Dikgosi wa Bobedi

18 Mo ngwageng wa boraro wa ga Hoshea+ morwa Ela kgosi ya Iseraele, Hesekia+ morwa Kgosi Ahase+ wa Juda o ne a nna kgosi. 2 O ne a na le dingwaga di le 25 fa a nna kgosi, mme o ne a busa dingwaga di le 29 mo Jerusalema. Leina la ga mmaagwe e ne e le Abi* morwadia Sekarea.+ 3 O ne a nna a dira se se siameng mo matlhong a ga Jehofa,+ fela jaaka Dafide rraagwemogolo a ne a dirile.+ 4 Ke ene yo o neng a tlosa mafelo a a kwa godimo a a boitshepo,+ a thubaganya dipilara tse di boitshepo a bo a rema kota e e boitshepo.*+ Gape o ne a thubaganya noga ya kopore e Moshe a neng a e dirile;+ ka gonne go tla go fitlha ka nako eo batho ba Iseraele ba ne ba ntse ba e ntshetsa ditlhabelo, mme e ne e tle e bidiwe modingwana wa noga ya kopore.* 5 O ne a ikanya Jehofa,+ Modimo wa Iseraele; go ne go se na ope yo o tshwanang le ene mo dikgosing tsotlhe tsa Juda tse di nnileng teng morago ga gagwe kgotsa pele ga gagwe. 6 O ne a ngaparela Jehofa.+ Ga a ka a fapoga a tlogela go mo sala morago; o ne a tswelela a boloka ditaelo tse Jehofa a neng a di neile Moshe. 7 Mme Jehofa o ne a na le ene. Gongwe le gongwe kwa a neng a ya teng, o ne a dira ka botlhale. O ne a tlhanogela kgosi ya Asiria mme a gana go e direla.+ 8 Gape o ne a fenya Bafilisitia+ go ya go fitlha kwa Gasa le dikarolo tsa yone, go simologa kwa toreng ya go lebelela go ya go fitlha kwa motseng o o sireletsegileng.*

9 Mo ngwageng wa bonê wa ga Kgosi Hesekia, e leng ngwaga wa bosupa wa ga Hoshea+ morwa Ela kgosi ya Iseraele, Kgosi Shalemanesere wa Asiria o ne a tlhasela Samarea mme a simolola go kampa go e dikologa.+ 10 Ba ne ba e gapa+ kwa bokhutlong jwa dingwaga di le tharo; mo ngwageng wa borataro wa ga Hesekia, o e neng e le ngwaga wa borobongwe wa ga Kgosi Hoshea wa Iseraele, Samarea e ne ya gapiwa. 11 Go tswa foo, kgosi ya Asiria e ne ya isa Baiseraele botshwarwa+ kwa Asiria mme ya ba baya kwa Hala le kwa Habore kwa nokeng ya Gosane le mo metseng ya Bameda.+ 12 Seno se ne sa direga ka gonne ba ne ba sa reetsa lentswe la ga Jehofa, Modimo wa bone, mme ba ne ba nna ba tlola kgolagano ya gagwe, e leng sotlhe se Moshe motlhanka wa ga Jehofa a neng a se laetse.+ Ga ba a ka ba reetsa e bile ga ba a ka ba ikoba.

13 Mo ngwageng wa bo14 wa ga Kgosi Hesekia, Senakeribe kgosi ya Asiria+ o ne a tlhasela metse yotlhe ya Juda e e sireletsegileng a bo a e gapa.+ 14 Ka jalo, Kgosi Hesekia wa Juda o ne a romela molaetsa ono kwa kgosing ya Asiria kwa Lakishe: “Ke dirile phoso. O se ka wa ntlhasela, mme ke tla go naya sepe fela se o tla se batlang mo go nna.” Kgosi ya Asiria e ne ya duedisa Kgosi Hesekia wa Juda ditalenta* tsa selefera di le 300 le ditalenta tsa gauta di le 30. 15 Ka jalo, Hesekia o ne a ntsha selefera yotlhe e e neng e le mo ntlong ya ga Jehofa le mo mabolokelamatlotlong a ntlo ya kgosi.*+ 16 Ka nako eo, Hesekia o ne a ntsha* mabati a tempele+ ya ga Jehofa le diforeimi tse ene Kgosi Hesekia wa Juda a neng a di manegile,*+ mme o ne a di naya kgosi ya Asiria.

17 Go tswa foo, kgosi ya Asiria e ne ya roma Taretane,* Rabesarise* le Rabeshake* ba na le mophato o mogolo wa masole ba tswa kwa Lakishe+ gore ba ye kwa go Kgosi Hesekia kwa Jerusalema.+ Ba ne ba ya kwa Jerusalema ba bo ba ema fa moseleng o o tswang mo mogobeng o o kwa godimo, o o mo tseleng e kgolo e e yang kwa tshimong ya motlhatswi wa matsela.+ 18 E rile ba bitsa kgosi gore e tle kwa go bone, Eliakime+ morwa Hilekia, yo o neng a okametse ntlo ya kgosi,* Shebenahe+ mokwaledi le Joa morwa Asafe mokwadi wa ditiragalo, ba ne ba ya kwa go bone.

