Kgaolo 27

Go Bidiwa ga ga Mathaio

KA BOKHUTSHWANE fela morago ga a sena go fodisa motho yo o suleng ditokololo, Jesu o tloga mo Kaperenama a ya kwa Lewatleng la Galilea. Matshwititshwiti a batho a tla kwa go ene gape koo, mme o simolola go ba ruta. Fa a ntse a tsamaya, o bona Mathaio, yoo gape a bidiwang Lefi, a dutse fa ofising ya lekgetho. “Ntshala moragō,” Jesu o mo laletsa jalo.

E ka nna ya bo e le gore, Mathaio o setse a itse kaga dithuto tsa ga Jesu, fela jaaka go ne go ntse jalo ka Petere, Anderea, Jakobe, le Johane fa ba ne ba bidiwa. Mme jaaka bone, Mathaio o arabela taletso eo ka bonako. O a nanoga, a tlogela maikarabelo a gagwe jaaka mokgethisi, a bo a sala Jesu morago.

Moragonyana ga moo, gongwe e le go keteka go amogela pitso ga gagwe, Mathaio o dira moletlo o mogolo mo ntlong ya gagwe. Kwantle ga ga Jesu le barutwa ba Gagwe, ditsala tsa pele tsa ga Mathaio di gone. Banna bano ka kakaretso ba lebelwa kwa tlase ke Bajudakabone ka gonne ba tseela babusi ba ba tlhoilweng ba Baroma makgetho. Go feta moo, gantsi ba tsaya madi a a oketsegileng ka boferefere mo bathong ao a fetang madi a a tlwaelegileng a lekgetho.

Fa Bafarasai ba bona Jesu kwa moletlong ono a na le batho ba ba ntseng jalo, ba botsa barutwa ba gagwe ka go re: “Kana moruti oa lona o yèlañ le bakgethisi le baleohi?” Fa a utlwa potso eo, Jesu o araba Bafarasai ka go re: “Ba ba itekanetseñ ga ba dihe ñaka sepè, ha e se ba ba lwalañ hèla. Me tsamaeañ lo ithutè, go re, lea reñ, lehoko ye, Ke eletsa boutlwèlō botlhoko, e señ setlhabèlō: gonne ga kea tla go bitsa basiami, ha e se baleohi hèla.”

Go bonala Mathaio a laleleditse bakgethisi bano mo legaeng la gagwe gore ba ke ba reetse Jesu mme ba bone phodiso ya semoya. Jalo Jesu o kopanela le bone go ba thusa gore ba bone kamano e e molemo le Modimo. Jesu ga a lebele batho ba ba ntseng jalo kwa tlase, jaaka go dira Bafarasai bao ba ithayang ba re ba siame. Go na le moo, a tlhotlhelediwa ke kutlwelobotlhoko, tota, o direla jaaka ngaka ya semoya mo go bone.

Ka gone fa Jesu a bontsha kutlwelobotlhoko mo baleofing ga se gore o mpampetsa maleo a bone mme o ne a bontsha maikutlo a a ntseng jalo a bonolo go bao ba neng ba lwala mo mmeleng. Ka sekai, gakologelwa gore fa a ne a otlolola letsogo ka kutlwelobotlhoko le go ama molepero, o ne a re: “Kea rata, u ntlahalè.” Ekete le rona re ka bontsha kutlwelobotlhoko ka tsela e e tshwanang le eo go thusa batho bao ba tlhokang, segolobogolo ka go ba thusa ka tsela ya semoya. Mathaio 8:3; 9:9-13; Mareko 2:13-17; Luke 5:27-32.

▪ Jesu o kwa kae fa a bonwa ke Mathaio?

▪ Tiro ya ga Mathaio ke eng, mme ke ka ntlhayang fa batho ba ba ntseng jalo ba lebelwa kwa tlase ke Bajuda ba bangwe?

▪ Ke eng se se ngongoregelwang ka Jesu, mme o arabela jang?

▪ Ke ka ntlhayang fa Jesu a kopanela le baleofi?