ISAIA

 2 Utlwang lona magodimo, mme o sekege tsebe wena lefatshe,+

Gonne Jehofa o buile jaana:

“Ke godisitse bana ba basimane ka bo ka ba tlamela,+

Mme ba ntlhanogetse.+

 3 Poo e itse moreki wa yone sentle,

Le tonki e itse bojelo jwa diruiwa jwa mong wa yone;

Mme Baiseraele bone ga ba nkitse,*+

Batho ba me ba itshwara ka go tlhoka tlhaloganyo.”

 4 Ruri setšhaba seno se se leofileng,+

Batho ba ba imetsweng ke molato wa bone,

Losika lwa batho ba ba bosula, bana ba ba senyegileng, ba tla atlholwa.

Ba tlogetse Jehofa;+

Ba nyaditse Modimo yo o Boitshepo wa Iseraele;

Ba mo tlogetse.

Tlhogo yotlhe e a lwala,

Le pelo yotlhe e koafetse.+

Go na le dintho le matsadi le diso tse di phunyegileng,

Ga di a alafiwa,* ga di a hapiwa e bile ga di a sidilwa ka leokwane.+

 8 Morwadia Siona o tlogetswe jaaka loobo* mo tshimong ya morara,*

Jaaka ntlwana mo tshimong ya dikomokomore,*

Jaaka motse o o dikologilweng ke masole.+

 9 Fa Jehofa wa masomosomo a ne a sa re tlogelela bafalodi ba le mmalwa,

Re ka bo re ntse jaaka Sodoma,

E bile re ka bo re tshwana le Gomora.+

Ke lapisitswe ke ditlhabelo tsa lona tse di fisiwang tsa diphelefu+ le mafura a diphologolo tse di fepilweng sentle,+

E bile ga ke itumedisiwe ke madi+ a dipowana+ le a dikwanyana le a dipodi.+

12 Fa lo tla go nkobamela,+

Ke mang yo o lo kopileng

Gore lo gatake malwapa a me?+

E fetogile morwalo mo go nna;

E ntapisitse.

15 Mme fa lo otlolola diatla tsa lona,

Ke lo fitlhela matlho a me.+

Le fa gone lo rapela gantsintsi,+

Ga ke a lo reetsa;+

Lo bolaile thata.*+

16 Tlhapang, lo iphepafatse;+

Tlosang ditiro tsa lona tse di bosula fa pele ga me;

Tlogelang go dira bosula.+

17 Ithuteng go dira se se molemo, batlang tshiamiso,+

Kgalemelang mogateledi,

Femelang ditshwanelo tsa khutsana,*

Lo bo lo seke kgang ya motlholagadi.”+

18 Jehofa a re, “Jaanong tlang, mme re tlhamalatse dilo fa gare ga rona,+

Le fa gone maleo a lona a le mahibidu,

A tla dirwa masweu fela jaaka kapoko;+

Le fa gone a le mahibidu jaaka letsela le le bohibidu jo bo tseneletseng,

A tla nna jaaka boboa.

19 Fa lo ikemiseditse go reetsa,

Lo tla ja dilo tse di molemo tsa naga ya lona.+

20 Mme fa lo gana go reetsa e bile lo tlhanoga,

Lo tla bolawa ka tšhaka,+

Gonne molomo wa ga Jehofa o buile seno.”

O ne o tletse tshiamiso;+

Tshiamo e kile ya bo e nna mo go one,+

Mme jaanong go nna babolai.+

22 Selefera ya gago e fetogile leswe,+

E bile bojalwa* jwa gago bo tlhaolositswe ka metsi.

Ga ba direle dikhutsana* tshiamiso,

E bile ga ba ke ba reetsa motlholagadi fa a ikuela.+

24 Ka jalo, Morena wa boammaaruri, Jehofa wa masomosomo,

Yo o Maatla wa Iseraele, a re:

“Go lekane! Ke tla tlosa baganetsi ba me mo go nna,

E bile ke tla ipusolosetsa mo babeng ba me.+

25 Ke tla go tsholeletsa seatla,

Ke tla tlosa leswe mo go wena jaaka fa batho ba gakolosa selefera gore ba ntshe leswe le le mo go yone

E bile ke tla tlosa dilo tsotlhe tse di sa batlegeng mo go wena.+

26 Ke tla go naya baatlhodi ba gago gape

Le bagakolodi ba gago jaaka kwa tshimologong.+

27 Siona o tla gololwa ka tshiamiso,+

E bile batho ba gagwe ba ba boang, ba tla gololwa ka tshiamo.

28 Batlhanogi le baleofi ba tla robaganngwa botlhe,+

E bile ba ba tlogelang Jehofa ba tla fedisiwa.+

29 Gonne batho ba tla tlhabiwa ke ditlhong ka ntlha ya ditlhare tse dikgolo tse lo neng lo di eletsa,+

E bile lo tla tlontlologa ka ntlha ya ditshingwana* tse lo di tlhophileng.+

30 Gonne lo tla nna jaaka setlhare se segolo se se nang le matlhare a a swabang,+

Le jaaka tshingwana e e se nang metsi.

31 Motho yo o nonofileng o tla nna jaaka leodi,*

Le tiro ya gagwe e tla nna jaaka tlhase;

Tsoopedi di tla tuka ka nako e le nngwe,

Go se na ope yo o ka di timang.”

 2 Mo metlheng ya bofelo,

Thaba e ntlo ya ga Jehofa e leng mo go yone

E tla tia thata kwa godimo ga ditlhoa tsa dithaba,+

E bile e tla tsholelediwa kwa godimo ga dithota,

Mme ditšhaba tsotlhe di tla ologela kwa go yone.+

“Tlang, a re tlhatlogeleng kwa thabeng ya ga Jehofa,

Kwa ntlong ya Modimo wa ga Jakobe.+

O tla re ruta ditsela tsa gagwe,

Mme re tla tsamaya mo ditselaneng tsa gagwe.”+

Gonne molao* o tla tswa kwa Siona,

Le lefoko la ga Jehofa le tla tswa kwa Jerusalema.+

 4 O tla atlhola ditšhaba

A bo a tlhamalatsa* dilo mo merafeng e le mentsi.

Ba tla fetola ditšhaka tsa bone ba di dira megoma*

Le marumo a bone ba a dira dikere tse di pomang.+

Setšhaba ga se kitla se lwa le setšhaba se sengwe,*

E bile ga ba kitla ba tlhola ba ithuta ntwa gape.+

 5 Tlang lona ditlogolwana tsa ga Jakobe,

A re tsamayeng mo leseding la ga Jehofa.+

 6 Gonne o latlhile batho ba gago, e leng ditlogolwana tsa ga Jakobe,+

Ka gonne ba latela mekgwa e mentsi e e tswang kwa Botlhaba;

Ba dira maselamose+ jaaka Bafilisitia,

E bile go tletse bana ba batswakwa mo go bone.

 7 Lefatshe la bone le tletse selefera le gauta,

E bile matlotlo a bone ga a na selekanyo.

Lefatshe la bone le tletse dipitse,

E bile dikara tsa bone ga di na selekanyo.+

Ba obamela dilo tse ba di dirileng ka diatla tsa bone,

E leng dilo tse ba di dirileng ka menwana ya bone.

 9 Ka jalo, motho o a obega, o a itlontlolola,

Mme ga o ka ke wa ba itshwarela.

10 Tsena mo lefikeng mme o iphitlhe mo loroleng

Ka ntlha ya bogale jwa ga Jehofa jo bo boifisang

Le bogolo jwa gagwe le kgalalelo ya gagwe.+

11 Batho ba ba mabela ba tla kokobediwa,

E bile batho ba ba boikgodiso ba tla ikoba.*

Le tlela mongwe le mongwe yo o mabela le yo o ikgodisang,

Le tlela mongwe le mongwe, e ka tswa e le wa maemo a a kwa godimo kgotsa wa maemo a a kwa tlase,+

13 Le tlela masedara otlhe a kwa Lebanona a a goletseng kwa godimo le a a tlotlometseng

E bile le tlela ditlhare tsotlhe tsa moakere* tsa kwa Bashana,

14 Le tlela dithaba tsotlhe tse ditelele

E bile le tlela dithota tsotlhe tse di kwa godimo,

15 Le tlela tora nngwe le nngwe e e kwa godimo le lobota longwe le longwe lo lo sireletsegileng,

16 Le tlela dikepe tsotlhe tsa Tareshishe+

E bile le tlela mekoro yotlhe e e rategang.

17 Motho yo o mabela o tla kokobediwa,

E bile batho ba ba boikgodiso ba tla ikoba.*

19 Mme batho ba tla tsena mo dikgageng

Le mo mesimeng+

Ka ntlha ya bogale jwa ga Jehofa jo bo boifisang

Le bogolo jwa gagwe le kgalalelo ya gagwe,+

Fa a tla go dira gore lefatshe le rorome ka ntlha ya letshogo.

20 Mo letsatsing leo batho ba tla tsaya medimo ya bone e e se nang mosola ya selefera le ya gauta

E ba neng ba e itiretse gore ba e obamele

Ba bo ba e latlhela kwa dirunyeng* le kwa go bommamanthwane,+

21 Gore ba tsene mo mesimeng e e mo matlapeng a magolo

Le mo diphatlheng tsa mafika,

Ka ntlha ya bogale jwa ga Jehofa jo bo boifisang

Le bogolo jwa gagwe le kgalalelo ya gagwe,

Fa a tla go dira gore lefatshe le rorome ka ntlha ya letshogo.

22 Gore dilo di lo tsamaele sentle, tlogelang go ikanya motho,

Yo o tshwanang fela le mohemo mo marobeng a dinko tsa gagwe.*

3 Gonne Morena wa boammaaruri, e bong Jehofa wa masomosomo,

O tlosa mofuta mongwe le mongwe wa dilo tse Jerusalema le Juda di ikaegileng ka tsone,

E leng metswedi yotlhe ya senkgwe le metsi,+

 2 Monna yo o maatla le motlhabani,

Moatlhodi le moporofeti,+ yo o dirang boitseanape le mogolwane,

 3 Mookamedi wa ba ba 50,+ motlotlegi le mogakolodi,

Mankge mo go direng maselamose le motshereanyi yo o setswerere.+

 4 Ke tla dira gore basimane e nne dikgosana tsa bone,

E bile ba tla busiwa ke batho ba ba nnang ba fetola megopolo ya bone.*

 5 Batho ba tla gatelela ba bangwe,

Mongwe le mongwe a gatelela yo mongwe.+

Mosimane o tla tlhasela monnamogolo,

E bile yo o tseelwang kwa tlase o tla nyatsa yo o tlotlegang.+

“Ga nkitla ke nna yo o hapang dintho tsa lona;*

Ga ke na dijo kgotsa diaparo mo ntlong ya me.

 8 Gonne Jerusalema o kgopilwe,

Le Juda o ole,

Ka gonne ba tlhanogetse Jehofa ka mafoko le ka ditiro tsa bone;

Ga ba itshware sentle fa pele ga matlho a gagwe a a galalelang.*+

 9 Difatlhego tsa bone di a ba latofatsa,

E bile ba bua fela ka boleo jwa bone jaaka baagi ba Sodoma;+

Ga ba leke go bo fitlha.

10 Bolelelang basiami gore dilo di tla ba tsamaela sentle;

Ba tla duelelwa se ba se dirang.*+

O tla welwa ke masetlapelo,

Gonne o tla dirwa se diatla tsa gagwe di se dirileng.

12 Fa e le batho ba me, baokamedi ba bone ba a kgokgontsha,*

E bile ba busiwa ke basadi.

Batho ba me, baeteledipele ba lona ba dira gore lo kgarakgatshege,

E bile ba tlhakatlhakanya ditselana tse lo tshwanetseng go tsamaya mo go tsone.+

13 Jehofa o ipaakanyetsa gore a ba sekise;

O a ema gore a atlhole ditšhaba.

O ba raya a re, “Lo fisitse tshimo ya morara,*

E bile se lo se utswileng mo bahumaneging se mo matlong a lona.”+

15 Gape Morena Molaodimogolo, Jehofa wa masomosomo a re,

“Goreng lo thubaganya batho ba me e bile lo sila difatlhego tsa ba ba humanegileng mo loroleng?”+

16 Jehofa a re: “E re ka bomorwadia Siona ba le mabela,

Ba tsamaya ba tsholeditse ditlhogo,*

Ba leba ka tsela e e hepisang, ba a tlolatlola,

E bile ba dira modumo ka maseka a bone a maoto fa a ntse a itaagana,

17 Jehofa le ene o tla dira gore tlhogo ya bomorwadia Siona e tlale magogo,

E bile Jehofa o tla dira gore diphatla tsa bone di nne lefatla.+

18 Mo letsatsing leo Jehofa o tla tlosa bontle jwa maseka a bone,

Mabanta a bone a tlhogo le mekgabisa ya bone e e bopegileng jaaka ngwedi,+

19 Manyena,* maseka le masire,

20 Dirwalo tsa tlhogo, maseka a a rwalwang mo maotong le mabanta a sehuba,*

Mabotlolo a dinkgisamonate le dikgapetla tse di kgabisang,

21 Dipalamonwana le manyena a nko,

22 Diaparo tse ditelele tsa meletlo, diaparo tsa fa godimo, diaparo tsa ka fa ntle tse di se nang mabogo le dipatšhe,

23 Diipone+ le diaparo tsa letsela le le boleta,*

Dituku le masire.

24 Mo boemong jwa leokwane la balema,+ ba tla nkga sebodu;

Mo boemong jwa lebanta, ba tla ipofa ka mogala;

Mo boemong jwa moriri o o kgabisitsweng bontle, ba tla nna lefatla;+

Mo boemong jwa seaparo se se tlhwatlhwakgolo, ba tla apara seaparo se se dirilweng ka letsela la kgetsi;+

E bile mo boemong jwa gore ba nne bantle, ba tla nna le letshwao la go baboga.

25 Banna ba Siona ba tla bolawa ka tšhaka,

E bile banna ba gagwe ba ba maatla ba tla swela kwa tlhabanong.+

26 Dikgoro tsa gagwe di tla hutsafala di bo di utlwa botlhoko,+

E bile o tla nna fa fatshe a kgakgabetse.”+

“Re tla ja senkgwe sa rona

E bile re tla apara diaparo tsa rona;

Re kopa fela go bidiwa ka leina la gago

Gore re tlose matlhabisaditlhong a rona.”*+

5 Tsweetswee mma ke opelele moratiwa wa me,

Ke opele pina e e ka ga moratiwa wa me le tshimo ya gagwe ya morara.*+

O ne a jala morara o mohibidu o o e gaisang yotlhe mo go yone,

A aga tora mo gare ga yone,

A bo a epa segatisetso sa beine mo go yone.+

Go tswa foo, o ne a nna a solofetse gore e tlhagise morara o o monate,

Mme e ne ya tlhagisa morara o o botlha fela.+

 3 “Jaanong, lona banni ba Jerusalema le lona batho ba Juda,

Tsweetswee atlholang fa gare ga me le tshimo ya me ya morara.+

 4 Nkabo ke dirile eng gape mo tshimong ya me ya morara,

Se ke iseng ke se dire?+

Goreng e ne ya tlhagisa morara o o botlha fela,

Fa nna ke ne ke solofetse gore e tlhagise morara o o monate?

 5 Tsweetswee, mma jaanong ke lo bolelele

Se ke tla se dirang mo tshimong ya me ya morara:

Ke tla tlosa legora la yone,

Mme e tla fisiwa.+

Ke tla thuba lobota lwa yone lwa maje,

Mme e tla gatakwa.

 6 Ke tla dira gore e kgakgabale;+

Ga e kitla e pomiwa kgotsa e tlhagolwa.

E tla tlhoga ditlhatshana tsa mmitlwa le mefero,+

E bile ke tla laela maru gore a se ka a e nesetsa pula.+

 7 Gonne tshimo ya morara ya ga Jehofa wa masomosomo ke setšhaba sa Iseraele;+

Batho ba Juda ke dijalo tse a neng a di rata thata.

O ne a nna a solofetse gore batho ba tla busa ka tshiamo,+

Mme ga ba a ka ba dira se se mo molaong;

O ne a nna a solofetse gore batho ba tla dira se se siameng,

Mme o ne a utlwa selelo sa batho ba ba sa tshwarweng sentle.”+

 8 Ruri go tla atlholwa ba ba tsayang matlo a mantsi,+

Le ba ba tsayang masimo a mantsi+

Go fitlha go sa tlhole go na le sepe se se saletseng ope

Ba bo ba nna ba le bosi mo lefatsheng.

