Kgaolo Ya Lesome

Bogosi “Jo bo Se Kitlang bo Senngwa le ka Motlha”

 1. Ke ntlha efe e e ileng ya gatelelwa ke ditiragalo tsa lefatshe go ralala hisitori ya motho?

LETSATSI le letsatsi ditiragalo tsa lefatshe di gatelela ntlha ya gore batho ga ba a kgona go bona boitumelo ka go latlha bolaodi jwa ga Jehofa le go leka go ipusa. Ga go tsamaiso epe ya puso ya batho e e tliseditseng batho melemo kwantle ga go gobelela ba bangwe. Le fa batho ba tlhabolotse kitso ya bone ya saense ka selekanyo se segolo thata, ga ba a kgona go fenya bolwetse kgotsa go fedisa loso, le fa e le mo mothong a le esi fela. Puso ya motho ga e a fedisa ntwa, thubakanyo, bokebekwa, ditiro tse di seng kafa molaong kgotsa lehuma. Dipuso tse di gatelelang di sa ntse di gatelela batho mo dinageng di le dintsi. (Moreri 8:9) Boranyane jwa saense, bopelotshetlha le botlhokakitso fa di kopane di baka go kgotlelwa ga naga, metsi le moya. Tsela e e sa siamang e babusi ba laolang ikonomi ka yone e dira gore ba le bantsi ba ketefalelwe ke go nna le dilo tse di tlhokegang mo botshelong. Dingwaga tse di diketekete tsa go busa ga motho di bontshitse ntlha eno sentle: “Tsela ya motho wa mo lefatsheng ga se ya gagwe. Ga se ga motho yo o tsamayang ka dinao go kaela dikgato tsa gagwe.”—Jeremia 10:23.

 2. Tharabololo e le yosi ya mathata a batho ke eng?

² Tharabololo ke eng? Ke Bogosi jwa Modimo jo Jesu a neng a ruta balatedi ba gagwe go bo rapelela jaana: “A bogosi jwa gago bo tle. A thato ya gago e diragale le mo lefatsheng, jaaka kwa legodimong.” (Mathaio 6:9, 10) Mo go 2 Petere 3:13 Bogosi jwa Modimo jwa selegodimo bo tlhalosiwa e le “magodimo a masha,” a a tla bong a busa “lefatshe le lesha,” ke gore setšhaba se se siameng sa batho. Bogosi jwa Modimo jwa selegodimo bo botlhokwa mo e leng gore Jesu o ne a dira gore bo nne kgangkgolo ya thero ya gagwe. (Mathaio 4:17) O ne a bontsha kafa bo tshwanetseng jwa ama matshelo a rona ka teng, a rotloetsa a re: “Jalo, nnang lo batle pele bogosi le tshiamo ya gagwe.”—Mathaio 6:33.

 3. Ke ka ntlha yang fa go potlakile thata gone jaanong go ithuta ka Bogosi jwa Modimo?

³ Go ithuta ka Bogosi jwa Modimo go potlakile fela thata gone jaanong, ka gonne go ise go ye kae Bogosi joo bo tla tsaya kgato ya go fetolela ruri puso ya lefatshe leno. Daniele 2:44 e bolelela pele jaana: “Mo metlheng ya dikgosi tseo [dipuso tse di busang jaanong] Modimo wa legodimo o tla tlhoma bogosi [kwa legodimong] jo bo se kitlang bo senngwa le ka motlha. Mme bogosi joo ga bo kitla bo fetisediwa mo bathong bape ba bangwe [batho ga ba ne ba tlhola ba busa lefatshe gape]. Bo tla thubaganya bo fedisa magosi ano otlhe [a a leng teng gone jaanong], mme bo tla ema ka bosakhutleng.” Ka gone, Bogosi bo tla fedisa metlha eno ya bofelo ka go senya tsamaiso eno yotlhe e e boikepo ya dilo. Ka nako eo go busiwa ga lefatshe ke Bogosi jwa selegodimo go tla bo go sa ganediwe ke ope. A bo re tshwanetse ra leboga jang ne go bo go setse go le gaufi thata gore re gololesege ka ntlha ya seno!

