Efangele ya ga Luke

7 Fa a sena go bolelela batho dilo tseno, o ne a tsena kwa Kaperenama. 2 Jaanong modiredi mongwe wa masole o ne a na le motlhanka yo a neng a mo rata thata. Motlhanka yoo o ne a lwala thata e bile a tloga a swa.+ 3 Fa modiredi wa masole a utlwalela ka Jesu, o ne a roma baeteledipele bangwe ba Bajuda kwa go ene go mo kopa gore a tle go fodisa motlhanka wa gagwe. 4 Ba ne ba ya kwa go Jesu mme ba mo kopa ka tlhoafalo, ba re: “Tota o tshwanetse go mo thusa, 5 ka gonne o rata setšhaba sa rona e bile o ile a re agela sinagoge.” 6 Ka jalo, Jesu o ne a tsamaya le bone. Le fa go ntse jalo, fa a le gaufi le ntlo, modiredi wa masole o ne a roma ditsala tsa gagwe gore di mo reye di re: “Rra, o se ka wa itshwenya ka go tla mo ntlong ya me, ka gonne ga ke tshwanelege gore o ka tsena mo ntlong ya me.+ 7 Ke ka moo le nna ke neng ke bona ke sa tshwanelege go tla kwa go wena. Le fa go ntse jalo, bua lefoko, mme motlhanka wa me o tla fola. 8 Gonne le nna go na le motho yo o nkokametseng, mme le nna go na le masole a ke a okametseng, mme ke raya lesole leno ke re, ‘Tsamaya!’ le bo le tsamaya, e bile ke raya le lengwe ke re, ‘Tla kwano!’ le bo le tla, gape ke raya motlhanka wa me ke re, ‘Dira seno!’ a bo a se dira.” 9 Fa Jesu a utlwa dilo tseno, o ne a mo gakgamalela, mme o ne a leba batho ba bantsintsi ba ba mo setseng morago a bo a re: “Ke a lo bolelela, ga ke ise nke ke bone motho ope mo Iseraele yo o nang le tumelo e kgolo jaana.”+ 10 Mme fa ba ba neng ba romilwe ba boela kwa ntlong, ba ne ba fitlhela motlhanka yoo a fodile.+

11 Ka bonako fela morago ga seo, o ne a ya kwa motseng o o bidiwang Naina, mme barutwa ba gagwe le batho ba bantsintsi ba ne ba tsamaya le ene. 12 Fa a atamela kgoro ya motse, go ne go na le monna mongwe yo o suleng mme o ne a kukelwa kwa ntle, e ne e le ene fela ngwana* wa ga mmaagwe.+ Mo godimo ga moo, mmaagwe e ne e le motlholagadi. Gape batho ba bantsintsi ba ba tswang mo motseng ba ne ba na le ene. 13 Fa Morena a bona mosadi yoo, o ne a mo tlhomogela pelo,+ mme a mo raya a re: “Tlogela go lela.”+ 14 Foo o ne a atamela a bo a kgoma bolawana jwa go tshola setopo, mme ba ba neng ba mo kukile ba ne ba ema. Go tswa foo, Jesu o ne a re: “Lekawana, ke go raya ke re, tsoga!”+ 15 Monna yoo yo o suleng o ne a tsoga a bo a simolola go bua, mme Jesu o ne a mo naya mmaagwe.+ 16 Jaanong botlhe ba ne ba gakgamatse thata, mme ba simolola go galaletsa Modimo, ba re: “Modimo o tlhomile moporofeti yo mogolo mo go rona,”+ e bile, “o gakologetswe batho ba gagwe.”+ 17 Mme dikgang tseno tse di ka ga gagwe di ne tsa anamela mo Judea yotlhe le mo metseng yotlhe e e mo tikologong.

18 Jaanong barutwa ba ga Johane ba ne ba mmolelela dilo tseno tsotlhe.+ 19 Ka jalo, Johane o ne a bitsa barutwa ba gagwe ba le babedi mme a ba roma kwa go Morena gore ba mmotse ba re: “A ke wena Yo o Tlang,+ kgotsa a re tshwanetse go lebelela mongwe o sele?” 20 Fa banna bao ba fitlha kwa go ene ba ne ba re: “Johane Mokolobetsi o re romile kwa go wena gore re go botse go re, ‘A ke wena Yo o Tlang, kgotsa a re tshwanetse go lebelela mongwe o sele?’” 21 Mo nakong eo o ne a fodisa batho ba le bantsi ba ba tshwerweng ke malwetse a a farologaneng,+ a leleka madimona, e bile o ne a fodisa batho ba le bantsi ba ba foufetseng gore ba kgone go bona. 22 O ne a ba araba a re: “Tsamayang lo ye go bolelela Johane dilo tse lo di utlwileng le tse lo di boneng: Difofu jaanong di a bona,+ batho ba ba tlhotsang ba a tsamaya, balepero ba a fodisiwa, bosusu ba a utlwa,+ baswi ba a tsosiwa le bahumanegi ba bolelelwa dikgang tse di molemo.+ 23 Go itumela motho yo o se nang dipelaelo dipe ka nna.”+

