Kgaolo 46

O Ne A Tshwara Seaparo Sa Gagwe

DIKGANG kaga go boa ga ga Jesu kwa Dikapolise di fitlha kwa Kaperenama, mme boidiidi jo bogolo bo phuthegela fa lewatleng go mo gorosa sentle. Kwantle ga pelaelo ba ile ba utlwalela gore o ne a didimatsa sefefo le go fodisa banna ba ba neng ba na le badimona. Jaanong, jaaka a tswela mo lotshitshing, ba a mo kokoanela, ba shwègashwèga pelo ebile ba solofetse sengwe.

Mongwe wa bao ba neng ba batla thata go bona Jesu e ne e le Jairo, molaodi wa senagoge. O wela fa dinaong tsa ga Jesu mme a mo kopa ka tlhoafalo a re: “Morwadiake oa ñwanyana o hèla mo loshuñ: kea gu rapèla, u tlo u tlè, u beè diatla tsa gago mo go èna, gore a hodisiwè, a tshelè.” Ereka e le ene ngwana fela yo a nang le ene ebile a le dingwaga di le 12 fela, o botlhokwa fela thata mo go Jairo.

Jesu o a dumela mme, a patilwe ke boidiidi, o leba kwa legaeng la ga Jairo. Re ka akanya fela kaga matlhagatlhaga a batho jaaka ba ipaakanyetsa kgakgamatso e nngwe. Mme mosadi mongwe mo boidiiding o akantse fela ka bothata jo bogolo jo a nang najo.

Ka lobaka lo loleele lwa dingwaga tse 12 mosadi yono o ntse a na le bolwetsi jwa go tshologa madi. O tsamaile mo dingakeng tsotlhe, a dirisa madi a gagwe otlhe mo kalafing. Mme ga a ise a alafege; go na le moo, bothata jwa gagwe bo ile jwa nna maswe le eleng go feta.

O ka ne o lemoga gore bolwetsi jwa gagwe ga bo mo koafatse fela, mme gape ke jo bo tlhabisang ditlhong. Gantsi ga go ke go buiwa phatlalatsa ka botlhoko jo bo ntseng jalo. Mo godimo ga moo, mo Molaong wa ga Moshe go tshologa ga madi go ne go itshekolola mosadi, mme mongwe le mongwe yo o mo tshwarang kana a ama diaparo tsa gagwe tse di madi o ne a tshwanetse go tlhapa mme a itshekologe go ya maitsiboeng.

Mosadi o ne a utlwaletse dikgakgamatso tsa ga Jesu mme jaanong o a mmatla. Ka ntlha ya go sa itshekang ga gagwe, o leka ka moo a ka kgonang ka teng gore a tsene mo boidiiding a sa lemogiwe, a ntse a ithaya a re: “Ha nka ama leha e ka bo e le diaparō tsa gagwè hèla, ke tla hodisiwa.” Fa a dira jalo, ka bofefo fela o ikutlwa gore go tshologa ga gagwe ga madi go eme!

“Ke amilwe emañ?” Abo mafoko ao a ga Jesu a ile a mo tshosa jang ne! O ne a ka itse jang? ‘Moruti,’ Petere o a botsa, ‘batho ba go kgotlhaganyeditse ba go pitlagantse, mme wa re, “Ke amilwe emañ?”’

Fa a leba kafa le kafa go senka mosadi yoo, Jesu o tlhalosa jaana: “Moñwe o nkamile; ka ke ikutlwile ha nonohō e dule mo go nna.” Ruri, ga se go ama fela mo go tlwaelegileng, ereka go fodisiwa ga gagwe go goga maatla mo go Jesu.

Ka go bona gore o lemogilwe, mosadi o a atamela mme o wela fa pele ga ga Jesu, a tshogile ebile a roroma. Fa pele ga batho botlhe, o bolela boammaaruri jotlhe kaga bolwetsi jwa gagwe le ka moo a sa tswang go alafega ka teng.

Ka go amiwa ke go ipolela ga gagwe ga boammaaruri, Jesu o mo gomotsa ka go amega jaana: “Morwadiaka, tumèlō ea gago e gu hodisitse; tsamaea ka kagishō, u hōlè mo pecoñ ea gago.” Abo go le molemo jang ne go itse gore Yo Modimo a mo tlhophileng go busa lefatshe ke motho yo o botsalano, yo o pelotlhomogi, yo o amegang ka batho ebile a na le thata ya go ba thusa! Mathaio 9:18-22; Mareko 5:21-34; Luke 8:40-48; Lefitiko 15:25-27.

▪ Jairo ke mang, mme ke eng fa a tla kwa go Jesu?

▪ Ke bothata bofe jo mosadi mongwe a neng a na le jone, mme ke eng fa go tla kwa go Jesu go kopa thuso go le bokete jaana mo go ene?

▪ Mosadi yoo o fodisiwa jang, mme Jesu o mo gomotsa jang?