Anaanela Dinonofo Tsa ga Jehofa ka Botlalo

 1. (a) Ke dinonofo dife tsa ga Jehofa tse Mokeresete a ka akanyang ka tsone? (b) Re tla solegelwa molemo jang ke go sekaseka dinonofo tsa Modimo?

FA O akanya ka botho jwa ga Jehofa, ke dinonofo dife tse di tlang mo mogopolong wa gago? Bontsi jwa rona re akanya lorato, tshiamiso, botlhale le maatla. Le fa go ntse jalo, re lemoga gore Jehofa o na le dinonofo tse dintsi tse di dirang gore re mo rate. Tota e bile, re ka dira lenaane la dinonofo tse di fetang 40 tsa ga Jehofa tse go tlotlilweng ka tsone mo dikgatisong tsa rona. Akanya fela gore go na le dintlha tse di kgatlhang jang tse di malebana le botho jwa ga Jehofa tse re ka ithutang tsone fa re ithuta re le nosi kgotsa re le malapa! Thuto e e ntseng jalo e ka re solegela molemo ka ditsela dife? E ka re thusa gore re anaanele Rraarona yo o kwa legodimong fela thata. Mme fa re anaanela Jehofa thata, re tla batla go atamalana le ene le go mo etsa.—Josh. 23:8; Pes. 73:28.

 2. (a) Bontsha kafa re ka godisang tsela e re anaanelang dinonofo tsa ga Jehofa ka yone. (b) Re tlile go sekaseka eng?

² Gone mme, go “anaanela” sengwe go kaya eng? Go kaya go lemoga botlhokwa jwa sone. Kanaanelo e gola ka bonya ka bonya. Ka sekai: Re ka simolola go rata dijo tse re neng re sa di itse ka go dupa monko wa tsone, go di ja ka iketlo mme go tswa foo re bo re di ikapeela. Ka tsela e e tshwanang, re ka godisa tsela e re anaanelang ka yone nonofo nngwe ya ga Jehofa ka go ithuta ka yone, go tlhatlhanya ka yone mme go tswa foo, re bo re e dirisa mo matshelong a rona. (Baef. 5:1) Boikaelelo jwa setlhogo seno le tse pedi tse di latelang ke go re thusa go anaanela thata dinonofo tsa Modimo, tse re ka tswang re sa akanye thata ka tsone jaaka re dira ka tse dingwe tsa konokono. Fa re tlotla ka nonofo nngwe le nngwe re tla sekaseka gore: Nonofo eno e kaya eng? Jehofa o e bontsha ka tsela efe? Re ka etsa Jehofa jang ka tsela e re bontshang nonofo eno ka yone?

3, 4. (a) O ka tlhalosa jang motho yo o atamelesegang? (b) Jehofa o re tlhomamisetsa jang gore o a atamelesega?

³ A re simolole ka go sekaseka nonofo ya go atamelesega. O ka re motho yo o atamelesegang ke yo o ntseng jang? O ka nna wa re, ke ‘Motho yo o pelonomi, yo o iketleeleditseng go thusa ba bangwe le yo go leng motlhofo go bua le ene.’ Gantsi o ka lemoga gore a motho o a atamelesega kgotsa nnyaa ka go reetsa se a se buang kgotsa go lemoga tsela e a itshwarang ka yone fa lo bua.