 4. Go ne ga diragala eng kwa legodimong ka 1914 malebana le Bogosi, mme ke ka ntlha yang fa seo se le botlhokwa mo go rona?

⁴ Ka 1914, Keresete Jesu o ne a tlhomiwa e le Kgosi mme a newa thata ya gore a ‘tsamaye a fenye mo gare ga baba ba gagwe.’ (Pesalema 110:1, 2) Gape ka one ngwaga oo, go ne ga simologa ‘metlha ya bofelo’ ya tsamaiso eno e e boikepo ya dilo. (2 Timotheo 3:1-5, 13) Go ntse go le jalo, ditiragalo tse Daniele a neng a di bone mo ponatshegelong ya boporofeti di ne tsa diragala kwa legodimong. “Mogologolo wa Malatsi,” Jehofa Modimo, o ne a naya Morwa motho, Jesu Keresete, “bobusi le seriti le bogosi, gore ditšhaba, ditlhopha tsa ditšhaba le dipuo tsotlhe di mo direle.” Daniele o ne a kwala jaana, a bega ka ponatshegelo eo: “Bobusi jwa gagwe ke bobusi jo bo nnang ka bosakhutleng jo bo se kitlang bo feta, mme bogosi jwa gagwe ke jo bo se kitlang bo senngwa.” (Daniele 7:13, 14) Modimo o tla dirisa Bogosi jono jwa selegodimo jo go tla bong go busa Keresete Jesu mo go jone go dira gore batho ba ba ratang tshiamo ba ipelele dilo tse dintsintsi tse di molemo tse a neng a ikaeletse gore ba di ipelele fa a ne a baya batsadi ba rona ba ntlha mo Paradaiseng.

 5. Ke dilo dife tse di re kgatlhang thata malebana le Bogosi, mme ka ntlha yang?

⁵ A o eletsa go nna mmusiwa yo o ikanyegang wa Bogosi joo? Fa go le jalo, o tla kgatlhegela thata go itse kafa puso eno ya selegodimo e bopegileng ka teng le kafa e dirang ka teng. O tla rata go itse gore e dirang gone jaanong, e tla dirang mo isagweng, le gore e batla gore wena o dire eng. Fa o ntse o tlhatlhoba Bogosi jono ka kelotlhoko, o tshwanetse wa bo anaanela thata. Fa o dumela go busiwa ke jone, o tla kgona go bolelela ba bangwe dilo tse di molemo tse Bogosi jwa Modimo bo tla di direlang batho ba ba kutlo.—Pesalema 48:12, 13.

Babusi ba Bogosi Jwa Modimo

 6. (a) Dikwalo di bontsha jang gore ke mang yo Bogosi jwa ga Mesia bo supang gore ke ene Molaodimogolo? (b) Se re se ithutang ka Bogosi se tshwanetse sa re ama jang?

⁶ Sengwe sa dilo tsa ntlhantlha tse o tla di lemogang fa o ntse o bo tlhatlhoba jalo ke gore Bogosi jono jwa ga Mesia bo bontsha gore Jehofa ke ene Molaodimogolo. Jehofa ke ene yo o neng a naya Morwawe “bobusi le seriti le bogosi.” Fa Morwa Modimo a sena go newa maatla a go busa e le Kgosi, mantswe kwa legodimong a ne a bolela jaana ka tshwanelo: “Bogosi jwa lefatshe bo fetogile bogosi jwa Morena wa rona [Jehofa Modimo] le jwa ga Keresete wa gagwe, mme [Jehofa] o tla busa e le kgosi ka bosaengkae le go ya go ile.” (Tshenolo 11:15) Ka jalo sengwe le sengwe se re se lemogang ka Bogosi jono le se bo se diragatsang se ka re atametsa gaufi le Jehofa ka boene. Se re se ithutang se tshwanetse sa re tsenya keletso ya go ineela mo bolaoding jwa gagwe ka bosakhutleng.

