“Baboledi ba ba Tlhoafetseng ba Bogosi” Ba Kopana ka Boipelo

MATHATA a boitsholo, a ikonomi le a dipolotiki a fudua lefatshe. Mme le fa go na le mathata a a kanakana, Basupi ba ga Jehofa ba ne ba kopane ka kagiso go tla go ipelela Dikopano Tsa Kgaolo tsa malatsi a mararo tsa “Baboledi ba ba Tlhoafetseng ba Bogosi.” Go simologa ka May 2002, dikokoano tseno di ile tsa tshwarwa go dikologa lefatshe.

Dikopano tseno di ile tsa nna dinako tse di itumedisang eleruri. A re sekasekeng ka bokhutshwane thulaganyo eo e e kgothatsang e e theilweng mo Baebeleng.

Letsatsi la Ntlha le Gatelela Tlhoafalo ya ga Jesu

Setlhogo sa letsatsi la ntlha la kopano se ne se re “Etsa Tlhoafalo ya Morena wa Rona, Jesu.” (Johane 2:17) Puo e e reng “Ipeleleng go Kopana Mmogo Jaaka Baboledi ba Bogosi” e ne ya kgothaletsa ka lorato botlhe ba ba neng ba le teng gore ba nne le boipelo jo bo sa bolong go bonwa mo dikopanong tsa batho ba Modimo. (Duteronome 16:15) Puo eno e ne ya latelwa ke dipotsolotso, go botsolodiwa bareri ba ba tlhoafetseng ba dikgang tse di molemo.

Puo e e reng “Itumelele Jehofa Thata” e ne e tlhalosa Pesalema 37:1-11 temana ka temana. Re ne ra rotloediwa gore re se ka ra ‘galefa’ fa go lebega e kete baikepi ba a atlega. Le fa badirabosula ba ka re senya leina, fa nako e ntse e ya, Jehofa o tla dira gore go bonale sentle gore tota batho ba gagwe ba ba ikanyegang ke bomang. Puo e e reng “Itshupeng Lo na Le Tebogo” e ne ya tlhalosa kafa re ka bontshang go leboga Modimo ka teng. Bakeresete botlhe ba tshwanetse ba naya Jehofa ‘setlhabelo sa pako.’ (Bahebera 13:15) Gone ke boammaaruri gore nako e re e dirisetsang tirelo ya ga Jehofa e ikaegile ka gore re anaanela tirelo eno go le kana kang le gore maemo a rona a ntse jang.

Puo ya setlhogo e ne e re, “Baboledi ba Bogosi ba Bolela ka Tlhoafalo.” E ne e bontsha gore Jesu Keresete ke sekao se se molemo mo go rona sa tlhoafalo. Fa Bogosi jwa kwa legodimong bo sena go tlhomiwa ka 1914, Bakeresete ba boammaaruri ba ne ba tshwanelwa ke go tlhoafala gore ba kgone go itsise dikgang tse di molemo tseo. Sebui se ne sa bua ka kopano e kgolo ya kwa Cedar Point, Ohio, U.S.A., ka 1922 mme sa re gakolola ka taletso eno e e sa lebalegeng: “Itsiseng Kgosi le Bogosi Jwa Yone”! Fa nako e ntse e feta, tlhoafalo ya batlhanka ba Modimo ba ba ikanyegang e ne ya ba tlhotlheletsa gore ba bolele dikgang tse di molemo tsa boammaaruri ka Bogosi mo ditšhabeng tsotlhe.

Puo e e reng “Se Boifeng ka lo Itse Gore Jehofa O na Le Rona,” e e neng ya newa ka thapama ya letsatsi la ntlha, e ne ya bontsha gore Satane o itebagantse thata le batho ba Modimo. Mme le fa re ganediwa, fa re akanya ka dikai tse dintsi tse di mo Baebeleng le tsa metlha ya rona tsa batho ba ba neng ba na le tumelo, re nna pelokgale gore re ka lebana le diteko le dithaelo re se na poifo.—Isaia 41:10.

Go tswa foo go ne ga latela dipuo tse tharo tsa neeletsano ya setlhogo se se reng “Boporofeti Jwa ga Mika bo re Nonotsha Gore re Tsamaye ka Leina la ga Jehofa.” Sebui sa ntlha se ne sa bapisa go senyega ga boitsholo, botlhanogi jwa bodumedi le go rata dikhumo ga motlha wa ga Mika le ga motlha wa rona. O ne a bolela jaana: “Isagwe ya rona e tla nna e e tlhomamisegileng fa re nna kutlo le go tlhomamisa gore boitshwaro jwa rona bo boitshepo mme botshelo jwa rona bo tletse ditiro tsa boineelo jwa bomodimo—re ntse re sa lebale le ka motlha gore letsatsi la ga Jehofa le tla tla.”—2 Petere 3:11, 12.

