Baroma

8 Ka jalo, ba ba leng seoposengwe le Keresete Jesu ga ba bonwe molato. 2 Gonne molao wa moya o o nayang botshelo o go golotse,+ wena molatedi wa ga Keresete Jesu, mo molaong wa boleo le wa loso. 3 E re ka batho ba na le boleo, ba ne ba sa kgone go latela molao wa ga Moshe ka botlalo+ e bile molao oo o ne o sa kgone go ba golola.+ Modimo o ne a ba golola ka go romela Morwawe+ gore a tle go tshwana le batho ba ba nang le boleo+ mme a tlose boleo. Ka jalo, Modimo o bona boleo jo bo mo bathong molato, 4 gore dilo tse molao wa ga Moshe o reng di siame di tle di diragadiwe mo go rona+ ba re kaelwang ke moya o o boitshepo, e seng ba ba laolwang ke dikeletso tse di sa siamang.+ 5 Ba ba laolwang ke dikeletso tse di sa siamang ba nna ba akantse ka go kgotsofatsa dikeletso tsa mebele ya bone,+ mme ba ba kaelwang ke moya o o boitshepo ba akanya ka dilo tse moya o ba kaelang gore ba di dire.+ 6 Gonne fa motho a nna a akantse ka go kgotsofatsa dikeletso tsa mmele, seo se felela ka loso.+ Mme fa motho a nna a akantse ka dilo tse di amanang le moya o o boitshepo, seo se felela ka botshelo le kagiso.+ 7 Jaanong, fa re letla mmele o o nang le boleo gore o laole megopolo ya rona, seo se dira gore re nne baba ba Modimo.+ Mmele o o nang le boleo ga o ikobele molao wa Modimo, tota e bile, ga o ka ke wa o ikobela. 8 Ka jalo, ba ba kgotsofatsang dikeletso tsa mebele ya bone e e nang le boleo, ga ba ka ke ba itumedisa Modimo.

9 Le fa go ntse jalo, lona bakaulengwe, ga lo kgotsofatse dikeletso tsa mebele e e nang le boleo. Fa e le gore eleruri moya wa Modimo o mo go lona, ke one o o lo kaelang.+ Mme fa mongwe a se na moya wa ga Keresete, motho yoo ga se wa ga Keresete. 10 Mme fa e le gore lo seoposengwe le Keresete,+ le fa gone mmele wa lona o swa ka ntlha ya boleo, moya o dira gore lo tshele ka gonne lo siame. 11 Moya wa Modimo o ne wa tsosa Jesu mo baswing. Jaanong, fa e le gore moya oo o mo go lona, Modimo yo o neng a tsosa Keresete Jesu mo baswing,+ gape o tla dira gore mebele* ya lona e tshele+ a dirisa moya wa gagwe.

12 Ka jalo, bakaulengwe, ga re tlhoke go laolwa ke mmele o o nang le boleo.+ 13 Fa e le gore lo laolwa ke mebele ya lona e e nang le boleo, ruri lo tla swa. Mme fa lo letla maatla a moya a lo thusa go bolaya mekgwa e e sa siamang,+ lo tla tshela.+ 14 Gonne botlhe ba ba kaelwang ke moya wa Modimo, eleruri ke bana ba Modimo.+ 15 Gonne ga re a ka ra amogela moya o o dirang gore re nne batlhanka le o o dirang gore re tshelele mo poifong gape. Mme re ne ra amogela moya o o dirang gore Modimo a re itseele gore re nne bana ba gagwe. Moya ono o dira gore re goe re re: “Aba,* Rara!”+ 16 Moya wa Modimo o re netefaletsa+ gore re bana ba Modimo.+ 17 Jaanong, fa re le bana ba Modimo, gape re baruaboswa ba Modimo. Mme re tla nna baruaboswa+ le Keresete fa fela re boga jaaka Keresete a ne a boga+ gore re tle re galalediwe mmogo le ene.+

