Daniele

12 “Mo nakong eo Mikaele*+ o tla ema,* kgosana e kgolo+ e e emelang batho ba gaeno.* Mme go tla nna le nako ya matshwenyego e e iseng e tsamaye e nne teng fa e sa le go nna le setšhaba go fitlha ka nako eo. Mme mo nakong eo batho ba gaeno ba tla falola,+ mongwe le mongwe yo o fitlhelwang a kwadilwe mo bukeng.+ 2 Mme ba le bantsi mo go ba ba robetseng mo loroleng lwa lefatshe ba tla tsoga, bangwe ba tla tsogela gore ba tshelele ruri mme ba bangwe ba tla tsogela gore ba kgobiwe le gore ba tlhabisiwe ditlhong ka bosakhutleng.

3 “Ba ba nang le temogo ba tla phatsima thata jaaka loapi go le motshegare, e bile ba ba thusang ba le bantsi go dira se se siameng ba tla phatsima jaaka dinaledi ka bosakhutleng le go ya go ile.

4 “Mme wena Daniele, boloka mafoko ano e le sephiri o bo o tswale* buka eno go fitlha kwa motlheng wa bokhutlo.+ Ba le bantsi ba tla ya kwa le kwa,* mme kitso ya boammaaruri e tla nna ntsi.”+

5 Foo nna Daniele, ke ne ka leba mme ka bona ba bangwe ba babedi ba eme foo, yo mongwe a eme mo lotshitshing lono lwa molatswana mme yo mongwe a eme mo go lo longwe.+ 6 Yo mongwe o ne a raya monna yo o neng a apere diaparo tsa letsela le le boleta,+ yo o neng a le mo godimo ga metsi a molatswana a re: “Go tla tsaya lobaka lo lo kae gore dilo tseno tse di gakgamatsang di fele?” 7 Foo monna yo o apereng diaparo tsa letsela le le boleta, yo o neng a le mo godimo ga metsi a molatswana, o ne a tsholeletsa seatla sa gagwe sa moja le seatla sa gagwe sa molema kwa magodimong, mme ke ne ka mo utlwa a ikana ka Ene yo o tshelang ka bosakhutleng+ a re: “Go tla tsaya motlha o o tlhomilweng le metlha e e tlhomilweng le halofo ya motlha.* Fela fa go thubaganngwa ga maatla a batho ba ba boitshepo go sena go khutla,+ dilo tseno tsotlhe di tla fela.”

8 Mme nna ke ne ka utlwa, le fa go ntse jalo ke ne ke sa tlhaloganye;+ ka jalo ke ne ka re: “Ao tlhe morena wa me, dilo tseno di tla felela ka eng?”

9 Go tswa foo, o ne a nthaya a re: “Tsamaya Daniele, ka gonne mafoko ano a tshwanetse go bolokwa e le sephiri e bile a tshwanetse go tswalelwa go fitlha mo motlheng wa bokhutlo.+ 10 Batho ba le bantsi ba tla iphepafatsa ba bo ba itshweufatsa mme ba tla itshekisiwa.+ Mme batho ba ba bosula ba tla dira dilo tse di bosula e bile ga go na bape ba bone ba ba tla tlhaloganyang mafoko ano; mme ba ba nang le temogo ba tla a tlhaloganya.+

11 “Mme go simolola ka nako e setlhabelo se se ntshiwang ka metlha*+ se tla bong se tlositswe ka yone le ka nako e go tla bong go tlhomilwe selo se se ferosang sebete se se bakang tshenyo,+ e tla nna malatsi a le 1 290.

12 “Go itumela yo o nnang a itshokile* go fitlha malatsi a le 1 335 a wela!

13 “Mme wena, itshoke go fitlha kwa bokhutlong. O tla ikhutsa, le fa go ntse jalo o tla ema gore o amogele kabelo ya gago* kwa bokhutlong jwa malatsi.”+