“Boammaaruri bo Tla lo Golola”—Jang?

BATHO ba le bantsi ba akanya gore ba gololesegile mme tota go sa nna jalo. Ka sekai, batho ba le bantsi ke makgoba a tumelobotlhodi. Ba bangwe ba boifa baswi mme ba ka leka go ba reba bogale ka go ba direla dilo tse di jang madi a mantsi. Mme e re ka ba bangwe ba sa tlhomamisega gore go diragalang fa motho a swa, ba boifa loso ka tsela e e feteletseng. A batho bano ba ka gololwa mo dilong tseno tse di ba imelang mo megopolong, mo maikutlong e bile di ba jela madi a mantsi? Ee! Fela jaaka mafoko a ga Jesu Keresete a a nopotsweng fa godimo a bontsha, tsela e le nngwe fela ya go bona kgololesego ke boammaaruri. Mme ke boammaaruri bofe? A ke boammaaruri ka kakaretso kgotsa ke boammaaruri jo bo rileng?

Jesu o ne a re naya karabo e e utlwalang sentle. O ne a re: “Fa lo nnela ruri mo lefokong la me, . . . lo tla itse boammaaruri, mme boammaaruri bo tla lo golola.” (Johane 8:31, 32) ‘Lefoko’ la ga Jesu, ke gore dithuto tsa gagwe, di ka bonwa mo Baebeleng.

Fa Jesu a ne a re “boammaaruri bo tla lo golola” o ne a bua segolobogolo ka go gololwa mo boleong le mo losong. Le fa go ntse jalo, go itse boammaaruri ka Lefoko la Modimo gape go re golola mo dilong tse di jaaka tumelobotlhodi, go boifa baswi le go boifa go swa ka tsela e e feteletseng. Jang?

1. Go gololwa mo tumelobotlhoding. Batho ba le bantsi ba dumela gore dilo dingwe kgotsa dinomoro dingwe di tla ba tlisetsa bomadimabe. Ba bangwe ga ba dire ditshwetso tsa botlhokwa fa ba ise ba bone letshwao la gore dilo di tla ba tsamaela sentle kgotsa fa ba ise ba botse mongwe yo o bolelelang dilo pele ka go leba dinaledi kgotsa yo o buisanang le meya.

Kafa boammaaruri jwa Baebele bo gololang ka teng: Mo metlheng ya ditiragalo tsa Baebele, bangwe ba batho ba Modimo ba ne ba simolola go dumela mo tumelobotlhoding go ya bokgakaleng jwa gore ba obamele “modimo wa Masego” le “modimo wa Bokamoso”! Jehofa Modimo o ne a ikutlwa jang ka seno? O ne a re: “Lo ne lwa nna lwa dira se se bosula mo matlhong a me.” (Isaia 65:11, 12) Modimo o ne a ikutlwa ka tsela e e tshwanang le ka batho ba ba ikgolaganyang le batho ba ba buisanang le meya gore ba ba kaele mo botshelong: “Ope yo o lopang kgakololo mo go yo o buang le meya . . . o makgapha mo go Jehofa.”—Duteronome 18:11, 12.

Tumelobotlhodi le batho ba ba buisanang le meya ba kotsi ka gonne ke “maano a boferefere a ga Diabolo,” yo Jesu a neng a mmitsa “ramaaka.” (Baefeso 6:11; Johane 8:44) Fa o ne o batla kaelo ka kgang nngwe ya botlhokwa, a o ne o tla botsa moaki? Ruri o ne o ka se dire jalo! Ka jalo, o tla bo o le botlhale fa o ka tila sepe fela se se amanang le “ramaaka.”

Sengwe se se ka re thusang go dira ditshwetso tse di siameng mo botshelong ke botlhale jo bo theilweng mo kitsong e e boammaaruri ya melaometheo ya Baebele le mo boikaelelong jwa Modimo ka batho. Diane 2:6 ya re: “Jehofa o naya botlhale; mo molomong wa gagwe go na le kitso le temogo.”

2. Go gololwa mo go boifeng baswi. Batho ba le bantsi ba dumela gore “meya” ya bagologolwane ba ba tlhokafetseng e ka tlhotlheletsa batho ba ba tshelang. Ba akanya gore “meya” eno e tshwanetse go rejwa bogale ka go direlwa ditlhabelo tse di farologaneng gore e se ka ya galefa. Ka ntlha ya seo batho ba le bantsi ba tsena mo dikolotong tse dintsi e le gore ba duelele ditlhabelo le meletlo e e jang madi a mantsi.

