Efangele ya ga Mathaio

21 E rile ba le gaufi le Jerusalema, ba ne ba ema kwa Bethefage kwa Thabeng ya Lotlhware, mme Jesu o ne a roma barutwa ba babedi,+ 2 a ba raya a re: “Yang kwa motsaneng o lo o bonang ole, mme lo tla fitlhela tonki e golegilwe e na le tonkana ya yone. Lo di golole mme lo di tlise mo go nna. 3 Fa mongwe a lo raya sengwe, lo mo reye lo re, ‘Morena o a di tlhoka.’ Foo ka yone nako eo, o tla lo tlogela lo di tsaya.”

4 Tota seno se ne sa diragala e le go diragatsa se se neng sa buiwa ke moporofeti mongwe fa a ne a re: 5 “Bolelelang morwadia Siona lo re: ‘Kgosi ya gago e tla kwa go wena,+ e le bonolo+ e bile e palame tonki, e palame tonkana, ngwana wa tonki e namagadi.’”+

6 Ka jalo, barutwa ba ne ba tsamaya mme ba dira fela jaaka Jesu a ne a ba laetse.+ 7 Ba ne ba tlisa tonki le tonkana ya yone ba bo ba ala diaparo tsa bone mo go tsone, mme o ne a nna mo godimo ga tsone.+ 8 Bontsi jwa batho ba ne ba ala diaparo tsa bone mo tseleng,+ mme ba bangwe ba ne ba kgaola dikala tsa ditlhare ba bo ba di ala mo tseleng. 9 Mo godimo ga moo, batho ba bantsintsi ba ba neng ba tsamaya kwa pele ga gagwe le kwa morago ga gagwe ba ne ba nna ba goa ba re: “Boloka Morwa Dafide,+ re a rapela! A go bakwe yo o tlang ka leina la ga Jehofa!* Mmoloke,+ re a rapela, wena yo o kwa magodimong!”+

10 Mme e rile a tsena mo Jerusalema, batho botlhe mo motseng ba ne ba tsosa modumo o mogolo, ba re: “Yono ke mang?” 11 Batho ba ba neng ba na le ene ba nna ba re: “Ke moporofeti Jesu,+ yo o tswang kwa Nasaretha wa Galalea!”

12 Jesu o ne a tsena mo tempeleng a bo a leleka botlhe ba ba rekisang le ba ba rekang mo tempeleng, e bile o ne a pitikolola ditafole tsa baananyi ba madi* le ditulo tsa ba ba rekisang maphoi.+ 13 O ne a ba raya a re: “Go kwadilwe go twe, ‘Ntlo ya me e tla bidiwa ntlo ya thapelo,’+ mme lona lo e dira logaga lwa dinokwane.”+ 14 Gape, batho ba ba foufetseng le ba ba tlhotsang ba ne ba tla kwa go ene mo tempeleng, mme a ba fodisa.

15 Fa baperesiti ba bagolo le bakwadi ba bona dikgakgamatso tse a neng a di dira le basimane ba ba neng ba goa mo tempeleng ba re, “Boloka Morwa Dafide, re a rapela!”+ ba ne ba galefa+ 16 mme ba mo raya ba re: “A o utlwa se basimane bano ba se buang?” Jesu o ne a ba raya a re: “Ee. A ga lo ise lo ke lo bale fa go tweng, ‘O itliseditse pako ka mafoko a a tswang mo melomong ya bana le masea’?”+ 17 Go tswa foo, o ne a tswa mo motseng a ya kwa Bethani a bo a lala koo.+

18 Fa a boela kwa motseng phakela, o ne a tshwarwa ke tlala.+ 19 O ne a bona setlhare sa mofeige gaufi le tsela a bo a ya kwa go sone, mme o ne a fitlhela go se na sepe mo go sone fa e se matlhare fela,+ a bo a se raya a re: “A go se tlhole go tswa leungo lepe mo go wena.”+ Mme setlhare sa mofeige sa swaba ka ponyo ya leitlho. 20 Fa barutwa ba bona seno ba ne ba gakgamala mme ba re: “Go tla jang gore setlhare sa mofeige se swabe ka ponyo ya leitlho?”+ 21 Jesu o ne a ba araba a re: “Ammaaruri ke a lo bolelela, fa lo na le tumelo e bile lo sa belaele, ga lo kitla lo dira fela se ke se dirileng setlhare seno sa mofeige, mme le fa lo ka raya thaba eno lo re, ‘Tsholetsega mme o itigele mo lewatleng,’ go tla nna jalo.+ 22 Mme dilo tsotlhe tse lo di kopang fa lo rapela lo na le tumelo, lo tla di newa.”+