Sebui sa puo ya bobedi ya neeletsano se ne sa akgela ka tsela e Mika a neng a kgala baeteledipele ba Juda ka yone. Ba ne ba sotla bahumanegi, batho ba ba tlhokang thuso. Mme gape Mika o ne a bolelela pele kafa kobamelo ya boammaaruri e tla fenyang ka teng. (Mika 4:1-5) E re ka moya wa ga Jehofa o o boitshepo o re naya maatla, re iketleeleditse go bolela molaetsa ono o o lapolosang wa tsholofelo. Mme go tweng fa re ikutlwa re kgorelediwa ka tsela nngwe ke bolwetse kgotsa sengwe se sele? Sebui sa boraro se ne sa re: “Dilo tse Jehofa a batlang re di dira di a utlwala e bile ga se dilo tse re ka se kang ra kgona go di dira.” O ne a tswelela pele ka go tlhalosa dintlha tse di farologaneng tsa Mika 6:8 e e balegang jaana: “Jehofa o kopa eng mo go wena fa e se gore o dire tshiamiso le go rata bopelonomi le go nna boingotlo fa o tsamaya le Modimo wa gago?”

E re ka Bakeresete ba ka amiwa ke boitsholo jo bo maswe jwa lefatshe leno, rotlhe re ile ra solegelwa molemo ke puo ya setlhogo se se reng “Nna o Itshekile ka go Dibela Pelo ya Gago.” Ka sekai, fa re nna re itshekile, re tla kgona go nna le manyalo a a itumetseng. Rona Bakeresete, le ka motlha ga re a tshwanela le fa e le gone go akanya gore re ka dira boitsholo jo bo sa siamang jwa tlhakanelodikobo.—1 Bakorintha 6:18.

Puo e e reng “Itise Kgatlhanong le Tsietso” e ne ya re bontsha gore dintlha tse di sokamisitsweng, dilo tse di buiwang e se boammaaruri le tse e leng go aka ka tlhamalalo ga batlhanogi, re tshwanetse ra nna botlhale mme ra di tsaya e le botlhole. (Bakolosa 2:8) Ka tsela e e tshwanang, ga re a tshwanela go itsietsa ka go akanya gore re ka kgotsofatsa dikeletso tsa rona tsa boleo go bo go sa nne le ditlamorago tse di botlhoko.

Setlhogo sa puo e e konelang letsatsi la ntlha se ne se re “Obamela Modimo yo o Esi wa Boammaaruri.” Fa maemo a lefatshe a ntse a nna maswe go ya pele, a bo go kgothatsa jang ne go itse gore go ise go ye kae Jehofa o tla tlisa lefatshe la gagwe la tshiamo! Ke bomang ba ba tla nnang mo go lone? Ke fela ba ba obamelang Jehofa. Sebui se ne sa golola buka e ntšha e e ithutiwang ya Obamela Modimo yo o Esi wa Boammaaruri e e tla thusang rona, bana ba rona le bao re ithutang Baebele le bone gore re fitlhelele mokgele ono. A bo re ne ra itumela jang ne go e amogela!

Letsatsi la Bobedi le Gatelela go Tlhoafalela se se Molemo

Letsatsi la bobedi la kopano le ne le na le setlhogo se se reng “Tlhoafalelang se se Molemo.” (1 Petere 3:13) Sebui sa ntlha se ne sa tlhalosa temana ya Baebele ya letsatsi leo. O ne a gatelela gore go sekaseka temana ya letsatsi ka metlha le ka tsela e e mosola go oketsa tlhoafalo ya rona.

Go tswa foo go ne ga latela dipuo tsa neeletsano ya setlhogo se se reng “Baboledi ba Bogosi ba ba Galaletsang Bodiredi Jwa Bone.” Puo ya ntlha e ne ya gatelela kafa go tlhokegang ka teng gore re tshware Lefoko la Modimo sentle. (2 Timotheo 2:15) Fa re dirisa Baebele sentle seno se dira gore e ‘neye batho maatla’ mo matshelong a bone. (Bahebera 4:12) Re tshwanetse go tlhokomedisa batho se Baebele e se buang re bo re ntsha mabaka ka tsela e e tlhatswang pelo. Puo ya bobedi ya neeletsano e ne ya re rotloetsa gore re boele gangwe le gape kwa bathong ba ba kgatlhegang. (1 Bakorintha 3:6) Re tshwanetse go baakanyetsa le go nna pelokgale gore re boele ka bonako kwa bathong botlhe ba ba kgatlhegang. Puo ya boraro e ne ya akantsha gore re tseye gore mongwe le mongwe yo re kopanang le ene a ka nna morutwa, ya ba ya bontsha gore go buelela thuto ya Baebele mo loetong lwa ntlha go ka felela ka boipelo jwa go thusa batho go nna barutwa.

