Bathesalonika wa Ntlha

4 La bofelo, bakaulengwe, fela jaaka lo amogetse ditaelo tse di tswang mo go rona tse di amanang le gore lo tshwanetse go tshela jang ka tsela e e itumedisang Modimo,+ re a lo rotloetsa e bile re lo kopa ka leina la Morena Jesu gore lo tswelele lo dira jalo ka botlalo. 2 Gonne lo itse ditaelo tse re neng ra di lo naya tse di tswang kwa go Morena Jesu.

3 Gonne Modimo o batla gore lo nne boitshepo+ e bile lo ithibe mo boitsholong jo bo sa siamang jwa tlhakanelodikobo.*+ 4 Mongwe le mongwe wa lona o tshwanetse go itse kafa a ka laolang mmele* wa gagwe+ ka gone gore o nne boitshepo+ o bo o tlotlege, 5 mme a se ka a tshwana le batho ba ditšhaba tse di sa itseng Modimo+ ba ba nang le keletso e e sa laolesegeng ya tlhakanelodikobo mme ba sa kgotsofale.+ 6 Go se ka ga nna le motho ope yo o tlolang ditaelo tseno tsa boitsholo a bo a utlwisa mokaulengwe wa gagwe botlhoko, ka gonne fela jaaka re ne ra lo bolelela le go lo tlhagisa mo nakong e e fetileng, Jehofa* o tla otlhaya batho ba ba dirang dilo tseno. 7 Gonne Modimo o ne a re bitsa gore re nne boitshepo, e seng gore re tshele botshelo jo bo seng phepa.+ 8 Ka jalo, motho yo o sa reetseng ditlhagiso tseno, ga a itlhokomolose motho, mme o itlhokomolosa Modimo,+ yo o lo nayang moya wa gagwe o o boitshepo.+

9 Le fa go ntse jalo, ga re tlhoke go lo kwalela ka kgang ya go rata bakaulengwe,+ ka gonne Modimo o lo ruta gore lo ratane.+ 10 Tota e bile, lo rata bakaulengwe botlhe ba mo Makedonia. Mme bakaulengwe, re lo kgothaletsa gore lo tswelele lo ratana le go feta. 11 Ikemisetseng go tshela ka kagiso+ e bile lo se ka lwa itshunya nko mo dikgannyeng tsa batho ba bangwe+ mme lo dire ka diatla tsa lona,+ fela jaaka re ne ra lo laela, 12 gore batho ba ba kwa ntle* ba bone gore lo itshwere sentle+ le gore ga lo tlhoke sepe.

13 Mo godimo ga moo, bakaulengwe, re batla gore lo tlhaloganye gore go tlile go diragala eng ka batho ba ba suleng,*+ gore lo se ka lwa hutsafala fela jaaka ba ba se nang tsholofelo ba hutsafala.+ 14 Gonne fa re dumela gore Jesu o ne a swa a bo a tsoga gape,+ re dumela gore Modimo o tla tsosa ba ba suleng a dirisa Jesu gore ba nne le ene.*+ 15 Gonne seno ke se re se lo bolelelang ka lefoko la ga Jehofa,* gore rona ba re tla bong re tshela go fitlha ka nako ya go nna gone ga Morena ga re kitla re tlhatlogela kwa legodimong pele ga ba ba setseng ba sule; 16 ka gonne Morena ka boene o tla fologa kwa legodimong a ntsha ditaelo ka lentswe la moengele yo mogolo+ e bile a tshwere terompeta ya Modimo, mme ba ba suleng ba le seoposengwe le Keresete ba tla tsoga pele.+ 17 Morago ga moo, rona ba re tla bong re tshela re tla phamolelwa kwa marung mmogo le bone+ gore re kgatlhantshe Morena+ kwa loaping; mme ka tsela eno re tla nna re na le Morena.+ 18 Ka jalo, nnang lo gomotsane ka mafoko ano.