O a Amogelwa Kwa Kopanong ya Kgaolo ya “Barutisi ba Lefoko la Modimo”!

BATHO BA LE DIMILIONE BA TLA NNA TENG kwa kopanong eno kwa mafelong a le makgolokgolo a a farologaneng go ralala lefatshe. Mo Afrika Borwa fela, go rulagantswe gore go nne le dikopano di le 50. Tsa ntlha di tla tshwarwa ka November 23-25, mme tsa bofelo ka January 4-6, 2002. Go ka nna ga direga gore nngwe ya dikokoano tseno tsa malatsi a mararo—Labotlhano go fitlha ka Sontaga—e tshwarelwe mo toropong e e gaufi le legae la gago.

Mo mafelong ka bontsi, thulaganyo e tla simolola letsatsi le letsatsi ka mmino ka 9:30 a.m. Puo ya go amogela bareetsi ka Labotlhano e tla latelwa ke dipuo tse di nang le ditlhogo tsa Baebele tse di reng “Go Ruta ka Bogosi go Tlhagisa Maungo a a Molemo,” “Go Kgothadiwa ke ‘Dilo Tse di Molemolemo Tsa Modimo,’” le “Itumelele Tshiamo ya ga Jehofa.” Thulaganyo ya mo mosong e tla konelwa ka puo ya setlhogo se se reng, “Go Tlhomelelwa ka Botlalo go Nna Barutisi ba Lefoko la Modimo.”

Puo ya ntlha thapama, “Go Itshekisiwa Jaaka Setšhaba go Dira Ditiro Tse di Molemo,” e tla latelwa ke simphosiamo ya dipuo tse tharo tsa setlhogo se se reng “Go Ithuta fa re Ntse re Ruta ba Bangwe.” Seno se tla gatelela botlhokwa jwa go dira se motho a se buelelang mabapi le boitshwaro, thuto ya Baebele ya botho, le botlhokwa jwa go gana maiteko a ga Diabolo a go re tsietsa. Go tla latela puo e e reng “Tlhoa Bosula jwa Lefatshe jwa Ditshwantsho Tse di Hepisang.” Go tswa foo thulaganyo ya letsatsi e tla konelwa ka go sekaseka Isaia kgaolo 60 ka setlhogo se se reng “Jehofa o Ntlafatsa Batho ba Gagwe ka Lesedi.”

Dipuo tsa Matlhatso “Go Lapologelwa Kafa Tlase ga Jokwe ya ga Keresete,” “Go Etsa Morutisi yo Mogolo,” le “A o Ikemiseditse go Direla ba Bangwe?” di tla remelela mo ntlheng ya botlhokwa jwa go sala sekao sa ga Keresete morago. Gape ka Matlhatso go tla nna le disimphosiamo tsa diura tse pedi tse di nang le setlhogo se se reng “Badiredi ba ba Thusang ba Bangwe go Nna Badumedi” le “Solegelwa Molemo ka Botlalo ke Thuto ya Puso ya Modimo.” Simphosiamo ya mo mosong e tla nna le dikakantsho tsa go dira barutwa, mme thapama go tla gatelelwa ditsela tse ka tsone re ka solegelwang molemo ka botlalo ke thuto ya Baebele le go nna teng kwa dipokanong tsa Bokeresete. Thulaganyo ya mo mosong e tla konelwa ka puo ya kolobetso, e morago ga yone ba ba tshwanelegang ba tla bulegelwang ke sebaka sa go kolobediwa. Ba bantsi ba tla shwegashwega pelo go utlwa puo e e konelang ya Matlhatso thapama ya setlhogo se se reng, “Sedirisiwa se Sesha Se re Se Rulaganyeditsweng Gore re Gatele Pele Semoyeng.”

Thulaganyo ya Sontaga mo mosong e akaretsa simphosiamo ya dipuo tse tharo tse di tla bong di tlotla ka lokwalo lwa Malaki mme e tla re bontsha kafa re ka lo dirisang sentle ka teng mo maemong a re kopanang le one mo motlheng wa rona. E tla latelwa ke terama e e buang ka botsuolodi jwa ga Kora, Dathane le Abirame fa ba tsuologela taolo ya ga Moshe e a e neilweng ke Modimo. Morago ga moo, go tla nna le puo e e tla gatelelang molaetsa o o tswang mo terameng. Thulaganyo ya thapama e tla bo e na le puo ya phatlalatsa ya setlhogo se se reng “Ke Bomang ba ba Rutang Ditšhaba Tsotlhe Boammaaruri?”

Kwantle ga pelaelo o tla nonotshiwa semoyeng ke go nna teng malatsi otlhe a mararo. Gore o tle o itse lefelo le le gaufi le legae la gago, ikgolaganye le Holo ya Bogosi ya Basupi ba ga Jehofa e e mo lefelong la gaeno kgotsa o kwalele bagatisi ba makasine ono.