 7. Ke eng fa go re kgatlha ka mo go kgethegileng gore Jesu Keresete ke Mothusa Mmusi wa ga Jehofa?

⁷ Ela tlhoko gape ntlha ya gore Jehofa o beile Jesu Keresete mo setulong sa bogosi e le Mothusa Mmusi. E re ka Jesu e le Modiri yo o Setswerere yo Modimo a mo dirisitseng go bopa lefatshe le batho, o itse dilo tse re di tlhokang go feta kafa ope wa rona a itseng ka teng. Mo godimo ga moo, go tswa fela kwa tshimologong ya hisitori ya motho, o ile a bontsha gore o ‘rata bomorwa batho.’ (Diane 8:30, 31; Bakolosa 1:15-17) O rata batho thata mo e leng gore o ne a tla ka esi mo lefatsheng a tla go ntsha botshelo jwa gagwe go ba rekolola. (Johane 3:16) Ka gone o ne a rulaganya gore re kgone go gololwa mo boleong le mo losong a ba a re naya sebaka sa go bona botshelo jo bo sa khutleng.—Mathaio 20:28.

 8. (a) Ke ka ntlha yang fa puso ya Modimo yone e tla nnela ruri go feta dipuso tsa batho? (b) “Motlhanka yo o boikanyego le yo o botlhale” o amana jang le puso ya selegodimo?

⁸ Bogosi jwa Modimo ke puso e e tlhomameng e e nnelang ruri. Se se tlhomamisang gore e nnela ruri ke gore Jehofa ka boene ga a swe. (Habakuke 1:12) Jesu Keresete, ene yo Modimo a mo neileng bogosi ga a tshwane le dikgosi tsa batho ka gonne le ene ga a swe. (Baroma 6:9; 1 Timotheo 6:15, 16) Ba ba tla bong ba na le Keresete mo ditulong tsa bogosi tsa selegodimo e tla bo e le ba bangwe ba le 144 000, batlhanka ba ba ikanyegang ba Modimo ba ba tswang “mo lotsong longwe le longwe le teme le batho le setšhaba.” Bano le bone ba newa botshelo jwa bosasweng. (Tshenolo 5:9, 10; 14:1-4; 1 Bakorintha 15:42-44, 53) Bontsi jwa bone ba setse ba le kwa magodimong, mme masalela a bone a a sa ntseng a le teng mo lefatsheng a bopa “motlhanka yo o boikanyego le yo o botlhale” wa gone jaanong yo ka boikanyegi a diragatsang dilo tse di amanang le Bogosi joo mono.—Mathaio 24:45-47.

 9, 10. (a) Bogosi bo tla tlosa dilo dife tse di tlhotlheletsang kgaogano le tse di senyang? (b) Fa re sa batle go nna baba ba Bogosi jwa Modimo, re tshwanetse ra tila go inaakanya le dilo dife?

⁹ Go ise go ye kae, ka nako e Jehofa a e beileng, o tla romela masomosomo a gagwe a a diragatsang katlholo gore a tseye kgato a phepafatse lefatshe. A tla fedisetsa ruri batho ba ba itlhophelang go gana go amogela bolaodi jwa gagwe le ba ba nyatsang dithulaganyo tse di lorato tse a di dirang ka Jesu Keresete. (2 Bathesalonika 1:6-9) Leo e tla bo e le letsatsi la ga Jehofa, nako e e sa bolong go letwa ya gore a fenye jaaka Molaodimogolo wa Lobopo Lotlhe. “Bona! Letsatsi la ga Jehofa le etla, le setlhogo ka tšhakgalo le ka bogale jo bo tukang, . . . gore le nyeletse baleofi ba lefatshe mo go lone.” (Isaia 13:9) “Letsatsi leo ke letsatsi la tšhakgalo, letsatsi la matshwenyego le la tlalelo e e mahehe, letsatsi la matsubutsubu le la kgakgabalo, letsatsi la lefifi le la letobo, letsatsi la maru le letobo le lentshontsho.”—Sefania 1:15.

