Thuto 4

Diabolo ke Mang?

Satane Diabolo—o tswa kae? (1, 2)

Satane o tsietsa batho jang? (3-7)

Ke eng fa o tshwanetse go ganetsa Diabolo? (7)

1. Lefoko “diabolo” le kaya motho yo o buang maaka a a bosula ka motho yo mongwe. “Satane” o kaya mmaba kana moganetsi. Maina ano ke a a filweng mmaba yo mogolo wa Modimo. Pele e ne e le moengele yo o itekanetseng kwa legodimong a na le Modimo. Lefa go ntse jalo, moragonyana o ne a simolola go itseela kwa godimo mme a batla kobamelo e tota e neng e tshwanetse go newa Modimo.—Mathaio 4:8-10.

2. Moengele yono e bong Satane o ne a bua le Efa a dirisa noga. Ka go mmolelela maaka, o ne a dira gore a se ka a utlwa Modimo. Satane o ne a tlhasela “bolaodi” jwa Modimo, kana boemo jwa gagwe jwa go nna Mogodimodimo. Satane o ne a belaela gore a Modimo o busa ka tsela e e tshwanetseng le ka tsela e e tla solegelang babusiwa ba Gagwe molemo. Satane o ne gape a dira gore go belaelwe gore a batho ba tla nna ba ikanyega mo Modimong. Ka go dira jalo, Satane o ne a itira mmaba wa Modimo. Ke ka lebaka leo a neng a bidiwa Satane Diabolo.—Genesise 3:1-5; Jobe 1:8-11; Tshenolo 12:9.

3. Satane o leka go tsietsa batho gore ba mo obamele. (2 Bakorinthe 11:3, 14) Tsela e nngwe e a tsietsang batho ka yone ke ka bodumedi jwa maaka. Fa bodumedi bo ruta maaka ka Modimo, tota bo a bo bo diragatsa boikaelelo jwa ga Satane. (Johane 8:44) Batho ba e leng maloko a bodumedi jwa maaka ba ka tswa ba dumela tota gore ba obamela Modimo wa boammaaruri. Mme tota ba direla Satane. Ke “modimo wa lefatshe leno.”—2 Bakorinthe 4:4.

4. Tirisabadimo ke tsela e nngwe e Satane a laolang batho ka yone. Ba ka nna ba senka badimona gore ba ba sireletse, ba utlwise batho ba bangwe botlhoko, ba bolelele pele isagwe, kana ba dire dikgakgamatso. Satane ke ene maatla a a bosula a a tlhotlheletsang dilo tseno tsotlhe. Gore re itumedise Modimo, re tshwanetse gore re ikgaoganye gotlhelele le tirisabadimo.—Duteronome 18:10-12; Ditiro 19:18, 19.

5. Satane gape o tsietsa batho ka go dira gore ba nne le boipelafatso jwa bomorafe thata le ka go obamela mekgatlho ya bopolotiki. Ba bangwe ba akanya gore morafe kana lotso lwa bone lo botoka go gaisa e mengwe. Mme ga go a nna jalo. (Ditiro 10:34, 35) Batho ba bangwe ba ikanya mekgatlho ya bopolotiki gore ke yone e e tla rarabololang mathata a batho. Ka go dira jalo ba gana Bogosi jwa Modimo. Ke jone fela jo bo ka rarabololang mathata a rona.—Daniele 2:44.

6. Tsela e nngwe e Satane a tsietsang batho ka yone ke ka go ba raela ka dikeletso tse di bosula. Jehofa o re bolelela gore re tile ditiro tse di bosula ka gonne o a itse gore di tla re utlwisa botlhoko. (Bagalatia 6:7, 8) Batho bangwe ba ka nna ba batla gore re kopanele le bone mo dilong tse di ntseng jalo. Lefa go ntse jalo, gakologelwa gore, tota ke Satane yo o batlang gore o dire dilo tseno.—1 Bakorinthe 6:9, 10; 15:33.

7. Satane a ka nna a dirisa pogiso kana kganetso go dira gore o tlogele Jehofa. Bangwe ba batho ba o ba ratang ba ka nna ba galefa thata ka go bo o ithuta Baebele. Ba bangwe ba ka nna ba go sotla. Mme ke mang yo o go fileng botshelo? Satane o batla go go tshosa gore o emise go ithuta ka Jehofa. O se ka wa letla Satane gore a fenye! (Mathaio 10:34-39; 1 Petere 5:8, 9) Fa o ganana le Diabolo, o tla itumedisa Jehofa mme o tla bo o bontsha gore o tseela bolaodi jwa Gagwe kwa godimo.—Diane 27:11.

[Ditshwantsho mo go tsebe 9]

Bodumedi jwa maaka, bomorafe le tirisabadimo ke dilo tse di tsietsang batho

[Setshwantsho mo go tsebe 9]

Ganana le Satane ka go tswelela pele o ithuta kaga Jehofa