Dipotso Tse di Tswang Kwa Babading

Ke ka ntlha yang fa Tora ya Tebelo ya April 1, 2002, mo tsebeng ya 11, mo serapeng sa 7, e ile ya re fa badumedi ba basha ba Bajuda ba ne ba kolobediwa mo metsing ka Pentekosete ya 33 C.E., e ne e le go tshwantshetsa “boineelo jwa bone mo Modimong ka Keresete” fa mo nakong e e fetileng go ne go dumelwa gore go tloga ka 33 C.E. go fitlha ka 36 C.E. Bajuda ba ne ba sa tlhoke go ineela ka tsela e e ntseng jalo?

Ka 1513 B.C.E., Jehofa o ne a naya Baiseraele tshono ya go nna setšhaba sa gagwe se se boitshepo fa ba ne ba ka ‘utlwa lentswe la gagwe ka kelotlhoko le go boloka kgolagano ya gagwe.’ Ba ne ba araba ba re: “Re iketleeleditse go dira sotlhe se Jehofa a se buileng.”—Ekesodo 19:3-8; 24:1-8.

Fa Baiseraele ba ne ba dumela gore ba tla boloka kgolagano ya Molao wa ga Moshe, ba ne ba ineela mo Modimong. Dikokomana tse di neng tsa latela tsa Bajuda di ne tsa tsholelwa mo setšhabeng seno se se ineetseng. Le fa go ntse jalo, go kolobediwa ga Bajuda ba ba neng ba nna balatedi ba ga Jesu Keresete go tloga ka Pentekosete ya 33 C.E. go ya pele, go ne go sa akaretse fela go itlhagisa go Modimo gore ke maloko a setšhaba se se ineetseng mo go ene. Go ne go tshwantshetsa boineelo jwa bone go Jehofa Modimo mo kamanong e ntšha e ba nang le yone le ene ka Jesu Keresete. Jang?

Morago ga gore barutwa ba ka nna 120 ba ba neng ba kokoane mo ntlwaneng e e kwa godimo kwa Jerusalema ba tshololelwe moya o o boitshepo ka Pentekosete ya 33 C.E., moaposetoloi Petere o ne a ema mme a simolola go rerela matshwititshwiti a Bajuda le basokologi ba ba neng ba tlile koo go tla go bona se se neng se direga. Fa a sena go rerela Bajuda ba ba neng ba amilwe maikutlo ke mafoko a gagwe o ne a re: “Ikwatlhayeng, mme a mongwe le mongwe wa lona a kolobediwe mo leineng la ga Jesu Keresete gore lo itshwarelwe maleo a lona.” Ka ntlha ya kgakololo e e oketsegileng ya ga Petere, “ba ba neng ba amogela lefoko la gagwe ka pelo yotlhe ba [ne ba] kolobediwa, mme mo letsatsing leo go ne ga okediwa ka meya e ka nna dikete di le tharo.”—Ditiro 2:1-41.

A Bajuda bao ba ba neng ba kolobediwa morago ga go utlwa kgakololo ya ga Petere e ne e setse e se maloko a setšhaba se se ineetseng? A ba ne ba sa ineela mo Modimong go le gale? Nnyaa. Moaposetoloi Paulo o ne a re, ‘Modimo o ne a ntshitse Molao mo tseleng ka go o kokotela mo koteng ya tlhokofatso.’ (Bakolosa 2:14) Jehofa Modimo o ne a fedisa kgolagano ya Molao—sone selo sa konokono se se neng sa dira gore Baiseraele ba nne le kamano ya boineelo le Ene—ka loso lwa ga Keresete ka 33 C.E. Jaanong setšhaba seo se se neng se ganne Morwa Modimo le sone Modimo o ne a se gana. Setšhaba seo se e neng e le “Iseraele ka tsela ya senama” se ne se ka se tlhole se ipolela gore ke setšhaba se se ineetseng mo Modimong.—1 Bakorintha 10:18; Mathaio 21:43.

Kgolagano ya Molao e ne ya fedisiwa ka 33 C.E., le fa go ntse jalo, nako ya Modimo ya go tsaya Bajuda e le batho ba ba kgethegileng e ne ya se ka ya fela ka nako eo.a Nako eo e ne e tlile go tswelela go fitlha ka 36 C.E., fa Petere a ne a rerela Korenelio wa Montadiana yo o boifang Modimo le lelapa la gagwe le Baditšhaba ba bangwe. (Ditiro 10:1-48) Ke ka ntlha yang fa nako eo e ile ya okediwa?

Daniele 9:27 ya re: ‘Mesia o ne a tla boloka kgolagano e le maatla mo go ba le bantsi beke e le nngwe.’ Kgolagano e e neng ya bolokiwa e le maatla ka dingwaga di le supa, kana “beke e le nngwe,” go tloga ka nako ya fa Jesu a kolobediwa le go tloga ka nako ya fa Mesia a simolola bodiredi jwa gagwe jwa phatlalatsa ka 29 C.E., e ne e le kgolagano ya ga Aborahame. Gore motho a nne mo kgolaganong eo, o ne a tshwanelwa fela ke go nna mongwe wa lotso lwa ga Aborahame lwa Bahebera. Kgolagano eo e ne e sa dire gore motho a ineele ka namana mo go Jehofa. Ka gone, le fa badumedi ba Bajuda ba ba neng ba kolobediwa morago ga puo ya ga Petere ka Pentekosete ya 33 C.E. ba ne ba na le tshiamelo e e kgethegileng ya go nna Bajuda ba tlholego, ba ne ba ka se ka ba bolela gore ba ineetse mo Modimong fa kgolagano ya Molao e sena go fedisiwa. Ba ne ba tshwanelwa ke go ineela ka namana mo Modimong.

Go ne go na le lebaka le lengwe gape le le neng le tlhoka Bajuda le baditšhaba ba ba neng ba kolobediwa ka letsatsi la Pentekosete ya 33 C.E. gore ba ineele ka namana. Moaposetoloi Petere o ne a gakolola bareetsi ba gagwe gore ba ikwatlhaye mme ba kolobediwe mo leineng la ga Jesu. Go dira jalo go ne go ba tlhoka gore ba tlogele tsela ya lefatshe mme ba amogele Jesu e le Morena le Mesia, Moperesiti yo Mogolo, le gore ke ene yo o tla dulang kafa letsogong la moja la Modimo kwa legodimong. Ba ne ba tshwanelwa ke go bitsa leina la ga Jehofa Modimo gore ba bolokwe ka Keresete Jesu, e leng se se neng se tlhoka gore ba dumele mo go Keresete le go mo tsaya e le Moeteledipele wa bone. Jaanong thulaganyo yotlhe ya go nna le kamano le Modimo le go itshwarelwa maleo e ne e fetogile. Mojuda mongwe le mongwe yo e neng e nna modumedi o ne a tshwanelwa ke go amogela thulaganyo eno e ntšha. Jang? Ka go ineela mo Modimong le ka go bontsha seo phatlhalatsa ka go kolobediwa mo metsing mo leineng la ga Jesu Keresete. Go kolobediwa mo metsing e ne e le sesupo sa gore ba ineetse mo Modimong, e leng se se neng se dira gore ba nne le kamano e ntšha le ene ka Jesu Keresete.—Ditiro 2:21, 33-36; 3:19-23.

[Ntlha e e kwa tlase]