¹⁰ Bodumedi jotlhe jwa maaka le dipuso tsotlhe tsa batho le masole a tsone, tse di ntseng di dirisiwa ke mmusi yo o sa bonaleng yo o boikepo wa lefatshe leno, di tla nyelelediwa ruri. Botlhe ba ba inaakanyang le lefatshe leno ka go tshela botshelo jwa boithati, jwa go sa ikanyege le jwa maitsholo a a sa siamang ba tla fedisiwa ka go bolawa. Satane le badimona ba gagwe ba tla tlosiwa gore ba se ka ba amana ka gope le banni ba lefatshe, mme ba tla tsenngwa mo moleteng ka dingwaga di le sekete. Foo Bogosi jwa Modimo bo tla kgona go laola dikgang tsotlhe tsa lefatshe. A bo e tla nna kgololo jang ne mo go botlhe ba ba ratang tshiamo!—Tshenolo 18:21, 24; 19:11-16, 19-21; 20:1, 2.

Maikaelelo a Bogosi—Kafa a Diragadiwang ka Teng

11. (a) Bogosi jwa ga Mesia bo tla diragatsa jang boikaelelo jwa ga Jehofa ka lefatshe? (b) Ka nako eo puso ya Bogosi e tla direla batho ba ba tla bong ba nna mo lefatsheng eng?

¹¹ Bogosi jwa ga Mesia bo tla diragatsa ka botlalo boikaelelo jwa Modimo jwa kwa tshimologong ka lefatshe. (Genesise 1:28; 2:8, 9, 15) Go tla go fitlha le jaanong, batho ga ba a tshegetsa boikaelelo joo. Le fa go ntse jalo, “lefatshe le le nang le banni le le tla tlang” le tla bo le busiwa ke Morwa motho, Jesu Keresete. Botlhe ba ba falolang go diragadiwa ga katlholo ya ga Jehofa mo tsamaisong eno e kgologolo ya dilo ba tla dira mmogo kafa tlase ga puso ya ga Keresete e le Kgosi, ba dira ka boipelo sengwe le sengwe se a se laelang, gore lefatshe lotlhe fela le nne paradaise. (Bahebera 2:5-9) Batho botlhe ba tla ipelela tiro ya diatla tsa bone mme ba solegelwe molemo thata ke motlele wa dikungwa tsa lefatshe.—Pesalema 72:1, 7, 8, 16-19; Isaia 65:21, 22.

12. Go tla dirwa jang gore babusiwa ba Bogosi ba itekanele mo mogopolong le mo mmeleng?

¹² Fa Adame le Efa ba ne ba bopiwa, ba ne ba itekanetse, mme Modimo o ne a ikaeletse gore lefatshe le tlale ka bana ba bone, botlhe ba itekanetse mo mogopolong le mo mmeleng. Boikaelelo joo bo tla diragadiwa ka tsela e e gakgamatsang mo pusong ya Bogosi. Seno se tlhoka gore diphelelo tsotlhe tsa boleo di tlosiwe, mme gore seo se diragale, Keresete ga a direle fela jaaka Kgosi mme gape o direla jaaka Moperesiti yo Mogolo. Ka bopelotelele, o tla thusa babusiwa ba gagwe ba ba kutlo gore ba solegelwe molemo ke go letlanyetsa maleo ga setlhabelo sa botshelo jwa gagwe e le motho.

13. Mo pusong ya Bogosi, batho ba tla solegelwa molemo jang ke boitekanelo jwa mmele?

¹³ Fa Bogosi bo busa, banni ba lefatshe ba tla solegelwa molemo thata ke boitekanelo jwa mmele. “Ka nako eo matlho a difofu a tla bulwa, le ditsebe tsa bosusu di tla thibololwa. Ka nako eo setlhotsa se tla palama fela jaaka kgama e tonanyana, le loleme lwa yo o sa kgoneng go bua lo tla goa ka boitumelo.” (Isaia 35:5, 6) Mmele o o sosobantsweng ke botsofe kgotsa o o sentsweng ke bolwetse o tla nna mosha go feta wa ngwana, mme makoa a a sa foleng a tla emisediwa ke botsogo jo bontle. “A nama ya gagwe e shafale go gaisa le nako ya bosha, a a boele mo malatsing a matlhagatlhaga a bosha jwa gagwe.” (Jobe 33:25) Letsatsi le tla tla le ka lone go seng ope yo o tla tlhokang gore a re, “Ke a bobola.” Ka ntlha yang? Ka gonne batho ba ba boifang Modimo ba tla gololwa mo mokgweleong wa boleo le matswela a jone a a hutsafatsang. (Isaia 33:24; Luke 13:11-13) Ee, Modimo “o tla phimola dikeledi tsotlhe mo matlhong a bone, mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone. Dilo tsa pele di fetile.”—Tshenolo 21:4.

