Kgaolo Ya Borobedi

‘Go Lwa le Mephato ya Meya e e Boikepo’

 1. Ke eng fa ditiro tsa meya e e boikepo di re ama thata jaana?

BATHO ba le bantsi ba a sotla fa go twe go na le meya e e boikepo. Mme seno ga se motlae. Le fa batho ba ka tswa ba dumela kgotsa ba sa dumele, meya e e boikepo e teng, e bile e leka go gatelela batho botlhe. E leka go gatelela le baobamedi ba ga Jehofa tota. E bile e itebagantse thata le bone. Moaposetoloi Paulo o re tlhagisa ka ntlha eo, a re: “Re lwa, e seng le madi le nama, mme le dipuso [tse di sa bonaleng], le balaodi, le babusi ba lefatshe ba lefifi leno, le mephato ya meya e e boikepo mo mafelong a selegodimo.” (Baefeso 6:12) Mo motlheng wa rona kgatelelo ya mephato ya meya e e boikepo e ile magoletsa ka gonne Satane o kobilwe kwa legodimong mme o galefile, ka a itse gore nako ya gagwe e khutshwane.—Tshenolo 12:12.

 2. Re ka kgona jang go fenya ntwa kgatlhanong le meya e e nang le maatla a a fetang a motho?

² A re ka kgona go fenya ntwa kgatlhanong le meya e e nang le maatla a a fetang a motho? Ee, mme re ka kgona fela ka go ikaega gotlhelele ka Jehofa. Re tshwanetse go mo reetsa le go ikobela Lefoko la gagwe. Ka go dira jalo, ga re na go utlwa botlhoko jwa mo mmeleng, mo boitsholong le mo boikutlong, botlhoko jo bo utlwiwang ke batho ba ba laolwang ke Satane.—Jakobe 4:7.

Babusi ba Lefatshe mo Mafelong a Selegodimo

 3. Satane o ganetsa bomang ka tsela e e setlhogo, mme o dira seo jang?

³ Jehofa o re tlhalosetsa seemo sa lefatshe sentle jaaka a se bona a le kwa lefelong la gagwe kwa magodimong. O ne a bontsha moaposetoloi Johane ponatshegelo e mo go yone Satane a supiwang e le “kgogela e kgolo e khunou.” O ne a ipaakanyeditse gore fa go kgonega, a kometse Bogosi jwa Modimo jwa Bomesia fela fa bo tsalwa kwa legodimong ka 1914. Fa Satane a palelwa ke go dira jalo, o ne a dira gore baemedi ba Bogosi joo ba ba mo lefatsheng ba bogisiwe ka tsela e e setlhogo. (Tshenolo 12:3, 4, 13, 17) Satane o ne a tla lwa ntwa eno jang? Ka baemedi ba gagwe ba batho.

 4. Dipuso tsa batho di tsaya kae maatla a tsone, mme re itse jang?

⁴ Go tswa foo Johane o ne a bontshiwa sebatana sa ditlhogo tse supa le dinaka tse di lesome, sebatana se se nang le taolo mo “godimo ga lotso longwe le longwe le batho le teme le setšhaba.” Sebatana seo se emela tsamaiso ya lefatshe lotlhe ya bopolotiki. Johane o ne a bolelelwa gore “kgogela [Satane Diabolo e ne] ya naya sebatana seno maatla a yone le setulo sa yone sa bogosi le taolo e kgolo.” (Tshenolo 13:1, 2, 7) Ee, Satane ke ene motswedi wa maatla le taolo ya dipuso tsa batho. Ka jalo, jaaka moaposetoloi Paulo a ne a kwala, “babusi ba lefatshe” tota ke “mephato ya meya e e boikepo mo mafelong a selegodimo,” e e laolang dipuso tsa batho. Botlhe ba ba batlang go obamela Jehofa ba tshwanetse ba tlhaloganya seo ka botlalo.—Luke 4:5, 6.

