Baebele ya Reng

A Modimo o Batla Gore o Hume?

“Ke letsatsi le lesha le Modimo a nneileng lone! Ke tlile go amogela madi a mantsi tota!”

“Ke batla go huma ka ntlha ya gore Modimo le ene o batla gore ke hume.”

“Modimo o re naya maatla a gore re hume.”

“Ke a atlega ka ntlha ya Buka eno [e leng Baebele].”

TSENO ke dipolelo tse di supang se bontsi jwa madumedi a se dumelang gore fa motho a huma e a bo e le ka ntlha ya gore Modimo a mo segofaditse. Ba ruta gore fa o dira dilo tse Modimo a di batlang, o tla go segofatsa ka dikhumo mo botshelong jono le jo bo tlang. Thuto eno ya bodumedi e aname thata mme le dibuka tse di e rotloetsang ke dingwe tsa dibuka tse di rekisiwang thata. Mme gone, a “thuto eno ya bodumedi ya go huma” e dumalana le Baebele?

Boammaaruri ke gore, Mmopi wa rona yo Baebele e mmitsang gore ke “Modimo yo o itumetseng” o batla gore le rona re tshele botshelo jo bo itumetseng le jo bo atlegileng. (1 Timotheo 1:11; Pesalema 1:1-3) Mo godimo ga moo, o segofatsa ba ba mo itumedisang. (Diane 10:22) Mme mo go rona gompieno, a masego ao ke a go atlega ka dikhumo? Re tla kgona go tlhaloganya karabo sentle fa re tlhaloganya gore re tshela mo nakong efe malebana le maikaelelo a Modimo.

A ke Nako ya go Huma?

Mo nakong e e fetileng Jehofa Modimo o ne a segofatsa bangwe ba batlhanka ba gagwe ka dikhumo, dikai tsa seo ke Jobe le Kgosi Solomone. (1 Dikgosi 10:23; Jobe 42:12) Le fa go ntse jalo, batho ba bangwe ba le bantsi ba ba neng ba boifa Modimo go akaretsa Johane Mokolobetsi le Jesu Keresete ba ne ba sa huma. (Mareko 1:6; Luke 9:58) Seno se kaya eng? Go ya ka Baebele, Modimo o dirisana le batlhanka ba gagwe go dumalana le maikaelelo a gagwe ka nako eo. (Moreri 3:1) Molaomotheo oo o re ama jang gompieno?

Boporofeti jwa Baebele bo senola gore re tshela mo nakong ya “bokhutlo jwa tsamaiso eno ya dilo” kgotsa mo “metlheng ya bofelo” jwa lefatshe leno. Motlha ono o tla supiwa ke dintwa, malwetse, ditlala, dithoromo tsa lefatshe le go senyega ga mekgwa ya batho mo setšhabeng e leng maemo a a ntseng a tshwenya batho ka tsela e kgolo fa e sa le ka ngwaga wa 1914. (Mathaio 24:3; 2 Timotheo 3:1-5; Luke 21:10, 11; Tshenolo 6:3-8) Ka bokhutshwane fela, lefatshe leno le tshwana le sekepe se se tlogang se nwela! Ka ntlha ya mabaka ano, a go tla bo go utlwala gore Modimo a segofatse mongwe le mongwe wa batlhanka ba gagwe ka dikhumo tsa mmatota kgotsa a Modimo o na le dilo tsa botlhokwa tse a di lebeletseng mo go rona?

Jesu Keresete o ne a tshwantsha nako e re tshelang mo go yone le motlha wa ga Noa. O ne a re: “Fela jaaka ba ne ba ntse mo malatsing ao pele ga morwalela, baa ja e bile baa nwa, banna ba nyala le basadi ba neelwa nyalong, go fitlha ka letsatsi le Noa a tseneng mo teng ga araka ka lone; mme ba se ka ba tsaya tsia go fitlha morwalela o tla o bo o ba gogola botlhe, go nna gone ga Morwa motho go tla nna jalo.” (Mathaio 24:37-39) Gape Jesu o ne a tshwantsha motlha wa rona le motlha wa ga Lote. Baagelani ba ga Lote kwa Sodoma le Gomora ba ne ba ‘ja, ba nwa, ba reka, ba rekisa, ba jala ba bile ba aga.’ “Mme ka letsatsi le Lote a neng a tswa mo Sodoma ka lone go ne ga na molelo le sulefera go tswa legodimong mme tsa ba senya botlhe,” mme Jesu o ne a oketsa jaana: “Go tla nna ka yone tsela eo mo letsatsing leo fa Morwa motho ruri a tla bo a senolwa.”—Luke 17:28-30.

