Modimo o Leba Kobamelo ya Labokeresete Jang?

JESU KERESETE o ne a bolela jaana: “Ga se go re mongwe le mongwe yo o nthayang a re: ‘Morena, Morena,’ o tlaa tsena mo bogosing jwa legodimo; fa e se yo o dirang go rata ga Rre yo o kwa legodimong. E tlaa re mo letsatsing leo batho ba le bantsi ba tlaa nthaya ba re: ‘Morena, Morena, a ga re a ka . . . ra dira ditiro di le dintsi tse di nonofileng ka leina la gago?’ E dira gone ke tlaa ba ipolelelang ke re: ‘Ga ke ise nke ke lo itse gope, tlogang fa go nna, lona ba lo dirang tshiamololo.’”—Mathaio 7:21-23.

Modimo o phepafaditse sentle se e leng thato ya gagwe ka Lefoko la gagwe le le boitshepo, e leng Baebele e e Boitshepo. A dikereke tsa Labokeresete di dira thato ya Modimo? Kana ke bao Jesu a ba biditseng ba ba “dirang tshiamololo”?

Tshololo ya Madi

Mo bosigong jwa pele ga loso lwa Mong wa gagwe, Petere o ne a batla a simolola go lwa ka dibolao le setlhopha sa masole a a neng a romilwe go tla go tshwara Jesu. (Johane 18:3, 10) Mme Jesu o ne a dira gore dilo di ye meriting mme a tlhagisa Petere jaana: “Botlhe ba ba tsayang tšhaka ba tlaa nyelela ka tšhaka.” (Mathaio 26:52) Tlhagiso eno e e utlwalang e boeleditswe gape mo go Tshenolo 13:10. A dikereke tsa Labokeresete di utlwile tlhagiso eno? Kana di na le seabe mo dintweng tse di ntseng di tswelela pele mo dikarolong tse di farologaneng tsa lefatshe?

Ka Ntwa ya Lefatshe II, makgolo a dikete a Ba-Serbia le Ba-Croatia a ne a bolawa go dirisiwa leina la bodumedi. The New Encyclopædia Britannica e bega jaana: “Kwa Croatia, puso e e tlholegileng koo ya bo-fascist e ne ya simolola go tlhoma molao wa go ‘nyeletsa morafe,’ molao o o neng o le maswe go feta ditiro tsa Banasi. . . . Go ne ga bolelwa gore nngwetharong ya palo ya batho ba Serbia e ne e tla fudusiwa, nngwetharong e sokololelwe mo go Roma Katoliki, mme nngwetharong e nyelediwe. . . . Tsela e baruti ba Katoliki ba ba neng ba sa dirisane mmogo thata ka yone mo ditirong tseno, e ne ya reketlisa ditirisanommogo le puso ka tsela e e masisi morago ga ntwa.” Dipalopalo tsa batho di ne tsa patelediwa gore di sokologele mo Bokatoliking kana e seng jalo di bolawe; dikete tse dingwe tsa batho ga di a fiwa le nako ya go itlhophela tota. Mo metsaneng yotlhe—banna, basadi le bana—ba ne ba patelediwa go tsena mo dikerekeng tsa Orthodox mme ba bolawa. Re ka reng ka masole a Bokomonisi a a neng a le kgatlhanong? A le one a ne a engwe nokeng ke bodumedi?

Buka ya History of Yugoslavia e bega jaana: “Baruti ba bangwe ba ne ba nna le seabe mo ntweng ba eme nokeng masole a batsuolodi.” “Batshegetsi ba masole ba ne ba bile ba akaretsa baruti ba dikereke tsa Serbian Orthodox mmogo le tsa Roma Katoliki,” go bolela jalo buka ya Yugoslavia and the New Communism. Dikgotlhang tsa bodumedi di tswelela pele di gakatsa ntwa e e lowang kwa dinageng tsa Balkan.

Mme re ka reng ka naga ya Rwanda? Mokwaledikakaretso wa Catholic Institute for International Relations, e bong Ian Linden, o ne a bolela jaana mo lokwalopakeng lwa The Month: “Ditlhotlhomiso tse di dirilweng ke setlhopha sa African Rights kwa Lontone di re neela sekai kana di le pedi tsa baeteledipele ba ba mo lefelong leo ba Kereke ya Katoliki, ya Anglican le ya Baptist ba ba neng ba na le seabe ka go tlhokomologa kana go etelela pele mo dipolaanong tsa sesole. . . . Ga go belaetse tota gore dipalo tse dikgolo tsa Bakeresete ba ba tumileng thata mo dikerekeng di ne di na le seabe mo dipolaanong.” Se se hutsafatsang ke gore ntwa e e lowang fa gare ga batho ba gotweng ke Bakeresete e santse e tsweletse pele kwa bogare jwa Afrika.

