Botshelo le Bodihedi tsa ga Jesu

Botlhoko Jo Bo Tlhabang Pelo jwa Fa A le mo Koteng

DINOKWANE tse pedi di ntshiwa mmogo le Jesu go ya go bolawa. Mokoloko oo o ema gaufi fela le motse kwa lefelong le le bidiwang Gologotha, kana Felo ga Logata.

Magolegwa a apolwa diaparo tsa one. A bo a newa beine e e tshetsweng santlhokwe. Go lebega e dirilwe ke basadi ba mo Jerusalema, mme Baroma ga ba gane gore bao ba tlileng go bolawa bano ba newe motswako ono o o bolayang ditlhabi. Lefa go ntse jalo, fa Jesu a utlwa tatso ya one, o gana go o nwa. Ka ntlha yang? Go lebega a batla gore a bo a ikutlwa sentle ka nako yotlhe eno ya fa tumelo ya gagwe e tla bo e lekwa thata.

Jesu jaanong o bapotswe mo koteng diatla tsa gagwe di pegilwe kwa godimo ga tlhogo ya gagwe. Masole jaanong a kokotela dimapo tse dikgolo mo diatleng tsa gagwe le mo maotong a gagwe. O utlwa botlhoko tota fa dimapo tseno di gagola nama ya gagwe le mesifa ya gagwe. Fa kota eno e emisiwa ka dinao, go nna botlhoko tota, ka go bo bokete jwa mmele bo gagola dintho tsa dimapo. Lefa go le jalo, go na le gore a ba tshosetse, Jesu o rapelela masole ao a Baroma jaana: “Rra, ba ichwarèlè; ka gonne ga ba itse se ba se dihañ.”

Pilatwe o beile lotshwao lo lo balegang jaana mo koteng eo: “YESU OA NASARETHA, KGOSI EA BAYUDA.” Go lebega a sa kwale seno fela ka gonne a tlotla Jesu mme gonne a ila baperesiti ba Bajuda ka go bo ba ne ba mo pateletsa go atlholela Jesu loso. Ka jalo Pilatwe o kwadile lotshwao loo ka dipuo di le tharo—ka Sehebera, puo ya semolao ya Selatini, le puo e e itseweng ke botlhe ya Segerika gore botlhe ba tle ba kgone go lo bala.

Baperesiti ba bagolo, go akaretsa le Kaiafase le Anase, ba gakgametse. Polelo eno e e tshwanetseng e sulafatsa nako eno e ba neng ba batla go itshupa fa ba fentse ka yone. Ka gone ba ganetsa jaana: “Se kwale, go re, Kgosi ea Bayuda, me u re, Èna o rile, Ke kgosi ea Bayuda.” A galefisitswe ke go bo baperesiti ba mo dirisitse selo se a neng a sa batle go se dira, Pilatwe o araba jaana ka lonyatso a ititeile sehuba: “Se ke se kwadileñ ke se kwadile.”

Jaanong baperesiti le boidiidi jo bogolo jwa batho bo kokoanela kwa lefelong leo a tlileng go bolaelwa kwa go lone, mme baperesiti ba leka go ganetsa bosupi jwa lotshwao. Ba boeletsa bosupi jwa maaka jo bo neng jwa newa pele kwa ditshekong tsa Sanehederine. Ka gone, ga go gakgamatse go bo batho ba ba fetang ka tsela ba bua ka go kgala ba tshikinya ditlhogo ka tshotlo ebile ba bolela jaana: “Wèna eo u senyañ tempele, u ba u e aga ka malatsi a le mararo, ipolokè: e re ha u le Morwa Modimo, hologa mo mokgoroñ.”

“O nntse a nna a boloka ba bañwe; o retelèlwa ke go ipoloka ka esi,” baperesiti ba bagolo le ditsala tsa bone tsa bodumedi ba bua jalo ba dumalana. “Ke èna kgosi ea Iseraela; a a kè a hologè yana mo mokgoroñ, me re tla mo dumèla. O ikantse Modimo; a o ko o mo gololè yanoñ, ha o mo eletsa: ka a rile, Ke Morwa Modimo.”

Masole le one a tlhotlheletsega go sotla Jesu. A mo naya beine e e botšarara ka tshotlo, go lebega ba e beile fela fa godimo ga molomo wa gagwe o o phanyegileng. “Ha e le wèna Kgosi ea Bayuda,” ba a sotla, “ipolokè.” Le eleng dinokwane di a mo sotla—se sengwe se bapoletswe kafa letlhakoreng la moja la ga Jesu, se sengwe kafa go la molema. Akanya fela ka seo! Monna yo mogolo go gaisa ope yo a kileng a tshela, ee, yo a neng a na le Jehofa Modimo ba bopa dilo tsotlhe mmogo, o sotliwa ka tsela eno yotlhe a ititeile sehuba!

Masole a tsaya diaparo tsa ga Jesu tsa kafa ntle mme a di kgaoganya dikarolo di le nnè. A tshela bola go bona gore di tla tsewa ke mang. Lefa go ntse jalo, seaparo sa kafa teng, ga se na moroko, mme ke sa boleng jo bo kwa godimo tota. Ka jalo masole a raana a re: “A re se e gagole, me a re e laoleñ ka bola, gore re bōnè, bo e tla nna ea ga mañ.” Ka gone ka go sa itse ba diragatsa lokwalo lo lo bolelang jaana: “Diaparō tsa me ba di kgaogana, hempe ea me ba e laola ka bola.”

Fa nako e ntse e tsamaya, sengwe sa dinokwane se lemoga gore Jesu ka boammaaruri e tshwanetse ya bo e le kgosi. Ka gone, se kgalema tsala ya sone ka go bolela jaana: “A le Modimo ga u o boihe, ecwa le wèna u le mo tshekishoñ e ka eosi? Me rona, rure e re chwanetse; ka re bōna tuèlō e e chwanetseñ ditihō tsa rona; me monna eo, ga a diha sepe se se shōkameñ.” Morago o bua le Jesu a mo kopa jaana: “U nkgopolè mogañ u tlañ mo bogosiñ yoa gago.”

“Amarure, kea gu raea [gompieno], u tla nna le nna kwa Paradaisa.” Tsholofetso eno e tla diragadiwa fa Jesu a busa jaaka Kgosi kwa legodimong mme a tsosa modirabosula yoo o ikwatlhaileng yono go tla go tshela mo lefatsheng mo Paradaiseng eo bafalodi ba Hara–Magedona le ditsala tsa bone ba tla bonang tshiamelo ya go e lema. Mathaio 27:33-44; Mareko 15:22-32; Luke 23:27, 32-43; Yohane 19:17-24.

◆ Ke ka ntlha yang fa Jesu a gana go nwa beine e e tlhakantsweng le santlhokwe?

◆ Ke ka ntlha yang fa go bewa lotshwao mo koteng ya ga Jesu, mme Pilatwe o ganetsana jang gape le baperesiti ba bagolo?

◆ Jesu o sotliwa gape jang fa a le mo koteng, mme go lebega seno se lerilwe ke eng?

◆ Boperofeti bo diragadiwa jang ka seo se dirwang ka diaparo tsa ga Jesu?

◆ Sengwe sa dinokwane se dira phetogo efe, mme Jesu o tla diragatsa kopo ya sone jang?