 9 Ke utlwile Jehofa wa masomosomo a ikana a re,

Matlo a le mantsi, le fa a le magolo e bile a le mantle,

A tla nna matlotla a a tshosang,

A se na banni.+

10 Gonne tshimo ya morara e kgolo e tla tlhagisa selekanyo sa dilitara di le 22* fela tsa beine

Le selekanyo sa dikilogerama di le 160* sa peo ya korong se tla tlhagisa dikilogerama di le 16*+ fela tsa korong.

11 Ruri go latlhega batho ba ba tsogang go sa le phakela gore ba nwe bojalwa,+

Ba ba nnang go fitlha go nna lefifi mo ba felelang ba tagwa ke beine.

12 Kwa meletlong ya bone go na le harepa le seletswa sa megala,

Moropana, fulutu le beine;

Mme ga ba ele tlhoko tiro ya ga Jehofa,

E bile ga ba bone tiro ya diatla tsa gagwe.

13 Ka jalo, batho ba me ba tla ya botshwarwa

Ka gonne ga ba nkitse;+

Batlotlegi ba bone ba tla bolawa ke tlala,+

Le batho botlhe ba bone ba tla phaphalala ka ntlha ya lenyora.

14 Ka jalo, Lebitla* le ikokeditse

E bile le butse molomo wa lone thata go feta selekanyo;+

Mme ba bantlentle* ba gagwe, boidiidi jwa gagwe jo bo modumo le ba ba tlhapetsweng ke boitumelo

Ruri ba tla fologela mo go lone.

15 Mme motho o tla ikoba,

Motho o tla kokobediwa,

Le motho wa matlho a a mabela o tla kokobediwa.

16 Jehofa wa masomosomo o tla tlotlomadiwa ka ntlha ya katlholo* e a tla e ntshang;

Modimo wa boammaaruri, Modimo yo o Boitshepo,+ o tla bontsha gore o boitshepo ka go dira tshiamo.+

17 Mme dikwanyana di tla fula jaaka e kete di fula mo mafulong a tsone;

Batswakwa ba tla ja mo mafelong a a kgakgabetseng a diphologolo tse di fepilweng sentle.

18 Ruri go latlhega ba ba buang maaka! Maaka a bone a goga molato wa bone

Le boleo jwa bone jaaka e kete phologolo e e gogang kara ka dikgole;

19 Ba ba reng: “A Modimo a potlakise tiro ya gagwe;

A e tle ka bonako gore re tle re e bone.

A boikaelelo* jwa Modimo yo o boitshepo wa Iseraele bo diragale

Gore re tle re bo itse.”+

20 Ruri go latlhega ba ba reng molemo ke bosula, le bosula ke molemo,+

Ba ba emisetsang lefifi ka lesedi, le lesedi ka lefifi,

Ba ba bayang bogalaka mo boemong jwa botshe, le botshe mo boemong jwa bogalaka.

21 Ruri go latlhega ba ba iponang ba le botlhale

Le ba ba tsayang gore ba na le temogo!+

22 Ruri go latlhega ba ba nwang beine thata,

Le batho ba e leng ditswerere tsa go tlhakanya dinôtagi,+

23 Ba ba gololang modirabosula gore ba newe pipamolomo+

Le ba ba sa direleng mosiami tshiamiso.+

24 Ka jalo, fela jaaka molelo o laila lotlhaka

Le bojang jo bo omeletseng bo sha mo molelong,

Medi ya bone le yone e tla bola,

Le malômô* a bone a tla phatlalala jaaka lorole,

Ka gonne ba ganne molao* wa ga Jehofa wa masomosomo,

E bile ba nyaditse lefoko la Modimo yo o Boitshepo wa Iseraele.+

25 Ke gone ka moo bogale jwa ga Jehofa bo tukelang batho ba gagwe,

Mme o tla ba tsholeletsa seatla sa gagwe a bo a ba kgemetha.+

Dithaba di tla roroma,

Le ditopo tsa bone di tla nna jaaka matlakala mo mebileng.+

Ka ntlha ya dilo tseno tsotlhe, bogale jwa gagwe ga bo a boela morago,

Mme o sa ntse a otlolotse seatla sa gagwe gore a ba kgemethe.

26 O tsholeleditse setšhaba sengwe se se kgakala sesupo;*+

O ba leleditse molodi gore ba tle ba tswa kwa dikhutlong tsa lefatshe;+

Mme ba tla ba itlhaganetse thata.+

Mabanta a a mo mathekeng a bone ga a a bofologa,

E bile dikgole tsa ditlhako* tsa bone ga di a kgaoga.

28 Metswi ya bone yotlhe e bogale,

Le mara a bone otlhe a obilwe.*

Ditlhakwana tsa dipitse tsa bone di tshwana le leje le le thata,

E bile maotwana a dikara tsa bone a tshwana le phefo ya matsubutsubu.+

29 Go kurutla ga bone go tshwana le ga tau;

Ba kurutla jaaka ditawana.*+

Ba tla duma ba bo ba tshwara se ba se tsomang

E bile ba tla tsamaya ka sone go se na ope yo o se gololang.

30 Mo letsatsing leo ba tla duma mo godimo ga se ba se tsomang

Jaaka go suma ga lewatle.+

Ope fela yo o lebang mo lefatsheng, o tla bona lefifi le le tshosang;

Tota le lesedi le tla bo le fifetse ka ntlha ya maru.+

Ka gonne mafoko a a tswang mo molomong wa me ga a phepa,

E bile ke tshela le batho ba mafoko a bone a seng phepa;+

Gonne matlho a me a bone Kgosi, e bong Jehofa wa masomosomo ka boene.”

Molato wa gago o phimotswe,

Le boleo jwa gago bo itshwaretswe.”*

‘Lo tla utlwa gangwe le gape,

Mme ga lo kitla lo tlhaloganya;

Lo tla bona gangwe le gape,

Mme ga lo kitla lo nna le kitso epe.’+

10 Thatafatsa pelo ya batho bano,+

Thiba ditsebe tsa bone,+

O bo o ngaparaganye matlho a bone,

Gore ba se ka ba bona

E bile ba se ka ba utlwa,

Gore pelo ya bone e se ka ya tlhaloganya

E bile ba se ka ba boela mo go nna mme ba fodisiwa.”+

“Go fitlha metse e thubagana e nna marope, e sala e se na banni,

Le matlo a sala a se na batho,

Le naga e senngwa e bo e kgakgabala;+

12 Go fitlha Jehofa a tlosa batho a ba isa kgakala+

Le go kgakgabala ga lefatshe go nna maswe thata.

“Leano la bone ga le kitla le atlega,

E bile ga le kitla le diragala.

 8 Gonne tlhogo ya Siria ke Damaseko,

Mme tlhogo ya Damaseko ke Resine.

Mo dingwageng di le 65 fela

Eferaime o tla bo a tšhwetlakantswe gotlhelele mo a tla bong a sa tlhole a le setšhaba.+

 9 Tlhogo ya Eferaime ke Samarea,+

Mme tlhogo ya Samarea ke morwa Remalia.+

Fa lo se na tumelo e e nonofileng,

Ga lo kitla lo sirelediwa.”’”

 6 “E re ka setšhaba seno se ganne metsi a Shiloa*+ a a elelang ka iketlo,

Mme se itumelela Resine le morwa Remalia,+

 7 Jehofa o tla romela kgosi ya Asiria+

Le masole otlhe a yone gore a tlhasele batho ba gagwe.

O tla tla ka bonako jaaka metsi a mantsi a Noka*

A a tlatsang melatswana yotlhe ya yone,

E bile a penologa mo lotshitshing longwe le longwe lwa yone.

O tla tshwana le morwalela o o kgabaganyang o bo o ya go fitlha fa molaleng;+

Diphuka tsa gagwe tse di tsharolotsweng di tla tlatsa bophara jwa lefatshe la gago,

Wena Imanuele!”*+

Buang se lo se ratang, mme ga se kitla se atlega,

Gonne Modimo o na le rona!*+

Lo se ka lwa boifa se ba se boifang;

Lo se ka lwa se tshoga.

13 Jehofa wa masomosomo ke Ene yo lo tshwanetseng go mo tsaya a le boitshepo,+

Ke Ene yo lo tshwanetseng go mmoifa,

E bile ke Ene yo lo tshwanetseng go mo tlotla.”+

14 O tla nna jaaka lefelo le le boitshepo,

Le fa go ntse jalo, o tla nna jaaka leje le le digang

Le jaaka lefika le le kgopang+

Mo magosing a mabedi a Iseraele,

Le jaaka serai le letlowa

Mo banning ba Jerusalema.

15 Ba le bantsi ba bone ba tla kgopiwa, ba tla wa ba bo ba robega;

Ba tla beelwa serai ba bo ba tshwarwa.

16 Tswala momeno o molaetsa o kwaletsweng mo go one;

Baya letshwao mo molaong* o na le barutwa ba me.

 2 Batho ba ba neng ba tsamaya mo lefifing

Ba bone lesedi le legolo.

Mme ba ba nnang mo lefatsheng la moriti o montsho,

Ba phatsimetswe ke lesedi.+

 3 O dirile gore setšhaba se nne le batho ba bantsi;

O dirile gore boitumelo jwa sone bo nne bogolo.

Ba itumela fa pele ga gago

Jaaka fa batho ba itumela ka nako ya thobo,

Jaaka batho ba ba itumelelang go kgaogana dilo tse ba di gapileng.

 4 Gonne o robagantse jokwe ya morwalo wa bone,

Le thobane e e mo magetleng a bone, thobane ya mookamedi wa bone,

Jaaka mo motlheng wa Midiana.+

 5 Setlhako sengwe le sengwe se se roromisang lefatshe fa se gwanta

Le seaparo sengwe le sengwe se se tletseng madi

Di tla fisiwa ka molelo.

 6 Gonne re tsaletswe ngwana,+

Re neilwe ngwana wa mosimane;

Mme o tla nna le taolo ya go busa.*+

 7 Puso ya gagwe e tla busa gongwe le gongwe,

Gape go tla nna le kagiso go ya go ile+

Mo setulong sa bogosi sa ga Dafide+ le mo bogosing jwa gagwe.

Bo tla tiisiwa thata+ e bile bo tla nonotshiwa

Ka tshiamiso+ le ka tshiamo,+

Go tloga jaanong go ya bosakhutleng.

 8 Jehofa o ne a romela molaetsa wa katlholo kwa go Jakobe,

Mme o tla diragadiwa mo Iseraele.+

 9 Mme batho botlhe ba Eferaime le banni ba Samarea

Ba tla itse ka gone,

Ba ba buang jaana ka mabela le ka pelo e e tletseng lonyatso:

10 “Ditena di ole,

Mme re tla aga ka maje a a betlilweng.+

Ditlhare tsa mosikamore di remilwe,

Mme re tla di emisetsa ka masedara.”

11 Jehofa o tla dira gore baganetsi ba ga Resine ba mo tlhasele,

E bile o tla tlhotlheletsa baba ba Iseraele gore ba tlhasele,

12 Siria e tla tswa kwa botlhaba mme Bafilisitia ba tla tswa kwa bophirima,*+

Ba tla bula melomo ya bone ba bo ba kometsa Iseraele.+

Ka ntlha ya dilo tseno tsotlhe, bogale jwa gagwe ga bo a boela morago,

Mme o sa ntse a otlolotse seatla sa gagwe gore a ba kgemethe.+

13 Gonne batho ga ba a boela kwa go Ene yo o ba kgemethang;

Ga ba a batla Jehofa wa masomosomo.+

14 Jehofa o tla kgaola Iseraele

Tlhogo le mogatla, letlhogela le mokhasi,* mo letsatsing le le lengwe fela.+

15 Mogolwane yo o tlotliwang thata ke tlhogo,

Mme moporofeti yo o ntshang taelo ya maaka ke mogatla.+

16 Baeteledipele ba batho bano ba dira gore ba kgarakgatshege,

Mme ba ba eteletsweng pele ba tlhakane tlhogo.

17 Ke gone ka moo Jehofa a se kitlang a itumelela makawana a bone,

E bile a se kitla a utlwela botlhoko dikhutsana* le batlholagadi ba bone

Ka gonne botlhe ke batlhanogi le badirabosula+

E bile molomo mongwe le mongwe o bua se se se nang tlhaloganyo.

Ka ntlha ya dilo tseno tsotlhe, bogale jwa gagwe ga bo a boela morago,

Mme o sa ntse a otlolotse seatla sa gagwe gore a ba kgemethe.+

18 Gonne bosula bo tuka jaaka molelo,

Bo laila ditlhatshana tsa mmitlwa le mefero.

Mme bo tla fisa ditlhatshana tse di kitlaneng tsa sekgwa,

E bile di tla kuelela mosi.

19 Tšhakgalo ya ga Jehofa wa masomosomo

E dirile gore lefatshe le she,

E bile batho ba tla fisiwa ke molelo.

20 Mongwe o tla kgaola dijo ka fa mojeng,

Le fa go ntse jalo, o tla nna a tshwerwe ke tlala;

Mme yo mongwe o tla ja dijo ka fa molemeng

Le fa go ntse jalo, ga a kitla a kgora.

Mongwe le mongwe o tla ja nama ya lebogo la gagwe,

21 Manase o tla kometsa Eferaime,

Le Eferaime o tla kometsa Manase.

Ka ntlha ya dilo tseno tsotlhe, bogale jwa gagwe ga bo a boela morago,

Mme o sa ntse a otlolotse seatla sa gagwe gore a ba kgemethe.+

Ba ka metlha ba kwalang ditaelo tse di gatelelang,

 2 Gore ba ganele bahumanegi ka ditshwanelo tsa bone,

Gore ba se ka ba direla batho ba maemo a a kwa tlase tshiamiso,+

Ba tseye dithoto tsa batlholagadi

Ba bo ba gape dithoto tsa dikhutsana.*+

 3 Lo tla dira eng ka letsatsi la katlholo,+

Fa tshenyego e tla e tswa kgakala?+

Lo tla tshabela kwa go mang gore a lo thuse,+

E bile lo tla tlogela khumo* ya lona kae?

 4 Ga go na se lo ka se dirang fa e se go gagaba fa gare ga magolegwa

Kgotsa go wela mo go ba ba bolailweng.

Ka ntlha ya dilo tseno tsotlhe, bogale jwa gagwe ga bo a boela morago,

Mme o sa ntse a otlolotse seatla sa gagwe gore a ba kgemethe.+

 5 “Reetsang! Moasiria,+

Ke thobane e ke e dirisang go bontsha gore ke galefile,+

Mme ke dirisa thobane e e mo seatleng sa gagwe go otlhaya.

 6 Ke tla mo romela gore a ye go tlhasela setšhaba sa motlhanogi,+

A ye go tlhasela morafe o o nkgalefisitseng;

Ke tla mo laela gore a tseye go le gontsi le gore a gape go le gontsi

Le gore a ba gatake jaaka seretse mo mebileng.+

 7 Le fa go ntse jalo, ga a kitla a tlhotlheletsega go dira ka tsela eo

E bile pelo ya gagwe ga e kitla e ikaelela go dira jalo;

Gonne mo pelong ya gagwe o ikaeletse go nyeletsa

Le go fedisa ditšhaba di le dintsi, e seng di le mmalwa.

 8 Gonne a re,

‘A dikgosana tsa me tsotlhe ga se dikgosi?+

10 Seatla sa me se nyeleditse magosi a a obamelang medimo e e se nang mosola,

A ditshwantsho tsa one tse di betlilweng di neng di le dintsi go feta tsa Jerusalema le Samarea.+

11 A ga nkitla ke dira Jerusalema le medingwana ya yone

Fela jaaka ke dirile Samarea le medimo ya yone e e se nang mosola?’+

12 “Fa Jehofa a wetsa tiro yotlhe ya gagwe mo Thabeng ya Siona le kwa Jerusalema, o* tla otlhaya kgosi ya Asiria ka ntlha ya pelo ya gagwe e e tletseng lonyatso le tsela e a lebang ka yone e e bontshang mabela le boikgodiso.+ 13 Gonne a re,

‘Ke tla dira seno ka nonofo ya seatla sa me

Le ka botlhale jwa me, ka gonne ke botlhale.