Kgokafalo le Boaka

Lefoko la Modimo le bolela gore go na le koo tlhakanelodikobo e tlotlegang fela teng, mme gone ke mo lenyalong. Baebele e bolela jaana: “A nyalo e tlotlwe mo go botlhe, a bolao bo se leswefadiwe; gonne Modimo o tlaa sekisa bagokafadi le ba boaka.” (Bahebere 13:4) A baeteledipele ba dikereke ba dira go dumalana le thuto eno ya Modimo?

Ka 1989 Kereke ya Anglican kwa Australia e ne ya anamisa lekwalo le le kafa molaong le le malebana le tlhakanelodikobo le le neng le akantsha gore tlhakanelodikobo pele ga lenyalo ga e phoso fa e le gore batho ba babedi ba a ratana tota. Bosheng thata jaana, moeteledipele wa Kereke ya Anglican kwa Scotland o ne a bolela jaana: “Kereke ga e a tshwanela go nyatsa baratani ba ba dirang boaka e re ba dira boleo kana phoso. Kereke e tshwanetse ya amogela gore boaka bo bakiwa ke dijini tse di leng mo go rona.”

Baruti ba le bantsi mo Afrika Borwa ba ile ba ntsha maikutlo a bone ba dumalana le bosotoma. Ka sekai, ka 1990 makasine wa Afrika Borwa wa You o ne wa nopola moruti yo o tumileng thata wa kereke ya Anglican a re: “Dikwalo ga di re bofele ruri. . . . Ke dumela gore kereke e tla fetola mokgwa le molao wa yone malebana le basotoma.”—Farologanya Baroma 1:26, 27.

Buka ya 1994 Britannica Book of the Year e bolela gore tlhakanelodikobo e setse e le kgang ya moruthutha mo dikerekeng tsa kwa Amerika, segolobogolo dikgang tse di jaaka “go tlhomiwa ga batho ba ba ipoletseng e le basotoma ba banna le ba basadi mo bodireding, tsela e bodumedi bo tlhaloganyang ditshwanelo tsa basotoma ka yone, go segofadiwa ga ‘manyalo a basotoma,’ le go amogelwa kana go nyadiwa ga mekgwa ya botshelo e e tsamaisanang le bosotoma.” Bontsi jwa ditumelo tse dikgolo tsa dikereke di letlelela baruti ba dira letsholo la gore go nne le kgololesego e kgolwanyane ya tlhakanelodikobo. Buka ya 1995 Britannica Book of the Year e bolela gore bobishopo ba le 55 ba Episcopal ba ne ba saena maiphako a a “tlhomamisang go amogelwa ga go tlhomiwa ga basotoma mo boruting le mekgwa ya go amogelwa ga jone.”

Baruti ba bangwe ba emela bosotoma, ba bolela gore Jesu ga a ise a ko a bolele sepe kgatlhanong le jone. A mme gone go ntse jalo tota? Jesu Keresete o ne a bolela gore Lefoko la Modimo ke boammaaruri. (Johane 17:17) Seo se raya gore o ne a dumalana le kgopolo ya Modimo e e malebana le bosotoma fela jaaka e tlhalositswe mo go Lefitiko 18:22, e e balegang jaana: “O se ka wa lala le banna, go ba etsa basadi; ke makgapha.” Gape, Jesu o ne a umaka kgokafalo le boaka mmogo le “dilo tse tsotlhe tse di bosula [tse di tswang] mo teng, mme di itshekolole motho.” (Mareko 7:21-23) Lefoko la Segerika le le kayang kgokafalo ke lereo le le atologileng thata go feta la boaka. Le tlhalosa mefuta yotlhe ya tlhakanelodikobo e e seng mo lenyalong le le kafa molaong, go akaretsa le bosotoma. (Juta 7) Gape Jesu Keresete o ne a tlhagisa balatedi ba gagwe gore ba se ka ba tlogela ope fela a ipolela gore ke moruti wa Mokeresete mme a nyatsa bomasisi jwa kgokafalo.—Tshenolo 1:1; 2:14, 20.

