Ba ne Ba Dira go Rata ga Jehofa

Elija o Tlotlomatsa Modimo wa Boammaaruri

E NE e le motho yo o neng a tsomiwa thata kwa Iseraele. Tota o ne a tla bolawa fa kgosi e ne e ka mmona. Monna yono yo o neng a tsomiwa sekanakana e ne e le mang? Moporofeti wa ga Jehofa e bong Elija.

Kgosi Ahabe le mosadi wa gagwe wa moheitane, Jesebele, ba ne ba dira gore kobamelo ya ga Baale e aname kwa Iseraele. Ka ntlha ya seo, Jehofa o ne a lere leuba mo nageng eo, le jaanong le neng le le mo ngwageng wa bonè. Jesebele yo o neng a galefile o ne a rera gore baporofeti ba ga Jehofa ba bolawe, mme Ahabe o ne a batla segolo jang gore go bolawe Elija. E ne e le Elija yo o neng a raya Ahabe jaana mo lobakeng lwa dingwaga tse di fetang tse tharo tse di fetileng: “Ga go ketla go na monyo le fa e le pula ka dinyaga tseno fa e se ka fa lefokong la me.” (1 Dikgosi 17:1) Mme leuba le le neng la tla le ne le sa ntse le tsweletse.

Mo seemong seno se se kotsi, Elija o ne a bolelelwa ke Jehofa jaana: “Ya o iponatse kwa go Ahabe, mme ke tlaa nesa pula mo lefatsheng.” Ka go itsenya mo kotsing e kgolo, Elija o ne a utlwa taelo ya ga Jehofa.—1 Dikgosi 18:1, 2.

Baganetsi ba Babedi ba a Kopana

“A ke wena, wena motshwenyi wa Baiseraele?” Ahabe o ne a botsa jalo fa a bona Elija. Elija o ne a araba jaana ka bopelokgale: “Ga ke a tshwenya Baiseraele; fa e se wena, le ba ntlo ya gago, ka lo latlhile ditaolo tsa ga Jehofa, mme lo setse boBaale morago.” Morago ga moo Elija o ne a laela gore Iseraele yotlhe e phuthegele kwa Thabeng ya Karemele, go akaretsa le “baperofeti ba ga Baale ba ba 450, le baperofeti ba Modimako ba ba 400.” Mme Elija o ne a bua jaana le boidiidi jwa batho: “Lo tlaa [tlolaka, NW] fa gare ga maikutlo a le mabedi ka lobaka lo lo kae?a E re fa Jehofa e le ene Modimo yang nae; mme fa e le Baale, foo lo yeng nae.”—1 Dikgosi 18:17-21.

Batho ba didimala. Gongwe ba ne ba lemoga phoso ya bone ya go palelwa ke go obamela Jehofa fela. (Ekesodo 20:4, 5) Kana gongwe digakolodi tsa bone di ne di babogile mo ba neng ba sa bone gore ba a leofa ka go kgaoganya boikanyegi jwa bone fa gare ga Jehofa le Baale. Le fa go ntse jalo, Elija o ne a laela batho gore ba ntshe dipoo tse pedi—e nngwe e le ya baporofeti ba ga Baale mme e nngwe e le ya gagwe. Dipoo tseo ka bobedi di ne di tla ntshiwa setlhabelo, mme go ne go sa tshwanela gore go godiwe molelo. Elija o ne a bolela jaana: “Lo bitse leina la modimo wa lona, le nna ke tlaa bitsa leina la ga Jehofa; mme Modimo o o arabang ka molelo, e nne one Modimo.”—1 Dikgosi 18:23, 24.

Jehofa o a Tlotlomadiwa

Baporofeti ba ga Baale ba ne ba simolola go “tlolaka mo tikologong ya sebeso se se dirilweng.” Moso otlhe ba ne ba goa jaana: “Baale we, re utlwe.” Mme Baale o ne a se ka a ba araba. (1 Dikgosi 18:26) Morago ga moo Elija o ne a simolola go ba sotla: “Goang thata gonne ke modimo.” (1 Dikgosi 18:27) Tota baporofeti ba ga Baale ba ne ba simolola go itshegaka ka dithipa le marumo—e leng mokgwa o gantsi o neng o dirwa ke baheitane gore medimo ya bone e ba utlwele botlhoko.b—1 Dikgosi 18:28.

