Efangele ya ga Mareko

2 Le fa go ntse jalo, morago ga malatsinyana o ne a ya gape kwa Kaperenama, mme batho ba le bantsi ba ne ba utlwa gore o kwa gae.+ 2 Ka jalo, bontsi jwa batho bo ne jwa phuthegela kwa go ene, mme go ne go sa tlhole go na le mo ba ka emang teng, tota le mo kgorong, mme o ne a simolola go ba bolelela lefoko la Modimo.+ 3 Mme ba ne ba mo tlisetsa motho yo o sa kgoneng go tsamaya, a kukilwe ke banna ba le banê.+ 4 Le fa go ntse jalo, ba ne ba sa kgone go mo tsenya mo teng kwa go Jesu ka gonne batho ba ne ba le bantsi thata, ka jalo ba ne ba bula phatlha mo marulelong ba bo ba folosetsa bolao jo motho yo o sa kgoneng go tsamaya a neng a robetse mo go jone. 5 Fa Jesu a bona gore ba na le tumelo,+ o ne a raya motho yoo yo o sa kgoneng go tsamaya a re: “Ngwanaka, o itshwaretswe maleo a gago.”+ 6 Jaanong go ne go na le bakwadi bangwe mme ba ne ba ntse foo ba akanya ka seno:+ 7 “Ke ka ntlha yang fa monna yono a bua jaana? O a tlhapatsa. Ga go na ope yo o ka itshwarelang batho maleo, ke Modimo fela.”+ 8 Mme ka bonako fela Jesu o ne a lemoga* gore ba ne ba akanya ka eng a bo a ba raya a re: “Ke ka ntlha yang fa lo akanya dilo tseno?+ 9 Ke eng se se motlhofo, a ke go raya motho yono yo o sa kgoneng go tsamaya o re, ‘O itshwaretswe maleo a gago,’ kgotsa go mo raya o re, ‘Ema o tseye bolao jwa gago mme o tsamaye’? 10 E le gore lo itse gore Morwa motho+ o na le taolo ya go itshwarela batho maleo mo lefatsheng . . .”+ Jaanong o ne a raya motho yo o sa kgoneng go tsamaya a re: 11 “Ema, tsaya bolao jwa gago, mme o ye gae.” 12 Mme o ne a ema, a tsaya bolao jwa gagwe ka bonako a bo a tswa fa pele ga bone botlhe a tsamaya. Batho botlhe ba ile ba gakgamala fela thata, mme ba galaletsa Modimo ba re: “Ga re ise re ke re bone selo se se ntseng jaana.”+

13 O ne a tswa a ya kwa lewatleng gape, mme batho ba bantsintsi ba nna ba ya kwa go ene a bo a simolola go ba ruta. 14 Fa a le mo tseleng, o ne a bona Lefi morwa Alefaeo a ntse fa ofising ya lekgetho a bo a mo raya a re: “Nna molatedi wa me.” Ka yone nako eo, o ne a ema a bo a mo sala morago.+ 15 Moragonyana Jesu o ne a ja* mo ntlong ya ga Lefi, mme bakgethisi ba le bantsi le baleofi ba ne ba ja* le Jesu le barutwa ba gagwe, ka gonne bontsi jwa bone ba ne ba mo sala morago.+ 16 Mme fa bakwadi ba Bafarasai ba bona gore o ne a ja le baleofi le bakgethisi, ba ne ba raya barutwa ba gagwe ba re: “Ke ka ntlha yang fa a ja le bakgethisi le baleofi?” 17 Fa Jesu a utlwa seno o ne a ba raya a re: “Batho ba ba tsogileng sentle ga ba tlhoke ngaka, mme ba ba lwalang ba a e tlhoka. Ke tletse go bitsa baleofi, e seng batho ba ba siameng.”+

18 Jaanong barutwa ba ga Johane le Bafarasai ba ne ba tlwaetse go itima dijo. Ka jalo, ba ne ba tla mme ba mo raya ba re: “Ke ka ntlha yang fa barutwa ba ga Johane le barutwa ba Bafarasai ba itima dijo, mme barutwa ba gago bone ba sa dire jalo?”+ 19 Jesu o ne a ba raya a re: “Ditsala tsa monyadi+ ga di na lebaka la go itima dijo fa monyadi a sa ntse a na le tsone, gakere? Fa di sa ntse di na le monyadi, ga di ka ke tsa itima dijo. 20 Le fa go ntse jalo, nako e tla tla ya gore monyadi a tlosiwe mo go tsone,+ mme ka nako eo ke gone di tla itimang dijo. 21 Ga go na ope yo o rokelelang letsela le lesha mo seaparong se se onetseng. Fa a ka dira jalo, letsela le lesha le tla gagola le le onetseng, mme fa go neng go gagogile teng go tla nna maswe le go feta.+ 22 Gape, ga go na ope yo o tshelang beine e ntšha mo medutwaneng* ya beine e megologolo. Fa a ka dira jalo, beine e tla phunya medutwana eo, mme beine le medutwana di bo di senyega tsotlhe. Go na le moo, beine e ntšha e tshelwa mo medutwaneng ya beine e mesha.”

23 Jaanong ka letsatsi la Sabata fa a ntse a feta mo masimong a dijo tsa ditlhaka, barutwa ba gagwe ba ne ba tshwarwa ke tlala mme ba simolola go kgetla dimela dingwe tse di jetsweng foo ba bo ba di ja.+ 24 Ka jalo Bafarasai ba ne ba mo raya ba re: “Ke ka ntlha yang fa ba dira se batho ba sa letlelelwang go se dira ka Sabata?” 25 Mme o ne a ba raya a re: “A ga lo ise lo ke lo bale se Dafide a neng a se dira fa a ne a feletswe ke dijo mme ene le banna ba ba neng ba na le ene ba ne ba tshwerwe ke tlala?+ 26 Mo pegong e e buang ka ga Abiathare+ moperesiti yo mogolo, Dafide o ne a tsena mo ntlong ya Modimo mme a ja dinkgwe tse di neelwang Modimo,* a bo a naya le banna ba ba neng ba na le ene tse dingwe. Di ne di tshwanetse go jewa fela ke baperesiti+ mme batho ba bangwe bone ba ne ba sa letlelelwa go di ja.” 27 Go tswa foo o ne a ba raya a re: “Modimo o ne a dira Sabata gore e thuse batho,+ mme o ne a sa bopela batho gore ba ikobele Sabata. 28 Ka jalo, Morwa motho ke Morena wa Sabata.”+