Go Bona Kgololo ya go Tsena Mo Lefatsheng Le Lesha La Tshiamo

“Ba tlaa inatefisa mo letlotlong la kagiso.”—PESALEMA 37:11.

1, 2. (a) Kgololo ya ga Jehofa ya mo motlheng wa rona e tla farologana jang le kgololo ya motlha wa bogologolo? (b) Jehofa o tla lere batho ba gagwe mo lefatsheng le le ntseng jang?

JEHOFA ke Modimo wa kgololo. Mo metlheng ya bogologolo, o ne a golola batho ba gagwe ka makgetlho a le mantsi. Go gololwa goo e ne e le ga nakwana, ka gonne Jehofa ga a ka a diragatsa katlholo ya gagwe ka bosakhutleng mo go lepe la makgetlho ao mo lefatsheng lotlhe la ga Satane. Mme mo motlheng wa rona, Jehofa o tla tloga a golola batlhanka ba gagwe botlhe ka kgololo e kgolo go di feta tsotlhe. Mo lekgetlhong leno o tla fedisa motlhala mongwe le mongwe wa tsamaiso ya ga Satane mo lefatsheng lotlhe, mme a bo a dira gore batlhanka ba gagwe ba tshelele ruri mo lefatsheng le lesha la tshiamo.—2 Petere 2:9; 3:10-13.

² Jehofa o solofetsa jaana: “E tlaa re kwa pelenyana, moikepi a bo a sa tlhole a le gone . . . Bapelonomi ba tlaa rua lefatshe; ba tlaa inatefisa mo letlotlong la kagiso.” (Pesalema 37:10, 11) Ka nako e kana kang? “Basiami ba tlaa rua lefatshe, ba tlaa aga mo go lone ka bosakhutleng.” (Pesalema 37:29; Mathaio 5:5) Le fa go ntse jalo, pele ga seo se diragala, lefatshe leno le tla nna le mathata a mantsi thata a a iseng a ko a nne teng pele.

“Sepitla se Segolo”

 3. Jesu o ne a tlhalosa “sepitla se segolo” jang?

³ Ka 1914, lefatshe leno le ne la simolola ‘metlha ya lone ya bofelo.’ (2 Timotheo 3:1-5, 13) Re setse re le mo ngwageng wa bo83 wa motlha oo mme re atamela bofelo jwa lone fa, jaaka Jesu a boleletse pele, dilo tse di latelang di tla bo di diragala: “Go tlaa nna sepitla se segolo mo metlheng eo, se se iseng se ke se nne, e sa le ka tshimologo ya lefatshe go tla nakong eno; nnyaa, le gone go se ketla go tlhola go nna jalo gope.” (Mathaio 24:21) Ee, go tla bo go gaisa tota le nako ya Ntwa ya Lefatshe II, fa go ne go bolawa batho ba ba ka nnang dimilione di le 50. A bo motlha o o tshosang wa lefatshe o atamela ka bonako jang ne!

 4. Ke ka ntlha yang fa Modimo a atlhola “Babilone o Mogolo”?

⁴ “Sepitla se segolo” se tla tla ka tshoganetso tota, “ka nako e le nngwe fela.” (Tshenolo 18:10) Go simologa ga sone go tla bonala fa Modimo a atlhola bodumedi jotlhe jwa maaka, jo Lefoko la Modimo le bo bitsang “Babilone o Mogolo.” (Tshenolo 17:1-6, 15) Selo se segolo mo go Babilone wa bogologolo e ne e le bodumedi jwa maaka. Babilone wa motlha wa segompieno o tshwana le setshwani sa gagwe sa bogologolo mme o emela mmuso wa lefatshe lotlhe wa bodumedi jwa maaka. O ile a itira seaka ka go inakanya le dipolotiki. O ile a ema dintwa tsa bone nokeng mme a segofatsa masole a a lwantshanang mo matlhakoreng oomabedi, go go ileng ga felela ka gore batho ba bodumedi jo bo tshwanang ba bolaane. (Mathaio 26:51, 52; 1 Johane 4:20, 21) O ile a itlhokomolosa ditiro tse di bosula tsa balatedi ba gagwe le go bogisa Bakeresete ba boammaaruri.—Tshenolo 18:5, 24.