Ke tla tlosa melelwane ya ditšhaba+

Ke bo ke tsaya matlotlo a tsone,+

E bile ke tla fenya banni ba teng fela jaaka yo o maatla.+

14 Seatla sa me se tla tsaya matlotlo a ditšhaba

Fela jaaka motho a tsenya seatla mo sentlhageng;

E bile ke tla phutha lefatshe lotlhe

Fela jaaka motho a phutha mae a a tlogetsweng.

16 Ka jalo Morena wa boammaaruri, Jehofa wa masomosomo,

O tla dira gore batho ba gagwe ba ba nonneng ba bopame,+

E bile Asiria ga a kitla a tlhola a galalela, o tla nna jaaka e kete o fisitswe ke molelo.+

17 Lesedi la Iseraele+ le tla fetoga molelo,+

Le Modimo wa gagwe yo o Boitshepo o tla fetoga kgabo ya molelo;

E tla tuka e bo e laila mefero ya gagwe le ditlhatshana tsa gagwe tsa mmitlwa mo letsatsing le le lengwe fela.

18 O tla fedisa gotlhelele bontle jwa sekgwa sa gagwe le jwa tshingwana ya gagwe ya maungo;

Go tla nna jaaka fa motho yo o lwalang a koafalela pele.+

19 Ditlhare tsotlhe tsa sekgwa sa gagwe tse di setseng

Di tla bo di le mmalwa mo mosimane a ka kgonang go di bala.

20 Mo letsatsing leo, ba ba setseng ba Iseraele

Le ditlogolwana tse di falotseng tsa ga Jakobe,

Ga ba kitla ba tlhola ba ikaega ka yo o neng a ba kgemetha;+

Mme ka boikanyegi, ba tla ikaega ka Jehofa,

Modimo yo o Boitshepo wa Iseraele.

21 Go tla boa masalela fela,

Masalela a ga Jakobe, a boela kwa go Modimo Mothata.+

22 Gonne le fa gone batho ba gago, wena Iseraele,

Ba tshwana le motlhaba* wa lewatle,

Go tla boa masalela a bone fela.+

Go dirilwe tshwetso ya gore ba fedisiwe,+

E bile ba tla welwa ke katlholo.+

23 Eleruri tshwetso ya go ba fedisa e e dirilweng ke Morena Molaodimogolo, Jehofa wa masomosomo,

E tla diragadiwa mo nageng eo yotlhe.+

27 Mo letsatsing leo, morwalo wa gagwe o tla tloga mo legetleng la gago,+

Le jokwe ya gagwe e tla tloga mo thamong ya gago,+

Mme jokwe eo e tla robega+ ka ntlha ya leokwane.”

28 O ne a tla mo Aiatha;+

O ne a ralala Migerone;

A baya dithoto tsa gagwe kwa Mikemashe.+

29 Ba kgabagantse karolo e go kgabaganngwang noka mo go yone,

Ba ne ba lala kwa Geba;+

Rama e a roroma, Gibea+ wa ga Saulo o tshabile.+

O kgatikanyetsa lebole la gagwe kwa thabeng ya ga morwadia Siona,

E leng thota ya Jerusalema.

33 Morena wa boammaaruri, Jehofa wa masomosomo,

O rema dikala gore di phatlakane ka modumo o mogolo;+

Ditlhare tse ditelele thata di a kgaolwa,

E bile ditlhare tse di goletseng kwa godimo di a kokobediwa.

34 O kgemetha ditlhatshana tse di kitlaneng tsa sekgwa ka selepe,*

Mme Lebanona o tla digwa ke motho yo o maatla.

11 Kalana+ e tla tlhoga mo sesaneng sa ga Jese,+

E bile letlhogela+ le le tswang mo meding ya gagwe le tla ungwa.

 2 Mme moya wa ga Jehofa o tla nna mo go ene,+

Moya wa botlhale+ le temogo,

Moya wa kgakololo le maatla,+

Moya wa kitso le wa go boifa Jehofa.

Ga a kitla a atlhola go ya ka se a se bonang ka matlho,

E bile ga a kitla a kgalemela go ya fela ka se a se utlwang.+

 4 O tla atlhola batho ba maemo a a kwa tlase ka tshiamo,

E bile o tla dira ditshwetso tse di siameng gore a sireletse ba ba pelonolo ba ba mo lefatsheng.

Mafoko a gagwe a tla tshwana le thobane e a tla e dirisang go itaya lefatshe+

A bo a bolaya batho ba ba bosula ka mafoko* a gagwe.+

 5 Tshiamo e tla nna lebanta mo lothekeng lwa gagwe,

Le boikanyegi e tla nna lebanta mo dinôkeng tsa gagwe.+

 6 Phiri e tla nna le kwanyana ka nakwana,+

Mme lengau le potsane di tla iketla mmogo,

E bile namane le tawana* le phologolo e e nonneng tsotlhe di tla nna mmogo;*+

Mme mosimanyana o tla di etelela pele.

 7 Kgomo le bera di tla fula mmogo,

E bile bana ba tsone ba tla iketla mmogo.

 8 Ngwana yo o anyang o tla tshameka fa mosimeng wa kake,

E bile ngwana yo o kgwisitsweng o tla baya seatla sa gagwe mo godimo ga mosima wa noga e e botlhole.

 9 Ga di kitla di baka kotsi epe+

E bile ga di kitla di senya mo thabeng ya me yotlhe e e boitshepo,+

Ka gonne ruri lefatshe le tla bo le tletse kitso ya ga Jehofa

Fela jaaka metsi a khurumeditse lewatle.+

Ditšhaba di tla leba kwa go ene gore a di kaele,*+

Mme lefelo la gagwe la boikhutso le tla galalela.

13 Lefufa la ga Eferaime le tla bo le fedile,+

E bile baba ba Juda ba tla fedisiwa.

Eferaime ga a kitla a fufegela Juda,

E bile Juda ga a kitla a nna mmaba wa Eferaime.+

14 Mme ba tla fologela mo mekgokoloseng* ya Bafilisitia e e kwa bophirima;

Ba tla gapa dithoto tsa batho ba kwa Botlhaba ba le mmogo.

Ba tla fenya* Edoma+ le Moabe,+

Mme Baamone ba tla fetoga babusiwa ba bone.+

15 Jehofa o tla kgaoganya* kgogometso* ya lewatle la Egepeto+

A bo a kgatikanya seatla sa gagwe mo godimo ga Noka.*+

O tla e itaya mo melatswaneng ya yone* e supa ka mohemo* wa gagwe o o babolang,

Mme o tla dira gore batho ba kgabaganye ba rwele ditlhako* tsa bone.

16 Mme go tla nna le tsela e kgolo+ e e tswang mo Asiria e masalela a batho ba gagwe+ a tla tsamayang ka yone,

Fela jaaka e ne ya nna teng mo letsatsing la fa Baiseraele ba ne ba tswa kwa lefatsheng la Egepeto.

“Ke a go leboga, wena Jehofa,

Gonne le fa o ne o nkgalefetse,

Bogale jwa gago bo ne jwa kokobela ka iketlo, mme o ne wa nkgomotsa.+

Ke tla mo ikanya e bile ga nkitla ke boifa sepe;+

Gonne Jah* Jehofa ke nonofo ya me le maatla a me,

E bile ke poloko ya me.”+

 3 Lo tla ga metsi ka boitumelo

Mo metsweding ya poloko.+

“Ntshetsang Jehofa ditebogo, bitsang leina la gagwe,

Itsiseng ditiro tsa gagwe mo ditšhabeng!+

 6 Goa o bo o tlhabe mokgosi wa boitumelo, wena monni wa* Siona,

Gonne Modimo yo o Boitshepo wa Iseraele yo o mo gare ga lona o mogolo.”

Ba goeletseng, ba bitseng ka seatla,

Gore ba tle go tsena mo dikgorong tsa batlotlegi.

Ke biditse batlhabani ba me gore ba bontshe bogale jwa me,

Batho ba me ba ke ba itumelelang thata.

 4 Reetsang! Boidiidi mo dithabeng;

Go utlwala e kete ke modumo wa batho ba bantsi!

Reetsang! Pheretlhego ya magosi,

Ya ditšhaba tse di phuthegileng mmogo!+

 5 Ba tswa kwa nageng e e kgakala,+

Ba tswa kwa bofelelong jwa magodimo,

Jehofa le dibetsa tsa bogale jwa gagwe,

Gore a tle go senya lefatshe lotlhe.+

 7 Ke gone ka moo diatla tsotlhe di tla golafalang,

Le pelo ya motho mongwe le mongwe e tla nyerolosiwang ke poifo.+

Ba tshwerwe ke dikerempe e bile ba mo ditlhabing

Jaaka mosadi yo o mo ditlhabing tsa pelegi.

Ba lebana ba tshogile,

Ka difatlhego tse di aparetsweng ke khutsafalo.

 9 Bonang! Letsatsi la ga Jehofa le etla,

Le setlhogo, le tletse tšhakgalo le bogale jo bo tukang,

Le tlile go dira gore lefatshe e nne selo se se tshosang,+

E bile le tlile go nyeletsa baleofi mo lefatsheng.

10 Gonne dinaledi tsa magodimo le masomosomo a tsone*+

Ga di kitla di ntsha lesedi la tsone;

Letsatsi le tla fifala fa le tlhaba,

Le ngwedi ga e kitla e phatsimisa lesedi la yone.

11 Ke tla otlhaela baagi ba lefatshe bosula jwa bone,+

E bile ke tla otlhaela batho ba ba bosula maleo a bone.

Ke tla fedisa boikgogomoso jwa batho ba ba ikgogomosang,

E bile ke tla kokobetsa bagateledi ba ba mabela.+

12 Ke tla dira gore motho a bonwe sewelo go gaisa gauta e e itshekisitsweng,+

E bile ke tla dira gore batho ba bonwe sewelo go gaisa gauta ya Ofire.+

13 Ke gone ka moo ke tla dirang gore magodimo a rorome,

E bile lefatshe le tla tshikhinyega le bo le tswa mo lefelong la lone+

Ka ntlha ya tšhakgalo ya ga Jehofa wa masomosomo mo letsatsing la bogale jwa gagwe jo bo tukang.

14 Fela jaaka tshephe e e tsomiwang le jaaka letsomane le le se nang ope yo o ka le phuthang,

Mongwe le mongwe o tla boela kwa bathong ba gagabo;

Mongwe le mongwe o tla tshabela kwa nageng ya gagabo.+

15 Ope fela yo o fitlhelwang o tla phunyelediwa,

E bile ope fela yo o tshwarwang o tla bolawa ka tšhaka.+

16 Bana ba bone ba tla phatlakanngwa ba ntse ba lebile,+

Matlo a bone a tla thukuthiwa,

Le basadi ba bone ba tla betelelwa.

17 Jaanong ke dira gore Bameda ba ba tlhasele,+

Ba ba tsayang selefera e se sepe

Le ba ba sa kgatlhiweng ke gauta.

18 Bora jwa bone bo tla thubaganya makawana;+

Ga ba kitla ba tlhomogela masea pelo

E bile ga ba kitla ba utlwela bana botlhoko.

19 Mme wena Babelona, yo o galalelang thata mo magosing,*+

Bontle le boikgogomoso jwa Bakaladia,+

O tla tshwana le Sodoma le Gomora fa Modimo a ne a di ribegetsa.+

20 Ga a kitla a tlhola a nniwa,

E bile ga a kitla a nna lefelo le go ka agiwang mo go lone mo dikokomaneng tsotlhe.+

Ga go kitla go nna le Moarabia yo o tlhomang tente ya gagwe gone,

E bile ga go kitla go nna le badisa ba ba bothisang matsomane a bone gone.

21 Ditshedi tsa mo sekakeng di tla botha gone;

Matlo a bone a tla tlala merubisi.

Bontšhe ba tla nna gone,+

Le dipodi tsa naga* di tla tlolaka gone.

22 Ditshedi tse di bokolelang di tla lela mo ditoreng tsa gagwe,

Le bophokoje ba tla lela mo matlong a gagwe a segosi a manobonobo.

 5 Jehofa o robile thobane ya ba ba bosula,

E leng molamu wa babusi,+

 6 Ba ba itayang ditšhaba ba galefile, ba di itaya ba sa kgaotse,+

Ba ba fenyang merafe ba shakgetse, ba e bogisa setlhogo ba sa kgaotse.+

 8 Tota le ditlhare tsa mofira di a go itumelela,

Mmogo le masedara a kwa Lebanona.

Tsa re, ‘Fa e sa le o wa,

Ga go na moremi ope wa logong yo o re tlhaselang.’

 9 Tota le Lebitla* ka fa tlase le fuduegile

Gore le go kgatlhantshe fa o tla.

Ka ntlha ya gago, le tsosa batho ba ba suleng,

Baeteledipele botlhe ba ba gatelelang* ba lefatshe.

10 Botlhe ba a bua mme ba go raya ba re,

‘A le wena o nnile bokoa jaaka rona?

11 Boikgogomoso jwa gago bo foloseditswe kwa Lebitleng,*

Le modumo wa diletswa tsa gago tsa megala o khutlile.+

Dibokwana di ikadile ka fa tlase ga gago jaaka bolao,

Mme diboko ke kobo ya gago.’

12 Ruri o ole kwa legodimong,

Wena yo o phatsimang, morwa bosa!

Ruri o kgaotswe mme wa digelwa mo lefatsheng,

Wena yo o neng o fenya ditšhaba!+

Ke tla tsholeletsa setulo sa me sa bogosi kwa godimo ga dinaledi tsa Modimo,+

E bile ke tla nna fa fatshe mo thabeng e go kopanelwang mo go yone,

Kwa dikarolong tse di kwa kgakala thata tsa bokone.+

14 Ke tla tlhatlogela kwa godimodimo ga maru;

Ke tla dira gore ke tshwane le Mogodimodimo.’

15 Le fa go ntse jalo, o tla folosediwa kwa Lebitleng,*

Kwa dikarolong tse di kwa tengteng tsa khuti.

16 Ba ba go bonang ba tla go tlhoma matlho;

Ba tla go sekaseka ka kelotlhoko ba re,

‘A motho yono ke ene yo o neng a tshikinya lefatshe,

Yo o neng a roromisa magosi,+

17 Yo o neng a dira gore lefatshe le batho ba nnang mo go lone le nne fela jaaka naga

A bo a ribegetsa metse ya lone,+

Yo o neng a gana go letla magolegwa a gagwe go boela gae?’+

18 Dikgosi tse dingwe tsotlhe tsa ditšhaba,

Tota, dikgosi tsotlhe, di fitlhwa ka tsela e e tlotlegang,

Nngwe le nngwe mo lebitleng* la yone.

19 Mme wena o tla latlhiwa o sa fitlhiwe mo lebitleng,

Jaaka letlhogela* le le nyatsegang,

O khurumeditswe ke batho ba ba bolailweng ba ba tlhabilweng ka tšhaka,

Ba ba fologelang kwa majeng a khuti,

Jaaka setoto se se gatakiwang ka dinao.

20 Ga o kitla o fologela kwa go bone kwa lebitleng,

Ka gonne o sentse naga ya gago,

O bolaile batho ba gago.

21 Baakanyetsang bomorwawe lefelo la go bolawa

Ka ntlha ya maleo a borraabonemogolo,

Gore ba se ka ba nna maatla ba bo ba gapa lefatshe

Ba bo ba tlatsa naga ka metse ya bone.”

“Fela jaaka ke ikaeletse, go tla nna jalo,

E bile fela jaaka ke sweditse, seo ke sone se se tla diragalang.

25 Ke tla thubaganya Moasiria mo lefatsheng la me,

E bile ke tla mo gataka mo dithabeng tsa me.+

Jokwe ya gagwe e tla tlosiwa mo go bone,

Le morwalo wa gagwe o tla tlosiwa mo legetleng la bone.”+

26 Seno ke se se sweditsweng* se se tla tlelang lefatshe lotlhe,

E bile seno ke seatla se se otlololetsweng* ditšhaba tsotlhe.

27 Gonne Jehofa wa masomosomo o dirile tshwetso,

Mme ke mang yo o ka e kgoreletsang?+

Seatla sa gagwe se otlologile,

Mme ke mang yo o ka se busetsang morago?+

29 “O se ka wa itumela, wena Filisitia, ope fela wa gago a se ka a itumela,

Fela ka gonne thobane ya yo o go kgemethang e robagantswe.

Gonne mo losikeng lwa noga+ go tla tswa noga e e botlhole,+

Mme ngwana wa yone e tla nna noga e e botlhole e e bonako.