 5. Gone jaanong babusi ba bopolotiki ba phuthelwa kwa go eng?

⁵ Le fa babusi ba le bantsi ba bopolotiki ba ipolela gore ba rata bodumedi, ga go na setšhaba sepe se se ineelang gore se busiwe ke Jehofa kgotsa ke Kgosi e a e tlhomileng, Jesu Keresete. Botlhe ba kgaratlha ka thata gore ba nne ba ngangatletse taolo e ba nang nayo. Gompieno, jaaka pego e e mo go Tshenolo e bontsha, “dipolelwana tse di tlhotlheleditsweng ke madimona” di phuthela babusi ba lefatshe kwa “ntweng ya letsatsi le legolo la Modimo Mothatayotlhe” kwa Haramagedona.—Tshenolo 16:13, 14, 16; 19:17-19.

 6. Ke eng fa motho a tshwanetse go nna kelotlhoko gore a se ka a iphitlhela a tshegetsa tsamaiso ya ga Satane?

⁶ Letsatsi le letsatsi, matshelo a batho a amiwa ke dikgotlhang tsa bopolotiki, tsa loago, tsa ikonomi le tsa bodumedi tse di kgaoganyang lelapa la batho. Fa go nna le dikgotlhang tse di ntseng jaana, gantsi batho ba tsaya letlhakore la setšhaba sa bone, morafe, setlhopha sa puo, kgotsa setlhopha sa maemo a ba leng mo go one—ba dira jalo ka mafoko kgotsa ka ditiro. Le fa batho ba sa nne le seabe ka tlhamalalo fa go na le kgotlhang, gantsi ba iphitlhela ba rata letlhakore lengwe go feta le lengwe. Mme go sa kgathalesege gore ba buelela motho ofe kgotsa kgopolo efe, totatota ba a bo ba tshegetsa mang? Baebele e bolela jaana ka tlhamalalo: “Lefatshe lotlhe le namaletse mo maatleng a yo o boikepo.” (1 Johane 5:19) Ka gone he, motho a ka dira jang gore a se ka a latlhega le batho ba bangwe botlhe? Ke fela ka go tshegetsa Bogosi jwa Modimo ka botlalo le go se tseye letlhakore gotlhelele mo dikganetsanong tsa lefatshe.—Johane 17:15, 16.

Maano a a Boferefere A yo O Boikepo

 7. Botlhajana jwa ga Satane bo bonala jang mo tseleng e a dirisang bodumedi jwa maaka ka yone?

⁷ Mo hisitoring yotlhe, Satane o ile a dirisa pogiso ya mafoko le ya go gobatsa mo mmeleng go faposa batho mo kobamelong ya boammaaruri. O dirisitse le mekgwa e mengwe e e bofitlha—ditiro le maano a boferefere. Ka botlhajana o dirisitse bodumedi jwa maaka go dira gore batho ba le bantsi ba nne ba le mo lefifing, a dira gore ba akanye gore ba direla Modimo. E re ka ba se na kitso e e tlhomameng ka Modimo e bile ba sa rate boammaaruri, ba ka nna ba gogelwa ke ditirelo tsa bodumedi tsa masaitseweng le tse di gogomosang maikutlo kgotsa ba kgatlhiwa ke ditiro dingwe tsa maatla. (2 Bathesalonika 2:9, 10) Mme re tlhagisiwa gore tota le mo gare ga batho ba ba kileng ba bo ba le mo bodumeding jwa boammaaruri, “bangwe ba tla wa . . . , ba tlhokomela dipolelo tse di tlhotlheleditsweng tse di tsietsang le dithuto tsa madimona.” (1 Timotheo 4:1) Seo se ka direga jang?