 5. “Sepitla se segolo” se simologa jang?

⁵ “Sepitla se segolo” se simolola ka tshoganetso fa ba bopolotiki ba tlhasela “Babilone o Mogolo.” Ba ‘tla ila seaka seo, ba tla se dira tshwafatso le bosaikatega, ba tla ja nama ya sone, ba se fisetsa ruri ka molelo.’ (Tshenolo 17:16) Morago ga moo, ba ba neng ba mo ema nokeng pele, ba tla ‘lela ba mo lelelela godimo.’ (Tshenolo 18:9-19) Mme ke kgale batlhanka ba ga Jehofa ba ntse ba letetse seno, mme ba tla bolela jaana: “Haleluja!, . . . gonne o sekisitse seaka se segolo se se kileng sa bodisa lefatshe ka kgokafalo ya sone, mme o lefeditse madi a batlhanka ba one mo seatleng sa sone.”—Tshenolo 19:1, 2.

Batlhanka ba Modimo ba a Tlhaselwa

6, 7. Ke ka ntlha yang fa batho ba ga Jehofa ba ka nna le tsholofelo fa ba tlhaselwa ka nako ya “sepitla se segolo”?

⁶ Fa mekgatlho ya bopolotiki e sena go senya bodumedi jwa maaka, e tla retologela mo batlhankeng ba ga Jehofa. Satane “Goge, wa lefatshe la Magoge” o bolela jaana ka tsela ya boporofeti: “Ke tlaa ya kwa go ba ba iketlileng, ba agile ka thagamo.” E re ka a akanya gore ba ka tlhaselwa motlhofo, o ba tlhasela ka “ntwa e e thata e kgolo . . . , o khurumetsa lefatshe jaaka leru.” (Esekiele 38:2, 10-16) Batho ba ga Jehofa ba itse gore tlhaselo eno ga e kitla e atlega ka gonne ba ikanya Jehofa.

⁷ Fa Faro le masole a gagwe ba ne ba akanya gore ba thibeletse batlhanka ba Modimo kwa Lewatleng le Lehibidu, Jehofa o ne a golola batho ba gagwe ka kgakgamatso mme a bolaya masole a Egepeto. (Ekesodo 14:26-28) Ka nako ya “sepitla se segolo,” fa ditšhaba di akanya gore di thibeletse batho ba ga Jehofa, o tla ba golola gape ka kgakgamatso: “Mo motlheng oo . . . tšararego ya me e tlaa gola mo dinkong tsa me. Gonne ke buile mo lefufeng la me, le mo molelong wa bogale jwa me.” (Esekiele 38:18, 19) “Sepitla se segolo” se tla bo se setse se le mo setlhoeng sa sone!

 8. Ke ditiragalo dife tse dikgolo tsa tlholego tse di tla diragalang pele ga Jehofa a fedisa batho ba ba boikepo, mme ka matswela afe?

⁸ Ka nako nngwe morago ga “sepitla se segolo” se setse se simolotse, mme e le pele ga Jehofa a ka diragatsa katlholo ya gagwe mo lefatsheng leno lotlhe, go tla nna le ditiragalo tse dikgolo tsa tlholego. Ela tlhoko gore di tla nna le ditlamorago dife. “Ke gone go tlaa bonalang sesupo sa Morwa Motho [Keresete] kwa legodimong. Foo ditšhaba tsotlhe tsa lefatshe di tlaa hutsafala, mme di tlaa bona Morwa Motho a tla ka maru a legodimo, ka nonofo le ka kgalalelo e kgolo.” (Mathaio 24:29, 30) “Go tlaa nna ditshupo mo letsatsing, le mo kgweding, le mo dinaleding; . . . batho ba idibadiwa ke poifo le tebelelo ya dilo tse di tlang mo lefatsheng.”—Luke 21:25, 26.

“Thekololo ya Lona e Tlaa bo e Atametse”

 9. Ke ka ntlha yang fa batlhanka ba ga Jehofa ba ka ‘tsholetsa ditlhogo tsa bone’ fa go nna le ditiragalo tse dikgolo tsa tlholego?