⁴ Jehofa o bontsha jang gore o a atamelesega? Le fa Jehofa e le Mmopi yo o maatlaotlhe wa lobopo lwa rona lo logolo, o re tlhomamisetsa gore o iketleeditse go reetsa dithapelo tsa rona le go di araba e bile o tlhoafaletse go dira jalo. (Bala Pesalema 145:18; Isaia 30:18, 19.) Re ka kgona go bua le Modimo ka sengwe le sengwe, nako nngwe le nngwe kgotsa gongwe le gongwe. Re ka mo atamela ka kgololesego, re tlhomamisegile gore a ka se re kgobe. (Pes. 65:2; Jak. 1:5) Lefoko la Modimo le tlhalosa gore Jehofa o batla go atamelwa, mme le tlhalosa seo ka tsela e rona batho re ka e tlhaloganyang sentle. Ka sekai, mopesalema Dafide o ne a kwala gore “matlho a ga Jehofa a mo” go rona le gore ‘seatla sa gagwe sa moja se re ngangatletse.’ (Pes. 34:15; 63:8) Moporofeti Isaia o ne a tshwantshanya Jehofa le modisa, fa a ne a re: “O tla phutha dikwanyana mmogo ka lebogo la gagwe; mme o tla di tshola mo sehubeng sa gagwe.” (Isa. 40:11) Akanya fela! Jehofa o batla re mo atamela jaaka kwana e e robetseng mo sehubeng sa modisa yo o lorato. Ruri Jehofa ke Rre yo o atamelesegang! Re ka kgona jang go mo etsa mo ntlheng eno?

 5. Ke eng fa go le botlhokwa gore bagolwane ba atamelesege?

⁵ Bosheng jaana, Basupi ba ba tlhagafetseng ba ba nnang mo dinageng tse di farologaneng ba ne ba bodiwa potso eno, “Ke nonofo efe e o bonang go le botlhokwa thata gore mogolwane a nne le yone?” Bontsi jwa bone bo ne jwa araba ka go re, “Ke go atamelesega.” Gone ke boammaaruri gore Mokeresete mongwe le mongwe o tshwanetse go leka ka natla go nna le nonofo eno, mme gone go botlhokwa thata gore bagolwane ba atamelesege. (Isa. 32:1, 2) Fa kgaitsadi mongwe a ne a tlhalosa lebaka la go bo a akanya gore nonofo eno e botlhokwa thata, o ne a re: “Ke fela fa mogolwane a atamelesega re ka kgonang go solegelwa molemo ke dinonofo tse dingwe tsa gagwe tse di molemo.” A o bona lebaka le le utlwalang la go bo bangwe ba ikutlwa jalo? Mme gone, ke eng se se dirang gore motho a atamelesege?

 6. Ke eng sa botlhokwa se se ka thusang motho gore a atamelesege?

⁶ Sengwe sa botlhokwa se se ka thusang motho gore a atamelesege ke gore a kgatlhegele batho go tswa pelong. Fa mogolwane a amega ka batho ba bangwe e bile a iketleeleditse go ipha nako le bone, bakaulengwe le bokgaitsadi ba gagwe, go akaretsa le ba bannye ba ka nna ba lemoga seo. (Mar. 10:13-16) Carlos wa dingwaga di le 12 a re: “Ke kgatlhiwa ke go bona bagolwane kwa holong ba nyenya e bile ba le pelonomi.” Gone ga go a lekana gore mogolwane a bue fela gore o a atamelesega; o tshwanetse go bontsha seo ka ditiro. (1 Joh. 3:18) A ka dira seo jang?

 7. Ke eng fa gantsi go tsenya betšhe ya kopano go dira gore batho ba simolole motlotlo, mme re ka ithuta eng mo go seno?

⁷ Akanya ka sekai seno. Bosheng jaana, mokaulengwe mongwe o ne a tsentse betšhe ya gagwe ya kopano fa a ne a le mo sefofaneng a boela gae go tswa kopanong kwa moseja. Fa modiredi wa mo sefofaneng a bona betšhe e e nang le mafoko a a reng, “A Bogosi Jwa Modimo bo Tle!” o ne a raya mokaulengwe yono a re “Ee, a bo tle—re tshwanetse go tlotla mo go oketsegileng ka kgang eno.” Moragonyana ba ne ba tlotla, mme modiredi yoo o ne a amogela dimakasine tsa rona. Bontsi jwa rona re na le maitemogelo a a tshwanang le ao. Mme gone, ke eng fa gantsi betšhe ya kopano e dira gore batho ba simolole motlotlo? Ka gonne ka tsela nngwe e raya batho e re: “Ikutlwe o gololesegile go nkatamela. Mpotse gore ke ya kae.” Betšhe ke letshwao le le bonalang sentle le le dirang gore batho ba bone gore re iketleeleditse go buisana le bone ka bodumedi jwa rona. Ka tsela e e tshwanang, bagolwane ba Bakeresete ba batla go naya badumedimmogo le bone matshwao a a ba bolelelang gore: “Ikutlwe o gololesegile go nkatamela.” Mangwe a matshwao ao ke afe?