30 Fa maitibolo a batho ba maemo a a kwa tlase a ja,

Le bahumanegi ba rapama ka pabalesego,

Ke tla bolaya losika lwa gago ka leuba,

Mme se se setseng sa gago se tla bolawa.+

Gonne go tla masole a a tswang kwa bokone jaaka e kete ke mosi,

E bile ga go na bape ba ba tsamayang ka bonya mo mephatong eo.”

Ba tla ba araba ba re Jehofa o theile motheo wa Siona,+

E bile batho ba gagwe ba maemo a a kwa tlase ba tla tshabela mo go ene.

Ara+ wa Moabe o didimaditswe,

Ka gonne a sentswe mo bosigong bo le bongwe.

Kire+ wa Moabe o didimaditswe,

Ka gonne a sentswe mo bosigong bo le bongwe.

 2 O tlhatlogetse kwa Ntlong* le kwa Dibone,+

Kwa mafelong a a kwa godimo a a boitshepo gore a ye go lela.

Botlhe ba bokolela ba le mo marulelong a bone le mo dipatlelong tsa bone;

Ba fologela kwa tlase ba lela.+

 4 Heshebone le Eleale+ ba a goa;

Lentswe la bone le utlwiwa go ya go fitlha kwa Jahase.+

Ba tsamaya ba ntse ba lela fa ba tlhatloga thotana ya Luhithe;

Ba tsamaya ba ntse ba lela ka ntlha ya masetlapelo ao, ba le mo tseleng e e yang kwa Horonaime.+

 6 Gonne metsi a Nimerime a kgadile;

Bojang jo botala bo omeletse,

Bojang bo nyeletse mme ga go a sala sepe se setala.

 7 Ke gone ka moo ba tsayang se se setseng mo mabolokelong a bone le mo matlotlong a bone;

Ba kgabaganya mokgatšha* wa ditlhare tsa modibonoka.

Go bokolela ga bone go fitlha kwa Egelaime;

Go bokolela ga bone go fitlha kwa Beere-elime.

 9 Gonne metsi a kwa Dimone a tletse madi,

Mme go sa ntse go na le dilo tseno tse ke tla di tlisang mo Dimone:

Batho ba Moabe ba ba falolang le ba ba setseng mo nageng eo,

Ke tla ba romelela tau.+

16 Romelelang mmusi wa lefatshe phelefu,

Go tswa kwa Sela go ralala naga

Go ya kwa thabeng ya ga morwadia Siona.

 2 Fela jaaka nonyane e e lelekilweng mo sentlhageng sa yone,+

Bomorwadia Moabe ba tla nna jalo kwa go kgabaganngwang noka gone kwa Arenone.+

Mogateledi o tla fedisiwa,

Tshenyo e tla khutla,

E bile ba ba gatakang ba bangwe ba tla fedisiwa mo lefatsheng.

E tla ikanyega e bile puso ya gagwe e tla nna e e sireletsegileng e e dirang dilo ka lorato lo lo sa kgaotseng;+

E tla atlhola ka tekatekano e bile e tla diragatsa tshiamo ka bonako.”+

 6 Re utlwile ka mabela a ga Moabe gore o ikgogomosa thata,+

Re utlwile ka boikgodiso jwa gagwe le mabela a gagwe le tšhakgalo ya gagwe;+

Le fa go ntse jalo, puo ya gagwe e e se nang mosola e tla fela.

 7 Ka jalo, Moabe o tla lelela Moabe;

Botlhe fela ba tla bokolela.+

 8 Gonne masimo a Heshebone+ a swabile,

E leng ditlhare tsa morara wa Sibema,+

Babusi ba ditšhaba ba gatakile dikala tsa tsone tse dikhibidu;*

Ba ne ba ya go fitlha kwa Jasere;+

Ba ne ba fetela kwa nageng.

Ke tla go kolobetsa ka dikeledi tsa me, wena Heshebone le Eleale,+

Ka gonne modumo wa go itumelela maungo a gago a selemo le thobo ya gago o khutlile.*

10 Boitumelo le boipelo di tlositswe mo tshingwaneng ya maungo,

E bile ga go na dipina tsa boipelo kgotsa modumo wa boitumelo mo masimong a morara.+

11 Ke gone ka moo ke fuduegileng ka ntlha ya Moabe,+

Jaaka modumo wa harepa,

E bile dikarolo tsa me tse di kwa tengteng di fuduegile ka ntlha ya Kire-haresethe.+

“Damaseko ga e kitla e tlhola e nna motse,

Mme e tla fetoga mokoa wa marope.+

 2 Metse ya Aroere+ e tla tlogelwa;

E tla fetoga mafelo a matsomane a bothang mo go one

Go se na ope yo o a tshosang.

 3 Metse e e sireletsegileng e tla nyelela kwa Eferaime,+

Le bogosi bo tla nyelela kwa Damaseko;+

Mme kgalalelo ya ba ba setseng ba Siria

E tla nyelela fela jaaka kgalalelo ya bomorwa Iseraele,” go bua Jehofa wa masomosomo.

 4 “Mo letsatsing leo, kgalalelo ya ga Jakobe e tla fokotsega,

E bile mmele wa gagwe o o itekanetseng* o tla bopama.

 5 Iseraele o tla nna jaaka dijo tse dinnye tsa ditlhaka tse di setseng,

Tse motho a di phuthang morago ga thobo

Mo masimong a a iseng a robiwe mo Mokgatšheng* wa Refaime.+

 6 Go tla sala fela se se phuthiwang,

Jaaka fa go tlhotlhoriwa setlhare sa motlhware:

Go tla sala fela metlhware e e buduleng e le mebedi kgotsa e le meraro mo kaleng e e kwa godimo thata,

Go tla sala fela e le menê kgotsa e le metlhano mo dikaleng tsa sone tse di ungwang,”+ go bua Jehofa Modimo wa Iseraele.

 9 Mo letsatsing leo, metse ya gagwe ya phemelo e tla nna jaaka lefelo le le tlhokomologilweng mo sekgweng,+

Jaaka kala e e neng e latlhilwe fa pele ga Baiseraele;

Le tla fetoga naga e e kgakgabetseng.

10 Gonne o lebetse Modimo+ yo o go bolokang;

Ga o a ka wa gakologelwa Lefika+ le e leng kago ya gago ya phemelo.

Ke gone ka moo o jalang dijalo tse dintle*

E bile o di tlhoma ka letlhogela la motswakwa.*

11 Motshegare o agelela dijalo tsa gago ka kelotlhoko,

Mo mosong o dira gore peo ya gago e tlhoge,

Mme thobo ya gago e tla nyelela mo letsatsing la fa o lwala thata e bile o le mo ditlhabing tse di sa foleng.+

12 Reetsang! Go na le khuduego ya ditšhaba tse dintsi,

Tse di fuduegang jaaka mawatle.

Go utlwala pheretlhego ya merafe,

E modumo wa yone o tshwanang le go suma ga metsi a a maatla.

O tla di kgalema, mme di tla tshabela kgakala

Di phepheulega jaaka mmoko o o tswang mo dithabeng o phepheulwa ke phefo,

Jaaka mofero o o itshokeletsang o tsewa ke phefo ya matsubutsubu.

Eno ke kabelo ya ba ba tsayang dithoto tsa rona,

E bile ke karolo ya ba ba re gapelang.

18 Ruri masetlapelo a tla tlela lefatshe le le tletseng modumo wa go phaphasela ga diphuka tsa ditshenekegi

Mo kgaolong ya dinoka tsa Ethiopia.+

 2 Lefatshe leno le romela barongwa ka lewatle,

Ba raletse metsi ba palame mekoro ya papirase, le re:

“Tsamayang, lona barongwa ba ba bofefo,

Lo ye kwa setšhabeng sa batho ba baleele ba letlalo le le borethe,*

Kwa morafeng o o boifiwang gongwe le gongwe,+

Kwa setšhabeng se se nonofileng, se se fenyang,*

Se lefatshe la sone le gogolwang ke dinoka.”

 3 Lona banni botlhe ba lefatshe le lona baagi ba lefatshe,

Se lo se bonang se tla tshwana le sesupo* se se tsholeditsweng mo dithabeng,

E bile lo tla utlwa modumo o o tshwanang le wa go lediwa ga lonaka.

“Ke tla nna ke sa tshwenngwe ke sepe ke bo ke leba mo* lefelong la me,

Jaaka mogote le lesedi le le tswang mo letsatsing,

Jaaka leru la monyo mo mogoteng wa thobo.

 5 Gonne pele ga thobo,

Fa ditlhare di sena go thunya mme malômô* a fetoga morara* o o tlogang o butswa,

Matlhogela a tla kgaolwa ka disekele

Le dikalana tse di lepeletseng di tla kgaolwa di bo di tlosiwa.

 6 Tsotlhe di tla tlogelelwa dinonyane tse di jang nama tsa kwa dithabeng

Le dibatana tsa lefatshe.

Dinonyane tse di jang nama di tla fetsa selemo mo go tsone,

E bile dibatana tsotlhe tsa lefatshe di tla fetsa nako ya thobo mo go tsone.

 7 Ka nako eo Jehofa wa masomosomo o tla tlisediwa mpho,

E tswa kwa setšhabeng sa batho ba baleele ba letlalo le le borethe,*

Kwa morafeng o o boifiwang gongwe le gongwe,

Kwa setšhabeng se se nonofileng, se se fenyang,*

Se lefatshe la sone le gogolwang ke dinoka,

Mpho eo e tlisiwa kwa lefelong le leina la ga Jehofa wa masomosomo le leng mo go lone, e leng Thaba ya Siona.”+

Medimo e e se nang mosola ya Egepeto e tla roroma fa pele ga gagwe,+

E bile dipelo tsa Egepeto di tla tshoga.

 2 “Ke tla tlhotlheletsa Baegepeto gore ba nne kgatlhanong le Baegepeto,

Mme ba tla lwantshana,

Mongwe le mongwe a lwantsha morwarraagwe le moagelani wa gagwe,

Motse o lwantsha motse o mongwe, bogosi bo lwantsha bogosi jo bongwe.

 3 Mme Baegepeto ba tla akabala,

E bile ke tla tlhakatlhakanya dithulaganyo tsa bone.+

Ba tla leba kwa medimong e e se nang mosola,

Kwa batshereanying le kwa bathong ba ba dirisanang le badimo le kwa go ba ba bolelelang ditiragalo pele.+

 4 Ke tla tsenya Egepeto mo seatleng sa mmusi yo o gatelelang,

E bile ba tla busiwa ke kgosi e e setlhogo,”+ go bua Morena wa boammaaruri, Jehofa wa masomosomo.

 5 Metsi a lewatle a tla kgala,

Le noka e tla phaphalala e bile e tla kgala.+

 6 Mme dinoka di tla nkga sebodu;

Mesele ya Noka ya Nile e e kwa Egepeto e tla kgala e bo e phaphalala.

 7 Dimela tse di fa thoko ga Noka ya Nile, kwa molomong wa Noka ya Nile,

Le dijalo tsotlhe tse di jadilweng fa thoko ga Nile+ di tla omelela.+

 8 Batshwaraditlhapi ba tla hutsafala,

Ba ba tshwarang ditlhapi ka dihuku mo Nile ba tla lela,

E bile ba ba tsharololelang matlowa a bone mo metsing ba tla fokotsega.

 9 Ba ba dirang letsela ka tlhale ya semela sa leloba*+

Le ba ba dirang matsela a masweu, ba tla tlhabiwa ke ditlhong.

10 Balogi ba gagwe ba tla thubagana;

Badiri botlhe ba ba thapilweng ba tla hutsafala.

“Nna ke setlogolwana sa batho ba ba botlhale,

Setlogolwana sa dikgosi tsa bogologolo”?

13 Dikgosana tsa Soane di dirile ka boeleele;

Dikgosana tsa Nofe*+ di tsieditswe;

Dikgosana tsa ditso tsa gagwe di timeditse Egepeto.

14 Jehofa o dirile gore a tlhakane tlhogo;+

Mme ba timeditse Egepeto mo go sepe fela se a se dirang,

Fela jaaka motho yo o tagilweng a relela mo matlhatseng a gagwe.

15 Mme Egepeto ga e kitla e nna le tiro epe e e ka e dirang,

E ka tswa e le e e ka dirwang ke tlhogo kgotsa mogatla, letlhogela kgotsa mokhasi.*

Masetlapelo a tswa kwa nageng, a tswa kwa nageng e e boifisang,

A tla jaaka diphefo tsa matsubutsubu tse di phepheulang kwa borwa.+

Leferefere le dira boferefere,

Le mosenyi o a senya.

Ke tshwerwe ke ditlhabi

Tse di tshwanang le tsa mosadi yo o belegang.

Ke ngomogile pelo thata mo ke sa kgoneng go utlwa;

Ke fuduegile thata mo ke sa kgoneng go bona.

 7 Mme o ne a bona kara ya ntwa e gogwa ke setlhopha sa dipitse,

Kara ya ntwa e gogwa ke ditonki,

Kara ya ntwa e gogwa ke dikamela.

“Jehofa, ke nna ke eme mo toreng ya go lebelela motshegare,

E bile ke eme mo lefelong le ke nnang mo go lone fa ke disa bosigo bongwe le bongwe.+

10 Lona batho ba me ba lo ntseng lo phothiwa,

Thobo* ya seboana sa me,+

Ke lo begetse se ke se utlwileng mo go Jehofa wa masomosomo, Modimo wa Iseraele.

Lo tla lala gaufi le ditlhare dingwe mo sekakeng,

Lona ditlhopha tsa batsamai ba kwa Dedane.+

14 Tlang ka metsi lo ye go kgatlhantsha yo o nyorilweng,

Lona banni ba lefatshe la Tema,+

Mme motho yo o tshabang lo mo tlisetse senkgwe.

15 Gonne ba tshabile ditšhaka, ba tshabile tšhaka e e somotsweng,

Ba tshabile bora jo bo obilweng e bile ba tshabile ntwa e e setlhogo.

 2 O ne o tletse pheretlhego,

Wena motse o o tletseng khuduego, motse o o tletseng boitumelo.

Batho ba gago ba ba bolailweng ga ba a bolawa ka tšhaka,

E bile ga ba a swela kwa tlhabanong.+

Botlhe ba ba neng ba fitlhelwa ba ne ba dirwa magolegwa,+

Tota le fa ba ne ba tshabetse kgakala.

 4 Ke gone ka moo ke neng ka re: “Tlosang matlho a lona mo go nna,

Mme ke tla lela mo go botlhoko.+

Lo se ka lwa pateletsa go nkgomotsa

Ka ntlha ya go senngwa ga batho ba me.+

 5 Gonne ke letsatsi la tlhakatlhakano le la go fenngwa le la go tsenwa ke tsebetsebe,+

Le le tswang kwa go Morena Molaodimogolo, Jehofa wa masomosomo,

Mo Mokgatšheng wa Ponatshegelo.

Lobota lo a thubiwa+

E bile go na le selelo se se utlwiwang kwa thabeng.

 6 Elama+ e tsaya mokotlopo*

E tla ka dikara tse di pegileng batho le ka dipitse,*

Mme Kire+ e baakanya thebe.

 7 Mekgatšha* ya gago e e e gaisang yotlhe

E tla tlala dikara tsa ntwa,

Mme dipitse* di tla ema mo maemong a tsone fa kgorong,

 8 Mme sesiro* sa Juda se tla tlosiwa.

12 Mo letsatsing leo Morena Molaodimogolo, Jehofa wa masomosomo,

O tla laela gore batho ba lele ba bo ba hutsafale,+

Ba beole ditlhogo ba bo ba apare letsela la kgetsi.

13 Mme bone ba a keteka e bile ba itumetse,

Ba tlhaba dikgomo le dinku,

Ba ja nama e bile ba nwa beine.+

 3 Korong* ya Shihore* e ne e tsamaisiwa mo metsing a mantsi,+

E leng thobo ya Nile, e e mo tlisetsang lotseno,

E e tlisang poelo ya ditšhaba.+

 4 Tlhajwa ke ditlhong, wena Sidona, wena kago e e thata ya lewatle,

Ka gonne lewatle le rile:

“Ga ke ise nke ke nne le ditlhabi tsa pelegi, e bile ga ke ise nke ke belege,

Le gone ga ke ise nke ke godise basimane kgotsa basetsana.”*+

 5 Batho ba tla tshoga ka ntlha ya pego e e amanang le Ture+

Fela jaaka fa ba ne ba utlwa pego e e amanang le Egepeto.+

 8 Ke mang yo o dirileng tshwetso eno ya gore Ture e diragalelwe ke seno,

E leng motse o o tlhomang dikgosi,

O bagwebi ba one e neng e le dikgosana,

O barekisi ba one ba neng ba tlotliwa mo lefatsheng lotlhe?+

 9 Jehofa wa masomosomo o dirile tshwetso eno,

Gore a fedise boikgogomoso jwa Ture ka ntlha ya bontle jotlhe jwa yone,

Gore a tlontlolole botlhe ba ba neng ba tlotliwa go ralala lefatshe.+

11 Jehofa o otlolotse seatla sa gagwe mo godimo ga lewatle;

O tshikintse magosi.