⁹ Ka yone nako eo, boporofeti jwa ga Luke 21:28 bo a dira. Jesu o ne a bolela jaana: “E tlaa re dilo tse di simologa go dirala, foo lo lelale, lo tsholetse ditlhogo tsa lona; gonne thekololo ya lona e tlaa bo e atamela.” Baba ba Modimo ba tla bo ba roroma ka ntlha ya poifo ka gonne ba tla bo ba itse gore ditiragalo tse dikgolo tsa tlholego tse di diregang di tswa kwa go Jehofa. Mme batlhanka ba ga Jehofa ba tla itumela ka gonne ba tla itse gore thekololo ya bone e atametse.

10. Lefoko la Modimo le tlhalosa jang setlhoa sa “sepitla se segolo”?

¹⁰ Morago ga foo Jehofa o tla bo a feleletsa tsamaiso ya ga Satane: “Ke tlaa ganetsana [le Goge] ka kgogodi le madi; go le ene le masomosomo a gagwe a sekamerwalo ya tsie, le ditšhaba tse dintsi tse o nang natso, ke tlaa ba nesetsa lesogodi le le penologang, le sefako se segolo, le molelo, le sulefura. . . . Mme ba tlaa itse fa ke le Jehofa.” (Esekiele 38:22, 23) Metlhala yotlhe ya tsamaiso ya ga Satane e fedisitswe. Tsamaiso yotlhe ya batho ba ba itlhokomolosang Modimo e fedisitswe. Seo ke setlhoa sa “sepitla se segolo” sa Haramagetone.—Jeremia 25:31-33; 2 Bathesalonika 1:6-8; Tshenolo 16:14, 16; 19:11-21.

11. Ke ka ntlha yang fa batlhanka ba ga Jehofa ba gololwa mo ‘sepitleng se segolo’?

¹¹ Dimilione tsa baobamedi ba ga Jehofa mo lefatsheng lotlhe di tla gololwa go falola “sepitla se segolo.” Bano ba bopa “boidiidi jo bogolo jwa batho” e le “ba morafe mongwe le mongwe, le ba ditso tsotlhe, le batho, le dipuo.” Ke ka ntlha yang fa ba gololwa ka tsela e e gakgamatsang jaana? Ka gonne ba direla Jehofa “tirelo e e boitshepo motshegare le bosigo.” (NW) Ka jalo, ba falola bokhutlo jwa lefatshe leno mme ba tsenngwa mo lefatsheng le lesha la tshiamo. (Tshenolo 7:9-15) Ka jalo, ba bona go diragadiwa ga tsholofetso eno ya ga Jehofa: “Lebelela mo go Jehofa, o bo o tshware tsela ya gagwe, mme o tlaa go goletsa go tla o rua lefatshe; e tlaa re mogang baikepi ba kgaolwang, o tlaa go bona.”—Pesalema 37:34.

Lefatshe le Lesha

12. Bafalodi ba Haramagetone ba ka lebelela pele go eng?

¹² A bo e tla bo e le nako e e itumedisang jang ne—go fedisiwa ga bosula le go fitlha ga nako e e molemolemo mo hisitoring yotlhe ya batho! (Tshenolo 20:1-4) A bo bafalodi ba Haramagetone ba tla leboga Jehofa jang ne go bo ba le mo tsamaisong e ntle, e e phepa ya Modimo, lefatshe le lesha, mo lefatsheng le le tla bong le fetotswe go nna paradaise! (Luke 23:43) Mme le ka motlha ba ka se tlhole ba swa! (Johane 11:26) Eleruri, go tloga ka nako eo go ya pele, ba tla bo ba na le tebelelo e ntle le e e itumedisang ya go tshela fa fela Jehofa a ntse a tshela!

