“A Nko Ruri!”

GANTSI batho ba bua jalo fa ba simolola go bona tshwene e tonanyana ya proboscis e e nang le nko e kima e e lepelelang.a Mo ditshweneng dingwe tse ditonanyana, nko ya tshwene eno e ka gola go fitlha e nna mo e ka nnang disentimetara di le 18—mo e ka nnang kwatara ya boleele jwa mmele wa phologolo eno. E re ka nko ya tshwene e tonanyana e lepelela mo godimo ga molomo le seledu sa yone, e tshwanelwa ke go e sutisa fa e ja! Fa nko ya gago e ka bo e le kalo, e ka bo e lepelela go fitlha mo sehubeng sa gago.

Nko eno e solegela tshwene e tonanyana ya proboscis molemo jang?b Go na le ditlhaloso tse di sa tshwaneng. Gongwe nko ya yone e ntsha mogote o o sa tlhokegeng mo mmeleng wa yone kgotsa e oketsa segalo sa yone sa lentswe. Kgotsa e ka tswa e dirisa nko eno go tlhagisa ditshwene tse dingwe tse ditonanyana. Ee, fa tshwene e tonanyana e e etelelang setlhopha pele e galefa, nko ya yone e a budologa e bo e nna khibidu. Gape e ka tswa e ngoka ditshwene tse di namagadi ka yone! Le fa go ntse jalo, go ka direga thata gore nko ya tshwene eno e dira ditiro di le mmalwa, gongwe go akaretsa le dingwe tse re sa itseng sepe ka tsone.

Dimpa Tse Dikgolo

Gape ditshwene tsa proboscis—tse ditonanyana le tse di namagadi—di na le dimpa tse di sa tlwaelegang tse dikgolo. E bile tota, bokete jwa dimpa tsa ditshwene tseno bo ka tswa bo lekana le kwatara ya boima jwa mebele ya tsone. Ka ntlha ya seo, ditshwene tse ditonanyana mmogo le tse di namagadi di ka lebega di dusa ka dinako tsotlhe! Ke eng fa di na le dimpa tse dikgolo?

Dimpa tsa tshwene ya proboscis, fela jaaka tsa kgomo, di tletse motswako o o metsi wa dimela le dibakateria. Dibakateria di dira gore dijo di bele gape di sila cellulose, mmogo le botlhole jwa dijalo dingwe jo bo neng bo ka bolaya diphologolo tse dingwe. Ka ntlha ya tsamaiso e e gakgamatsang ya go sila dijo ya ditshwene tsa proboscis, di kgona go tshela ka matlhare le maungo a a seng botshe le dipeo tsa dimela tse di jaaka dinawa, mekolane le tse dingwe mme ditshwene tse di nang le dimpa tse di sa tshwaneng le tsa tsone di ne di ka se ka tsa tshela ka dijo tseo fela.

Le fa go ntse jalo, thulaganyo e e raraaneng thata ya go sila dijo ya tshwene ya proboscis e na le mathata a yone. Phologolo eno ga e a tshwanela go ja maungo a a botshe a a belang ka bonako. Maungo a a ntseng jalo a a botshe a ka budulosa dimpa tsa tshwene, mo gongwe go neng go ka felela ka gore e swe loso lo lo botlhoko.

E re ka ditshwene tsa proboscis di ja dijo tse di nang le cellulose e ntsi e bile di na le dimpa tse di nang le thulaganyo e e raraaneng ya go sila dijo, di tlhoka nako e ntsi ya gore di sile dijo tse di di jang. Ka jalo, fa di sena go ja thata mo mosong, di a ikhutsa—ka dinako tse dingwe e le ka diura tse dintsi—pele di ja gape.

Diphologolo Tse di Nnang Mmogo

Le fa ditshwene tsa proboscis di ka tswa di ja kgotsa di ikhutsitse, gantsi di a bo di na le tse dingwe. Gantsi ditshwene tse ditonanyana di etelela pele tse di namagadi di ka nna robedi le bana ba tsone. Ditshwene tse ditonanyana tse di tsalwang mo setlhopheng seno di a lelekwa fa di setse di godile sentle gore di ka itlhokomela. Ditshwene tseno di ikopanya le tse dingwe tse dinnye tse ditonanyana, di bo di bopa ditlhopha tse le tsone di nang le tshwene e kgolwane e tonanyana e le nngwe kgotsa di le pedi. Motho yo o sa itseng a ka tsaya gore ditlhopha tseo ke tsa ditshwene tse di namagadi.