12 Mme a re: “Ga o kitla o tlhola o itumela,+

Wena yo o gateletsweng, morwadia Sidona wa kgarebane.

Ba emisitse dikara tsa ntwa tse e keteng ditora go dikologa motse;

Ba thukuthile ditora tsa one tse di sireletsegileng,+

Ba o dirile marope.

14 Bokolelang, lona dikepe tsa Tareshishe,

Gonne kago ya lona e e thata e sentswe.+

Letsa harepa ya gago ka botswerere;

Opela dipina tse dintsi

Gore ba tle ba go gopole.”

Batho mmogo le moperesiti,

Motlhanka le mong wa gagwe,

Lelata le mohumagadi wa lone,

Moreki le morekisi,

Yo o adimang le yo o adingwang,

Yo o kolotisang le yo o kolotang.+

 3 Lefatshe le tla sala le le lolea;

Le tla thukuthiwa gotlhelele,+

Gonne Jehofa o buile lefoko leno.

 5 Lefatshe le kgotletswe ke banni ba lone,+

Gonne ba tlhokomologile melao,+

Ba fetotse melawana,+

E bile ba tlodile kgolagano e e nnelang ruri.*+

 6 Ke gone ka moo phutso e kometsang lefatshe,+

E bile ba ba nnang mo go lone ba bonwe molato.

Ke gone ka moo banni ba lefatshe ba fokotsegileng,

E bile go setse batho ba le mmalwa thata.+

 7 Beine e ntšha e a kgala, morara* o a swaba,+

E bile botlhe ba ba dipelo di itumetseng ba a lela.+

 8 Modumo o o ipedisang wa meropana o kgaoditse;

Modumo wa ba ba tlhapetsweng ke boitumelo o khutlile;

Modumo o o itumedisang wa harepa o kgaoditse.+

 9 Ba nwa beine ba sa opele,

E bile ba ba nwang bojalwa ba utlwa bo le bogalaka.

10 Motse o o se nang batho o thubilwe;+

Ntlo nngwe le nngwe e tswetswe gore ope a se ka a tsena mo go yone.

Boitumelo jotlhe bo nyeletse;

Boipelo jwa lefatshe bo fedile.+

12 Motse o tlogetswe e le marope fela;

Kgoro e thubagantswe gore e sale e le mokoa wa matlakala.+

Go tla nna jaaka fa go tlhotlhoriwa setlhare sa motlhware,+

Jaaka fa go phuthiwa se se setseng morago ga thobo ya morara.+

14 Ba tla tsholetsa mantswe a bone,

Ba tla goa ka boitumelo.

15 Ke gone ka moo ba tla galaletsang Jehofa kwa kgaolong ya lesedi;*+

Ba tla galaletsa leina la ga Jehofa, Modimo wa Iseraele, kwa ditlhaketlhakeng tse di mo lewatleng.+

Ruri go latlhega nna! Batho ba tsietsa ba bangwe e bile ba dira ka boferefere;

Batho ba nna ba tsietsa e bile ba dira ka boferefere.”+

18 Mongwe le mongwe yo o tshabang modumo o o tshosang o tla wela mo khuting,

Mme mongwe le mongwe yo o tswang mo khuting o tla tshwarwa ke serai.+

Gonne dikgoro tsa merwalela tse di kwa godimo di tla bulwa,

Le metheo ya lefatshe e tla roroma.

19 Lefatshe le phatlogile;

Lefatshe le reketlisitswe;

Lefatshe le tshikinyega thata.+

20 Lefatshe le thetheekela jaaka motho yo o tagilweng,

E bile le temeka le ya kwa pele le kwa morago jaaka ntlwana e temeka mo phefong.

Molato wa lone o le imela thata,+

Mme le tla wa, mo le se kitlang le tsoga gape.

21 Mo letsatsing leo, Jehofa o tla atlhola lesomo le le kwa godimo thata

Le dikgosi tse di mo lefatsheng.

22 Mme ba tla phuthiwa mmogo

Jaaka magolegwa a phuthelwa mo khuting,

Mme ba tla tswalelwa mo khuting ya kgolegelo;

Morago ga malatsi a le mantsi ba tla otlhaiwa.

23 Ngwedi yo o tletseng o tla tlhabiwa ke ditlhong,

Le letsatsi le le phatsimang le tla swaba,+

Gonne Jehofa wa masomosomo e setse e le Kgosi+ mo Thabeng ya Siona+ le kwa Jerusalema,

O galalela fa pele ga bagolwane ba setšhaba sa gagwe.*+

Ke a go tlotlomatsa, ke baka leina la gago,

Gonne o dirile dilo tse di gakgamatsang,+

Dilo tse o neng o di ikaeletse* go tswa metlheng ya bogologolo,+

O di dirile ka boikanyegi,+ le ka boammaaruri.

 2 Gonne o dirile gore motse o fetoge mokoa wa maje,

O dirile gore motse o o sireletsegileng o fetoge marope.

Tora ya batswakwa ga e tlhole e le motse;

Ga e kitla e tlhola e agiwa sesha.

 3 Ke gone ka moo setšhaba se se nonofileng se tla go galaletsang;

Motse wa ditšhaba tse di gatelelang o tla go boifa.+

 4 Gonne o fetogile kago e e thata mo mothong wa maemo a a kwa tlase,

Kago e e thata mo mohumaneging fa a le mo matshwenyegong,+

Botshabelo fa pula ya matsubutsubu e na,

Le moriti fa go le mogote.+

Fa bagateledi ba shakgetse jaaka pula ya matsubutsubu e e itayang lobota,

 5 Jaaka mogote mo nageng e e omeletseng,

Wena o okobatsa khuduego ya batswakwa.

Fela jaaka mogote o o okobadiwang ke moriti wa leru,

Pina ya bagateledi le yone e didimadiwa jalo.

 6 Mo thabeng eno,+ Jehofa wa masomosomo o tla direla ditšhaba tsotlhe

Mokete wa dijo tsa maemo,+

Mokete wa beine e e monate,*

Wa dijo tsa maemo tse di nang le nama e ntsi,*

Wa beine e e monate, e e tlhotlhilweng.

 7 Mo thabeng eno, o tla fedisa* kobo e e khurumeditseng ditšhaba tsotlhe

Le lesire* le le logagantsweng mo godimo ga merafe yotlhe.

 8 Morena Molaodimogolo Jehofa o tla kometsa* loso ka bosakhutleng,+

E bile o tla phimola dikeledi mo difatlhegong tsotlhe.+

O tla tlosa kgobo mo bathong ba gagwe mo lefatsheng lotlhe,

Gonne Jehofa ka boene o buile seno.

Re solofetse mo go ene,+

Mme o tla re boloka.+

10 Gonne seatla sa ga Jehofa se tla nna mo thabeng eno,+

Mme Moabe o tla gatakwa mo lefelong la gagwe+

Fela jaaka lotlhaka lo gatakelwa mo mokoeng wa motshotelo.

11 Mme Modimo o tla otlololela Moabe diatla tsa gagwe

Fela jaaka fa mongwe yo o thumang a otlolola diatla tsa gagwe fa a thuma,

Mme o tla kokobetsa mabela a Moabe+

A e itaya a dirisa diatla tsa gagwe ka botswerere.

12 Mme motse o o sireletsegileng, o o nang le dipota tse di o sireletsang,

O tla o isa kwa tlase;

O tla o latlhela fa fatshe, mo loroleng.

 2 Bulang dikgoro+ gore setšhaba se se siameng se tsene,

Setšhaba se se ikanyegang.

 3 O tla sireletsa ba ba ikaegang ka wena;*

O tla dira gore ba tswelele ba na le kagiso,+

Ka gonne ba a go ikanya.+

 4 Ikanyeng Jehofa ka bosakhutleng,+

Gonne Jah* Jehofa ke Lefika+ le le nnetseng ruri.

O o isa kwa tlase,

O o isa kwa tlase mo lefatsheng;

O o latlhela fa fatshe mo loroleng.

 6 Lonao lo tla o gataka,

E leng dinao tsa ba ba bogisiwang, dikgato tsa batho ba maemo a a kwa tlase.”

E re ka o tlhamaletse,

O tla rethefatsa tsela ya basiami.

 8 Jehofa, fa re ntse re latela tselana ya dikatlholo tsa gago,

Re solofela mo go wena.

 9 Fa go le bosigo, ke go tlhologelelwa ka pelo ya me yotlhe,

Ruri moya wa me o nna o go batla;+

Gonne fa o atlhola lefatshe,

Banni ba lefatshe ba ithuta ka ga tshiamo.+

10 Tota le fa motho yo o bosula a utlwelwa botlhoko,

Ga a kitla a ithuta tshiamo.+

Tota le mo lefatsheng la tshiamo o tla dira se se bosula,+

Mme ga a kitla a bona bogolo jwa ga Jehofa.+

12 Wena Jehofa, o tla re naya kagiso,+

Ka gonne sengwe le sengwe se re se dirileng

Ke wena o re thusitseng go se dira.

13 Wena Jehofa, Modimo wa rona, babusi ba bangwe ntle le wena ba a re laola,+

Le fa go ntse jalo, re bitsa leina la gago fela.+

Gonne o ne wa itepatepanya le bone

Gore o ba nyeletse mo ba ka se tlholeng ba gopolwa.

15 O okeditse setšhaba, wena Jehofa,

O okeditse setšhaba;

O ikgalaleditse.+

16 Wena Jehofa, ba ne ba leba kwa go wena fa ba le mo matshwenyegong;

Ba ne ba rapelela kwa tlase ka tlhoafalo fa o ne o ba otlhaya.+

17 Fela jaaka mosadi yo o moimana yo o tlogang a belega

A nna le ditlhabi tsa pelegi e bile a goa ka ntlha ya ditlhabi,

Le rona re ne ra nna jalo ka ntlha ya gago, wena Jehofa.

18 Re ne ra ima, ra nna le ditlhabi tsa pelegi,

Mme go ne ga nna jaaka e kete re belege phefo.

Ga re a tlisetsa lefatshe poloko,

E bile ga go na ope yo o tshotsweng gore a nne mo lefatsheng leno.

Tsogang mme lo goe ka boitumelo,

Lona ba ba nnang mo loroleng!+

Gonne monyo wa lona o tshwana le monyo wa mo mosong,*

E bile lefatshe le tla letla gore ba ba suleng ba boe ba tshele.*

20 Tsamayang batho ba me, tsenang mo diphaposing tsa lona tse di kwa teng,

Lo bo lo tswala dikgoro fa lo sena go tsena.+

Iphitlheng ka nakwana

Go fitlha tšhakgalo* e fetile.+

21 Gonne Jehofa o tswa kwa lefelong la gagwe,

O tla go sekisetsa banni ba lefatshe molato wa bone,

Mme lefatshe le tla senola madi a a tshololetsweng mo go lone

E bile ga le kitla le tlhola le fitlha ba ba bolailweng ba ba mo go lone.”

27 Mo letsatsing leo, Jehofa o tla otlhaya Lefiathane, noga e e lelemelang,*

O tla otlhaya Lefiathane,* noga e e itsoketsang,

A dirisa tšhaka ya gagwe e e bogale, e kgolo le e e nonofileng,+

E bile o tla bolaya setshedi seno se setona thata se se mo lewatleng.

Ke mo sireletsa bosigo le motshegare,

Gore ope a se ka a mo gobatsa.+

A a dire kagiso le nna;

A a agisane le nna.”

 6 Mo malatsing a a tlang Jakobe o tla mela medi,

Iseraele o tla ntsha malômô* a bo a tlhoga dikala tse disha,+

E bile ba tla tlatsa naga ka maungo.+

 9 Ka jalo, molato wa ga Jakobe o tla itshwarelwa ka tsela eno,+

E bile eno e tla nna tuelo e e tletseng fa boleo jwa gagwe bo tlosiwa:

Modimo o tla dira gore maje otlhe a sebeso

A nne jaaka maje a kalaka a a thubagantsweng,

E bile ga go na dikota dipe tse di boitshepo* kgotsa ditlhomo dipe tsa maswalo tse di tla tlogelwang.+

10 Gonne motse o o sireletsegileng o tla tlogelwa o le nosi fela;

Mafulo a tla tlogelwa a bo a kgakgabala jaaka naga.+

Namane e tla fula koo e bo e botha gone

E bile e tla ja dikala tsa gagwe.+

11 Fa dikalana tsa gagwe di sena go omelela,

Basadi ba tla tla ba bo ba di roba,

Ba gotsa molelo ka tsone.

Ke gone ka moo Modiri wa bone a se kitlang a ba utlwela botlhoko,

E bile Mmopi wa bone ga a kitla a ba amogela.+

Ke mokgabisa o montle o o tshwanang le lelômô* le le swabang,

Le le mo motseng o o kwa godimo mo mokgatšheng o o nonneng, kwa batho ba ba fekeediwang ke beine ba nnang gone.

O tla latlhela serwalo seo fa fatshe mo lefatsheng ka maatla,

Jaaka sefako se se nang ka dikgadima, e leng phefo ya matsubutsubu e e senyang,

Jaaka pula ya matlakadibe ya metsi a morwalela a a maatla.

 3 Dirwalo tse matagwa a Eferaime a ikgantshang* ka tsone

Di tla gatakwa ka dinao.+

 4 Mme lelômô le le swabang la bontle jwa gagwe jo bo galalelang,

Le le mo motseng o o kwa godimo mo mokgatšheng wa mmu o o nonneng,

Le tla nna jaaka mofeige wa ntlha go butswa pele ga selemo.

 7 Bano le bone ba a fapoga ka ntlha ya beine;

Dinô tsa bone tse di tagang di dira gore ba thetheekele.

Moperesiti le moporofeti ba faposiwa ke bojalwa;

Beine e ba tlhakanya tlhogo,

E bile bojalwa jwa bone bo dira gore ba thetheekele;

Ba a fapoga ka gonne ga ba bone sentle,

E bile ga ba atlhole sentle.+

 8 Gonne ditafole tsa bone di tletse matlhatsa a a leswe,

Ga go na gope fa a seyong teng.

 9 Motho o tla naya mang kitso,

Le gone motho o tla tlhalosetsa mang molaetsa?

A o tla tlhalosetsa ba ba sa tswang go kgwisiwa mashi,

Ba ba sa tswang go kgwisiwa lebele?

10 Gonne ba re ke “taelo morago ga taelo, taelo morago ga taelo,

Thapo morago ga thapo, thapo morago ga thapo,*+

Bonnye fano, bonnye fale.”

“Taelo morago ga taelo, taelo morago ga taelo,

Thapo morago ga thapo, thapo morago ga thapo,*+

Bonnye fano, bonnye fale,”

Gore fa ba tsamaya

Ba tle ba kgopiwe ba bo ba wela kwa morago

Mme ba tla robaganngwa, ba beelwa serai ba bo ba tshwarwa.+

14 Ka jalo utlwang lefoko la ga Jehofa, lona baikgantshi,

Lona babusi ba batho bano mo Jerusalema,

15 Gonne lwa re:

“Re dirile kgolagano le Loso,+

E bile re dirile tumalano* le Lebitla.*

Fa morwalela wa tshoganyetso o o galefileng o kgabaganya,

Ga o kitla o fitlha kwa go rona,

Gonne re dirile maaka botshabelo jwa rona

E bile re iphitlhile ka maaka.”+

“Jaanong ke baya leje le le lekilweng e le motheo+ mo Siona,

Leje la sekhutlo*+ le le tlhwatlhwakgolo la motheo o o tlhomameng.+

17 Mme ke tla dira gore tshiamiso e nne thapo e e lekanyang+

Le tshiamo e nne sedirisiwa se se tlhamalatsang.*+

Sefako se tla senya botshabelo jwa maaka,

Le metsi a tla gogola lefelo la go iphitlha.