 8. Bagolwane ba bontsha jang gore ba kgatlhegela batho ba bangwe, mme seo se ama phuthego jang?

⁸ Dingwao di farologana go ya ka mafelo, mme gantsi fa o nyenya le bakaulengwe kgotsa bokgaitsadi ba gago, o ba dumedisa ka seatla e bile o sa itlhaganela, o ba bontsha gore tota o a ba kgatlhegela. Ke mang yo o tshwanetseng go atamela yo mongwe pele? Ela tlhoko sekao se Jesu a se tlhomileng. Mathaio o bega gore mo pokanong nngwe e Jesu a neng a na le yone le barutwa ba gagwe, “Jesu [o ne] a atamela a ba a bua le bone.” (Math. 28:18) Ka tsela e e tshwanang, gompieno bagolwane ba atamela badumedimmogo le bone le go bua le bone. Seo se ka ama phuthego jang? Kgaitsadi mongwe wa mmulatsela yo o nang le dingwaga di le 88 a re: “Monyenyo o o lorato le mafoko a a kgothatsang a bagolwane ba mpolelelang one fa ke tsena mo Holong ya Bogosi, a dira gore ke ba rate.” Kgaitsadi mongwe yo o ikanyegang le ene o ne a re: “Go ka lebega e le sengwe se se sa reng sepe, mme gone, fa mogolwane a nkamogela ka monyenyo kwa dipokanong, seno se intumedisa tota.”

9, 10. (a) Jehofa o re tlhomela sekao sefe se se molemo? (b) Ke jang bagolwane ba ka iphang nako le ba bangwe?

⁹ Ga go pelaelo gore re ka se kgone go atamelesega fa re sa iphe nako le batho ba bangwe. Jehofa o re tlhomela sekao se se molemo mo ntlheng eno. “[Ga a] kgakala thata le mongwe le mongwe wa rona.” (Dit. 17:27) Tsela nngwe e bagolwane ba ka iphang nako le batho ba bangwe ka yone, ke ka go beela nako kwa thoko pele ga dipokano tsa Bokeresete le morago ga tsone gore ba tlotle le bakaulengwe le bokgaitsadi ba bone—ba bannye le ba bagolo. Mokaulengwe mongwe wa mmulatsela o ne a re: “Fa mogolwane a mpotsa gore ke ntse ke tsoga jang, a bo a ntheetsa fa ke mo araba, ke ikutlwa ke anaanelwa.” Kgaitsadi mongwe yo o nang le dingwaga di ka nna 50 a direla Jehofa o ne a re: “Bagolwane ba ba iphang nako ya go tlotla le nna morago ga dipokano ba dira gore ke ikutlwe ke le botlhokwa.”

¹⁰ Go a utlwala gore badisa ba Bakeresete ba tshwanetse go dira ditiro tse dingwe gape. Le fa go ntse jalo, ba tshwanetse go ipeela mokgele wa gore ba iphe nako le dinku pele, fa ba le kwa dipokanong.

11, 12. (a) Go sa nne le tlhaolele go akaretsa eng? (b) Jehofa o re tlhometse jang sekao sa go sa nne le tlhaolele?

¹¹ Go sa nne le tlhaolele ke nngwe ya dinonofo tse di rategang tse Jehofa a nang le tsone. Go sa nne le tlhaolele go kaya eng? Go kaya go se gobelele kgotsa go se kgetholole, go tshwara batho sentle. Go sa nne le tlhaolele go bonala ka ditsela tse pedi: tsela e re ikutlwang ka yone ka ba bangwe le kafa re ba tshwarang ka gone. Ke eng fa dilo tseno tsoopedi di le botlhokwa? Ka gonne motho a ka kgona go tshwara batho ba bangwe ka go se ba tlhaole fa fela a na le boikutlo joo jwa go se tlhaole batho. Mo Dikwalong Tsa Bokeresete Tsa Segerika, polelwana go ‘sa nne le tlhaolele,’ fa e ranolwa e kaya go se tseye motho yo mongwe a le botoka mo go yo mongwe. (Dit. 10:34) Ka jalo, batho ba ba sa tlhaoleng ba bangwe ga ba na sepe le ditebego tsa motho kgotsa maemo a gagwe, go na le moo, ba kgatlhegela botho jwa gagwe.