Ditshwene tsa proboscis di na le mokgwa mongwe o o sa tlwaelegang fa di kopane—ditlhopha tse di farologaneng tsa ditshwene tse di namagadi di itswakanya le tse dingwe, segolobogolo fa di kokoane gaufi le dinoka maitseboa. Ka dinako tseo, tshwene e tonanyana e tla supa maatla a yone fa e bona e kete tshwene e nngwe e tonanyana e kgatlhegela ditshwene tsa yone tse di namagadi. Gantsi tshwene e tonanyana e e fufegang—e e ka tswang e le bokete jwa dikilogerama di le 20—e tla ya kwa pele e tlhomile ka maroo oomane e atlhamisitse legano la yone e bo e tlhoma tshwene e e e tshosetsang matlho. Buka ya Proboscis Monkeys of Borneo ya re: “Fa tshwene eo e sa tshoge, tshwene e tonanyana e tlolela mo ditlhareng ka tshoganyetso go sa lebelelwa, gantsi e dira jalo e ntse e ntsha modumo o mogolo wa go kurutla mme e bo e tlhoma gangwe le gape mo dikaleng tse di suleng tse di dirang modumo o mogolo fa di gatiwa, tse di oketsang modumo o o leng teng wa pheretlhego.” Di a tle di lwe, mme go lebega e le ka sewelo.

Buka e e nopotsweng fa godimo ya re: “Ga se fela gore ditshwene tsa proboscis di na le tebego e e sa tlwaelegang; gape di dira medumo e mentsi e e sa tlwaelegang.” Diphologolo tseno di a kgorotlha, di lela jaaka ganse, di a kurutla e bile di a bokolela, segolobogolo fa di kopane gaufi le dinoka maitseboa. Mo gare ga tlhatlharuane eno, tse di namagadi di ka tswa di ntse ka tidimalo di anyisa le go phepafatsa ditshwenyana tsa tsone tse di difatlhego di dipudutswana. Kgabagare, fa letsatsi le setse le phirimile mo sekgweng, diphologolo tseno di tla bo di bone mafelo a a siametseng go ikhutsa mo ditlhareng—gantsi mo ditlhareng tse di telele gaufi le noka—di bo di robala mo go one.

Ditshwene Tse di Nang le Dinama Tse di Tshwaraganyang Menwana ya Maoto!

Kwantle ga nko ya tsone, ditshwene tsa proboscis di na le sengwe gape se se sa tlwaelegang—dikarolo dingwe tsa menwana ya tsone ya maoto di na le dinama tse di di tshwaraganyang. Dinama tseno tse di fa gare ga menwana ya maoto ga di thuse diphologolo tseno go thuma sentle fela mme gape di di thusa go tsamaya ka pabalesego mo seretseng se se tletseng medi e e tswetseng kwantle ya ditlhare tsa mangrove. Ke boammaaruri gore fa o akanya ka ditlhare tsa mangrove tsa boboatsatsi, o ka nna wa akanya le ka dikwena. Dikwena di dintsi mo mafelong a ditshwene tsa proboscis di nnang mo go one. Ditshwene tseno tse di nnang fa thoko ga dinoka di dira jang gore di se ka tsa jewa ke dikwena?

Mokgwa mongwe o di o dirisang ke go tsena mo nokeng ka tidimalo di tlhomagane di bo di thuma jaaka dintša gore di se ka tsa lemotshega. Le fa go ntse jalo, fa noka e le tshesane, di a tle di bonwe di dirisa mokgwa o sele. Di palamela kwa godimo ga setlhare di bo di tlolela kwa pele go tswa mo kaleng, e e ka tswang e le bogodimo jwa dimetara di le robongwe go tswa mo metsing, di bo di thabuela ka dimpa mo nokeng, go tswa foo di bo di thuma ka bonako jo bo ka kgonegang go kgabaganya karolo e e setseng ya noka. Tota le ditshwene tse di namagadi tse di belegeng ditshwenyana tsa tsone di dirisa mokgwa ono. Ka dinako tse dingwe segopa sotlhe se ka thabuela mo metsing ka nako e le nngwe se bo se thuma ka bonako jo bo ka kgonegang go ya ntlheng e nngwe! Le fa go ntse jalo, mmaba wa tsone yo mogolo ga se kwena.