18 Kgolagano ya lona le Loso e tla senyega,

E bile tumalano ya lona le Lebitla* ga e kitla e nnela ruri.+

Fa morwalela wa tshoganyego o o galefileng o kgabaganya,

O tla lo gogola.

19 Nako le nako fa morwalela oo o kgabaganya,

O tla lo gogola;+

Gonne o tla kgabaganya moso mongwe le mongwe,

Bosigo le motshegare.

20 Gonne bolao bo bokhutshwane thata gore motho a ka namalala mo go jone,

E bile shiti e tshesane thata gore motho a ka iphutha ka yone.

21 Gonne Jehofa o tla ema fela jaaka kwa Thabeng ya Perasime;

O tla fuduega jaaka kwa mokgatšheng* o o gaufi le Gibeone,+

Gore a tle a dire tiro ya gagwe, e leng tiro e e sa tlwaelegang

Le gore a tle a dire mmereko wa gagwe, e leng mmereko o o sa tlwaelegang.+

22 Jaanong lo se ka lwa sotla,+

Gore dikgole tse lo bofilweng ka tsone di se ka tsa gagamadiwa le go feta,

Gonne ke utlwile Morena Molaodimogolo, Jehofa wa masomosomo,

A bolela gore go dirilwe tshwetso ya gore naga* yotlhe e fedisiwe.+

23 Sekegang tsebe mme lo reetse lentswe la me;

Tlhwayang tsebe mme lo reetse se ke se buang.

25 Fa a sena go o lekalekanya,

A ga a gase kumina yo montsho a bo a jala kumina yo mongwe,

E bile a ga a leme korong, lebêlêbêlê* le barele mo mafelong a tsone

Le korong+ e e tlhabang mo matlhakoreng?

27 Gonne kumina yo montsho ga a thubiwe ka selei sa go photha,+

E bile leotwana la kara ga le tsamaisiwe mo godimo ga kumina yo mongwe.

Go na le moo, kumina yo montsho o phothiwa ka thobane,

Mme kumina yo mongwe o phothiwa ka thobane.

Nnyaa, ga a e phothe a sa kgaotse;+

Mme fa a tsamaisa leotwana la kara ya gagwe mo godimo ga yone ka dipitse tsa gagwe,

Ga a e thuge.+

29 Seno le sone se tswa kwa go Jehofa wa masomosomo,

Yo kgakololo* ya gagwe e leng molemo

Le yo o fitlheletseng dilo tse dikgolo.*+

Tswelelang ngwaga le ngwaga;

A modikologo wa meletlo+ o tswelele.

 2 Le fa go ntse jalo, ke tla tlisetsa Ariele masetlapelo,+

Mme go tla nna le khutsafalo le selelo se segolo,+

E bile mo go nna, o tla nna jaaka leiso la sebeso sa Modimo.+

 3 Ke tla kampa mo matlhakoreng otlhe gore ke tle ke lwe le wena,

E bile ke tla aga legora go go dikologa

Ke bo ke aga dithako gore ke go tlhasele.+

 4 O tla kokobediwa;

O tla bua go tswa mo mmung,

Mme se o se buang se tla felela mo loroleng.

Lentswe la gago le tla tswa mo mmung+

Jaaka lentswe la motho yo o dirisanang le badimo,

E bile mafoko a gago a tla tswirinya a tswa mo loroleng.

 5 Baba ba gago* ba bantsintsi ba tla nna jaaka lorole lo lo boleta,+

Bagateledi ba bantsintsi ba tla nna fela jaaka mmoko o o fofang.+

 6 Jehofa wa masomosomo o tla go golola

Ka tumo ya maru, thoromo ya lefatshe le modumo o mogolo,

Ka phefo ya matsubutsubu, setsuatsue le dikgabo tsa molelo o o lailang.”+

 7 Foo batho ba bantsintsi ba ditšhaba tsotlhe tse di tlhabanang le Ariele,+

Botlhe ba ba lwang le ene,

Dikara tsa ntwa tse e keteng ditora tse di mo tlhaselang,

Le botlhe ba ba mo tlisetsang masetlapelo,

Ba tla nna jaaka toro, e leng ponatshegelo ya bosigo.

 8 Ruri go tla nna fela jaaka fa motho yo o tshwerweng ke tlala a lora a ja,

Mme a bo a tsoga a tshwerwe ke tlala,*

E bile go tla nna jaaka fa motho yo o tshwerweng ke lenyora a lora a nwa,

Mme a bo a tsoga a lapile e bile a tshwerwe ke lenyora.*

Batho ba bantsintsi ba ditšhaba tsotlhe tse di tlhabanang le Thaba ya Siona,

Le bone ba tla diragalelwa ke sone seo.+

 9 Akabalang lo bo lo gakgamale;+

Iphoufatseng mme lo foufale.+

Ba tagilwe, mme ga ba a tagiwa ke beine;

Ba a thetheekela, mme ga ba a nwa bojalwa.

10 Gonne Jehofa o dirile gore lo robale boroko jo bogolo;+

O tswetse matlho a lona, lona baporofeti,+

E bile o khurumeditse ditlhogo tsa lona, lona ba lo bonang diponatshegelo.+

13 Jehofa a re: “Batho bano ba atamela kwa go nna ka melomo ya bone fela,

E bile ba ntlotla ka melomo ya bone fela,+

Mme dipelo tsa bone di kgakala le nna;

E bile go mpoifa ga bone go theilwe mo ditaelong tsa batho tse ba di rutilweng.+

14 Ka jalo, ke nna Yo ke tla dirang dilo tse di gakgamatsang gape ka batho bano,+

Ke tla dira dikgakgamatso ka go latelana;

Mme botlhale jwa batho ba bone ba ba botlhale bo tla nyelela,

E bile tlhaloganyo ya batho ba bone ba ba botlhale e tla fitlhiwa.”+

Ba direla ditiro tsa bone mo lefifing,

Ba ntse ba re: “Ke mang yo o re bonang?

17 Mo lobakeng lo lokhutshwane fela, Lebanona e tla fetolwa tshingwana ya maungo,+

Mme tshingwana eo ya maungo e tla tshwana fela le sekgwa.+

18 Mo letsatsing leo, bosusu ba tla utlwa mafoko a a mo bukeng,

Mme difofu di tla tswa mo letobong le mo lefifing di bo di bona.+

19 Ba ba pelonolo ba tla itumela thata ka ntlha ya ga Jehofa,

Le bahumanegi ba tla itumela ka ntlha ya Modimo yo o Boitshepo wa Iseraele.+

20 Mogateledi o tla bo a sa tlhole a le gone,

Moikgantshi o tla fedisiwa,

Le botlhe ba ba nnang ba ipaakanyeditse go gobatsa ba tla senngwa,+

21 Ba ba buang maaka gore ba bangwe ba felele ba le molato,

Ba ba beelang mofemedi* dirai kwa kgorong ya motse,+

Le ba ba ganang go direla mosiami tshiamiso ka ntlha ya dikganetsano tse di sa utlwaleng.+

“Jakobe ga a kitla a tlhola a tlhabiwa ke ditlhong,

E bile sefatlhego sa gagwe ga se kitla se tlhola se nna sesetlha.*+

23 Gonne fa a bona bana ba gagwe,

Ba e leng tiro ya diatla tsa me, ba na le ene,+

Ba tla baka leina la me;

Ruri ba tla baka Modimo yo o Boitshepo wa ga Jakobe,

E bile ba tla tlotla Modimo wa Iseraele.+

24 Ba ba duleng mo tseleng ba tla ithuta go tlhaloganya,

Le ba ba ngongoregang ba tla amogela thuto.”

30 Jehofa a re, “Ruri go latlhega barwa ba ba tlhogoethata,+

Ba ba diragatsang dithulaganyo tse e seng tsa me,+

Ba ba dirang dikgolagano,* mme ba sa kaelwa ke moya wa me,

E le gore ba oketse boleo ka boleo.

 2 Ba ya kwa Egepeto+ ba sa mpotsa,*+

Ba ya go batla tshireletsego kwa go Faro*

E bile ba tshabela mo moriting wa Egepeto.

 3 Le fa go ntse jalo, kago e e thata ya ga Faro e tla dira gore ba tlhabiwe ke ditlhong,

Le moriti wa Egepeto o ba tshabetseng mo go one o tla dira gore ba tlontlologe.+

 4 Gonne dikgosana tsa gagwe di kwa Soane,+

E bile barongwa ba gagwe ba ile ba bo ba fitlha kwa Hanese.

 5 Botlhe ba tla tlhabisiwa ditlhong

Ke batho ba ba ka se ba tsweleng mosola ka sepe,

Ba ba ka se ba thuseng e bile ba ka se ba tswele mosola,

Ba ba ba tlhabisang ditlhong le ba ba ba tlontlololang.”+

Ba ralala lefatshe la matshwenyego le la mathata,

La tau, tau e e kurutlang,

La noga ya lebolobolo le noga e e botlhole e e bonako

Ba pegile dikhumo tsa bone mo mekwatleng ya ditonki

Le dilo tse ba itlamelang ka tsone ba di pegile mo diroteng tsa dikamela.

 8 “Jaanong tsamaya, o kwale molaetsa oo mo sekwalelong ba go lebile,

O bo o o kwale mo bukeng,+

Gore o tle o dirisiwe mo nakong e e tlang

E le bosupi jo bo nnelang ruri.+

 9 Gonne ke batlhanogi,+ barwa ba ba tsietsang,+

Barwa ba ba sa batleng go utlwa molao* wa ga Jehofa.+

“E re ka lo gana lefoko leno+

Mme lo ikanya boferefere le tsietso

E bile lo ikaega ka dilo tseno,+

13 Jaanong ka ntlha ya molato wa lona, lo tshwana le lobota lo lo thubegileng,

Jaaka lobota lo lo kwa godimo lo lo kokomogileng.

14 Lobota loo lo tla thubega jaaka nkgo e kgolo ya mmopi wa letsopa,

Lo tla thubaganngwa gotlhelele mo go se kitlang go sala kapetla epe mo dikarolwaneng tse di thubagantsweng

Gore go gogolwe molelo mo leisong

Kgotsa go gelelwe metsi mo mogobenyaneng* ka yone.”

“Fa lo boela mo go nna lo bo lo ikhutsa, lo tla bolokwa;

Fa lo nna lo ritibetse e bile lo ntshepa, lo tla nna le maatla.”+

17 Batho ba le sekete ba tla roroma ba boifa motho a le mongwe;+

Lo tla tshaba lo boifa batho ba le batlhano

Go fitlha ba ba setseng ba lona ba nna jaaka pilara e le nngwe kwa godimo ga thaba,

Le jaaka kota ya sesupo mo thoteng.+

18 Le fa go ntse jalo, Jehofa o letile ka bopelotelele* gore a lo tlhomogele pelo,+

Mme o tla lo utlwela botlhoko.+

27 Jehofa o e tla,

O tla a tuka bogale e bile o tla ka maru a magolo.

Molomo wa gagwe o tletse tšhakgalo,

E bile loleme lwa gagwe lo tshwana le molelo o o lailang.+

28 Moya* wa gagwe o tshwana le molatswana o o penologang o o fitlhang mo molaleng,

Gore o tshikinye ditšhaba ka sêfê ya go senya;*

E bile merafe e tla tsenngwa tomo mo ditlhaeng,+ tomo e e dirang gore e fapoge.

29 Mme pina ya lona e tla tshwana le pina e e opelwang bosigo

Fa lo baakanyetsa* moletlo,+

E bile pelo ya lona e tla itumela jaaka motho

Yo o tsamayang ka* fulutu

A ya kwa thabeng ya ga Jehofa, kwa Lefikeng la Iseraele.+

30 Jehofa o tla dira gore lentswe la gagwe le legolo+ le utlwiwe

E bile o tla senola lebogo la gagwe+ fa a ntse a le folosa a tuka bogale,+

Ka kgabo ya molelo o o lailang,+

Ka tumo ya maru+ le pula ya matlakadibe le sefako.+

31 Asiria e tla welwa ke poifo ka ntlha ya lentswe la ga Jehofa;+

O tla e itaya ka thobane.+

32 Titeo nngwe le nngwe ya thobane ya ga Jehofa

E a tla otlhayang Asiria ka yone,

E tla tsamaisana le meropana le diharepa+

Fa a ntse a kgatikanya lebogo la gagwe a tlhabana le bone mo ntweng.+

33 Gonne Tofethe*+ ya gagwe e setse e baakantswe;

Gape e baakanyeditswe kgosi.+

O dirile gore mokoa wa dikgong o nne kwa godimo o bo o nne bophara,

O na le molelo o montsi le dikgong tse dintsi.

Mohemo wa ga Jehofa, o o tshwanang le molatswana wa sulefera,

O tla o tlhosetsa ka molelo.

31 Ruri go latlhega ba ba yang kwa Egepeto ba ya go batla thuso,+

Ba ba ikaegang ka dipitse,+

Ba ba ikanyang dikara tsa ntwa ka gonne di le dintsi,

Le dipitse tsa ntwa* ka gonne di na le maatla.

Mme ga ba lebe kwa Modimong yo o Boitshepo wa Iseraele,

E bile ga ba senke Jehofa.

 2 Mme le ene o botlhale e bile o tla tlisa masetlapelo,

E bile ga a kitla a busetsa mafoko a gagwe kwa morago.

O tla tlhasela ntlo ya badirabosula

E bile o tla tlhasela ba ba thusang batho ba ba dirang dilo tse di sa siamang.+

 3 Mme gone, Baegepeto ke bathonyana fela, ga se Modimo;

Dipitse tsa bone ke nama mme ga se ditshedi tsa semoya.+

Fa Jehofa a otlolola seatla sa gagwe,

Ope fela yo o thusang o tla kgopiwa

Le ope fela yo o thusiwang o tla wa;

Botlhe ba tla nyelela ka nako e le nngwe.

“Fela jaaka tau e kurutla, e leng tawana* e e maatla, ka ntlha ya se e se tsomang,

Fa setlhopha sotlhe sa badisa se biditswe gore se tle go e tlhasela,

Mme e sa tshosiwe ke mantswe a bone

Kgotsa e sa boifisiwe ke modumo wa bone,

Ka tsela e e tshwanang, Jehofa wa masomosomo o tla tla go bolotsa ntwa

Ka ntlha ya Thaba ya Siona le thota ya gagwe.

 5 Fela jaaka dinonyane tse di fologelang kwa tlase gore di phamole sengwe,

Jehofa wa masomosomo le ene o tla femela Jerusalema jalo.+

 8 Mme Moasiria o tla wa ka tšhaka, e seng tšhaka ya motho;

E bile o tla bolawa ka tšhaka, e seng tšhaka ya motho.+

O tla tshaba ka ntlha ya tšhaka,

Mme makawana a gagwe a tla patelediwa go dira tiro e e boima.

 9 Lefika la gagwe le tla feta ka ntlha ya letshogo le legolo,

Le dikgosana tsa gagwe di tla tshoga ka ntlha ya kota ya sesupo,” go bua Jehofa,

Yo lesedi* la gagwe le leng kwa Siona le yo molelo wa gagwe o mogolo o leng kwa Jerusalema.

32 Kgosi+ e tla busa gore go nne le tshiamo,+

Le dikgosana di tla busa gore go nne le tshiamiso.

 2 Mme mongwe le mongwe o tla nna jaaka lefelo la go iphitlhela* phefo,

Lefelo la go iphitlhela* pula ya matsubutsubu,

O tla nna jaaka melatswana ya metsi mo nageng e e se nang metsi,+

Le jaaka moriti wa lefika le legolo thata mo lefatsheng le le omeletseng.

 3 Foo matlho a ba ba bonang ga a kitla a tlhola a ngaparagana,

E bile ditsebe tsa ba ba utlwang di tla reetsa ka kelotlhoko.

 4 Pelo ya batho ba ba mafega e tla akanyetsa kwa teng ka kitso,

Le loleme lo lo kwakwaetsang lo tla bua ka thelelo le ka tsela e e utlwalang sentle.+

 5 Motho yo o bosula ga a kitla a tlhola a bidiwa yo o pelotshweu,

Le motho yo o se nang maitseo ga a kitla a bidiwa motlotlegi;

 6 Gonne yo o se nang tlhaloganyo o tla bua se se se nang tlhaloganyo,

Le pelo ya gagwe e tla loga maano a a utlwisang botlhoko,+

Gore a kgothaletse botlhanogi* le go bua se se sa siamang kgatlhanong le Jehofa,

Gore a tsamaise yo o tshwerweng ke tlala a sa fiwa dijo

A bo a time yo o tshwerweng ke lenyora sengwe sa go nwa.

