Bakorintha wa Ntlha

7 Jaanong ka ga dilo tse lo neng lwa di kwala, go botoka gore monna a se ka a tshwara* mosadi; 2 mme e re ka boitsholo jo bo sa siamang jwa tlhakanelodikobo* bo aname, a monna mongwe le mongwe a nne le mosadi wa gagwe+ le mosadi mongwe le mongwe a nne le monna wa gagwe.+ 3 A monna yo o nyetseng a neye mosadi wa gagwe tshwanelo ya gagwe, mme a mosadi yo o nyetsweng le ene a direle monna wa gagwe ka tsela e e tshwanang.+ 4 Mosadi yo o nyetsweng ga a laole mmele wa gagwe, mme monna wa gagwe ke ene a o laolang; ka tsela e e tshwanang, monna yo o nyetseng le ene ga a laole mmele wa gagwe, mme mosadi wa gagwe ke ene a o laolang. 5 Lo se ka lwa timana tshwanelo eo, kwantle ga fa lo dumalane ka nako e e rileng gore lo tle lo nne le nako ya go rapela le gore lo tle lo naane tshwanelo eo gape, gore Satane a se ka a lo raela ka gonne lo sa kgone go itshwara. 6 Le fa go ntse jalo, ke ne ke lo gakolola fela mme ke sa lo laele. 7 Mme ke eletsa gore batho botlhe ba ka bo ba tshwana le nna. Le fa go ntse jalo, Modimo o neile mongwe le mongwe mpho ya gagwe,+ ke gone ka moo go nang le ba ba nyalang le ba ba sa nyaleng.

8 Jaanong ke raya batho ba ba sa nyalang le batlholagadi ke re, go botoka gore ba tshwane le nna.+ 9 Mme fa ba palelwa ke go itshwara, a ba nyale, ka gonne go botoka go nyala go na le go nna le keletso e e maatla ya tlhakanelodikobo.+

10 Ke naya batho ba ba nyetseng ditaelo, mme go bua Morena e seng nna, gore mosadi yo o nyetsweng a se ka a kgaogana le monna wa gagwe.+ 11 Le fa go ntse jalo, fa a kgaogana le ene, a a nne a sa nyalwa kgotsa a boelane le monna wa gagwe; monna yo o nyetseng le ene ga a a tshwanela go tlogela mosadi wa gagwe.+

12 Mme nna, e seng Morena+ ke raya ba bangwe ke re: Fa mokaulengwe a na le mosadi yo o sa dumeleng mo Moreneng mme mosadi yoo a dumalana go nna le ene, a a se ka a mo tlogela; 13 e bile fa mosadi a na le monna yo o sa dumeleng mo Moreneng mme monna yoo a dumalana go nna le ene, a a se ka a mo tlogela. 14 Gonne monna yo o nyetseng yo o sa dumeleng mo Moreneng o tla segofadiwa* ka ntlha ya mosadi wa gagwe, le mosadi yo o nyetsweng yo o sa dumeleng mo Moreneng o tla segofadiwa* ka ntlha ya monna wa gagwe yo o dumelang; go seng jalo, bana ba lona ba ne ba ka se segofadiwe,* mme jaanong ba segofaditswe.* 15 Mme fa yo o sa dumeleng a tlhopha go tsamaya,* a a mo lese a tsamaye; mo maemong a a ntseng jalo, mokaulengwe kgotsa kgaitsadi ga a patelesege go nna le ene. Modimo o batla gore lo nne le kagiso.+ 16 Mosadi yo o nyetsweng, o itse jang gore gongwe o tla boloka monna wa gago?+ Kgotsa monna yo o nyetseng, o itse jang gore gongwe o tla boloka mosadi wa gago?

17 Le fa go ntse jalo, a motho mongwe le mongwe a tshele go ya ka se Jehofa* a setseng a mo neile sone, a tshele mo boemong jo a neng a le mo go jone fa Modimo a ne a mmitsa gore e nne modumedi.+ Ka jalo, ke naya diphuthego tsotlhe taelo eno. 18 A motho mongwe o ne a setse a rupile fa a ne a bidiwa?+ A a tswelele a le mo boemong joo. A motho mongwe o ne a sa rupa fa a ne a bidiwa? A a se ka a rupa.+ 19 Go rupa ga go kaye sepe, le go sa rupa ga go kaye sepe;+ mme selo sa botlhokwa ke go boloka ditaelo tsa Modimo.+ 20 A mongwe le mongwe a tswelele a le mo boemong jo a biditsweng a le mo go jone.+ 21 A o ne o le motlhanka fa o bidiwa? O se ka wa letla seo se go tshwenya;+ mme fa e le gore o ka nna le tshono ya go gololesega, gololesega. 22 Morutwa ope fela wa Morena yo e neng e le motlhanka fa a bidiwa, o gololesegile e bile o ikobela Morena;+ ka tsela e e tshwanang ope fela yo o neng a gololesegile fa a ne a bidiwa, ke motlhanka wa ga Keresete. 23 Lo ne lwa rekwa ka tlhwatlhwa e e kwa godimo;+ tlogelang go nna batlhanka ba batho. 24 Bakaulengwe, le fa motho a ka tswa a biditswe a le mo boemong bofe, a a tswelele a le mo boemong joo fa pele ga Modimo.