 8. Satane a ka re gogela jang mo bodumeding jwa maaka le fa re obamela Jehofa?

⁸ Diabolo o dirisa makoa a rona ka boferefere. A re sa ntse re boifa motho? Fa go ntse jalo re ka ineela fa re gatelelwa ke ba losika kgotsa baagelani gore le rona re latele ditlwaelo tsa bodumedi jwa maaka. A re a ikgantsha? Fa go ntse jalo, re ka nna ra kgopisega fa re gakololwa kgotsa fa ba bangwe ba sa amogele megopolo ya rona. (Diane 15:10; 29:25; 1 Timotheo 6:3, 4) Mo boemong jwa go baakanya tsela e re lebang dilo ka yone gore e latele sekao sa ga Keresete, re ka nna ra ikutlwa re rata go reetsa ba ba ‘tsikitlang ditsebe tsa rona’ ka go bolela gore go bala Baebele fela le go tshela botshelo jo bo siameng go lekane. (2 Timotheo 4:3) Satane ga a na sepe le gore a re tsena mo bodumeding jo bongwe kgotsa re ngangatlela mofuta wa rona wa bodumedi, o batla fela gore re se ka ra obamela Jehofa ka tsela e Modimo a re e kaelang ka Lefoko la gagwe le ka phuthego ya gagwe.

 9. Satane o dirisa tlhakanelodikobo ka boferefere jang gore a fitlhelele maikaelelo a gagwe?

⁹ Gape Satane ka boferefere o oka batho gore ba kgotsofatse dikeletso tsa tlholego ka ditsela tse di sa tshwanelang. O dirile seno ka keletso ya tlhakanelodikobo. Batho ba le bantsi mo lefatsheng ba latlhile boitshwaro jo bo buelelwang ke Baebele, mme ba leba tlhakanelodikobo ya batho ba ba sa nyalanang e le go itlosa bodutu fela mo go amogelesegang kgotsa e le tsela ya go supa gore ba godile. Mme go tweng ka ba ba leng mo lenyalong? Ba le bantsi ba a gokafala. Mme le fa molekane yo mongwe a sa dira kgokafalo, batho ba le bantsi ba a tlhala kgotsa ba kgaogana le balekane ba bone gore ba tle ba nne le mongwe o sele. Tsela e e bofitlha ya ga Satane e leka go tlhotlheletsa batho gore ba ijese monate gone jaanong, e dira gore ba tlhokomologe matswela a gone a botshelo jotlhe mo go bone le mo go ba bangwe mme bogolo jang mo kamanong ya bone le Jehofa le Morwawe.—1 Bakorintha 6:9, 10; Bagalatia 6:7, 8.

10. Satane o leka ka ditsela dife go faposa boikutlo jwa rona malebana le boitsholo jo bo sa siamang le thubakanyo?

¹⁰ Keletso e nngwe ya tlholego ke ya boitapoloso. Fa bo le phepa, bo ka lapolosa mmele, mogopolo le maikutlo. Mme re itshwara jang fa Satane ka botlhajana a dirisa dinako tsa go itapolosa go leka go faposa dikakanyo tsa rona mo Modimong? Ka sekai, re a itse gore Jehofa o tlhoile boitsholo jo bo sa siamang jwa tlhakanelodikobo le thubakanyo. Fa difilimi, dithulaganyo tsa thelebishene kgotsa metshameko e bontsha dilo tseno, a re nna fela re bo re reetsa sengwe le sengwe? Gakologelwa gape gore, Satane o tla tlhomamisa gore dilo tseno di nna maswe le go feta fa nako ya gore a senngwe e ntse e atamela, ka gonne “batho ba ba boikepo le maferefere ba tla tswelela ba sulafalela pele, ba tsietsa e bile ba tsiediwa.” (2 Timotheo 3:13) Ka jalo re tlhoka go nna re itisitse mo maanong a ga Satane.—Genesise 6:13; Pesalema 11:5; Baroma 1:24-32.

11. Tota le motho yo o itseng boammaaruri ka bodimona a ka raelesega ka ditsela dife fa a se kelotlhoko?

¹¹ Gape re itse gore batho ba ba dirisanang le meya ka tsela epe fela—go laola ka bola, go loa kgotsa go leka go bua le baswi—ba makgapha mo go Jehofa. (Duteronome 18:10-12) Ka ntlha ya seo, re ne re ka se ka ra akanya go ya kwa bathong ba ba buang le meya, e bile re ne re ka se ka ra ba amogela mo legaeng la rona gore ba tle go dira boitseanape jwa bone jwa bodimona. Mme a re ne re ka ba reetsa fa ba tlhaga mo thelebisheneng ya rona kgotsa mo Internet? Le mororo le ka motlha re ka se ka ra dumela go alafiwa ke ngaka ya bola, a re ka bofelela thapo mo seatleng sa ngwana wa rona yo o sa tswang go tsalwa, re akanya gore ka tsela nngwe e ka sireletsa ngwana mo go se se kotsi? E re ka re itse gore Baebele e kgala go loa batho ba bangwe, a re ne re ka letla motho yo o alafang ka go korobetsa a laola mogopolo wa rona?—Bagalatia 5:19-21.

