Kgaolo 45

Morutwa Yo O Sa Solofelwang

ABO e le pono e e tshosang jang ne fa Jesu a tswa mo mokorong! Banna ba babedi ba ba bogale jo bo sa tlwaelegang ba tswa mo diphupung tse di gautshwane mme ba bo ba simolola go mo sianela. Ba na le badimona. Ereka mongwe wa bone go bonala a le seganka thata go feta yo mongwe ebile a na le lobaka lo loleele a tlhasetswe ke badimona, ke ene yo tlhokomelo yotlhe e lebisiwang kwa go ene.

Monna yo o tlhomolang pelo yono o na le lobaka lo loleele a nna mo diphupung a sa apara. Ka dinako tsotlhe, bosigo le motshegare, o goa le go itshegaka ka matlapa. O seganka thata mo eleng gore ga go ope yo o nang le bopelokgale jwa go feta mo tseleng eo. Go ile ga dirwa boiteko jwa go mmofa, mme o kgaola dikeetane le go roba ditshipi a di ntsha mo maotong a gagwe. Ga go na ope yo o nang le maatla a go mo fenya.

Jaaka monna a atamela Jesu mme a wela fa dinaong tsa gagwe, badimona ba ba mo go ene ba mo dira gore a goe a re: “Ke dihañ ka wèna, Yesu, Morwa Modimo Mogodimodimo? Ke gu ikanisa ka Modimo, u se ka ua ntlhokohatsa.”

“Cwa mo monneñ eo, mōea o o mashwè ke wèna,” Jesu o nna a rialo. Mme go tswa foo Jesu o botsa ka go re: “Leina ya gago, ga twe, u mañ?”

“Leina ya me ke Mophatō; gonne re bantsi,” o fetola jalo. Badimona ba itumelela go bona dipogisego tsa bao ba tsenyeng mo go bone, go bonala fa ba kgatlhwa ke go ba tlhasela ba ipopile segopa ka mokgwa wa bogatlapa. Mme fa ba kopana le Jesu, ba kopa gore a seka a ba isa mo moleting. Gape re bona thata e kgolo e Jesu a neng a na le yone go fenya le eleng badimona ba ba setlhogo. Seno gape se senola gore badimona ba itse gore kwa bofelong Modimo o tla ba atlhola mmogo le moeteledipele wa bone, Satane Diabolo, ka go ba isa mo moleting.

Go na le serapa sa dikolobe tse di ka nnang 2 000 tse di fulang gautshwane mo thabeng. Ka jalo badimona ba bua ba re: “Mma re eè mo dikolobeñ, gore re tsènè mo go cōna.” Go bonala fa badimona ba kgona go bona boitumelo jwa mofuta mongwe o eseng wa tlholego, wa go itumedisiwa ke go bogisa mebele ya ditshedi tsa senama. Fa Jesu a ba letlelela go tsena mo dikolobeng, tsotlhe tse 2 000 di phadimoga di be di nwela mo lewatleng go tswa fa go leng legaga teng.

Fa ba ba disitseng serapa seo sa dikolobe ba bona seno, ba sianela kwa motseng le kwa dinageng tse di mo tikologong go ya go bega dikgang. Ka ntlha ya seo, batho ba tswa ba tla go bona se se diragetseng. Fa ba goroga, ee, ba bona monna yole yo badimona ba duleng mo go ene. O apere ebile o itekanetse sentle mo tlhaloganyong, o ntse fa dinaong tsa ga Jesu!

Ba ba boneng ka matlho ba bolelela batho ka moo monna a ileng a fodisiwa ka gone. Gape ba bolela kaga loso lo lo gakgamatsang lwa dikolobe. Fa batho ba utlwa seno, ba tlelwa ke poifo e kgolo, mme ba kopa Jesu thata gore a tswe mo nageng ya bone. O a dumela mme o palama mokoro. Monna yo o neng a tsenwe ke badimona o kopa Jesu go mo letlelela go tsamaya le ene. Mme Jesu o mo raya a re: “Ea kwa ga eno kwa ditsaleñ tsa gago, u ba bolèlèlè dilō tse dikgolo tse Morèna o di gu dihetseñ, le yaka a gu tlhomogetse pelo.”

Ka metlha Jesu o laela ba a ba fodisitseng gore ba seka ba bolelela ope, ereka a sa batle gore batho ba dire diphetso mo motheong wa dipego tsa magatwe. Mme go bo a sa dire jalo jaanong go tshwanetse ka ntlha ya gore monna yo o neng a tsenywe ke badimona jaanong o tla kgona go neela bosupi mo gare ga batho ba jaanong go bonalang fa Jesu a tla seke a bone sebaka sa go ba fitlhelela. Mo godimo ga moo, go nna gone ga monna yoo e tla nna bosupi kaga thata ya ga Jesu ya go dira tiro e e molemo, e e ganetsanang le pego epe e e sa siamang e e ka nnang ya gasiwa mabapi le tatlhegelo ya serapa sa dikolobe.

Tumalanong le taolo ya ga Jesu, monna yo o neng a tsenywe ke badimona o a tsamaya. O simolola go bolela dilo tsotlhe tse Jesu a di mo diretseng mo Dikapolise yotlhe, mme batho ba jewa ke kgakge fela. Mathaio 8:28-34; Mareko 5:1-20; Luke 8:26-39; Tshenolō 20:1-3.

▪ Ke eng se se ka tswang se ne se dira gore tlhokomelo e lebe thata a le mongwe fela wa banna ba babedi ba ba neng ba tsenwe ke badimona?

▪ Ke eng se se supang gore badimona ba itse gore ba tla tsenngwa mo moleting mo isagweng?

▪ Ke eng se go bonalang se dira gore badimona ba rate go tsena mo bathong le mo diphologolong?

▪ Ke eng fa Jesu a ne a dirisana le monna yo o neng a na le badimona ka mo go farologaneng le se se tlwaelegileng, ka go mo laela gore a bolelele ba bangwe kaga se A se mo diretseng?