25 Jaanong ka ga makgarebane, ga ke na taelo epe e e tswang kwa Moreneng, mme ke bua se ke se akanyang+ go ya ka kutlwelobotlhoko e ke neng ka e bontshiwa ke Morena gore ke ikanyege. 26 Ka jalo, ke akanya gore go botoka gore monna a tswelele jaaka a ntse ka gonne re tshela mo dinakong tse di thata. 27 A o na le mosadi? O se ka wa leka go mo tlogela.+ A ga o na mosadi? Tlogela go batla mosadi. 28 Mme le fa o ne o ka nyala, o ne o tla bo o sa leofe. Mme fa motho yo o sa nyalang kgotsa yo o sa nyalwang* a ka nyala kgotsa a nyalwa, o tla bo a sa leofe. Le fa go ntse jalo, ba ba nyalang kgotsa ba ba nyalwang ba tla nna le mathata a mantsi. Mme ke leka go lo thusa.

29 Mo godimo ga moo, bakaulengwe, ka re nako e e setseng e khutshwafetse.+ Go tloga jaanong, a ba ba nang le basadi ba nne jaaka e kete ga ba na bone, 30 mme a ba ba lelang ba nne jaaka ba ba sa leleng, ba ba itumelang ba nne jaaka ba ba sa itumeleng, ba ba rekang ba nne jaaka ba ba se nang sepe, 31 le ba ba dirisang lefatshe ba nne jaaka ba ba sa le diriseng ka botlalo; ka gonne seemo sa lefatshe leno se a fetoga. 32 Tota ke batla gore lo se ka lwa tlhobaela. Monna yo o sa nyalang o akanya thata ka go direla Morena, gore a ka dira jang gore Morena a mo amogele. 33 Mme monna yo o nyetseng o akanya thata ka dilo tsa lefatshe,+ gore a ka dira jang gore mosadi wa gagwe a mo amogele, 34 mme monna yoo o iteega tsebe. Gape, mosadi yo o sa nyalwang kgotsa kgarebane, o akanya thata ka go direla Morena,+ gore a nne boitshepo mo mmeleng le mo mogopolong wa gagwe. Le fa go ntse jalo, mosadi yo o nyetsweng o akanya thata ka dilo tsa lefatshe, gore a ka dira jang gore monna wa gagwe a mo amogele. 35 Mme ke bua dilo tseno go lo thusa, e seng gore ke lo thatafaletse dilo,* mme ke dira jalo go lo tlhotlheletsa gore lo dire se se tshwanetseng le gore lo kgone go direla Morena ka metlha lo sa iteege tsebe.

36 Mme fa motho yo a iseng a nyale kgotsa a nyalwe a akanya gore ga a kgone go laola keletso ya gagwe ya tlhakanelodikobo, mme a setse a godile, go botoka gore a nyale kgotsa a nyalwe. Ga a leofe.+ 37 Le fa go ntse jalo, fa mongwe a dirile tshwetso mo pelong ya gagwe e bile a sa fetole tshwetso e a e dirileng, a ikutlwa a sa patelesege go nyala kgotsa go nyalwa e bile a kgona go laola dikeletso tsa gagwe, o dira sentle.+ 38 Ka jalo, ope fela yo o tsenang mo lenyalong* o dira sentle, mme ope fela yo o sa tseneng mo lenyalong o dira sentle le go feta.+

39 Mosadi yo o nyetsweng o tshwanetse go tswelela a nna le monna wa gagwe fa a sa ntse a tshela.+ Mme fa monna wa gagwe a ka swa, o gololesegile go nyalwa ke ope fela yo a mmatlang, mme e le mo Moreneng fela.+ 40 Mme nna ke akanya gore o tla itumela thata fa a sa nyalwe; mme ke akanya gore le nna ke kaelwa ke moya wa Modimo.