O ka tlhomamisega ka gore ga go na sepe se se phoso ka go ja, go nwa, go nyala, go reka le go rekisa. Kotsi fela e nna fa o amegile thata ka dilo tseno mo o sa boneng go potlaka ga dinako tse re leng mo go tsone. Ka jalo, ipotse jaana, ‘A Modimo o tla bo a re direla molemo fa a ne a ka re segofatsa ka sengwe le sengwe se se neng se tla tlatsa matshelo a rona ka dilo tse di tla re itayang tsebe?’a Go farologana le moo, o ne a tla bo a re gobatsa tota. Ga se kafa Modimo yo o lorato a ntseng ka teng!—1 Timotheo 6:17; 1 Johane 4:8.

Nako ya go Boloka Matshelo!

Mo nakong eno ya mathata mo hisitoring ya motho, batho ba Modimo ba na le tiro e ntsi e ba tshwanetseng go e dira. Jesu o ne a re: “Dikgang tse di molemo tseno tsa bogosi di tla rerwa mo lefatsheng lotlhe le le nang le banni gore e nne bosupi mo ditšhabeng tsotlhe; mme go tswa foo bokhutlo bo tla tla.” (Mathaio 24:14) Basupi ba ga Jehofa ba tsaya mafoko ano masisi. Ka jalo, ba rotloetsa baagisani ba bone go ithuta ka Bogosi joo le ka se Modimo a batlang gore ba se dire gore ba bone botshelo jo bo sa khutleng.—Johane 17:3.

Le fa go ntse jalo, Modimo ga a lebelela gore batlhanka ba gagwe ba ba ikanyegang ba tshele botshelo jwa boitlami. Go na le moo, o batla gore ba kgotsofalele dilo tse ba di tlhokang gore ba kgone go tlhoma mogopolo mo go mo direleng. (Mathaio 6:33) Mme kafa letlhakoreng le lengwe, o tla tlhomamisa gore ba nna le dilo tse ba di tlhokang tsa nama. Bahebera 13:5 e bolela jaana: “A mokgwa wa lona wa botshelo e se ka ya nna wa go rata madi, lo ntse lo kgotsofetse ka dilo tsa jaanong. Gonne [Modimo] o rile: ‘Ruri ga ke na ke go tlogela ka gope le fa e le go go latlha ka gope.’”

Modimo o tla diragatsa tsholofetso eo ka tsela e e tlhomologileng fa a boloka ba “boidiidi jo bogolo” ba baobamedi ba gagwe ba boammaaruri go fitlha kwa bofelong jwa tsamaiso eno ya dilo le go ya kwa lefatsheng le lesha la kagiso le katlego ya mmatota. (Tshenolo 7:9, 14) Jesu o ne a re: “Ke tlile gore [baobamedi ba me ba ba ikanyegang] ba tle ba nne le botshelo mme ba tle ba nne le jone ka letlotlo.” (Johane 10:10) ‘Botshelo jwa letlotlo’ ga bo reye botshelo jwa dikhumo gone jaanong mme bo raya botshelo jo bo sa khutleng kwa Paradaiseng kafa tlase ga puso ya Bogosi jwa Modimo.—Luke 23:43.

O se ka wa amogela sepe sa boleng jo bo kwa tlase ga se o se batlang ka go tsiediwa ke se se bidiwang thuto ya bodumedi ya dikhumo e e leng sengwe se se itayang tsebe. Go na le moo, reetsa mafoko ano a a lorato e bile a potlakile a ga Jesu a a reng: “Itlhokomeleng gore dipelo tsa lona di se ka le ka motlha tsa imelwa ke go ja mo go feteletseng le ke go nwa bobe le ke ditlhobaelo tsa botshelo, mme ka tshoganyetso letsatsi leo la lo wela ka ponyo ya leitlho jaaka seru.”—Luke 21:34, 35.

[Ntlha e e kwa tlase]

A O KILE WA IPOTSA GORE  . . .

◼ Gone jaanong ke nako e e tlhomilweng ya go dira eng?—Mathaio 24:14.

◼ Jesu o ne a tshwantsha motlha wa rona le metlha ya batho bafe ba mo Baebeleng?—Mathaio 24:37-39; Luke 17:28-30.

◼ Re tshwanetse go tila eng fa re batla go bona botshelo jo bo sa khutleng?—Luke 21:34.

[Mafoko a a mo go tsebe 13]

Se go tweng ke thuto ya bodumedi ya dikhumo totatota ke sengwe se se itayang tsebe