14. Go itekanela ga batho go akaretsa eng?

¹⁴ Le fa go ntse jalo, go itekanela ga go akaretse go nna le mmele le mogopolo o o itekanetseng fela. Go akaretsa le go bontsha sentle dinonofo tsa ga Jehofa, ka gonne re dirilwe ‘mo setshwanong sa Modimo, kafa tshwanong ya gagwe.’ (Genesise 1:26) Gore re kgone go dira jalo, go tla tlhokega thuto e ntsi. Mo lefatsheng le lesha, “go tla nna tshiamo.” Ka jalo, jaaka Isaia a boleletse pele, “banni ba naga e e ungwang ruri ba tla ithuta tshiamo.” (2 Petere 3:13; Isaia 26:9) Nonofo eno e dira gore go nne le kagiso—mo gare ga batho ba ditso tsotlhe, mo gare ga ditsala, mo lelapeng, mme sa botlhokwa go feta, fa gare ga batho le Modimo ka boene. (Pesalema 85:10-13; Isaia 32:17) Ba ba ithutang tshiamo ba tla tswelela pele ba rutiwa se Modimo a batlang ba se dira. Fa lorato lwa go rata Jehofa lo ntse lo nonofa mo dipelong tsa bone, ba tla latela ditsela tsa gagwe mo botshelong jwa bone jotlhe. Ba tla kgona go bolela jaana jaaka go boletse Jesu, ‘Ka metlha ke dira dilo tse di itumedisang Rara.’ (Johane 8:29) A bo botshelo bo tla nna monate jang ne fa batho botlhe ba dira jalo!

Ditiro di Setse di Bonala

15. Bontsha dilo tse Bogosi bo di dirileng le se re tshwanetseng go se dira gone jaanong, o dirisa dipotso tse di mo serapeng seno.

¹⁵ Ditiro tse di kgatlhang tsa Bogosi jwa Modimo le babusiwa ba jone di a bonala. Dipotso le ditemana tse di latelang di tla go gopotsa dingwe tsa ditiro tseno, mmogo le dilo tse babusiwa botlhe ba Bogosi ba ka di dirang le tse ba tshwanetseng go di dira gone jaanong.

Bogosi bo ile jwa tsaya kgato kgatlhanong le mang pele, mme ga felela ka eng? (Tshenolo 12:7-10, 12)

Fa e sa le Keresete a tlhomiwa mo setulong sa bogosi go ntse go phuthiwa masalela a setlhopha sefe? (Tshenolo 14:1-3)

Ke tiro efe e Jesu a neng a bolelela pele gore o tla e dira morago ga go tlhagoga ga pitlagano e kgolo, jaaka go kwadilwe mo go Mathaio 25:31-33?

Ke tiro efe ya paakanyetso e e dirwang gompieno? Ke bomang ba ba nnang le seabe mo go yone? (Pesalema 110:3; Mathaio 24:14; Tshenolo 14:6, 7)

Ke ka ntlha yang fa baganetsi ba bopolotiki le ba bodumedi ba ile ba palelwa ke go emisa tiro ya go rera? (Sekarea 4:6; Ditiro 5:38, 39)

Ke diphetogo dife tse di diragetseng mo matshelong a batho ba ba ikobelang puso ya Bogosi? (Isaia 2:4; 1 Bakorintha 6:9-11)

Bogosi Jwa Dingwaga Tse di Sekete

16. (a) Keresete o tla busa ka lobaka lo lo kae? (b) Ke dilo dife tse di molemo tse di tla dirwang ka nako eo le morago ga yone?