Setlhogo sa puo e e latelang se ne se re, “Lebaka La go Bo re Tshwanetse go ‘Rapela re sa Kgaotse.’” Baebele e kgothaletsa Bakeresete gore ba batle kaelo ya Modimo mo botshelong jwa bone jotlhe. Re tshwanetse go ipha nako ya go rapela re le rosi. Mo godimo ga moo, re tshwanetse go nnela ruri mo thapelong ka gonne Jehofa a ka re tlogela re mo rapela ka lobaka lo lo rileng pele go bonala gore o re arabile.—Jakobe 4:8.

Puo e e reng “Go Tlotla ka Dilo Tsa Semoya go a Aga” e ne ya re rotloetsa go dirisa bokgoni jwa rona jwa go bua go solegela rona le ba bangwe molemo. (Bafilipi 4:8) Banyalani le bana ba tlhoka go tlotla ka dilo tsa semoya letsatsi le letsatsi. Gore malapa a kgone go dira jalo, a tshwanetse a leka gore bogolo gangwe fela ka letsatsi a je mmogo gore a kgone go nna le metlotlo e e agang.

Thulaganyo ya mo mosong e ne ya konela ka puo e e kgothatsang ya setlhogo se se reng, “Kafa Boineelo le Kolobetso di Isang Polokong ka Gone.” Bayakolobetsong ba ne ba bapetse kitso, ba bontshitse tumelo, ba ikwatlhaile, ba tlogetse go dira bosula e bile ba ineetse mo Modimong. Sebui se ne sa bontsha gore fa ba sena go kolobediwa ba tshwanetse ba tswelela pele ba gola semoyeng le go nna ba tlhoafetse e bile ba na le boitshwaro jo bontle.—Bafilipi 2:15, 16.

Mo thapameng eo, dintlha tse pedi tsa konokono di ne tsa gatelelwa mo puong e e reng, “Nna Tekatekano, Mme o Boloke Leitlho la Gago le sa Raraana.” Go nna tekatekano go kaya go itse makoa a rona le boemo jwa rona fa pele ga Modimo. Go nna tekatekano go re thusa gore re boloke leitlho la rona le sa “raraana”—le lebile Bogosi Jwa Modimo fela, e seng dikhumo. Fa re dira seno ga re a tshwanela go tlhobaela, ka gonne Jehofa o tla re naya dilo tse re di tlhokang.—Mathaio 6:22-24, 33, 34.

Sebui se se latelang se ne sa bontsha lebaka la gore re “Ikanye Jehofa ka Botlalo mo Dinakong Tsa Matshwenyego.” Re ka lepalepana jang le dilo tse di jaaka makoa a rona le mathata a tsa madi kgotsa a botsogo? A re kopeng Jehofa gore a re neye botlhale re bo re kope thuso mo go ba bangwe. Mo boemong jwa gore re boife kgotsa re itlhoboge, re tshwanetse go nonotsha tsela e re ikanyang Modimo ka yone ka go bala Lefoko la gagwe.—Baroma 8:35-39.

Neeletsano ya bofelo ya kopano e ne e na le setlhogo se se reng “Boleng Jwa Tumelo ya Rona bo Lekwa ka Diteko Tse di Farologaneng.” Puo ya ntlha ya neeletsano eno e ne ya re gakolola gore Bakeresete botlhe ba boammaaruri ba a bogisiwa. Go bogisiwa go naya bosupi, go nonotsha tumelo ya rona e bile go re naya sebaka sa go bontsha gore re ikanyega mo Modimong. Le fa re sa tsenye matshelo a rona mo kotsing go sa tlhokege, le ka motlha re ka se ka ra dirisa mokgwa ope o e seng wa Dikwalo go tila pogiso.—1 Petere 3:16.