 7 Maano a motho yo o se nang maitseo a bosula;+

O kgothaletsa boitshwaro jo bo sa siamang

Gore a senye yo o bogisiwang a dirisa maaka,+

Tota le fa mohumanegi a bua se se siameng.

 8 Le fa go ntse jalo, motho yo o pelotshweu o rata go aba,

Mme o nna a ntse a aba ka bopelotshweu.

10 Mo lobakeng lo lo fetang ngwaga, lona ba lo sa kgathaleng lo tla tshoga,

Ka gonne go tla bo go se na maungo ape a a phuthilweng fa thobo ya morara* e khutla.+

Apolang diaparo tsa lona,

Mme lo ikgatlhe ka letsela la kgetsi mo dinôkeng.+

12 Ititeyeng dihuba lo lele selelo sa khutsafalo

Ka ntlha ya masimo a a eletsegang le setlhare sa morara se se ungwang.

13 Gonne masimo a batho ba me a tla tlhoga mmitlwa le mengana gotlhe fela;

Mme e tla khurumetsa matlo otlhe a boitumelo,

One motse o o tletseng boitumelo.+

14 Gonne tora e e sireleditsweng e tlogetswe fela;

Motse o o modumo o tlogetswe fela.+

Ofele+ le tora ya go lebelela di fetogile naga e e kgakgabetseng ka bosakhutleng,

E e itumelelwang ke ditonki tsa naga,

Le mafulo a matsomane,+

15 Go fitlha Modimo a re tshololela moya wa gagwe,+

Le naga e fetoga tshingwana ya maungo,

Le tshingwana ya maungo e kaiwa e le sekgwa.+

16 Foo tshiamiso e tla aga mo nageng,

Le tshiamo e tla nna mo tshingwaneng ya maungo.+

17 Diphelelo tsa tshiamo ya boammaaruri e tla nna kagiso,+

E bile tuelo ya tshiamo ya boammaaruri e tla nna maemo a a ritibetseng le polokesego tse di nnelang ruri.+

18 Batho ba me ba tla nna mo lefelong la bonno le le nang le kagiso,

Mo mafelong a a sireletsegileng le mo mafelong a boikhutso a a ritibetseng.+

19 Le fa go ntse jalo, sefako se tla digela sekgwa fa fatshe,

E bile motse o tla ripitliwa gotlhelele.

20 Go itumela lona ba lo jalang peo gongwe le gongwe kwa go nang le metsi,

Ba lo tsamaisang* poo le tonki.”+

Re tshegetse ka lebogo* la gago+ moso mongwe le mongwe,

Re boloke ka dinako tsa matshwenyego.+

 4 Fela jaaka tsie e e senyang e phutha, dilo tse o di gapileng di tla phuthiwa jalo;

Batho ba tla thologela kwa go tsone jaaka lesogodi la tsie.

 5 Jehofa o tla tlotlomadiwa,

Gonne o agile kwa mafelong a a kwa godimo.

 6 Ke ene yo o go sireletsang;

Tseno ke dikhumo tsa gagwe:

 7 Bagaka ba bone ba goa mo mmileng;

Barongwa ba kagiso ba lela mo go botlhoko.

 8 Ditsela tse dikgolo di kgakgabetse;

Ga go na ope yo o tsamayang mo ditselaneng.

O* tlodile kgolagano;

O ganne metse;

Ga a kgathalele motho ope.+

Sharona e fetogile sekaka,

E bile Bashana le Karemele di tlhotlhora matlhare a tsone.+

10 Jehofa a re, “Jaanong ke tla dira sengwe,

Jaanong ke tla itlotlomatsa;+

Jaanong ke tla ikgodisa.

14 Baleofi ba ba kwa Siona ba tshogile;+

Batlhanogi ba a roroma ba re:

15 Motho yo o tsamayang ka tshiamo ka metlha,+

Yo o buang se se siameng,+

Yo o ganang go huma ka boferefere,

Yo o ganang gore diatla tsa gagwe di amogele pipamolomo,+

Yo o ithibang ditsebe gore a se ka a utlwa fa go logiwa maano a go bolaya,

Le yo o tswalang matlho gore a se ka a bona se se bosula,

16 O tla nna kwa mafelong a a kwa godimo;

Lefelo la gagwe la botshabelo le le sireletsegileng* le tla nna mo dikagong tse di thata tsa mafika,

O tla tlamelwa ka senkgwe,

E bile ga a kitla a tlhoka metsi.”+

17 Matlho a gago a tla bona kgosi e le mo bontlentleng jwa yone;

A tla bona lefatshe le le kgakala.

19 Ga o kitla o tlhola o bona setšhaba se se se nang maitseo,

Setšhaba se puo ya sone e raraaneng thata* gore e ka tlhaloganngwa,

Se o ka se tlhaloganyeng loleme lwa sone lo lo kwakwaetsang.+

Matlho a gago a tla bona Jerusalema e le lefelo la bonno le le ritibetseng,

Tente e e se kitlang e sutisiwa.+

Dipekere tsa yone ga di kitla di somolwa,

E bile ga go na megala epe ya yone e e tla kgaoganngwang.

21 Mme gone koo Yo o Tlotlometseng e bong Jehofa,

O tla nna kgaolo ya dinoka mo go rona, ya mesele e e atlhameng,

Kwa go se kitlang go tsamaya setlhopha sa dikepe gone,

E bile go se kitla go kgabaganya dikepe tse dikgolo gone.

22 Gonne Jehofa ke Moatlhodi wa rona,+

Jehofa ke Moneimolao wa rona,+

Jehofa ke Kgosi ya rona;+

Ke Ene yo o tla re bolokang.+

23 Megala ya gago e tla repa;

Ga e ka ke ya kgona go tshegetsa pilara ya sekepe kgotsa go tsharolola saile.

Ka nako eo dilo tse dintsi tse di gapilweng di tla kgaoganngwa;

Tota le ba ba tlhotsang ba tla ikgapela go le gontsi.+

34 Atamelang gore lo utlwe, lona ditšhaba,

Lo bo lo tlhwaye tsebe, lona merafe.

A lefatshe le tsotlhe tse di tletseng mo go lone di reetse,

Naga le sengwe le sengwe se se mo go yone.

 2 Gonne Jehofa o galefetse ditšhaba tsotlhe,+

E bile o shakgaletse masole otlhe a tsone.+

O tla di senya;

O tla di ganyaola.+

 3 Batho ba tsone ba ba bolailweng ba tla latlhelwa kwa ntle,

Mme sebodu sa ditopo tsa bone se tla tlhatloga;+

Dithaba di tla gakologa ka ntlha ya* madi a bone.+

 4 Lesomosomo lotlhe la magodimo le tla bola,

Le magodimo a tla menwa jaaka momeno.

Masole otlhe a bone a tla omelela

Fela jaaka letlhare le le omeletseng le wa mo setlhareng sa morara*

Le jaaka mofeige o o swabileng o wa mo setlhareng sa mofeige.

E tla fologela mo Edoma fa ke tlisa katlholo,+

E tla fologela mo bathong ba ke ikaeletseng go ba senya.

E tla khurumediwa ke mafura,+

E tla khurumediwa ke madi a diphelefu tse di potlana le dipodi,

E tla khurumediwa ke mafura a diphilo tsa diphelefu.

Gonne Jehofa o na le setlhabelo kwa Bosera,

E leng polao e kgolo kwa lefatsheng la Edoma.+

 7 Dipoo tsa naga di tla fologela kwa tlase mmogo le tsone,

Dipowana le dipoo tse di maatla.

Lefatshe la bone le tla kolobediwa ke madi,

E bile lorole lwa bone lo tla kolobediwa ke mafura.”

 8 Gonne Jehofa o tlhomile letsatsi la pusoloso,+

O tlhomile ngwaga wa go ipusolosetsa mo tshekong e e amanang le Siona.+

 9 Melatswana ya gagwe* e tla fetoga bitumena,*

Le lorole lwa gagwe lo tla fetoga sulefera,

E bile lefatshe la gagwe le tla nna jaaka boka jo bo tukang.

10 Ga bo kitla bo timiwa bosigo kgotsa motshegare;

Mosi wa jone o tla nna o tlhatloga ka bosakhutleng.

Edoma o tla nna a kgakgabetse kokomana morago ga kokomana;

Ga go na ope yo o tla mo ralalang ka bosakhutleng le go ya go ile.+

11 Kukara le noko di tla aga mo go ene,

Le merubisi e e ditsebe ditelele le magakabe di tla nna mo go ene.

Modimo o tla lekanya lefatshe leno ka thapo e e lekanyang le ka mogala o o tlhamalatsang*

E le go bontsha gore le tla sala le le lolea e bile le kgakgabetse.

12 Ga go na ope wa batlotlegi ba gagwe yo o tla bidiwang gore a nne kgosi,

E bile dikgosana tsotlhe tsa gagwe di tla bo di sa tlhole di le teng.

13 Go tla tlhoga mmitlwa mo ditoreng tsa gagwe tse di sireletsegileng,

Go tla tlhoga dibabetsane le mefero e e mmitlwa mo dikagong tsa gagwe tsa phemelo.

O tla fetoga mongobo wa bophokoje,+

Lefelo le bontšhe ba nnang mo go lone.

14 Ditshedi tsa kwa sekakeng di tla kopana le diphologolo tse di bokolelang,

E bile podi ya naga* e tla bitsa molekane wa yone.

15 Noga e e bofefo e tla dira sentlhaga e bo e beela mae a yone gone,

Mme e tla a thuba e bo e phuthela bana ba yone ka fa tlase ga moriti wa yone.

Ga go na epe ya tsone e e tla tlhaelang;

Ga go na epe ya tsone e e tla tlhokang molekane,

Gonne molomo wa ga Jehofa ke one o o ntshitseng taelo,

E bile moya wa gagwe ke one o o di phuthileng mmogo.

17 Ke Ene yo o di latlhetseng bola,

Mme seatla sa gagwe ke sone se se lekantseng lefelo le a di abetseng lone.*

Di tla le rua ka bosakhutleng;

Di tla aga mo go lone mo dikokomaneng tsotlhe.

35 Naga le lefatshe le le omeletseng di tla itumela,+

E bile sekaka se tla itumela se bo se ntsha malômô* jaaka saferone.*+

 2 Ruri se tla ntsha malômô;+

Se tla itumela e bile se tla goa ka boitumelo.

Se tla newa kgalalelo ya Lebanona,+

Bontlentle jwa Karemele+ le Sharona.+

 3 Nonotshang ba ba bokoa,

Le mangole a a roromang.+

Modimo wa lona o tla tla go lo busolosetsa mo babeng ba lona,

Modimo o tla tla go diragatsa katlholo.+

 5 Ka nako eo, matlho a difofu a tla bulwa,+

Le ditsebe tsa bosusu di tla thibololwa.+

 6 Ka nako eo, motho yo o tlhotsang o tla tlolaka jaaka kgama,+

Le loleme lwa yo o sa kgoneng go bua lo tla goa ka boitumelo.+

Gonne metsi a tla pomponyega mo nageng,

Le melatswana e tla pomponyega mo sekakeng.

 7 Mmu o o omeleditsweng ke mogote o tla nna jaaka mogobe o o tletseng lotlhaka,

Le mmu o o nyorilweng o tla nna jaaka metswedi ya metsi.+

Go tla nna le bojang jo botala le lotlhaka le papirase

Mo mengobong e bophokoje ba ikhutsang mo go yone.+

 8 Mme go tla nna le tsela e kgolo,+

Tsela e e bidiwang Tsela ya Boitshepo.

E baakanyeditswe ba ba tsamayang ka tsela;

Ga go na ope yo o seeleele yo o tla fapogelang mo go yone.

 9 Ga go kitla go nna le tau teng,

E bile ga go kitla go nna le dibatana dipe tse di kotsi mo go yone.

Ga di kitla di fitlhelwa teng;+

Ba ba rekolotsweng ke bone fela ba tla tsamayang teng.+

Boitumelo jo bo sa feleng bo tla nna mo ditlhogong tsa bone,+

Ba tla nna le boitumelo le boipelo,

Mme khutsafalo le selelo di tla tshaba.+

O tsholeleditse mang lentswe la gago+

E bile o tsholeleditse mang matlho a gago a a ikgodisang?

24 O kgobile nna Jehofa ka batlhanka+ ba gago mme wa re,

‘Ke tla tlhatloga dithaba tse di kwa godimo thata,+

E leng dikarolo tsa Lebanona tse di kgakala thata

Ka dikara tsa me tsa ntwa tse dintsintsi.

25 Ke tla epa didiba ke bo ke nwa metsi;

Ke tla kgadisa melatswana* ya Egepeto ka dipato tsa dinao tsa me.’

27 Banni ba yone e tla nna batho ba ba ka se itireng sepe;

Ba tla tshoga e bile ba tla tlhabiwa ke ditlhong.

Ba tla nna jaaka dimela tsa naga le bojang jo botala,

Jaaka bojang jo bo rulelang jo bo fisitsweng ke phefo ya botlhaba.

28 Mme gone, ke itse sentle fa o nna, fa o tswa, fa o tsena,+

Le fa o nkgalefetse,+

29 Ka gonne go nkgalefela ga gago+ le go kurutla ga gago di gorogile mo ditsebeng tsa me.+

Ka jalo, ke tla tsenya huku ya me mo nkong ya gago le tomo ya me+ mo molomong wa gago,

Mme ke tla go busetsa morago ka tsela e o tlileng ka yone.”

“Ga a kitla a tsena mo motseng ono+

Kgotsa a hulela motswi mo go one

Kgotsa a lebana le one ka thebe

Kgotsa a dira thotana e e ka dirisiwang fa go tlhaselwa motse.”’+

34 ‘O tla boa ka tsela e a tlileng ka yone;

Ga a kitla a tsena mo motseng ono,’ go bua Jehofa.

35 ‘Ke tla femela motse ono+ ke bo ke o boloka ka ntlha ya me+

Le ka ntlha ya ga Dafide+ motlhanka wa me.’ ”

10 Ke ne ka re: “Ke tla tsena ka dikgoro tsa Lebitla,*

Ke ise ke tsofale.

Ga nkitla ke tlhola ke bona batho

Fa ke na le banni ba lefelo le kwa go lone sengwe le sengwe se khutlang.

12 Lefelo le ke nnang mo go lone le kumotswe e bile le tlositswe mo go nna+

Jaaka tente ya modisa.

Ke menne botshelo jwa me jaaka mologi a mena letsela;

Modimo o nkgaola jaaka mologi a kgaola letsela a le ntsha mo selogelong.

O nna a robaganya marapo a me otlhe, fela jaaka tau;

Go tloga motshegare go fitlha bosigo, o nna a leka go mphedisa.+

14 Ke nna ke tswirinya jaaka peolwane kgotsa moritinkole;+

Ke nna ke kuruetsa jaaka leeba.+

‘Ao tlhe Jehofa, ke mo matshwenyegong a magolo;

Nkeme nôkeng.’*+

Ke tla tsamaya ka boikokobetso* botshelo jotlhe jwa me

Ka ntlha ya matshwenyego a a botlhoko a ke leng mo go one.

16 ‘Wena Jehofa, mongwe le mongwe o tshela ka dilo tseno,*

E bile maatla a me a botshelo a mo go tsone.

17 Mo boemong jwa kagiso, ke ne ka nna mo khutsafalong e kgolo;

Mme e re ka o nthata,

O ne wa nketsha* mo khuting ya tshenyego.+

18 Gonne Lebitla* ga le ka ke la go galaletsa,+

Loso ga lo ka ke lwa go baka.+

19 Batshedi ke bone fela ba ba kgonang go go baka,

Fela jaaka ke kgona go dira jalo mo letsatsing leno.

20 Ao tlhe Jehofa, mpoloke,

Mme re tla letsa dipina tsa me ka diletswa tsa megala+

Malatsi otlhe a botshelo jwa rona kwa ntlong ya ga Jehofa.’”+

 2 Buang le pelo ya* Jerusalema,

Mme lo mo itsise gore tirelo ya gagwe e a tshwanetseng go e dira e dirilwe,

Lo mo itsise gore molato wa gagwe o itshwaretswe.+

 4 A mokgatšha mongwe le mongwe o katelwe,

Le thaba nngwe le nngwe le thota nngwe le nngwe di isiwe kwa tlase.