24 Fa batho ba Johane a neng a ba romile ba sena go tsamaya, Jesu o ne a bua le boidiidi jwa batho ka Johane a re: “Lo ne lo ile go bona mang kwa nageng? A e ne e le motho yo o tshwanang le lotlhaka lo lo phepheulwang ke phefo?+ Nnyaa. 25 Tota lo ne lo ile go bona mang? Motho yo o apereng diaparo tse di boleta?*+ Nnyaa. Batho ba ba aparang diaparo tse dintle e bile ba nna mo manobonobong ba mo matlong a segosi. 26 Mme gone, tota lo ne lo ile go bona mang? Go bona Moporofeti? Ee, e ne e le moporofeti e bile o botlhokwa thata go feta moporofeti.+ 27 Yono ke ene yo go kwadilweng jaana ka ga gagwe: ‘Ke tla roma morongwa wa me kwa pele ga gago,* yo o tla baakanyang tsela kwa pele ga gago.’+ 28 Ke a lo bolelela, mo bathong, ga go na ope yo mogolo go feta Johane, le fa go ntse jalo, motho yo o nang le maemo a a kwa tlase mo Bogosing Jwa Modimo o mogolo go mo feta.”+ 29 (Fa batho botlhe le bakgethisi ba utlwa seno, ba ne ba bolela gore Modimo o siame, ka gonne ba ne ba kolobeditswe ka kolobetso ya ga Johane.+ 30 Mme Bafarasai le batho ba ba itseng Molao thata ba ne ba itlhokomolosa kgakololo* ya Modimo,+ ka gonne bone ba ne ba sa kolobediwa ke ene.)

31 “Ka jalo, ke tla tshwantsha batho ba kokomana eno le bomang, mme ba tshwana le bomang?+ 32 Ba tshwana le bana ba babotlana ba ba ntseng mo marekisetsong ba ba goang ba raana ba re: ‘Re ne ra lo leletsa fulutu, mme lo ne lwa se ka lwa bina; re ne ra lela, mme lo ne lwa se ka lwa lela.’ 33 Ka tsela e e tshwanang, Johane Mokolobetsi o ne a tla a sa je senkgwe e bile a sa nwe beine,+ le fa go ntse jalo lona lwa re: ‘O na le ledimona’ 34 Morwa motho o tlile a ja e bile a nwa, le fa go ntse jalo lona lwa re: ‘Bonang monna yo o jang bobe le yo o nwang beine thata, ke tsala ya bakgethisi le baleofi!’+ 35 Mme gone, dilo tse di siameng tse motho a di dirang, di bontsha gore o botlhale.”+

36 Jaanong Mofarasai mongwe o ne a nna a mo kopa gore a tle go ja le ene. Ka jalo, o ne a tsena mo ntlong ya Mofarasai yoo a bo a nna fa tafoleng gore a je.* 37 Mme mosadi mongwe yo o neng a itsiwe mo motseng e le moleofi o ne a utlwalela gore Jesu o ne a ja* kwa ntlong ya Mofarasai yoo, mme o ne a tla a tshotse lebotlolo la alabasetere la leokwane le le nkgang monate.+ 38 Fa a sena go nna fa morago ga gagwe fa dinaong, o ne a lela a bo a simolola go kolobetsa dinao tsa gagwe ka dikeledi, mme o ne a di phimola ka moriri wa gagwe. Gape, o ne a suna dinao tsa gagwe a bo a tshela leokwane le le nkgang monate mo go tsone. 39 Fa Mofarasai yo a neng a mo laleditse a bona seno o ne a ipolelela jaana: “Fa e le gore ruri monna yono e ne e le moporofeti, o ne a tla itse gore mosadi yo o mo kgomang yono ke mang le gore ke motho yo o ntseng jang. O ne a tla itse gore ke moleofi.”+ 40 Mme Jesu o ne a mo raya a re: “Simone, ke batla go go bolelela sengwe.” O ne a re: “Moruti, bua.”

41 “Banna ba babedi ba ne ba kolota mongwe yo o adimang batho madi; yo mongwe o ne a mo kolota didenario* di le 500, mme yo mongwe di le 50. 42 E re ka ba se na sepe se ba ka mo duelang ka sone, o ne a ba itshwarela ka pelo yotlhe. Ka jalo, ke ofe mo banneng bano yo o tla ratang motho yoo thata?” 43 Simone o ne a araba a re: “Ke tsaya gore ke monna yo o itshwaretsweng sekoloto se segolo.” O ne a mo raya a re: “O arabile sentle.” 44 Foo o ne a retologela kwa mosading yoo a bo a raya Simone a re: “A o bona mosadi yono? Ke ne ka tsena mo ntlong ya gago; ga o a ka wa nnaya metsi a go tlhapa dinao. Mme mosadi yono ene o ne a kolobetsa dinao tsa me ka dikeledi tsa gagwe a bo a di phimola ka moriri wa gagwe. 45 Ga o a ka wa ntshuna; mme mosadi yono ene, ga a ise a ke a tlogele go suna dinao tsa me fa e sa le ke goroga fano. 46 Ga o a ka wa tlotsa tlhogo ya me ka leokwane, mme mosadi yono ene o ne a tshela leokwane le le nkgang monate mo dinaong tsa me. 47 Ke a go bolelela, e re ka a dirile seno, o itshwaretswe maleo a gagwe le fa gone a le mantsi,*+ ka gonne o ratile thata. Mme yo o itshwaretsweng go le gonnye, o rata go le gonnye.” 48 Go tswa foo, o ne a raya mosadi yoo a re: “O itshwaretswe maleo a gago.”+ 49 Ba ba neng ba ntse le ene fa tafoleng ba ja, ba ne ba simolola go buisana ba re: “Tota monna yono ke mang yo o kgonang go itshwarela batho maleo?”+ 50 Mme o ne a raya mosadi yoo a re: “Tumelo ya gago e go bolokile;+ tsamaya ka kagiso.”