23 Fa a sena go tsena mo tempeleng, baperesiti ba bagolo le baeteledipele ba ne ba tla kwa go ene fa a ntse a ruta mme ba re: “A o na le tetla ya go dira dilo tseno? Mme ke mang yo o go romileng gore o di dire?”+ 24 Jesu o ne a ba raya a re: “Le nna ke tla lo botsa selo se le sengwe. Fa lo ka nkaraba, ke gone ke tla lo bolelelang gore ke tsaya kae tetla ya go dira dilo tseno: 25 Kolobetso ya ga Johane e ne e tswa kwa go mang? A e ne e tswa kwa Modimong* kgotsa mo bathong?” Ba ne ba simolola go buisana ba re: “Fa re ka re, ‘E ne e tswa kwa Modimong,’ o tla re raya a re, ‘Jaanong ke ka ntlha yang fa lo ne lo sa mo dumele?’+ 26 Mme fa re ka re, ‘E ne e tswa mo bathong,’ re tshaba gore batho ba tla galefa, ka gonne botlhe ba dumela gore Johane ke moporofeti.” 27 Ka jalo, ba ne ba araba Jesu ba re: “Ga re itse.” Le ene o ne a ba raya a re: “Le nna ga ke lo bolelele gore ke tsaya kae tetla ya go dira dilo tseno.

28 “Lo akanya eng? Monna mongwe o ne a na le bana ba babedi. O ne a ya kwa go wa ntlha a bo a mo raya a re, ‘Ngwanaka, tsamaya o ye go bereka kwa tshimong ya morara* gompieno.’ 29 Ngwana yoo o ne a re, ‘Ke a gana,’ mme morago o ne a ikwatlhaya a bo a tsamaya. 30 O ne a ya kwa go wa bobedi mme a mmolelela se se tshwanang. Yono o ne a re, ‘Ke tla dira jalo Rra,’ le fa go ntse jalo o ne a se ka a tsamaya. 31 Ke ofe mo go ba babedi bano yo o neng a dira thato ya ga rraagwe?” Ba re: “Wa ntlha.” Jesu o ne a ba raya a re: “Ammaaruri ke a lo bolelela, bakgethisi le bagwebakammele ba tla tsena pele ga lona mo Bogosing Jwa Modimo. 32 Gonne Johane o ne a tla kwa go lona mme a lo bontsha tsela e e siameng,* mme lo ne lwa se ka lwa mo dumela. Le fa go ntse jalo, bakgethisi le bagwebakammele ba ne ba mo dumela,+ mme le fa lo ne lo bona seno, ga lo a ka lwa ikwatlhaya e bile ga lo a ka lwa mo dumela.

33 “Utlwang setshwantsho se sengwe: Go ne go na le monna mongwe yo o neng a na le tshimo ya morara+ a bo a aga lobota go e dikologa. O ne a epa khuti gore a tle a dire segatisetso sa beine a bo a aga tora;+ go tswa foo, o ne a e hirisetsa balemi a bo a tsaya loeto a ya kwa nageng e e kgakala.+ 34 Fa paka ya maungo e fitlha, o ne a roma batlhanka ba gagwe kwa baleming bao gore ba ye go tsaya maungo a gagwe. 35 Le fa go ntse jalo, balemi ba ne ba tsaya batlhanka ba gagwe, yo mongwe ba mo itaya, yo mongwe ba mmolaya mme yo mongwe ba mo kgobotletsa ka maje.+ 36 O ne a roma batlhanka ba bangwe gape, ba ba fetang ba ntlha, le bano ba ne ba ba dira se se tshwanang.+ 37 La bofelo o ne a roma morwawe kwa go bone ka gonne o ne a ithaya a re, ‘Ba tla tlotla morwaake.’ 38 Fa balemi bao ba bona morwawe, ba ne ba raana ba re, ‘Yono ke moruaboswa.+ Tlang, a re mmolayeng mme re tseye boswa jwa gagwe!’ 39 Ka jalo, ba ne ba mo tshwara, ba mo latlhela kwa ntle ga tshimo ya morara ba bo ba mmolaya.+ 40 Jaanong, fa mong wa tshimo ya morara a tla, o tla dira eng ka balemi bao?” 41 Ba ne ba mo raya ba re: “E re ka ba le bosula, o tla ba bolaya* a bo a hirisetsa balemi ba bangwe tshimo ya morara, ba ba tla mo nayang maungo fa e nna paka ya one.”

42 Jesu o ne a ba raya a re: “A lo ne lo ise lo ke lo bale mo Dikwalong fa go tweng, ‘Leje le baagi ba neng ba le gana, jaanong le fetogile leje le legolo la sekhutlo.*+ Leje leno le tswa kwa go Jehofa,* mme le a kgatlha’?+ 43 Ke gone ka moo ke lo rayang ke re, Bogosi Jwa Modimo bo tla tsewa mo go lona mme bo tla newa batho ba ba dirang thato ya Modimo.* 44 Gape, motho yo o welang mo lejeng leno o tla thubagana.+ Mme ope fela yo le welang mo go ene, le tla mo sila.”+

45 E rile baperesiti ba bagolo le Bafarasai ba utlwa ditshwantsho tsa gagwe, ba lemoga gore o ne a bua ka bone.+ 46 Le fa gone ba ne ba batla go mo tshwara, ba ne ba tshaba batho, ka gonne batho bao ba ne ba dumela gore ke moporofeti.+