Ditiro Tsa Baaposetoloi

5 Mme monna mongwe yo o neng a bidiwa Ananiase, mmogo le mosadi wa gagwe e bong Safira, ba ne ba rekisa tshimo. 2 Le fa go ntse jalo, o ne a fitlha madi a mangwe, mosadi wa gagwe le ene o ne a itse ka gone, mme o ne a isa fela bontlhanngwe jwa madi ao kwa baaposetoloing.+ 3 Petere o ne a mo raya a re: “Ananiase, ke ka ntlha yang fa o letlile Satane gore a go tlhotlheletse go aketsa+ moya o o boitshepo+ le go fitlha madi a mangwe a tshimo? 4 Tshimo eo e ne e le ya gago gakere? Mme fa o sena go e rekisa, o ne o ka kgona go dirisa madi ao jaaka o batla. Ke ka ntlha yang fa o ile wa akanya ka selo se se ntseng jaana mo pelong ya gago? O akeditse Modimo, e seng batho.” 5 Fa Ananiase a utlwa mafoko ano, o ne a wela fa fatshe mme a swa. Mme batho botlhe ba ba neng ba utlwa seo, ba ne ba tshoga thata. 6 Foo makawana a ne a ema, a mo phuthela ka matsela a bo a mo kukela kwa ntle a ya go mo fitlha.

7 Jaanong morago ga lobaka lwa diura di ka nna tharo, mosadi wa gagwe o ne a tla, mme o ne a sa itse se se neng se diragetse. 8 Petere o ne a mo raya a re: “Mpolelele, a lo ne lwa rekisa tshimo ka bokana?” O ne a re: “Ee, ka bokalo.” 9 Ka jalo, Petere o ne a mo raya a re: “Ke ka ntlha yang fa lo ile lwa leka go tsietsa moya wa ga Jehofa?* Bona! Batho ba ba fitlhileng monna wa gago ba fa kgorong, mme le wena ba tla go kukela kwa ntle.” 10 Ka bonako fela o ne a wela fa fatshe fa dinaong tsa ga Petere mme a swa. Fa makawana a tsena, a ne a mo fitlhela a sule mme a mo kukela kwa ntle a ya go mo fitlha go bapa le monna wa gagwe. 11 Ka jalo, phuthego yotlhe le batho botlhe ba ba neng ba utlwa ka dilo tseno, ba ne ba tshoga thata.

12 Mo godimo ga moo, baaposetoloi ba ne ba tswelela ba dira ditshupo le dikgakgamatso di le dintsi fa pele ga batho;+ mme batho botlhe ba ne ba tlhola ba kopana mmogo mo Mathuding a ga Solomone.*+ 13 Ke boammaaruri gore go ne go se na ope yo mongwe yo o nang le bopelokgale jwa go ikopanya le bone; le fa go ntse jalo, batho ba ne ba ba tlotlomatsa. 14 Mo godimo ga moo, ba ba dumelang mo Moreneng ba ne ba tswelela ba oketsega, banna le basadi ba le bantsintsi.+ 15 Tota e bile, ba ne ba ntshetsa balwetse kwa ditseleng tse dikgolo ba bo ba ba latsa foo mo malawaneng le mo dimmêtshêng,* gore e tle e re fa Petere a feta, bogolo moriti wa gagwe o wele mo go mongwe wa bone.+ 16 Gape, batho ba le bantsintsi ba ba tswang kwa metseng e e dikologileng Jerusalema ba ne ba nna ba tla, ba kukile batho ba ba lwalang le ba ba tshwenngwang ke madimona,* mme ba ne ba fodisiwa botlhe.

17 Le fa go ntse jalo, moperesiti yo mogolo o ne a ema, mmogo le botlhe ba ba nang le ene, ba e neng e le ba lekoko la Basadukae, mme ba ne ba galefile. 18 Ba ne ba tshwara baaposetoloi ba bo ba ba tsenya mo kgolegelong ya motse.+ 19 Le fa go ntse jalo, moengele wa ga Jehofa* o ne a bula dikgoro tsa kgolegelo bosigo,+ a ba ntsha a bo a ba raya a re: 20 “Tsamayang, lo ye go ema mo tempeleng, mme lo tswelele lo bolelela batho dilo tsotlhe tse motho a tlhokang go di dira gore a bone botshelo jo bo sa khutleng.” 21 Fa ba sena go utlwa seno, ba ne ba tsena mo tempeleng fa letsatsi le tlhaba mme ba simolola go ruta.