Lefatshe le le magwata le tshwanetse go rethefadiwa,

Le lefatshe le le tletseng maje le tshwanetse go nna lebala.+

 5 Kgalalelo ya ga Jehofa e tla senolwa,+

E bile batho botlhe* ba tla e bona,+

Gonne molomo wa ga Jehofa o buile seno.”

 7 Bojang jo botala bo a omelela,

Lelômô le a swaba,+

Ka gonne mohemo* wa ga Jehofa o foka mo go lone.+

 8 Bojang jo botala bo a omelela,

Lelômô le a swaba,

Mme lefoko la Modimo wa rona le nna ka bosakhutleng.”+

 9 Tlhatlogela kwa thabeng e e kwa godimo,

Wena mosadi yo o tlisetsang Siona dikgang tse di molemo.+

Tsholetsa lentswe la gago ka maatla,

Wena mosadi yo o tlisetsang Jerusalema dikgang tse di molemo.

10 Morena Molaodimogolo Jehofa o tla tla a le maatla,

E bile lebogo la gagwe le tla busa mo boemong jwa gagwe.+

Modimo o tla a tshotse maduo a gagwe,

Le tuelo e a duelang ka yone e fa pele ga gagwe.+

O tla phutha dikwanyana mmogo ka lebogo la gagwe,

E bile o tla di tshola mo sehubeng sa gagwe.

12 Ke mang yo o lekantseng metsi mo seatleng sa gagwe,+

A bo a lekanya magodimo ka paralatso ya seatla sa gagwe?*

Ke mang yo o neng a phuthela lerole la lefatshe mo selekanyong+

Kgotsa a lekanya dithaba ka dilekanyi,

Le dithota ka dikale?

13 Ke mang yo o lekantseng* moya wa ga Jehofa,

E bile ke mang yo o ka nnang mogakolodi wa gagwe gore a mo kaele?+

14 O ne a botsa mang gore a tlhaloganye,

Kgotsa ke mang yo o mo rutang tselana ya tshiamiso,

Kgotsa yo o mo rutang kitso,

Kgotsa yo o mmontshang tsela ya temogo ya boammaaruri?+

15 Ditšhaba di tshwana le lerothodi le le tswang mo kgamelong,

E bile di tshwana le lerolenyana le le mo dikaleng.+

16 Tota le Lebanona ga e a lekana go dira gore molelo o tswelele o tuka,*

Le diphologolo tsa yone tsa naga ga di a lekana go nna setlhabelo se se fisiwang.

17 Ditšhaba tsotlhe di ntse jaaka sengwe se se iseng se nne teng fa pele ga gagwe;+

O di kaya e se sepe, e le lefela.+

19 Mmetli o dira modingwana,*

Mothudi wa tshipi o o manega gauta,+

A bo a o direla dikeetane tsa selefera.

20 Motho o tlhopha setlhare sengwe e le moneelo wa gagwe,+

Setlhare se se se kitlang se bola.

O batla mmetli yo o setswerere

Gore a mo direle setshwantsho se se betlilweng se se se kitlang se wa.+

22 Go na le Yo o nnang kwa godimo ga lefatshe le le kgolokwe,*+

Mme ba ba nnang mo go lone ba tshwana le ditsiakgope.

O phutholola magodimo jaaka lesire,

E bile o a tsharolola jaaka tente e go nniwang mo go yone.+

23 O pagolola badiredibagolo mo maemong a bone

E bile o dira gore baatlhodi* ba lefatshe e nne batho ba e seng ba sepe.

24 Ga ba ise ba lengwe,

Ga ba ise ba jalwe,

Kutu ya bone ga e ise e mele medi mo lefatsheng,

Mme ba a budulelwa ba bo ba omelela,

E bile ba tsewa ke phefo jaaka lotlhaka.+

Ke Ene yo o bolotsang lesomo la tsone ka palo;

O di bitsa tsotlhe ka maina.+

E re ka a na le maatla a magolo a a boitshegang e bile a na le nonofo e kgolo,+

Ga go na epe ya tsone e e tlhaelang.

27 Ke ka ntlha yang fa wena Jakobe, le wena Iseraele o bua o re,

‘Jehofa ga a bone tsela ya me,

E bile Modimo ga a ntirele tshiamiso epe’?+

29 O naya yo o lapileng maatla

E bile ba ba se nang nonofo o ba naya maatla a magolo.+

30 Basimane ba tla lapa e bile ba tla felelwa ke nonofo,

Makawana a tla kgopiwa a bo a wa,

31 Mme ba ba solofetseng mo go Jehofa ba tla nna le maatla gape.

Ba tla siana mme ga ba kitla ba felelwa ke nonofo;

Ba tla tsamaya mme ga ba kitla ba lapa.”+

41 “Ntheetseng lo didimetse,* lona ditlhaketlhake;

A ditšhaba di nne le maatla gape.

 2 Ke mang yo o tlhotlheleditseng mongwe go tswa kwa botlhabatsatsi,+

A mmiletsa fa dinaong tsa Gagwe* ka tshiamo,

Gore a mo neye ditšhaba

Le gore a mo thuse go fenya dikgosi?+

Ke mang yo o dirang gore di nne jaaka lerole fa pele ga tšhaka ya gagwe,

Jaaka lotlhaka lo lo kgokgweediwang ke phefo fa pele ga bora jwa gagwe?

 3 O a ba latelela, a feta a sa kgorelediwe ke sepe

Mo ditselaneng tse dinao tsa gagwe di iseng di tsamaye mo go tsone.

 4 Ke mang yo o dirileng seno,

A bitsa dikokomana go tswa kwa tshimologong?

Nna Jehofa, ke nna Wa Ntlha;+

Le mo go ba bofelo ga ke a fetoga.”+

 6 Mongwe le mongwe o thusa tsala ya gagwe

E bile o raya morwarraagwe a re: “Nonofa.”

 7 Ka jalo, mmetli o nonotsha mothudi wa tshipi;+

Yo o papetlang ka hamore*

O nonotsha yo o kokotelelang mo lentswetshiping.

 8 “Mme wena Iseraele, o motlhanka wa me,+

Wena Jakobe, o motlhanka wa me yo ke mo tlhophileng,+

Setlogolwana* sa ga Aborahame tsala ya me,+

 9 Wena, yo ke neng ka go tsaya kwa dikhutlong tsa lefatshe,+

Le wena yo ke neng ka go bitsa go tswa kwa dikarolong tsa lone tse di kgakalakgakala.

Ke ne ka go raya ka re, ‘O motlhanka wa me;+

Ke go tlhophile; ga ke a go gana.+

Ke tla go nonotsha, ke tla go thusa,+

Ruri ke tla go ngangatlela thata ka seatla sa me sa moja sa tshiamo.’

12 O tla batla batho ba ba lwang le wena, mme ga o kitla o ba bona;

Batho ba ba tlhabanang le wena ba tla nna jaaka sengwe se se iseng se nne teng, ba tla fetoga lefelafela.+

13 Gonne nna Jehofa, Modimo wa gago, ke tshwere seatla sa gago sa moja,

Nna yo ke go rayang ke re, ‘O se ka wa boifa. Ke tla go thusa.’+

14 O se ka wa boifa, wena Jakobe yo e leng seboko,*+

Lona banna ba Iseraele, ke tla lo thusa,” go bua Jehofa, Morekolodi wa gago,+ Modimo yo o Boitshepo wa Iseraele.

15 “Ke go dirile selei se se phothang,+

Sedirisiwa se sesha se se phothang sa meno a a magalemabedi.

O tla gataka dithaba o bo o di thubaganya

E bile o tla dira gore dithota di nne jaaka mmoko.

16 O tla di olosa,

Mme di tla tsewa ke phefo;

Phefo ya matsubutsubu e tla di phatlalatsa.

O tla itumela ka ntlha ya ga Jehofa,+

E bile o tla ipelafatsa ka ntlha ya Modimo yo o Boitshepo wa Iseraele.”+

18 Ke tla dira gore dinoka di elele mo dithoteng tse di sa tlhogang sepe+

Le metswedi e elele mo mabaleng.+

Ke tla dira gore naga e fetoge mogobe wa metsi o o tletseng lotlhaka

Le lefatshe le le se nang metsi le fetoge metswedi ya metsi.+

19 Ke tla jala setlhare sa mosedara,

Sa mokala, sa moretela le sa phaene mo sekakeng.+

Ke tla jala setlhare sa mofira,

Mmogo le setlharesetuba le mokuperese mo lebaleng le le sekaka,+

20 Gore batho botlhe ba tle ba bone ba bo ba itse

Mme ba ele tlhoko ba bo ba tlhaloganye

Gore seatla sa ga Jehofa se dirile seno,

Le gore Modimo yo o Boitshepo wa Iseraele o bopile seno.”+

Re boleleleng dilo tsa nako e e fetileng,*

Gore re tle re akanyetse kwa teng ka tsone* mme re itse diphelelo tsa tsone.

23 Re boleleleng se se tla diregang mo nakong e e tlang,

Gore re tle re itse gore lo medimo.+

Dirang sengwe, se ka tswa se le molemo kgotsa se le bosula,

Gore re tle re gakgamale fa re se bona.+

24 Ga lo na mosola,

E bile se lo se fitlheletseng ke lefela.+

25 Ke biditse mongwe go tswa kwa bokone, mme o tla tla,+

Mongwe yo o tswang kwa botlhabatsatsi*+ yo o tla bitsang leina la me.

O tla gataka babusi* jaaka e kete o gataka letsopa,+

Jaaka mmopi wa letsopa yo o gatakang letsopa le le bongola.

26 Ke mang yo o boletseng seno go tswa kwa tshimologong, gore re tle re itse,

Kgotsa go tswa kwa dinakong tse di fetileng, gore re ka re, ‘O nepile’?+

28 Le fa go ntse jalo, ke ne ka nna ke lebile, mme go ne go se na ope;

Go ne go se na ope mo gare ga bone yo o ka ba gakololang.

Ke tsentse moya wa me mo go ene;+

O tla tlisetsa ditšhaba tshiamiso.+

 2 Ga a kitla a goa kgotsa a tsholetsa lentswe la gagwe,

E bile ga a kitla a dira gore lentswe la gagwe le utlwiwe mo mmileng.+

 3 Ga a kitla a robaganya lotlhaka lope lo lo obegileng,

E bile ga a kitla a tima mogala ope o o kuang mosi.+

 4 Ga a kitla a koafala kgotsa a lapa go fitlha a diragatsa tshiamiso mo lefatsheng;+

Mme ditlhaketlhake di nna di letetse molao* wa gagwe.

 5 Seno ke se Modimo wa boammaaruri, Jehofa, a se buang,

Mmopi wa magodimo le Ene yo Mogolo yo o neng a a tsharolola,+

Ene yo o dirileng lefatshe le sengwe le sengwe se se mo go lone,+

Ene yo o nayang batho ba ba mo go lone mohemo,+

Le yo o nayang ba ba tsamayang mo go lone moya:+

 6 “Nna Jehofa, ke go biditse ka tshiamo;

Ke tshwere seatla sa gago.

Ke tla go sireletsa ke bo ke dira gore o nne kgolagano gareng ga me le batho+

Le gore o nne lesedi la ditšhaba,+

 7 Gore o bule matlho a ba ba foufetseng,+

Gore o ntshe legolegwa mo khuting ya kgolegelo

Le ba ba ntseng mo lefifing o ba ntshe mo kgolegelong.+

 8 Ke nna Jehofa. Leo ke lone leina la me;

Ga nkitla ke letla ope a newa tlotlo e e ntshwanetseng,*

E bile ga nkitla ke naya ditshwantsho tse di betlilweng pako ya me.+

 9 Bonang, dilo tsa ntlha di diragetse;

Jaanong ke bolela dilo tse disha.

10 Opelelang Jehofa pina e ntšha,+

Mmakeng go tswa kwa dikhutlong tsa lefatshe,+

Lona ba lo tsamayang ka dikepe mo lewatleng le mo gare ga ditshedi tse di nnang mo go lone,

Lona ditlhaketlhake le ba lo nnang mo go tsone.+

11 A naga le metse ya yone di tsholetse lentswe la tsone,+

A metsana e banni ba Kedare+ ba nnang mo go yone e tsholetse lentswe la yone.

A ba ba nnang mo mafelong a a nang le mafika ba goe ka boitumelo;

A ba goe ba le kwa godimo ga dithaba.

12 A ba tlotle Jehofa

Ba bo ba mmake mo ditlhaketlhakeng.+

O tla goa, ruri o tla tlhaba mokgosi wa ntwa;

O tla itshupa a le maatla go feta baba ba gagwe.+

Ke tla goa, ke tla hema ka bonako, e bile ke tla felelwa ke moya ka nako e le nngwe

Jaaka mosadi yo o belegang.

15 Ke tla phaphalatsa dithaba le dithota

Ke bo ke omeletsa dimela tsotlhe tsa tsone.

Ke tla dira gore dinoka di fetoge ditlhaketlhake*

Ke bo ke kgadisa megobe e e tletseng lotlhaka.+

16 Ke tla tsamaisa difofu mo tseleng e di sa e itseng+

Ke bo ke dira gore ba gate mo ditselaneng tse ba sa di tlwaelang.+

Ke tla dira gore lefifi le le fa pele ga bone le fetoge lesedi+

Ke bo ke dira gore naga e e nang le maje e nne lebala.+

17 Ba ba ikanyang ditshwantsho tse di betlilweng,

Ba ba rayang difikantswe tse di bopilweng ba re: “Lo medimo ya rona,”

Ba tla busediwa morago e bile ba tla tlhabiwa ke ditlhong thata.+

18 Reetsang, lona bosusu;

Lebang mme lo bone, lona difofu.+

19 Ke mang yo o sefofu ntle le motlhanka wa me,

Yo o susu jaaka morongwa yo ke mo romang?

Ke mang yo o sefofu jaaka mongwe yo o duetsweng,

Yo o sefofu jaaka motlhanka wa ga Jehofa?+

21 Jehofa o itumeletse go godisa molao* le go o galaletsa

Ka ntlha ya tshiamo ya gagwe.

22 Mme seno ke setšhaba se se gapilweng;+

Botlhe ba gaeletswe mo mesimeng e bile ba fitlhilwe mo dikgolegelong.+

Ba ne ba gapiwa mme go se na ope yo o ba gololang,+

E bile ba ne ba gapiwa mme go se na ope yo o reng: “Ba buse!”

24 Ke mang yo o letlileng gore Jakobe a gapiwe

Le yo o tsentseng Iseraele mo seatleng sa ba ba gapang?

Ba ne ba gana go tsamaya mo ditseleng tsa gagwe,

E bile ga ba a ka ba ikobela molao* wa gagwe.+

25 Ka jalo, Modimo o ne a ba galefela,

A bo a ba otlhaya ka go ba tlisetsa ntwa.+

43 Jaanong seno ke se Jehofa a se buang,

Mmopi wa gago wena Jakobe, Ene yo o go dirileng wena Iseraele:+

 2 Fa o ralala metsi, ke tla bo ke na le wena,+

E bile fa o ralala dinoka, ga di kitla di go gogola.+

Fa o ralala molelo, ga o kitla o sha,

E bile kgabo ya molelo ga e kitla e go babola.

 3 Gonne ke nna Jehofa, Modimo wa gago,

Modimo yo o Boitshepo wa Iseraele, Mmoloki wa gago.

Ke ntshitse Egepeto gore e nne thekololo ya gago,

Ke ntshitse Ethiopia le Seba gore ke go rekolole.

 4 Gonne o ne wa nna tlhwatlhwakgolo mo matlhong a me,+

O ne o tlotlega, e bile ke ne ka go rata.+

Ka jalo, ke tla ntsha batho le ditšhaba

Gore ke boloke botshelo jwa gago.

Ke tla busa ditlogolwana* tsa gago go tswa kwa botlhaba

E bile ke tla go phutha go tswa kwa bophirima.+

Busa bomorwaake go tswa kgakala, le bomorwadiake go tswa kwa dikhutlong tsa lefatshe,+

 7 Mongwe le mongwe yo o bidiwang ka leina la me+

Le yo ke mmopileng gore ke galalediwe,

Yo ke mmopileng le yo ke mo dirileng.’+

 8 Busang batho ba ba foufetseng le fa gone ba na le matlho,