¹² Jehofa ke sekao se segolo sa go sa nne le tlhaolele. Lefoko la Gagwe la re, “ga a na tlhaolele” e bile ‘ga a tshware ope ka go mo tlhaola.’ (Bala Ditiro 10:34, 35; Duteronome 10:17.) Tiragalo nngwe ya mo motlheng wa ga Moshe e bontsha seo.

13, 14. (a) Bomorwadia Selofehade ba le batlhano ba ne ba lebana le boemo bofe? (b) Jehofa o ne a bontsha jang gore ga a na tlhaolele?

¹³ Nakwana fela pele ga gore Baiseraele ba tsene mo Lefatsheng le le Solofeditsweng, makgarebane a le matlhano a e neng e le bana ba motho a ne a lebana le bothata bongwe. E ne e le bofe? Ba ne ba itse gore, fela jaaka malapa a mangwe a Baiseraele, lelapa la bone le ne le tshwanetse go newa karolo nngwe ya lefatshe le le neng le abetswe rraabone. (Dipa. 26:52-55) Le fa go ntse jalo, rraabone e bong Selofehade, wa lotso lwa ga Manase, o ne a sule. Go ya ka molao, tshwanelo ya go abelwa lefatshe leo e ne e tla newa bomorwa Selofehade, le fa go ntse jalo, o ne a na le barwadi fela. (Dipa. 26:33) E re ka go ne go se na morwa yo o neng a tla amogela boswa joo, a seno se ne se raya gore lefatshe leo le tla abelwa mongwe wa losika mme bomorwadia Selofehade ba ne ba tla latlhegelwa ke boswa jwa lelapa?

¹⁴ Bomorwadia Selofehade ba le batlhano ba ne ba ya kwa go Moshe mme ba mmotsa jaana: “Ke ka ntlha yang fa leina la ga rraarona le tshwanetse go tlosiwa mo gare ga lelapa la gagwe ka gonne a ne a se na ngwana wa mosimane?” Mme ba ne ba mo kopa jaana: “Tsweetswee re neye thuo mo gare ga bomorwarraagwe rraarona.” A Moshe o ne a ba araba ka go re, ‘Molao o ka se fetolwe’? Nnyaa, o ne “a isa kgang ya bone fa pele ga ga Jehofa.” (Dipa. 27:2-5) Jehofa o ne a reng? O ne a bolelela Moshe jaana: “Bomorwadia Selofehade ba bua sentle. Ba neye thuo ya boswa mo gare ga bomorwarraagwe rraabone, mme o dire gore boswa jwa ga rraabone bo fetele mo go bone.” Gape Jehofa o ne a dira se se fetang seo. O ne a fetola seo go nna molao, a laela Moshe jaana: “Fa go direga gore motho ope a swe a se na ngwana wa mosimane, foo lo dire gore boswa jwa gagwe bo fetele mo go morwadie.” (Dipa. 27:6-8; Josh. 17:1-6) Go simolola ka nako eo go ya pele, basadi botlhe ba Baiseraele ba ba neng ba lebane le seemo seo se se thata, ba ne ba ka kgona go sirelediwa.

15. (a) Jehofa o tshwara batho ba gagwe jang, segolobogolo ba go se nang ope yo o ka ba thusang? (b) Ke dipego dife tse dingwe tse di mo Baebeleng tse di bontshang gore Jehofa ga a na tlhaolele?