12. (a) Mmino o dirisiwa jang go dira gore re akanye ka dikgopolo tse re itseng gore di phoso? (b) Tsela e motho a aparang ka yone, a ipaakanyang moriri ka yone kana a buang ka yone e ka bontsha jang gore o rata batho ba ba tshelang ka tsela e Jehofa a sa e rateng? (c) Re tshwanetse ra dira eng gore re se ka ra wela mo maanong a ga Satane a boferefere?

¹² Baebele ya re boaka le maswe a mofuta otlhe a se ka a ba a umakiwa mo gare ga rona (ka boikaelelo jwa go re leswafatsa). (Baefeso 5:3-5) Mme go tweng fa e le gore dilo tse di ntseng jalo di umakwa mo mminong o o nang le molodi o o monate, o o nang le moribo o o gogelang kgotsa morethetho? A re tla simolola go boaboeletsa mafoko a pina e e galaletsang go tlhakanela dikobo kwantle ga lenyalo, go intsha bodutu ka diokobatsi, le ditiro tse dingwe tsa boleo? Kgotsa le fa re itse gore ga re a tshwanela go tshela jaaka batho ba ba dirang dilo tseno, a re itshwantsha le bone ka go etsa tsela e ba aparang ka yone, e ba ipaakanyang meriri ka yone, kgotsa e ba buang ka yone? A bo e le bofitlha jang ne mekgwa e Satane a e dirisang go raela batho go tshela tumalanong le tsela ya gagwe e e maswe ya go akanya! (2 Bakorintha 4:3, 4) Fa re sa batle go wela mo maanong a gagwe a boferefere, re tshwanetse ra itlhokomela gore re se ka ra ya le lefatshe. Re tshwanetse go nna re gopotse gore “babusi ba lefatshe ba lefifi leno” ke bomang mme re lwe ka tlhoafalo kgatlhanong le tlhotlheletso ya bone.—1 Petere 5:8.

Re Ipaakanyeditse go Nna Bafenyi

13. Go ka kgonega jang ka ope wa rona, re ntse re sa itekanela, gore re fenye lefatshe le Satane a le busang?

¹³ Jesu o ne a raya baaposetoloi ba gagwe jaana pele a swa: “Nnang pelokgale! Ke fentse lefatshe.” (Johane 16:33) Le bone ba ne ba ka nna bafenyi. Dingwaga di le 60 moragonyana, moaposetoloi Johane o ne a kwala jaana: “Ke mang yo o fenyang lefatshe fa e se yo o nang le tumelo ya gore Jesu ke Morwa Modimo?” (1 Johane 5:5) Re ka bontsha tumelo e e ntseng jalo ka go ikobela ditaelo tsa ga Jesu le go ikaega ka Lefoko la Modimo, fela jaaka Jesu a ne a dira. Go tlhokega eng gape? Gore re nne re le gaufi le phuthego e a leng Tlhogo ya yone. Fa re leofa, re tshwanetse go ikotlhaya ka pelo yotlhe mme re kope Modimo gore a re itshwarele mo motheong wa setlhabelo sa ga Jesu. Ka tsela eno, le fa re sa itekanela e bile re dira diphoso, le rona re ka nna bafenyi.—Pesalema 130:3, 4.

14. Bala Baefeso 6:13-17, mme o dirise dipotso le ditemana tse di mo serapeng seno go tlhalosa melemo ya karolo nngwe le nngwe ya diaparo tsa semoya tsa tlhabano.