Jaanong go ne go setse go fetile motshegare o mogolo, mme baobamedi ba ga Baale ba ne ba tswelela pele “ba itshwara jaaka baporofeti”—e leng polelwana e mo ntlheng eno e tlisang kgopolo ya gore ba ne ba setse ba simolola go dira jaaka ditsenwa e bile ba se na boikgapo. Fa go setse go ela kwa maitseboeng, kgabagare Elija o ne a raya batho botlhe jaana: “Atamelang kwano go nna.” Botlhe ba ne ba lebelela ka tlhoafalo fa Elija a aga sebeso sa ga Jehofa sesha, a bo a epa lefuti gaufi le sone, a bo a segelela powana eno, a bo a e baya mo godimo ga sebeso le dikgong tsa molelo. Morago ga moo, poo, sebeso, le dikgong di ne tsa tshelwa metsi thata, mme mosele o ne o tletse metsi (kwantle ga pelaelo metsi a lewatle a ne a tswa mo Lewatleng la Mediterranean). Morago ga moo, Elija o ne a rapela Jehofa jaana: “Go itsiwe gompieno fa o le Modimo mo Iseraele, le go re, nna ke motlhanka wa gago, le go re ke dirile dilo tsotlhe tse ka lefoko la gago. Nkutlwa Jehofa, o nkutlwe gore batho ba, ba itse fa wena Jehofa o le Modimo, le go re o bile o bositse dipelo tsa bone.”—1 Dikgosi 18:29-37.

Ka tshoganetso, molelo o ne wa tla o tswa kwa legodimong “mme wa nyeletsa tshupelo e e fisiwang le dikgong, le maje, le lorole, wa ba wa latswa metsi a a mo moseleng.” Batho ba ba neng ba lebeletse ka bonako fela ba ne ba khubama, ba re: “Jehofa ke ene Modimo; Jehofa ke ene Modimo!” Elija o ne a laela gore baporofeti ba ga Baale ba tshwarwe mme ba isiwe kwa molatswaneng wa Kishone, koo ba neng ba bolaelwa gone.—1 Dikgosi 18:38-40.

Thuto mo go Rona

Elija o ne a bontsha se go ka tweng ke bopelokgale jo bogolo thata. Le fa go ntse jalo, mokwadi wa Baebele e bong Jakobe o re tlhomamisetsa gore “Elija e ne e le motho yo o nang le maikutlo a a tshwanang le a rona.” (Jakobe 5:17) E ne e se gore ga a boife le go tlalelwa. Ka sekai, fa Jesebele moragonyana a ne a ikana gore o tla busolosetsa baporofeti ba ga Baale ba ba suleng, Elija o ne a tshaba mme morago ga moo a rapela Jehofa jaana: “Go lekanye; jaanong, Jehofa, tlosa botshelo jwa me.”—1 Dikgosi 19:4.

Jehofa o ne a se ka a tsaya botshelo jwa ga Elija ka loso. Go na le moo, o ne a mo thusa ka kutlwelobotlhoko. (1 Dikgosi 19:5-8) Batlhanka ba Modimo gompieno ba ka tlhomamisega gore Jehofa o tla dira se se tshwanang fa ba lebana le dinako tsa tlalelo tse di botlhoko, gongwe ka ntlha ya pogiso. Eleruri fa ba rapela gore Jehofa a ba thuse, o ka ba neela “maatla a a fetang a a tlwaelegileng,” gore le fa tota ba ‘patikilwe ka tsela nngwe le nngwe,’ ba se ka ba ‘pitlagana mo ba ka se tshikhinyegeng.’ Ka gone, ba tla thusiwa go itshoka, jaaka Elija a ne a itshoka.—2 Bakorintha 4:7, 8.

[Dintlha tse di kwa tlase]