Bakorintha wa Ntlha

3 Bakaulengwe, ke ne ke sa kgone go bua le lona jaaka nka bua le batho ba ba kaelwang ke moya wa Modimo,+ mme ke ne ke bua le lona jaaka batho ba ba laolwang ke dikeletso tsa bone, ke ne ke bua le lona jaaka masea+ mo go Keresete. 2 Ke ne ka lo fepa ka mashi, e seng ka dijo, ka gonne lo ne lo ise lo nonofe sentle. Tota e bile, ga lo ise lo nonofe sentle le gone jaanong,+ 3 ka gonne lo sa ntse lo laolwa ke dikeletso tsa lona.+ E re ka go na le lefufa le dikgogakgogano mo gare ga lona, a ga lo laolwe ke dikeletso tsa lona+ e bile a ga lo itshware ka tsela e batho ba bangwe ba itshwarang ka yone? 4 Gonne fa mongwe a re: “Nna ke wa ga Paulo,” mme yo mongwe ene a re: “Nna ke wa ga Apolose,”+ a ga lo dire fela jaaka batho fela ba ba mo lefatsheng ba dira?

5 Jaanong Apolose ke mang? Paulo ke mang? Re badiredi+ ba ba dirang tiro e Morena a re e neileng, ba gape ba lo thusitseng go nna badumedi. 6 Ke ne ka jala,+ Apolose ene a nosetsa,+ mme Modimo o ne a nna a godisa, 7 mo e leng gore ga go galalediwe yo o jalang kgotsa yo o nosetsang, mme go galalediwa Modimo yo o godisang.+ 8 Jaanong yo o jalang le yo o nosetsang ba dira tiro e e tshwanang, mme motho mongwe le mongwe o tla amogela maduo a gagwe go ya ka tiro ya gagwe ya bonatla.+ 9 Gonne re dira mmogo le Modimo. Lona lo tshimo ya Modimo e e lengwang, kago ya Modimo.+

10 Modimo o ne a nnaya bopelonomi jo bogolo,* ke gone ka moo ke neng ka thaya motheo ka gonne ke le moagi yo o setswerere.*+ Mme gone, motho yo mongwe o aga mo motheong oo. Ka jalo, mongwe le mongwe o tshwanetse go tlhokomela kafa a agang mo go one ka teng. 11 Gonne ga go na motho ope yo o ka thayang motheo ope o mongwe ntle le o o thailweng, e bong Jesu Keresete.+ 12 Jaanong fa mongwe a aga mo motheong a dirisa gauta, selefera, maje a a tlhwatlhwakgolo, logong, bojang kgotsa lotlhaka,* 13 tiro ya mongwe le mongwe e tla bonala sentle gore ke ya mofuta ofe ka letsatsi la teko. Molelo o tla dira gore e bonale gore ke tiro ya mofuta ofe.+ 14 Fa tiro ya mongwe e sa ntse e eme mo motheong oo, o tla amogela maduo; 15 mme fa tiro ya mongwe e jewa ka molelo, o tla latlhegelwa, mme ene o tla bolokwa. Le fa go ntse jalo, o tla tshwana le motho yo o falolang mo molelong.

16 A ga lo itse gore lo tempele ya Modimo,+ le gore moya wa Modimo o nna mo go lona?+ 17 Fa mongwe a senya tempele ya Modimo, Modimo o tla mo senya; gonne tempele ya Modimo e boitshepo, mme lona lo tempele eo.+

18 A ope a se ka a itsietsa: Fa mongwe mo go lona a akanya gore o botlhale mo lefatsheng leno,* a a nne seeleele, gore a tle a nne botlhale. 19 Gonne botlhale jwa lefatshe leno ke boeleele mo Modimong, gonne go kwadilwe jaana: “Modimo o dira gore batho ba ba botlhale ba wele mo seraing sa bone.”+ 20 Mme gape ga twe: “Jehofa* o a itse gore dikakanyo tsa batho ba ba botlhale ga di na mosola.”+ 21 Ka jalo, a ope a se ka a ikgantsha ka dilo tse batho ba di dirang; ka gonne dilo tsotlhe ke tsa lona, 22 e ka ne e le Paulo kgotsa Apolose kgotsa Kefase*+ kgotsa lefatshe kgotsa botshelo kgotsa loso kgotsa dilo tse jaanong di leng teng kgotsa dilo tse di tla tlang, dilo tsotlhe ke tsa lona; 23 mme lona lo ba ga Keresete;+ Keresete le ene, ke wa Modimo.