13. Jesu o tswelela pele jang ka tiro ya go fodisa e a neng a e simolola mo lefatsheng?

¹³ Jesu, yo Jehofa a mo tlhomileng go nna Kgosi ya selegodimo, o tla dira gore masego a a gakgamatsang a itumelelwe ke ba ba tla falolang. Fa a ne a le mo lefatsheng, o ne a bula matlho a difofu le ditsebe tsa bosusu le go fodisa “dipobolo dingwe le dingwe tsotlhe, le malwetse mangwe le mangwe otlhe fela.” (Mathaio 9:35; 15:30, 31) Mo lefatsheng le lesha, o tla dira gape tiro e kgolo eo ya go fodisa mme e tla bo e le mo lefatsheng lotlhe. Jaaka Moemedi wa Modimo, o tla diragatsa tsholofetso eno: “[Modimo] o tlaa phimola dikeledi tsotlhe mo matlhong a bone; ga go ketla go tlhola go le loso; le gone ga go ketla go tlhola go le bohutsana, le fa e le selelo, le fa e le botlhoko; dilo tsa pele di fetetse ruri.” (Tshenolo 21:4) Le ka motlha go ka se ka ga tlhola go tlhokega dingaka kana batlhokomedi!—Isaia 25:8; 33:24.

14. Batlhanka ba ga Jehofa ba ba setseng ba sule ba tla gololwa jang?

¹⁴ Go tla gololwa gape le batlhanka ba Modimo ba ba ikanyegang ba ba ileng ba swa mo nakong e e fetileng. Mo lefatsheng le lesha, ba tla gololwa mo dikgoleng tsa lebitla. Jehofa o tlhomamisa jaana: “Go tlaa nna tsogo ya basiami le ya basiamolodi.” (Ditiro 24:15) Gongwe “basiami” ba tla tsosiwa pele mme ba bo ba nna le seabe mo go direng Paradaise. A bo go tla kgatlha batho ba ba tla falolang Haramagetone fa ba utlwa maitemogelo a baswi ba ba ikanyegang bao ba bogologolo, bao jaanong ba boetseng ba tshela gape!—Johane 5:28, 29.

15. Tlhalosa mangwe a maemo a a tla nnang teng mo lefatsheng le lesha.

¹⁵ Ka nako eo botlhe ba ba tshelang ba tla bona se mopesalema a ileng a se bua ka ga Jehofa: “O huporolola seatla sa gago, o kgorise keletso ya ditshedi tsotlhe fela.” (Pesalema 145:16) Go tla bo go sa tlhole go na le tlala: Ikholoji ya lefatshe e tla bo e boetse e lekalekana gape mme go nne le letlotlo le lentsi. (Pesalema 72:16) Ga go kitla go tlhola go na le batho ba ba se nang matlo: “Ba tlaa aga matlo, ba nna mo go one,” mme mongwe le mongwe o tla dula “fa tlase ga mofine wa gagwe, le fa tlase ga mofeige wa gagwe; ope ga a ketla a ba boifisa.” (Isaia 65:21, 22; Mika 4:4) Go tla bo go sa tlhole go na le poifo: Go tla bo go se na ntwa, thubakanyo, kana bokebekwa. (Pesalema 46:8, 9; Diane 2:22) “Lefatshe lotlhe le ikhutsitse, le iketlile; ba ponyega mo go opeleng.”—Isaia 14:7.

16. Ke ka ntlha yang fa go tla bo go rena tshiamo mo lefatsheng le lesha?

¹⁶ Mo lefatsheng le lesha, motswedi wa maaka wa ga Satane o tla bo o fedisitswe. Go na le moo, ‘banni ba lefatshe ba tla ithuta tshiamo.’ (Isaia 26:9; 54:13) Ka tao e e siameng ya semoya ya ngwaga le ngwaga, “lefatshe le tlaa bo le tletse kitso ya go itse Jehofa, jaaka metsi a khurumeditse lewatle.” (Isaia 11:9) Batho ba tla bo ba tletse megopolo le ditiro tse di agang. (Bafilipi 4:8) A o ko o akanye, lefatshe la batho ba ba se nang bokebekwa, boikgogomoso, lefufa—e le bokaulengwe jwa ditšhabatšhaba mo botlhe ba supang maungo a moya wa Modimo. Eleruri, tota le gone jaanong boidiidi jo bogolo bo tlhagolela dinonofo tse di ntseng jalo.—Bagalatia 5:22, 23.