Fa baeteledipele ba bodumedi ba dira letsholo la go tlhoma basotoma ba banna le Basotoma ba Basadi go nna baruti, seno se ama jang maloko a dikereke tsa bone, segolobogolo basha? A ga se go rotloetsa tlhakanelodikobo ya batho ba ba sa nyalanang? Se se farologaneng le seo, Lefoko la Modimo le rotloetsa Bakeresete gore “tshabang kgokafalo.” (1 Bakorinthe 6:18, NW) Fa modumedikawena a dira boleo jo bo ntseng jalo, o thusiwa ka lorato ka maikaelelo a gore motho yoo a boe a amogelwe ke Modimo gape. (Jakobe 5:16, 19 20) Go tweng fa e le gore thuso eno e a ganwa? Baebele e bolela gore fa fela batho ba ba ntseng jalo ba sa ikwatlhaya, ga ba “kitla ba rua bogosi jwa Modimo.”—1 Bakorinthe 6:9, 10.

“Go Itsa Batho go Nyala”

Ka ntlha ya “maakafalo,” Baebele e bolela gore “go molemo go nyala bogolo go go babalelwa.” (1 Bakorinthe 7:2, 9) Go sa kgathalesege kgakololo eno e e botlhale, baruti ba le bantsi ba tlhokwa gore ba nne bokgope, ke gore ba nne ba sa nyala. Nino Lo Bello o tlhalosa jaana mo bukeng ya gagwe ya The Vatican Papers: “Ikano ya go nna kgope ga e senngwe fa moruti, moitlami wa senna kana wa sesadi a dira tlhakanelodikobo. . . . Go ka nna le boitshwarelo jwa tlhakanelodikobo ka go ipolela dibe ka bopeloephepa, mme lenyalo lepe fela la moruti le ka se ka la tlotliwa ke Kereke.” A thuto eno e nnile le diphelelo tse di molemo kana tse di bosula?—Mathaio 7:15-19.

Ga go belaetse gore baruti ba le bantsi ba tshela botshelo jo bo phepa mo boitsholong, mme bontsi jwa bone ga bo tshele jalo. Buka ya 1992 Britannica Book of the Year e bolela fa “go ne ga begwa gore Kereke ya Roma Katoliki e duetse didolara di le dimilione tse 300 [diranta di le dimilione tse 1 100] gore e rarabolole dikgetsi tsa baruti tsa go sa dirise tlhakanelodikobo ka tsela e e tshwanetseng.” Morago ga moo, kgatiso ya 1994 e ne ya re: “Go swa ga baruti ba le bantsi thata ba bolawa ke AIDS, go upolotse gore go na le baruti ba banna ba basotoma e bile go lemogilwe gore go ne go na le palo e kgolo ya basotoma . . . ba ba neng ba kgatlhegela boruti.” Ga go gakgamatse go bo Baebele e bolela gore “go itsa batho go nyala” ke ‘thuto ya badimona.’ (1 Timotheo 4:1-3) Peter de Rosa o kwala jaana mo bukeng ya gagwe ya Vicars of Christ: “Tsela e bakwalahisitori bangwe ba bonang ka yone, [go nna kgope ga baruti] go ka tswa e le gone go sentseng maitsholo a batho thata go gaisa mokgwa ope fela o o dirwang kwa dinageng tsa Bophirima, o o akaretsang boaka. . . . Gantsi ke gone go leswefatsang leina la Bokeresete. . . . Gantsi go nna kgope mo go patelediwang go dirile gore batho ba ba mo maemong a boruti ba tshele botshelo jwa boitimokanyi. . . . Moruti o ka leofa ka makgetlho a le mantsi mme o thibelwa ke molao wa kereke gore le ka motlha a se ka a nyala.”

Morago ga go sekaseka tsela e Modimo a lebang kobamelo ya ga Baale ka yone, ga go thata go lemoga kafa a tshwanetseng a bo a leba dikereke tse di kgaoganeng tsa Labokeresete ka teng. Buka ya bofelo ya Baebele e kopanya mefuta yotlhe ya kobamelo ya maaka e re ke “Babilone o mogolo, mma diaka, le mma makgapha a lefatshe.” Baebele e oketsa jaana: “Ga fitlhelwa madi a baperofeti, le a baitshepi mo go one, le a botlhe ba ba bolailweng mo lefatsheng.”—Tshenolo 17:5; 18:24.