Sebui sa bobedi mo dipuong tseno tsa neeletsano se ne sa araba dipotso tse di amanang le kgang ya go se tseye letlhakore. Bakeresete ba bogologolo ba ne ba se kgatlhanong le ntwa ka kakaretso, mme ba ne ba lemoga gore ba tshwanetse go ikanyega thata mo Modimong. Le gompieno Basupi ba ga Jehofa ba tshegetsa molaomotheo ono ka tlhoafalo: “Ga lo karolo ya lefatshe.” (Johane 15:19) E re ka maemo a a lekang boemo jwa rona jwa go se tseye letlhakore a ka tlhaga re sa lebelela, malapa a tshwanetse go ipha nako ya go sekaseka kaelo ya Baebele malebana le kgang eno. Jaaka puo ya boraro ya neeletsano eno e ne e bontsha, boikaelelo jwa ga Satane ga se go re bolaya, mme ke go re gatelela gore re se ka ra ikanyega. Fa re itshokela go kgobiwa, dikgatelelo tsa boitsholo jo bo sa siamang, kutlobotlhoko le malwetse ka boikanyegi, re isa pako kwa go Jehofa.

Puo ya bofelo ya letsatsi e ne e na le setlhogo se se nang le taletso e e lorato e e reng “Atamalana le Jehofa.” Go tlhaloganya dinonofo tse di tlhomologileng tsa ga Jehofa go dira gore re atamalane le ene. O dirisa maatla a gagwe a a seng kana ka sepe go sireletsa batho ba gagwe, segolo jang semoyeng. Tshiamiso ya gagwe ga e setlhogo mme e mo tlhotlheletsa gore a neye mongwe le mongwe yo o dirang tshiamo botshelo jo bo sa khutleng. Botlhale jwa Modimo bo bonala ka tsela e a neng a dirisa batho ba ba sa itekanelang ka yone gore ba kwale Baebele. Nonofo e e kgatlhang thata ke lorato lwa gagwe, lo lo neng lwa mo tlhotlheletsa go dira thulaganyo ya gore batho ba bolokwe ka Jesu Keresete. (Johane 3:16) Sebui se ne sa konela ka go golola buka e ntšha e e itumedisang ya Atamalana le Jehofa.

Letsatsi la Boraro le Gatelela go Tlhoafalela Ditiro Tse di Molemo

Setlhogo sa letsatsi la boraro la kopano se ne se re “Batho ba ba Tlhoafaletseng Ditiro Tse di Molemo.” (Tito 2:14) Thulaganyo ya mo mosong e ne ya simolola sentle ka gore lelapa le tlotle ka temana ya letsatsi leo. Go tswa foo go ne ga latela puo ya setlhogo se se reng “A o Ikanya Jehofa?” Ditšhaba di ikanya dilo tse e seng tsone ka go ikaega ka botlhale le maatla a tsone. Le fa go ntse jalo, batlhanka ba ga Jehofa bone ba mo ikanya ka bopelokgale le ka boitumelo le fa ba lebane le masetlapelo.—Pesalema 46:1-3, 7-11.

Puo e e nang le setlhogo se se reng “Basha—Ipaakanyetseng Isagwe mo Phuthegong ya ga Jehofa” e ne e araba potso eno: Tota mosha a ka dira jang gore a bone dilo tse di molemo mo botshelong? Ga a ka ke a kgona go dira jalo fa a latelela go nna le madi, dithoto le maemo. Mmopi wa rona o rotloetsa basha ka lorato gore ba mo gakologelwe ba sa ntse ba le bannye. Sebui se ne sa botsolotsa bangwe ba ba ileng ba dira ka natla mo tirelong ya Bokeresete mo dingwageng tsa bone tsa bosha, mme re ne re kgona go utlwa boitumelo jwa bone. Mme a bo go ne go itumedisa jang ne go amogela pampitshana e ntšha ya Basha—Lo Tla Dirang ka Botshelo Jwa Lona?, e e diretsweng go thusa basha ba Basupi gore ba theye motheo o o tla ba thusang gore ba nne le isagwe e e nnetseng ruri mo phuthegong ya ga Jehofa!

Go tswa foo go ne ga latela terama e e kgatlhang thata ya Baebele ya setlhogo se se reng “Ema o Nitame mo Dinakong Tsa Matshwenyego.” E ne e tlhalosa ka bokhutshwane botshelo jwa ga Jeremia go tswa bosheng jwa gagwe go fitlha ka nako e a neng a boleletse pele ka yone ka tlhoafalo ya go senngwa ga Jerusalema. Jeremia o ne a ikutlwa a sa tshwanelege go dira kabelo eo ya gagwe, mme le fa go ntse jalo o ne a e dira le fa a ne a lebane le kganetso mme Jehofa o ne a mo golola.—Jeremia 1:8, 18, 19.