Jaanong fa moperesiti yo mogolo le ba ba nang le ene ba goroga, ba ne ba phutha maloko otlhe a Sanehederine le setlhopha sotlhe sa baeteledipele ba bomorwa Iseraele, mme ba ne ba roma badisa kwa kgolegelong gore ba ye go tsaya baaposetoloi. 22 Mme fa badisa ba fitlha koo, ga ba a ka ba ba fitlhela mo kgolegelong. Ka jalo, ba ne ba boa mme ba ba begela 23 ba re: “Re fitlhetse kgolegelo e lotletswe thata, mme badisa ba ne ba eme fa dikgorong, le fa go ntse jalo, fa re bula, re ne ra fitlhela go se na ope mo teng.” 24 Fa molaodi wa tempele le baperesiti ba bagolo ba utlwa mafoko ao, ba ne ba gakgamala ba bo ba ipotsa gore tota go tla felela jang. 25 Le fa go ntse jalo, mongwe o ne a tla mme a ba raya a re: “Bonang! Banna ba lo neng lwa ba tsenya mo kgolegelong ba kwa tempeleng e bile ba ruta batho.” 26 Go tswa foo, molaodi le badiredi ba gagwe ba ne ba tsamaya ba ya go ba tsaya, mme e seng ka dikgoka ka gonne ba ne ba tshaba gore batho ba tla ba kgobotletsa ka maje.+

27 Ka jalo, ba ne ba tla le bone ba bo ba ba emisa fa pele ga Sanehederine. Mme moperesiti yo mogolo o ne a ba botsolotsa 28 morago ga moo a ba raya a re: “Re ne ra lo laela thata gore lo se ka lwa nnela go ruta ka leina leno,+ mme le fa go ntse jalo bonang fela! lo tladitse Jerusalema ka thuto ya lona, e bile lo batla gore re bonwe molato wa loso lwa monna yono.”+ 29 Petere le baaposetoloi ba bangwe ba ne ba araba ba re: “Re tshwanetse go ikobela Modimo e le mmusi go na le go ikobela batho.+ 30 Modimo wa borraaronamogolo o ne a tsosa Jesu, yo lo neng lwa mmolaya ka go mo pega mo koteng.*+ 31 Le fa go ntse jalo, Modimo o ne a mo tlhatlosa maemo gore a nne ka fa seatleng sa gagwe sa moja+ e le Moemedi yo Mogolo+ le Mmoloki,+ gore batho ba Iseraele ba tle ba ikwatlhaye mme ba itshwarelwe maleo.+ 32 Mme re basupi ba dikgang tseno,+ moya o o boitshepo le one ke mosupi,+ o Modimo a o neileng ba ba mo tsayang e le mmusi wa bone e bile ba mo ikobela.”

33 Fa ba utlwa seno, ba ne ba galefa* fela thata mme ba batla go ba bolaya. 34 Le fa go ntse jalo, Mofarasai mongwe yo o bidiwang Gamaliele+ o ne a ema fa pele ga Sanehederine; e ne e le morutisi wa Molao yo batho botlhe ba neng ba mo tseela kwa godimo, mme o ne a laela gore banna bao ba ntshediwe kwa ntle ka nakonyana. 35 Go tswa foo o ne a ba raya a re: “Banna ba Iseraele, elang tlhoko se lo ikaelelang go se dira ka banna bano. 36 Ka sekai, mo nakong e e fetileng Theudase o ne a tlhanoga, a re ene ka boene ke motho wa botlhokwa, mme banna ba ka nna 400 ba ne ba ikopanya le ene. Le fa go ntse jalo, o ne a bolawa, mme botlhe ba ba neng ba mo sala morago ba ne ba phatlalala mme maano a bone ga a ka a felela gope. 37 Morago ga gagwe, go ne ga tlhanoga Judase wa Mogalalea mo malatsing a go kwadisiwa, mme o ne a tlhotlheletsa batho gore ba mo sale morago. Monna yoo le ene o ne a nyelela, mme botlhe ba ba neng ba mo sala morago ba ne ba gasama. 38 Ka jalo, ka ntlha ya se se diregang gone jaanong, ke lo raya ke re, lo se ka lwa tshwenyana le banna bano, ba tlogeleng. Ka gonne fa leano leno kgotsa tiro eno e tswa mo bathong, e tla fela; 39 mme fa e tswa kwa Modimong, ga lo kitla lo kgona go ba fenya.+ Go seng jalo, lo ka nna lwa feleletsa lo lwantsha Modimo ka boene.”+ 40 Foo ba ne ba reetsa kgakololo ya gagwe, mme ba bitsa baaposetoloi, ba ba kgwathisa,*+ ba bo ba ba laela gore ba tlogele go bua ka leina la ga Jesu, mme ba ba tlogela ba tsamaya.

41 Ka jalo, ba ne ba tswa fa pele ga Sanehederine ba itumetse,+ ka gonne Modimo o ne a ba neile tshiamelo ya go bogisiwa ka ntlha ya leina la ga Jesu. 42 Mme letsatsi le letsatsi ba ne ba tswelela ba ruta mo tempeleng e bile ba tsamaya ka ntlo le ntlo+ ba sa kgaotse ba bolela dikgang tse di molemo ka Keresete, e bong Jesu.+