Ke ka Ntlha Yang fa go Tsaya Nako e Telele Jaana?

17. Ke ka ntlha yang ga Jehofa a ile a leta nako e telele jaana pele a fedisa boikepo?

¹⁷ Le fa go ntse jalo, ke ka ntlha yang fa Jehofa a ile a leta nako e telele jaana go tlosa boikepo le go golola batho ba gagwe gore ba tsene mo lefatsheng le lesha? Akanya ka se se neng se tshwanetse sa dirwa. Se se botlhokwa le go feta ke go tlotlomadiwa ga bolaodi jwa ga Jehofa, tshwanelo ya gagwe ya go busa. Ka go dira gore go fete nako e e lekaneng, o ne a supa go se na pelaelo epe gore puso ya batho kwantle ga bolaodi jwa gagwe e paletswe ka tsela e e boitshegang. (Jeremia 10:23) Ka jalo gone jaanong Jehofa o na le tshwanelo yotlhe ya go emisa puso ya batho ka Bogosi jwa gagwe jwa selegodimo kafa tlase ga Keresete.—Daniele 2:44; Mathaio 6:9, 10.

18. Ditlogolwana tsa ga Aberahame di ne di tla rua leng naga ya Kanana?

¹⁸ Se se diragetseng mo makgolong ano otlhe a dingwaga se tshwana fela le se se diragetseng mo motlheng wa ga Aberahame. Jehofa o ne a bolelela Aberahame gore ditlogolwana tsa gagwe di ne di tla rua naga ya Kanana—mme e ne e tla nna morago ga dingwaga di le makgolo a manè “gonne boikepo jwa Moamore [bo ne] bo ise bo tlale.” (Genesise 12:1-5; 15:13-16) Go bonala fa lefoko leno “Moamore” (morafe o o laolang) gongwe le emela batho botlhe ba Kanana. Ka jalo, go ne go tla feta makgolo a a ka nnang manè a dingwaga pele ga Jehofa a ne a ka dira gore batho ba gagwe ba thope Kanana. Mo nakong eo Jehofa o ne a dira gore ditšhaba tsa Kanana di godise ditšhaba tsa tsone. Matswela e nnile eng?

19, 20. Bakanana ba ne ba simolola go nna le ditšhaba tsa mofuta ofe?

¹⁹ Bible Handbook, e e kwadilweng ke Henry H. Halley e bolela gore kwa Megito, baithutamarope ba ile ba bona matlotla a tempele ya ga Ashetorethe, mosadi wa modimo wa sesadi wa ga Baale. O kwala jaana: “Dikgato di sekaenyana fela go tswa mo tempeleng eno go ne go na le mabitla, ao mo go one go neng ga bonwa dinkgo tse di neng di na le masalela a masea a a neng a ntshitswe setlhabelo mo tempeleng eno . . . Baporofeti ba ga Baale le Ashetorethe e ne e le babolai ba bagolo ba bana ba babotlana.” “Selo se sengwe se se boitshegang se ba neng ba se dira e ne e le [se] ba neng ba se bitsa ‘ditlhabelo tsa motheo.’ Fa go ne go agiwa ntlo, go ne go ntshiwa ngwana setlhabelo mme mmele wa gagwe o ne o agelelwa mo leboteng.”

²⁰ Halley o akgela jaana: “Kobamelo ya ga Baale, Ashetorethe le medimo e mengwe ya Kanana e ne e nna teng mo meketeng e megolo thata ya maitlhapediso; ditempele tsa one e ne le kwa boitsholo jo bo leswe bo neng bo direlwa gone. . . . Bakanana ba ne ba obamela ka go dira boitsholo jo bo sa siamang, . . . mme morago ga foo, ba bo ba bolaya bana ba bone ba maitibolo, gore e nne ditlhabelo tsa yone medimo eo. Go bonala thata fa naga ya Kanana e nnile mofuta mongwe wa Sotoma le Gomora ka selekanyo se segolo mo setšhabeng. . . . A mokgwa oo wa botshelo o o makgapha le o o setlhogo o ne o tshwanela go nna o le teng? . . . Baithutamarope ba ba neng ba epa mo matlotleng ano a metse ya Bakanana ba ipotsa gore ke ka ntlha yang fa Modimo a ile a se ka a ba fedisa pele ga nako e A ba fedisitseng ka yone.”—Bapisa 1 Dikgosi 21:25, 26.

