Efangele ya ga Mareko

13 Fa a tswa mo tempeleng, mongwe wa barutwa ba gagwe o ne a mo raya a re: “Moruti, bona maje ano le dikago tseno tse di kgatlhang!”+ 2 Le fa go ntse jalo, Jesu o ne a mo raya a re: “A o bona dikago tseno tse dikgolo? Ga go kitla go tlogelwa leje lepe fano mo godimo ga le lengwe mme le sa digelwa fa fatshe.”+

3 E rile a ntse mo Thabeng ya Lotlhware go lebagana le tempele, Petere, Jakobe, Johane le Anderea ba ne ba mmotsa kwa thoko ba re: 4 “Re bolelele, dilo tseno di tla direga leng, mme sesupo sa gore dilo tseno tsotlhe di a fela e tla nna sefe?”+ 5 Ka jalo, Jesu o ne a ba raya a re: “Lo ele tlhoko gore ope a se ka a lo tsietsa.+ 6 Ba le bantsi ba tla dirisa leina la me, ba re, ‘Ke nna Keresete,’ mme ba tla timetsa batho ba le bantsi. 7 Mo godimo ga moo, fa lo utlwalela ka dintwa le dipego tsa dintwa, lo se ka lwa tshoga; dilo tseno di tshwanetse go diragala, mme e tla bo e ise e nne bokhutlo.+

8 “Ka gonne setšhaba se tla tlhasela setšhaba se sengwe le bogosi bo tla tlhasela bogosi jo bongwe;+ go tla nna le dithoromo tsa lefatshe mo mafelong ka go latelana; gape go tla nna le ditlhaelo tsa dijo.+ Dilo tseno ke tshimologo ya dinako tsa mathata.*+

9 “Mme lona, lo ikele tlhoko. Batho ba tla lo isa kwa dikgotlatshekelong tsa mafelo a lo nnang mo go one,+ mme lo tla itewa mo disinagogeng+ lo bo lo emisiwa fa pele ga balaodi le dikgosi ka gonne lo le balatedi ba me. Mme seo se tla lo naya tshono ya gore lo ba bolelele se lo se dumelang.+ 10 Gape, dikgang tse di molemo di tshwanetse go rerwa pele mo ditšhabeng tsotlhe.+ 11 Mme fa ba lo tshwara gore ba lo ise kwa balaoding, lo se ka lwa tlhobaela ka se lo tla se buang; lo tla itse se lo tshwanetseng go se bua ka nako eo, ka gonne go tla bo go sa bue lona, mme go bua moya o o boitshepo.+ 12 Mo godimo ga moo, motho o tla dira gore morwarraagwe a bolawe, e bile rre o tla dira gore ngwana wa gagwe a bolawe, mme bana ba tla tlhanogela* batsadi ba bone e bile ba tla dira gore ba bolawe.+ 13 Mme batho botlhe ba tla lo tlhoa ka gonne lo le balatedi ba me.+ Le fa go ntse jalo, yo o itshokileng* go fitlha kwa bokhutlong+ o tla bolokwa.+

14 “Le fa go ntse jalo, fa lo bona selo se se ferosang sebete se se bakang tshenyo+ se eme fa se sa tshwanelang gone (a mmadi a tlhaloganye se go buiwang ka sone), foo a ba ba kwa Judea ba simolole go tshabela kwa dithabeng.+ 15 A monna yo o kwa godimo ga ntlo a se ka a fologa a ya go tsaya sepe mo ntlong ya gagwe; 16 e bile a monna yo o kwa tshimong a se ka a boela kwa dilong tse di kwa morago a ya go tsaya seaparo sa gagwe sa ka fa ntle. 17 Ruri go tla nna thata mo basading ba ba imileng le ba ba anyisang masea mo malatsing ao!+ 18 Nnang lo rapelele gore seno se se ka sa diragala ka paka ya mariga; 19 ka gonne go tla nna le pitlagano mo malatsing ao.+ Ga go ise go ke go nne le pitlagano e e tshwanang le eo fa e sa le Modimo a bopa lefatshe go fitlha jaanong, mme ga e kitla e nna teng gape.+ 20 Tota e bile, fa Jehofa* a ne a sa khutshwafatsa malatsi ao, go ne go ka se nne le motho ope yo o bolokwang. Mme o khutshwafaditse malatsi ao ka ntlha ya ba a ba tlhophileng.+

21 “Ka nako eo, fa mongwe a ka lo raya a re, ‘Bonang! Keresete ke yo,’ kgotsa ‘Ke yole,’ lo se ka lwa mo dumela.+ 22 Gonne go tla nna le bo-Keresete ba maaka le baporofeti ba maaka+ mme ba tla dira ditshupo le dikgakgamatso gore fa go kgonega, ba timetse ba ba tlhophilweng. 23 Jaanong lo nne kelotlhoko.+ Ke lo boleletse dilo tseno tsotlhe go sa le pele.

24 “Mme mo malatsing ao, morago ga pitlagano eo, letsatsi le tla fifala, ngwedi ga e kitla e ntsha lesedi la yone,+ 25 e bile dinaledi di tla bo di wa kwa legodimong, mme dilo tse di kwa magodimong di tla reketlisiwa. 26 Go tswa foo, ba tla bona Morwa motho+ a tla a le mo marung a na le maatla a magolo le kgalalelo.+ 27 Morago ga moo, o tla romela baengele mme ba tla phutha ba ba tlhophilweng go tswa kwa dikhutlong tse nnê tsa lefatshe, go tswa kwa ntlheng ya lefatshe go ya kwa ntlheng ya legodimo.+

28 “Jaanong ithuteng seno go tswa mo setlhareng sa mofeige: Ka bonako fela fa dikalana tsa sone di simolola go gola di bo di ntsha matlhare, lo a itse gore selemo se gaufi.+ 29 Ka tsela e e tshwanang, le lona fa lo bona dilo tseno di diragala, itseng gore o gaufi, o fela fa dikgorong.+ 30 Ammaaruri ke a lo bolelela, kokomana eno ga e kitla e fela go fitlha dilo tseno tsotlhe di diragala.+ 31 Legodimo le lefatshe di tla nyelela,+ mme mafoko a me one ga a kitla a nyelela.+

32 “Ga go na ope yo o itseng letsatsi leo kgotsa ura eo. Tota le baengele ba ba kwa legodimong le Morwa Modimo ga ba itse, go itse Rara fela.+ 33 Nnang lo lebeletse, nnang lo tsogile,+ ka gonne ga lo itse gore nako e e tlhomilweng e leng.+ 34 Go tshwana le motho yo o tsayang loeto a ya kwa nageng e e kgakala yo o neng a tlogela ntlo ya gagwe a bo a naya batlhanka ba gagwe maikarabelo a go tlhokomela ntlo eo.+ O ne a naya mongwe le mongwe tiro ya gagwe a bo a laela molebedi wa kgoro gore a nne a disitse.+ 35 Ka jalo, nnang lo disitse, ka gonne ga lo itse gore mong wa ntlo o tla tla leng,+ e ka tswa e le maitseboa kgotsa bosigogare kgotsa pele ga bosa bo sa* kgotsa phakela thata,+ 36 gore fa a ka tla ka tshoganyetso, a se ka a lo fitlhela lo robetse.+ 37 Mme se ke se lo bolelelang, ke se bolelela botlhe: Nnang lo disitse.”+