¹⁴ Gore re atlege, re tshwanetse go apara “diaparo tse di feletseng tsa tlhabano tse di tswang kwa Modimong,” re sa tlhokomologe sepe sa tsone. Tsweetswee bula Baebele ya gago mo go Baefeso 6:13-17, mme o bale kafa e tlhalosang diaparo tseo tsa tlhabano ka teng. Go tswa foo, ka go araba dipotso tse di fa tlase, tlhatlhoba kafa o ka solegelwang molemo ka teng ke tshireletso e o e newang ke karolo nngwe le nngwe ya diaparo tsa tlhabano.

“Lotheka . . . lo gatlhilwe ka boammaaruri”

Le fa re ka tswa re itse boammaaruri, go ithuta ka metlha, go tlhatlhanya ka boammaaruri jwa Baebele le go nna teng kwa dipokanong go re sireletsa jang? (1 Bakorintha 10:12, 13; 2 Bakorintha 13:5; Bafilipi 4:8, 9)

“Seiphemelo sa sehuba sa tshiamo”

Ke mang yo o beileng tekanyetso eno ya tshiamo? (Tshenolo 15:3)

Tshwantsha kafa go se latele ditsela tsa ga Jehofa tsa tshiamo go tsenyang motho mo kotsing ya semoya ka teng. (Duteronome 7:3, 4; 1 Samuele 15:22, 23)

“Dinao tsa lona di rwele iketleetso ya dikgang tse di molemo tsa kagiso”

Go dira gore dinao tsa rona di re ise ka metlha kwa bathong gore re ye go bua le bone ka dithulaganyo tsa Modimo tsa kagiso go re sireletsa jang? (Pesalema 73:2, 3; Baroma 10:15; 1 Timotheo 5:13)

“Thebe e kgolo ya tumelo”

Fa re na le tumelo e e tlhomameng sentle, re tla itshwara jang fa batho ba leka go re tsenya dipelaelo kgotsa poifo? (2 Dikgosi 6:15-17; 2 Timotheo 1:12)

“Tlhoro ya phemelo ya poloko”

Tsholofelo ya poloko e thusa motho jang gore a se ka a raelwa ke go tshwenyega mo go feteletseng ka go nna le dikhumo? (1 Timotheo 6:7-10, 19)

“Tšhaka ya moya”

Ka metlha re tshwanetse ra ikaega ka eng fa re lwantsha ditlhaselo mo bomoyeng jwa rona kgotsa jwa ba bangwe? (Pesalema 119:98; Diane 3:5, 6; Mathaio 4:3, 4)

Ke eng gape se se botlhokwa gore motho a atlege mo ntweng ya semoya? Se tshwanetse sa dirisiwa ga kae? Se dirisediwa bomang? (Baefeso 6:18, 19)

15. Re ka tsaya kgato jang mo ntweng ya semoya?

¹⁵ Jaaka masole a ga Keresete, re karolo ya mophato o mogolo o o mo ntweng ya semoya. Fa re nna re ntshitse matlho dinameng mme re dirisa diaparo tsotlhe tsa phemelo sentle tse di tswang kwa Modimong, re ka se bolawe mo ntweng eno. Mo boemong jwa moo, re tla thusa batlhanka ba bangwe ba Modimo ka go ba nonotsha. Re tla nna re ipaakantse e bile re iketleeditse go tsaya kgato, go anamisa dikgang tse di molemo tsa Bogosi jwa Modimo jwa Bomesia, puso ya selegodimo e Satane a e ganetsang thata jaana.

Motlotlo wa Poeletso

• Ke ka ntlha yang fa baobamedi ba ga Jehofa ba sa tseye letlhakore gotlhelele mo dintweng tsa lefatshe?

• Dingwe tsa ditsela tsa boferefere tse Satane a di dirisang go bolaya Bakeresete semoyeng ke dife?

• Diaparo tsa tlhabano tsa semoya tse Modimo a re nayang tsone di re sireletsa jang mo ntweng ya rona ya semoya?

[Ditshwantsho mo go tsebe 76]

Ditšhaba di phuthelwa kwa Haramagedona