19 Ka jalo, Rabeshake o ne a ba raya a re: “Tsweetswee, rayang Hesekia lo re, ‘Seno ke se kgosi e kgolo, kgosi ya Asiria, e se buang: “Tota o ikantse eng?+ 20 Wena o a re, ‘Ke na le leano le maatla a go tlhabana,’ mme ao ke mafoko a a se nang mosola. O ikantse mang, go bo o ntlhanogela?+ 21 O ikantse go tshegediwa ke lotlhaka lono lo lo obegileng, e bong Egepeto,+ lo fa motho a ikaega ka lone, lo tla tsenang mo seatleng sa gagwe lo bo lo mo tlhaba. Eo ke yone tsela e Faro kgosi ya Egepeto a ntseng ka yone mo go botlhe ba ba mo ikanyang. 22 Mme fa lo ka nthaya lwa re, ‘Re ikantse Jehofa, Modimo wa rona,’+ a ga se ene yo Hesekia a tlositseng mafelo a gagwe a a kwa godimo a a boitshepo le dibeso tsa gagwe,+ a ntse a raya Juda le Jerusalema a re, ‘Lo tshwanetse go ikoba fa pele ga sebeso seno kwa Jerusalema’?”’+ 23 Jaanong, tsweetswee dira tumalano eno le morena wa me kgosi ya Asiria: Ke tla go naya dipitse di le 2 000 fa e le gore o tla bona bapalami ba ba lekaneng ba ba ka di palamang.+ 24 O ka kgona jang go fenya tota le mmusi a le mongwe yo mmotlana mo batlhankeng ba morena wa me, fa e le gore o ikantse Egepeto ka ntlha ya dikara le ka ntlha ya masole a a tsamayang ka dipitse? 25 A o akanya gore ke tlile go tlhasela lefatshe leno gore ke le senye kwantle ga taelo e e tswang kwa go Jehofa? Jehofa ke ene a ntheileng a re, ‘Tsamaya o ye go tlhasela lefatshe leo mme o le senye.’”

26 Foo Eliakime morwa Hilekia le Shebenahe+ le Joa ba ne ba raya Rabeshake+ ba re: “Tsweetswee, bua le batlhanka ba gago ka puo ya Searamaika,*+ ka gonne re a se tlhaloganya; o se ka wa bua le rona ka puo ya Bajuda batho ba ba mo loboteng ba reeditse.”+ 27 Le fa go ntse jalo, Rabeshake a ba raya a re: “A o akanya gore morena wa me o nthomile fela kwa moreneng wa gago le kwa go wena gore ke bue mafoko ano? O nthomile le kwa banneng ba ba ntseng mo loboteng, ba ba tla jang mantle a bone ba bo ba nwa motlhapo* wa bone mmogo le lona.”

28 Go tswa foo, Rabeshake o ne a ema mme a tlhaeletsa ka lentswe le le kwa godimo ka puo ya Bajuda a re: “Utlwang lefoko la kgosi e kgolo, kgosi ya Asiria.+ 29 Seno ke se kgosi e se buang, ‘Lo se ka lwa letla Hesekia a lo tsietsa, ka gonne a ka se kgone go lo golola mo seatleng sa me.+ 30 Gape lo se ka lwa letla Hesekia a dira gore lo ikanye Jehofa ka go bua a re: “Ruri Jehofa o tla re golola, mme motse ono ga o kitla o tsenngwa mo seatleng sa kgosi ya Asiria.”+ 31 Lo se ka lwa reetsa Hesekia, ka gonne seno ke se kgosi ya Asiria e se buang: “Dirang kagiso le nna mme lo ineele,* mme mongwe le mongwe wa lona o tla ja mo setlhareng sa gagwe sa morara* le mo setlhareng sa gagwe sa mofeige e bile o tla nwa metsi a khuti ya gagwe ya go bolokela metsi,* 32 go fitlha ke tla ke bo ke lo isa kwa lefatsheng le le tshwanang le lefatshe la lona,+ lefatshe la dijo tsa ditlhaka le beine e ntšha, lefatshe la senkgwe le masimo a morara, lefatshe la ditlhare tsa motlhware le tswina ya dinotshe. Foo lo tla tshela mme ga lo kitla lo swa. Lo se ka lwa reetsa Hesekia, ka gonne o a lo tsietsa ka go lo raya a re, ‘Jehofa o tla re golola.’ 33 A go na le medimo epe ya ditšhaba e e kileng ya golola lefatshe la yone mo seatleng sa kgosi ya Asiria? 34 E kae medimo ya Hamathe+ le Arepade? E kae medimo ya Sefarefaime,+ Hena le Ifaha? A e kgonne go golola Samarea mo seatleng sa me?+ 35 Ke modimo ofe mo medimong yotlhe ya mafatshe o o golotseng lefatshe la one mo seatleng sa me, mo Jehofa a ka gololang Jerusalema mo seatleng sa me?”’”+

36 Le fa go ntse jalo, batho ba ne ba didimala mme ba se ka ba mo araba, ka gonne kgosi e ne e laetse jaana: “Lo se ka lwa mo araba.”+ 37 Mme Eliakime morwa Hilekia, yo o neng a okametse ntlo ya kgosi,* le Shebenahe mokwaledi le Joa morwa Asafe mokwadi wa ditiragalo, ba ne ba boela kwa go Hesekia ba gagogantse diaparo tsa bone mme ba mmolelela mafoko a ga Rabeshake.