¹⁵ Ruri eo e ne e le tshwetso e e bontshang bopelonomi le go sa nne le tlhaolele! Jehofa o ne a tshwara ka seriti basadi bano ba ba neng ba ka latlhegelwa ke boswa jwa bone, fela jaaka a ne a dira ka Baiseraele ba maemo a bone a neng a siame. (Pes. 68:5) Eno ke nngwe ya dipego tse dintsi tsa Baebele tse di bontshang boammaaruri jono jo bo nametsang: Jehofa o tshwara batlhanka ba gagwe botlhe ka go se ba tlhaole.—1 Sam. 16:1-13; Dit. 10:30-35, 44-48.

16. Re ka nonotsha jang maikemisetso a rona gore re se ka ra nna le tlhaolele?

¹⁶ Re ka etsa Jehofa jang ka go sa nne le tlhaolele? Gopola gore go sa nne le tlhaolele go bonala ka ditsela tse pedi. Re ka kgona go tshwara batho ba bangwe ka go se ba tlhaole, fa fela re na le boikutlo joo jwa go se tlhaole. Ke boammaaruri gore rotlhe re na le go akanya gore ga re na tlhaolele. Mme gone, o ka tswa o dumela gore ga se ka dinako tsotlhe go leng motlhofo go itlhatlhoba ka tsela e e siameng. Ka jalo, ke eng se re ka se dirang fa re batla go lemoga gore a batho ba re itse re le batho ba ba se nang tlhaolele? Fa Jesu a ne a batla go itse gore batho ba reng ka ene, o ne a botsa ditsala tsa gagwe tse di ikanyegang jaana: “Batho ba re Morwa motho ke mang?” (Math. 16:13, 14) Ke eng fa re sa latele sekao seno sa ga Jesu? O ka nna wa botsa tsala nngwe ya gago e o e ikanyang e o itseng gore e tla go bolelela boammaaruri, gore a o itsege o le motho yo o se nang tlhaolele. Fa a go bolelela gore go bonala o na le mekgwa mengwe ya go tlhaola batho go ya ka lotso, go ya ka maemo a bone mo setšhabeng kgotsa maemo a bone a itsholelo, o tshwanetse go dira eng? Rapela Jehofa ka tlhoafalo gore a go thuse gore o baakanye boikutlo joo, gore o se ka wa nna le tlhaolele fela jaaka ene.—Math. 7:7; Bakol. 3:10, 11.

17. Re ka bontsha ka ditsela dife gore ga re tlhaole batho?

¹⁷ Mo phuthegong ya Bokeresete, re bontsha gore re etsa Jehofa ka go se nne le tlhaolele, ka go tshwara bakaulengwe botlhe le bokgaitsadi ba rona ka seriti le ka bopelonomi. Ka sekai, fa go tliwa mo kgannyeng ya go amogela baeng, re batla go laletsa badumedimmogo le rona ba merafe yotlhe, go akaretsa le ba ba godileng ka tsela e e sa tshwaneng le ya rona, mmogo le ba ba humanegileng, dikhutsana kgotsa batlholagadi. (Bala Bagalatia 2:10; Jakobe 1:27.) Mo godimo ga moo, fa re le mo tirong ya go rera ka Bogosi, re rerela batho botlhe ba ba godileng ka ditsela tse di sa tshwaneng go akaretsa le ba ba tswang kwa dinageng di sele. Ruri re a itumela gore re na le dikgatiso tse di theilweng mo Baebeleng ka dipuo di ka nna 600. Ruri seno ke bosupi jo bo bonalang sentle jwa gore ga re na tlhaolele!

18. Wena o ka bontsha jang gore o anaanela tsela e Jehofa a atamelesegang ka yone le tsela e a se nang tlhaolele ka yone?

¹⁸ Eleruri, fa re ipha nako ya go akanya kafa Jehofa a atamelesegang ka gone e bile a se na tlhaolele, re tla mo anaanela fela thata. Mme go mo anaanela ka tsela eno e kgolo go tshwanetse ga re tlhotlheletsa gore re etse dinonofo tsa gagwe ka botlalo, re bontshe seno mo tseleng e re dirisanang le badumedimmogo le rona ka yone le batho ba re ba rerelang.