Kafa boammaaruri jwa Baebele bo gololang ka teng: Baebele e re bolelela boammaaruri ka boemo jwa baswi. Ka sekai, Jesu o ne a re baswi ba “mo borokong.” (Johane 11:11, 14) O ne a kaya eng? Karabo e mo go Moreri 9:5: “Batshedi ba a itse gore ba tla swa; mme fa e le baswi bone, ga ba itse sepe gotlhelele.” Ee, go ntse jaaka e kete baswi ba robetse boroko jo bogolo, ga ba itse sepe gotlhelele. E bile tota ga ba tlhole ba le teng, ka jalo ba ka se kgone go re direla molemo le fa e le go re ntsha kotsi.

Le fa go ntse jalo, batho bangwe ba re ba kile ba buisana le baswi. Seno se ka direga jang? Le fano gape Baebele e na le karabo. E re bolelela gore mo tshimologong ya hisitori ya batho, baengele bangwe ba ne ba tsuologela Modimo. (2 Petere 2:4) Meya eno e e boikepo e e bidiwang madimona e leka go tsietsa batho. (1 Timotheo 4:1) Tsela nngwe e ba dirang seno ka yone ke ka go itira e kete ke batho ba ba suleng, ka go dira jalo ba anamisa maaka a gore baswi ba a tshela ba le mo sebopegong se sengwe kgotsa ba le mo lefelong le lengwe.

3. Go gololwa mo go boifeng loso ka tsela e e feteletseng. Ruri loso ke mmaba fela jaaka Baebele e bolela. (1 Bakorintha 15:26) Ka jalo, go a utlwala go bo re boifa loso e bile re sa batle go swa. Le fa go ntse jalo, ga re a tshwanela go boifa loso ka tsela e e feteletseng.

Kafa boammaaruri jwa Baebele bo gololang ka teng: Kwantle ga gore Baebele e bolela boammaaruri ka boemo jwa baswi, gape e bontsha gore Modimo o ikaeletse go dira gore baswi ba tshele gape ka go ba tsosa. Jesu o ne a re: “Nako e etla e mo go yone botlhe ba ba mo mabitleng a kgakologelo ba tla utlwang lentswe la gagwe [Keresete] ka yone mme ba tla tswa.”—Johane 5:28, 29; Ditiro 24:15.

Ba tla “tswa” ba le mo sebopegong sefe? Jesu o ne a senola karabo ya potso eno fa a ne a tsosa batho ba le mmalwa mo baswing. Mo lekgetlhong lengwe le lengwe, fa motho a ne a tsosiwa o ne a boa ka mmele wa motho—a ntse fela jaaka a ne a ntse pele. (Mareko 5:35-42; Luke 7:11-17; Johane 11:43, 44) Ntlha eno e tsamaisana le lefoko la Segerika le le ranolwang go twe “tsogo,” le le kayang “go ema.” Fa Modimo a ne a bua le motlhanka wa gagwe yo o godileng e bong Daniele, o ne a re: “O tla ikhutsa [kgotsa o robale mo losong], mme o tla emela kabelo ya gago ka dinao kwa bokhutlong jwa metlha.” (Daniele 12:13) Ruri mafoko ao a tshwanetse a bo a ile a gomotsa Daniele, a dira gore a kgone go lebana le loso ka bopelokgale le seriti!

Lengwe la mabaka a go bo Jesu a ile a romelwa mo lefatsheng e ne e le “go rerela batshwarwa kgololo”—batho ba ba mo botshwarong jwa dithuto tsa maaka. (Luke 4:18) E re ka dithuto tsa gagwe di kwadilwe mo Baebeleng, di ntse di golola batho letsatsi le letsatsi. Re solofela ka bopeloephepa gore boammaaruri jwa Baebele bo tla go tlisetsa kgololesego e e nnelang ruri.

A O KILE WA IPOTSA GORE . . . 

Boammaaruri jwa Baebele bo re golola jang mo

● tumelobotlhoding?—Isaia 8:19, 20; 65:11, 12.

● go boifeng baswi?—Moreri 9:5; Johane 11:11, 14.

● go boifeng loso?—Johane 5:28, 29; Ditiro 24:15.

[Mafoko a a mo go tsebe 11]

Boammaaruri jwa Baebele bo golola batho mo tumelobotlhoding, mo go boifeng baswi le mo go boifeng go swa ka tsela e e feteletseng