Setshedi Se se Mo Kotsing ya go Fela

Ditshwene tsa proboscis, tse palo ya tsone e leng dikete di sekae fela mo mafelong a tsone a tlholego, di tsentswe semolao mo lenaaneng la ditshedi tse di mo kotsing ya go fela e bile palo ya tsone e ntse e fokotsega mme seno se bakwa thata ke ditiro tsa batho. Ditiro tseno tsa batho di akaretsa go fisa naga, go kgaola ditlhare, go sa nne le tsamaiso ya bojanala le go fetsa dikgwa gore go dirwe masimo a mekolane e e tlhagisang leokwane. Se sengwe se ba se dirang ke go tsoma. Batho bangwe ba bolaya ditshwene tsa proboscis e le motshameko fela. Ba bangwe ba di bolaela go di ja kgotsa go di dirisetsa melemo ya setso. E re ka gantsi diphologolo tseno di robala mo di ka bonwang motlhofo teng mo ditlhareng tse di gaufi le dinoka, di ka tlhaselwa motlhofo. E bile mo lefelong lengwe le mo go lone go fetang batsomi ba le bantsi ba ba dirisang mekoro e e lobelo ya dienjene, palo ya ditshwene tseno e ne ya fokotsega ka diperesente di le 50 mo dingwageng di le tlhano!

Batho ba ba tlhokometseng tlhago ba leka go itsise setšhaba ka bothata jwa ditshwene tsa proboscis e bile diphologolo tseno di sireleditswe ka molao kwa Borneo. A mme dikgato tseno di tla atlega? Re tla dika re bone. Fa setshedi seno se ka fela mo nageng, ruri e ka nna masetlapelo ka gonne tshwene ya proboscis ke phologolo e e nang le dilo tse dintsi tse di sa tlwaelegang! Mo godimo ga moo, gantsi phologolo eno ga e tshele sentle fa e tswaletswe mo lefelong le le rileng.

Mme gone, tshwene ya proboscis ke sengwe fela sa ditshedi tse isagwe ya tsone e lebegang e le letobo. Mefuta e mengwe e mentsintsi e setse e fedile. Se se itumedisang ke gore, Modimo o ikaeletse go laola lefatshe ka botlalo, go tlosa baikepi le go ruta batho tsela e e tshwanetseng ya go tlhokomela legae la bone e leng lefatshe. (Diane 2:21, 22) Jehofa Modimo o solofetsa jaana: “Ga [ba] kitla [ba] utlwisa botlhoko le fa e le go senya mo thabeng ya me yotlhe e e boitshepo; ka gonne lefatshe le tla tlala kitso ya ga Jehofa jaaka metsi a khurumeditse lewatle.”—Isaia 11:9.

[Dintlha tse di kwa tlase]

[Setshwantsho mo go tsebe 12]

Ditshwene tsa “proboscis” di na le dimpa le dinko tse dikgolo tse di sa tshwaneng le tsa diphologolo tse dingwe

[Motswedi wa Setshwantsho]

© Peter Lilja/age fotostock

[Setshwantsho mo go tsebe 13]

Nko ya tshwene e tonanyana e lepelela mo godimo ga molomo wa yone. E tshwanelwa ke go e sutisa fa e ja

[Motswedi wa Setshwantsho]

© Juniors Bildarchiv/Alamy

[Setshwantsho mo go tsebe 14]

Le fa ditshwene tsa “proboscis” di ka tswa di ja kgotsa di ikhutsitse, gantsi di a bo di na le tse dingwe

[Motswedi wa Setshwantsho]

© Peter Lilja/age fotostock