Ka gone, Modimo o rotloetsa batho botlhe ba ba batlang go nna baobamedi ba gagwe ba boammaaruri jaana: “Tswang mo go ene lona batho ba me, gore lo se tlhakanele nae dibe tsa gagwe, le gore lo se bone dipetso tsa gagwe. . . . Dipetso tsa gagwe di tlaa [tla] ka letsatsi le le lengwe fela, e bong loso, le selelo, le popamo; o tlaa fisediwa ruri ka molelo, gonne go thata Morena Modimo o o mo atlhotseng.”—Tshenolo 18:4, 8.

Jaanong go tsoga potso: Fa motho a se na go tswa mo bodumeding jwa maaka, o tshwanetse go ya kae? Ke mofuta ofe wa kobamelo o o amogelwang ke Modimo?

Lebokoso/Setshwantsho mo go tsebe 5]

Kobamelo ya medimo e e itiretsweng

Kobamelo ya ga Baale e ne e akaretsa tiriso ya medimo e e itiretsweng. Baiseraele ba ne ba leka go kopanya kobamelo ya ga Jehofa le ya ga Baale. Ba ile ba bo ba tsenya medimo e e itiretsweng mo tempeleng ya ga Jehofa. Tsela e Modimo a lebang kobamelo ya medimo e e itiretsweng ka yone e ne ya phepafala fa a ne a senya Jerusalema le tempele ya yone.

Dikereke di le dintsi tsa Labokeresete di tletse medimo e e itiretsweng, e ka tswa e le sefapaano, ditshwantsho, kana difikantswe tsa ga Marea. Gape, batho ba le bantsi ba ba tsenang kereke ba rutiwa go obama, go khubama, kana go dira sesupo sa sefapaano fa pele ga ditshwantsho tseno. Se se farologaneng le seo, Bakeresete ba boammaaruri ba laelwa gore “tshabang kobamelo ya medimo ya disetwa.” (1 Bakorinthe 10:14) Ga ba leke go obamela Modimo ba thusiwa ke didirisiwa dingwe tse di bonalang.—Johane 4:24.

[Motswedi wa Setshwantsho]

Musée du Louvre, Paris

[Lebokoso mo go tsebe 7]

“Moeteledipele Wa Kereke O Tshwanetse A Nna Yo O Senang Molato”

MAFOKO ano a tswa mo go Tito 1:7, go ya ka thanolo ya Today’s English Version. Thanolo ya King James Version e balega jaana: “Mobishopo ga a tshwanela go nna molato.” Lefoko le le reng “mobishopo” le tswa mo lefokong la Segerika le le kayang “molebedi.” Ka gone banna ba ba tlhomilweng gore ba etelele pele mo phuthegong ya Bokeresete ya boammaaruri ba tshwanetse ba dirisa melao ya Baebele ya motheo. Fa ba sa e dirise, ba tshwanetse ba ntshiwa mo bolebeding, ka gonne ba sa tlhole ba le “dikao mo letsomaneng.” (1 Petere 5:2, 3) Dikereke tsa Labokeresete di tsaya molao ono o le masisi jang?

Mo bukeng ya ga Dr. Everett Worthington ya I Care About Your Marriage, o bolela ka patlisiso ya baruti ba le 100 kwa kgaolong ya Virginia, U.S.A. Ba ba fetang diperesente di le 40 ba ne ba dumela gore ba kile ba kopanela mo boitshwarong jwa go tsosa maikutlo a lorato le mongwe yo e neng e se mogatse. Palo e ntsi ya bone e ne e dirile boaka.

Makasine wa Christianity Today o bolela jaana: “Mo dingwageng tse di lesome tse di fetileng, kereke e ntse e utlwalelwa kgapetsakgapetsa ka go upololwa ga baeteledipele ba bangwe ba ba tlotliwang thata ba yone ka gore ba dirile boitsholo jo bo sa siamang.” Setlhogo se se neng se re “Lebaka La go Bo Baruti ba Diaka ba sa Tshwanela go Busediwa Maemo” se ne sa gwetlha mokgwa o o tlwaelegileng mo go Labokeresete wa go busetsa baeteledipele ba kereke mo maemong a bone a pele ka bofefo fela fa ba se na go “bonwa molato wa boleo jwa tlhakanelodikobo.”