Terama eno e ne ya latelwa ke puo e e reng “Tshwana le Jeremia—Bolela Lefoko la Modimo o sa Boife.” Gantsi baboledi ba gompieno ba Bogosi ba tlhaselwa ka dipuo tsa maaka le ka go senngwa leina. (Pesalema 109:1-3) Le fa go ntse jalo, fela jaaka Jeremia re ka kgona go lepalepana le maemo a a re kgobang marapo ka gore re natefelelwe ke Lefoko la ga Jehofa. Mme re tlhatswegile pelo gore batho ba ba re lwantshang ga ba kitla ba fenya.

Eleruri puo ya phatlhalatsa e ne e le mo nakong, ka setlhogo se se reng “Seemo sa Lefatshe Leno se a Fetoga.” Go ile ga nna le diphetogo tse di gakgamatsang mo motlheng wa rona. Baebele e ne ya bolelela pele gore maemo a a ntseng jalo, a a akaretsang go goa ga batho ba re “kagiso le polokesego,” a ne a tla lebisa kwa letsatsing le le boitshegang la Modimo la katlholo. (1 Bathesalonika 5:3) Le tla tlisa diphetogo tse di molemo—go fedisiwa ga dintwa tsotlhe, bokebekwa, thubakanyo tota le bolwetse. Ka jalo, go na le gore re ikanye tsamaiso eno ya dilo, eno ke nako ya gore re nne le boineelo jwa bomodimo le boitshwaro jo bo itshekileng.

Tshobokanyo ya thuto ya beke eo ya Tora ya Tebelo e ne ya latelwa ke puo ya bofelo ya kopano e e nang le setlhogo se se reng “Totang mo Ditirong Tse di Molemo Jaaka Baboledi ba ba Tlhoafetseng ba Bogosi.” Sebui se ne sa bontsha kafa thulaganyo e re tlhotlheleditseng ka gone semoyeng le go re kgothaletsa gore re ikaege ka Jehofa. Kwa bokhutlong re ne ra rotloediwa gore re nne baboledi ba ba phepa, ba ba lorato le ba ba tlhoafetseng ba Bogosi Jwa Modimo.—1 Petere 2:12.

Ga go na pelaelo gore re ne ra boela gae re na le boikutlo jo bo tshwanang le jwa batlhanka ba ga Jehofa ba motlha wa ga Nehemia re itumeletse masego a semoya a re a amogetseng kwa Dikopanong Tsa Kgaolo Tsa “Baboledi ba ba Tlhoafetseng ba Bogosi.” (Nehemia 8:12) A kopano eno e e tlhotlheletsang e dirile gore o tlale boitumelo le go iketleeletsa go tswelela pele o le mmoledi yo o tlhoafetseng wa Bogosi?

[Lebokoso/Setshwantsho mo go tsebe 23]

Buka e Ntšha e e Ithutiwang!

Kwa bokhutlong jwa letsatsi la ntlha la kopano, batho ba ba neng ba le teng ba ne ba itumela fa go gololwa buka e ntšha ya Obamela Modimo yo o Esi wa Boammaaruri. E diretswe gore e ithutiwe le batho ba ba feditseng go ithuta buka ya Kitso E E Isang Botshelong Jo bo Sa Khutleng mme ga go na pelaelo gore e tla nonotsha tumelo ya batho ba ba nang le “tshekamelo e e siameng ya go bona botshelo jo bo sa khutleng.”—Ditiro 13:48.

[Motswedi wa Setshwantsho]

Image on book cover: U.S. Navy photo

[Lebokoso/Ditshwantsho mo go tsebe 24]

Sedirisiwa Sa go Re Thusa go Atamalana le Modimo

Sebui sa bofelo mo letsatsing la bobedi la kopano se ne sa itsise ka go gololwa ga buka e ntšha ya Atamalana le Jehofa. E na le dikarolo tsa botlhokwa tse nnè, nngwe le nngwe ya tsone e tlhalosa nngwe ya dinonofo tse di tlhomologileng tsa ga Jehofa—maatla, tshiamiso, botlhale le lorato. Karolo nngwe le nngwe ya buka eno e na le kgaolo e e bontshang kafa Jesu Keresete a neng a tlhoma sekao se segolo ka teng sa kafa dinonofo tsa Modimo di dirang ka gone. Boikaelelo jo bogolo jwa buka eno e ntšha ke go thusa rona le batho ba re ithutang Baebele le bone gore ba nne le kamano e e gaufi le e e nonofileng le Jehofa Modimo.