18 Ke tsaya dilo tse di re bogisang gone jaanong e se sepe fa re di bapisa le nako ya fa Modimo a tla bo a re bontsha tuelo e a tla re duelang yone.+ 19 Popo* e letile ka tlhoafalo gore bana ba Modimo ba senolwe.+ 20 Gonne popo e ne e sa batle go atlholelwa go tshela botshelo jo bo se nang mosola,+ mme gone Modimo o ne a letlelela seo. Le fa go ntse jalo, fa Modimo a ne a ntsha katlholo, o ne a re naya tsholofelo. 21 Modimo o ne a itse gore popo e tla gololwa+ gore e se ka ya nna motlhanka wa mmele o o swang mme e nne le kgololesego e e galalelang ya bana ba Modimo. 22 Gonne re a itse gore go tla go fitlha jaanong, popo yotlhe e ntse e le mo khutsafalong e bile e ntse e le mo kutlobotlhokong. 23 Mme jaanong re na le moya, o e leng sesupo* sa dilo tse di tla tlang. Re a hutsafala+ fa re ntse re letile ka tlhoafalo gore Modimo a re itseele gore re nne bana ba gagwe.+ Ka nako eo, re tla gololwa ka thekololo mo mebeleng ya rona e e nang le boleo. 24 Fa re ne re bolokwa, re ne ra nna le tsholofelo eno. Mme gone, tsholofelo e e bonwang ga se tsholofelo. Tota motho a ka solofela jang selo se a se bonang? 25 Mme fa re solofetse+ sengwe se re sa se boneng,+ re nna re se letile re itshokile.+

26 Ka tsela e e tshwanang, moya o o boitshepo o kgona go re thusa fa re le bokoa.+ Gonne fa re batla go rapela mme re sa itse gore re rapelele eng, moya oo o kgona go re rapelela fa re hutsafetse re sa itse mafoko a re ka a buang. 27 Le fa go ntse jalo, Modimo yo o tlhatlhobang dipelo+ o itse se moya o se kayang, ka gonne moya o rapelela ba ba boitshepo go ya ka thato ya Modimo.

28 Jaanong re a itse gore Modimo o dira gore ditiro tsotlhe tsa gagwe di direge ka thulaganyo gore ba ba ratang Modimo ba solegelwe molemo, e leng ba ba neng ba bidiwa go dumalana le boikaelelo jwa gagwe;+ 29 ka gonne go tswa kwa tshimologong Modimo o ne a itse ba a neng a tla ba tlhopha a bo a dira tshwetso ya* gore ba tshwanetse go tshwana le Morwawe.+ Ka tsela eno, Morwawe o ne a tla nna leitibolo+ mo go bomorwarraagwe ba bantsi.+ 30 Mo godimo ga moo, ba a neng a re ba tshwanetse go tshwana le Morwawe+ ke bone ba a neng a ba bitsa;+ mme ba a neng a ba bitsa ke bone ba gape ba neng ba bolelwa ba siame.+ Kwa bokhutlong, ba a neng a ba bolela ba siame ke bone ba gape a neng a ba galaletsa.+

31 Jaanong, re ka reng ka dilo tseno? Fa e le gore Modimo o mo letlhakoreng la rona, ke mang yo o tla nnang kgatlhanong le rona?+ 32 Modimo ga a ka a thibela Morwawe gore a boge mme o ne a mo ntsha gore a re swele rotlhe.+ E re ka a dirile jalo, a gape ga a kitla a re naya dilo tse dingwe tsotlhe ka bopelonomi? 33 Ke mang yo o tla latofatsang ba Modimo a ba tlhophileng?+ Modimo ke Ene yo o bolelang gore ba siame.+ 34 Ke mang yo o tla ba atlholang? Ga go na ope. Keresete Jesu ke ene yo o neng a ba swela e bile o ne a tsosiwa mo baswing. Gone jaanong o ka fa seatleng sa moja sa Modimo+ e bile o a re rapelela.+

35 Ke eng se se tla dirang gore Keresete a se ka a tlhola a re rata?+ A ke mathata* kgotsa matshwenyego kgotsa pogiso kgotsa tlala kgotsa go tlhoka diaparo* kgotsa go tlhagelwa ke dikotsi kgotsa go tshosediwa ka go bolawa ka tšhaka?+ 36 Fela jaaka go kwadilwe go twe: “Letsatsi le letsatsi re a bolawa ka gonne re le batho ba gago; re kailwe re le dinku tse di tshwanetseng go tlhabiwa.”+ 37 Go na le moo, mo dilong tseno tsotlhe re a fenya+ ka ntlha ya ene yo o neng a re rata. 38 Gonne ke tlhatswegile pelo gore loso kgotsa botshelo kgotsa baengele kgotsa dipuso kgotsa dilo tse di leng teng gone jaanong kgotsa dilo tse di tla tlang kgotsa maatla+ 39 kgotsa bogodimo kgotsa boteng kgotsa sebopiwa sepe fela se sengwe, ga di ka ke tsa kgona go dira gore Modimo a se ka a tlhola a re rata ka lorato lo a re bontshitseng lone a dirisa Keresete Jesu Morena wa rona.