21. Go na le go tshwana gofe fa gare ga seemo sa Bakanana le sa motlha wa rona?

²¹ Boikepo jwa Baamore bo ne bo ‘setse bo tletse.’ Ka jalo Jehofa o ne a na le mabaka a a utlwalang a go ba fedisa. Go ntse fela jalo le gompieno. Lefatshe leno le tletse ka thubakanyo, boitsholo jo bo sa siamang le go nyatsa melao ya Modimo. Mme e re ka ka tshwanelo re ferosiwa sebete ke ditlhabelo tse di sisimosang mmele tsa bana kwa Kanana wa bogologolo, go tweng ka ditlhabelo tse di ntshiwang tsa dimilione tsa basha mo dintweng tsa lefatshe leno, tse di setlhogo thata go feta tsa kwa Kanana? Eleruri, Jehofa o na le mabaka otlhe a go fedisa tsamaiso eno e e boikepo.

Go Fitlhelela Sengwe se Sele

22. Jehofa o fitlheletse eng ka go nna pelotelele mo motlheng wa rona?

²² Ka go nna pelotelele mo metlheng eno ya bofelo, Jehofa o fitlhelela sengwe se sele. Go letla nako ya gore boidiidi jo bogolo jo bo setseng bo feta dimilione di le tlhano bo phuthiwe le go rutiwa. Ka kaelo ya ga Jehofa, ba dirilwe phuthego e e gatelang pele. Banna, basadi le basha ba thapisitswe go ruta batho ba bangwe boammaaruri jwa Baebele. Ka dipokano tsa bone le dikgatiso tsa Baebele, ba ithuta ditsela tse di lorato tsa Modimo. (Johane 13:34, 35; Bakolosa 3:14; Bahebere 10:24, 25) Mo godimo ga moo, ba leka go nna le bokgoni jwa go aga, jwa dieleketoroniki, jwa go gatisa le jwa ditiro tse dingwe gore ba tshegetse tiro ya go rerwa ga “dikgang tse di molemo.” (Mathaio 24:14, NW) Gongwe bokgoni jo bo ntseng jalo jwa go ruta le go aga bo tla dirisiwa thata mo lefatsheng le lesha.

23. Ke ka ntlha yang fa e le tshiamelo go bo re tshela mo nakong eno?

²³ Ee, gompieno Jehofa o baakanyetsa batlhanka ba gagwe gore ba falole “sepitla se segolo” mme ba tsene mo lefatsheng le lesha la tshiamo. Ka nako eo go tla bo go sa tlhokege gore re itshokele Satane le lefatshe la gagwe le le boikepo, go tla bo go sa tlhole go na le bolwetse, bohutsana le loso. Batho ba Modimo ba tla tswelela pele ba tlhagafetse e bile ba itumetse ba dira tiro ya go aga paradaise, koo letsatsi lengwe le lengwe e tla nnang la “go inatifisa.” A bo re na le tshiamelo jang ne ya go tshela mo nakong e e botlhokwa eno, go itse le go direla Jehofa, le go lemoga gore go ise go ye kae re ‘tla tsholetsa ditlhogo tsa rona ka gonne kgololo ya rona e tlaa bo e atametse.’—Luke 21:28; Pesalema 146:5.

Dipotso Tsa Poeletso

◻ “Sepitla se segolo” ke eng, mme se simologa jang?

◻ Ke ka ntlha yang fa Goge a tla palelwa ke go tlhasela batlhanka ba ga Jehofa?

◻ “Sepitla se segolo” se konela jang?

◻ Lefatshe le lesha le tla lere masego afe a a itumedisang?

◻ Ke ka ntlha yang fa Jehofa a ile a leta nako e telele jaana pele a ka fedisa tsamaiso eno?

[Setshwantsho mo go tsebe 16]

Lefatshe lotlhe le tla fetolwa go nna paradaise