¹⁶ Fa Satane a sena go tsenngwa mo moleteng le badimona ba gagwe, Jesu Keresete le baruaboswa mmogo le ene ba ba 144 000 ba tla busa e le dikgosi le baperesiti ka dingwaga di le sekete. (Tshenolo 20:6) Mo nakong eo, batho ba tla itekanedisiwa, boleo le loso lwa ga Adame di tloseditswe ruri. Kwa bofelong jwa Puso ya Dingwaga Tse di Sekete, fa Jesu a sena go wetsa kabelo ya gagwe ya go nna Kgosi Mesia wa Moperesiti ka katlego, o ‘neela Rraagwe bogosi,’ “gore Modimo a nne dilo tsotlhe mo go mongwe le mongwe.” (1 Bakorintha 15:24-28) Ka nako eo, Satane o gololwa ka lobakanyana gore a leke batho ba ba rekolotsweng gore ba tshegetsa bolaodi jwa ga Jehofa jwa lobopo lotlhe go le kana kang. Fa teko eo ya bofelo e sena go wela, Jehofa o tla senya Satane le batsuolodi ba ba neng ba mo tshegetsa. (Tshenolo 20:7-10) Ba ba neng ba tshegetsa bolaodi jwa ga Jehofa—tshwanelo ya gagwe ya go busa—ba tla bo ba bontshitse boikanyegi jwa bone jo bo nitameng ka botlalo. Go tswa foo ba tla bo ba tsenngwa mo kamanong ya bone e e tshwanetseng le Jehofa, a ba amogela e le barwa le barwadie, ba amogetswe ke Modimo gore ba bone botshelo jo bo sa khutleng.—Baroma 8:21.

17. (a) Go tla diragalang ka Bogosi kwa bofelong jwa dingwaga tse di sekete? (b) Ke jang go ka tweng Bogosi jono ‘ga bo kitla bo senngwa’?

¹⁷ Ka jalo, seabe sa ga Jesu le sa ba ba 144 000 se tla fetoga malebana le lefatshe. Tiro ya bone ya mo nakong e e tlang e tla nna efe? Baebele ga e bolele. Mme fa re tshegetsa bolaodi jwa ga Jehofa ka boikanyegi, re tla bo re tshela kwa bokhutlong jwa Puso ya Dingwaga Tse di Sekete gore re bone se Jehofa a se ba rulaganyeditseng le se a se rulaganyeditseng lobopo lwa gagwe lo logolo. Le fa go ntse jalo, puso ya ga Keresete ya dingwaga tse di sekete e tla ‘nna ka bosakhutleng’ mme Bogosi jwa gagwe ‘ga bo kitla bo senngwa.’ (Daniele 7:14) Ka tsela efe? Selo sa ntlha ke gore taolo e a e neilweng ya go busa e ka se tsene mo diatleng tsa ba bangwe ba ba nang le maitlhomo a sele, ka gonne Jehofa e tla bo e le ene Mmusi. Gape, Bogosi ‘ga bo kitla bo senngwa le ka motlha’ ka gonne se bo se dirang se tla nnela ruri. (Daniele 2:44) Mme Kgosi Mesia wa Moperesiti le dikgosi tsa baperesiti tse di dirang le ene ba tla tlotliwa ka bosakhutleng ka ntlha ya go direla Jehofa ga bone ka boikanyegi.

Motlotlo wa Poeletso

• Ke ka ntlha yang fa Bogosi jwa Modimo e le jone fela tharabololo ya mathata a batho? Kgosi ya Bogosi jwa Modimo e simolotse leng go busa?

• Ke eng se se go kgatlhang thata ka Bogosi jwa Modimo le se bo tla se diragatsang?

• Ke ditiro dife tsa Bogosi tse di setseng di bonala, mme re na le seabe sefe mo go tsone?

[Setshwantsho mo go tsebe 92, 93]

Mo Bogosing jwa Modimo, batho botlhe ba tla ithuta tshiamo