O ka Itshoka go Fitlha Kwa Bokhutlong

“A re sianeng ka boitshoko lobelo lo re lo tlhomilweng pele.”—BAHEBERA 12:1.

1, 2. Go itshoka go bolela eng?

MOAPOSETOLOI PAULO o ile a kwalela Bakeresete ba lekgolo la ntlha la dingwaga ba Bahebera jaana: “Lo tlhoka boitshoko.” (Bahebera 10:36) Moaposetoloi Petere le ene fa a ne a gatelela botlhokwa jwa nonofo eno o ile a kgothatsa Bakeresete jaana: “Tsenyang mo tumelong ya lona . . . boitshoko.” (2 Petere 1:5, 6) Mme gone, tota boitshoko ke eng?

² Dikishinare ya Seesemane le Segerika e tlhalosa lediri la Segerika le le ranolwang e le “go itshoka” e re ke “go nna o eme go na le go tshaba . . . go ema o tsepame, o sa ineele.” Buka nngwe e bua jaana malebana le lefoko la Segerika le le ranolwang e le “boitshoko”: “Ke moya wa go emelana le dilo, e seng wa go ineela motlhofo fela, go na le moo, wa go nna le tsholofelo e kgolo . . . Ke nonofo e e dirang gore motho a eme a tlhomame a lebagane le phefo. Ke boikutlo jo bo molemo jo bo thusang motho go fenya teko e e boitshegang ka gonne le mororo a boga, o akanya fela ka mokgele wa gagwe.” Ka jalo, boitshoko bo thusa motho go ema a tlhomame le fa a lebane le mathata le dikgoreletsi a sa felelwe ke tsholofelo. Ke bomang ba segolobogolo ba tlhokang nonofo eno?

3, 4. (a) Ke bomang ba ba tlhokang go nna le boitshoko? (b) Ke eng fa re tshwanetse go itshoka go fitlha kwa bokhutlong?

³ Bakeresete botlhe ba mo lobelong lwa tshwantshetso lo lo ba tlhokang boitshoko. Mo e ka nnang ka 65 C.E., moaposetoloi Paulo o ile a kwalela modirikaene yo gape e neng e le mopati wa gagwe yo o ikanyegang e bong Timotheo mafoko ano a a nametsang pelo: “Ke tlhabane tlhabano e e molemomogolo, ke siane tshiano go ya bofelong, ke bolokile tumelo.” (2 Timotheo 4:7) Fa Paulo a re “ke siane tshiano go ya bofelong,” o ne a tshwantsha botshelo jwa gagwe jwa Bokeresete le lobelo lo lo nang le tsela e a sianang mo go yone le mola o le felelang mo go one. Ka nako eo, Paulo o ne a le gaufi le go fitlha mo bowelong jwa lobelo lwa gagwe ka phenyo e bile o ne a na le tsholofelo ya gore o tla bona tuelo. O ile a tswelela pele a re: “Go tswa mo nakong eno go ya pele ke beetswe serwalo sa tshiamo, se Morena, moatlhodi yo o siameng, o tla se nnayang e le maduo mo letsatsing leo.” (2 Timotheo 4:8) Paulo o ne a sa belaele gore o tla bona tuelo ka gonne a ile a itshoka go fitlha kwa bokhutlong. Go tweng ka rona rotlhe?

⁴ Paulo o ile a kwala jaana fa a kgothatsa batho ba ba tsenetseng lobelo lono: “A re sianeng ka boitshoko lobelo lo re lo tlhomilweng pele.” (Bahebera 12:1) Rona Bakeresete re tsenela lobelo lono lo lo re tlhokang boitshoko fa re neela botshelo jwa rona mo go Jehofa Modimo ka Jesu Keresete. Go botlhokwa gore motho a simolole lobelo lwa go nna morutwa sentle, mme gone, se se botlhokwa thata ke gore re wetse lobelo lono. Jesu o ile a bolela jaana: “Yo o itshokileng go ya bokhutlong ke ene yo o tla bolokwang.” (Mathaio 24:13) Tuelo e e beetsweng batho ba ba tla wetsang lobelo lono ka katlego ke botshelo jo bo sa khutleng! Ka gone, e re ka re na le mokgele o re ipeetseng one, re tshwanetse go itshoka go fitlha kwa bokhutlong. Ke eng se se ka re thusang go fitlhelela mokgele oo?

Dijo Tse di Siameng di Botlhokwa Thata

5, 6. (a) Ke eng se re tshwanetseng go se ela tlhoko gore re tle re itshoke mo lobelong lwa botshelo? (b) Ke dithulaganyo dife tsa semoya tse re tshwanetseng go di sola molemo, mme ka ntlha yang?

⁵ Bogologolo go ne go na le lefelo le go neng go tshwarelwa Metshameko e e tumileng ya Isthmian mo go lone gaufi le motse wa Korintha kwa Gerika. Ga go pelaelo gore Paulo o ne a itse gore bakaulengwe ba Korintha ba ne ba tlwaelane le dikgaisano tsa metshameko le dikgaisano tse dingwe tse di neng di tshwarelwa koo. O ile a dirisa kitso e ba neng ba na le yone go ba gakolola jaana ka lobelo lwa botshelo lo ba neng ba lo tsenetse: “A ga lo itse gore basiani mo lobelong botlhe ba a siana, mme ke a le mongwe fela yo o amogelang sekgele? Sianang ka tsela ya gore lo se gape.” Paulo o ile a gatelela gore go botlhokwa gore motho a nne a le mo lobelong a gatela pele go fitlha kwa bowelong. Mme ke eng se se neng se ka ba thusa go dira jalo? O ile a oketsa jaana: “Motho mongwe le mongwe yo o tsayang karolo mo kgaisanong o supa boikgapo mo dilong tsotlhe.” Ee, batabogi mo metshamekong eo ya bogologolo ba ne ba na le thulaganyo e e gagametseng ya go ikatisa, ba ne ba ela tlhoko dilo tse ba di jang le tse ba di nwang, e bile ba ne ba le kelotlhoko thata ka tiro nngwe le nngwe e ba e dirang gore ba tle ba fenye.—1 Bakorintha 9:24, 25.

⁶ Go tweng ka lobelo lo Bakeresete ba lo tsenetseng? Mogolwane mongwe wa phuthego ya Basupi ba ga Jehofa a re: “O tshwanetse go ela tlhoko thulaganyo ya gago ya go ja dijo tsa semoya fa e le gore o batla go itshoka mo lobelong lwa botshelo.” Akanya ka dijo tsa semoya tse Jehofa, “Modimo o o fang boitshoko,” a re tlametseng ka tsone. (Baroma 15:5) Selo sa konokono se se re fepang ka dijo tsa semoya ke Lefoko la gagwe, Baebele. A ga re a tshwanela go nna le thulaganyo e e molemo ya go bala Baebele? Gape Jehofa o dirisa “motlhanka yo o boikanngo le yo o bonokopela” go re tlamela ka makwalopaka a a tshwanelang tota e leng Tora ya Tebelo le Tsogang! le dikgatiso tse dingwe tsa Baebele. (Mathaio 24:45) Fa re a ithuta ka tlhoafalo re tla nonofa semoyeng. Ee, re tshwanetse go ipha nako—‘go ithekela nako e e re siametseng’—ya go ithuta ka namana.—Baefeso 5:16.

 7. (a) Ke eng fa re sa tshwanela go kgotsofalela go itse fela dithuto tsa motheo tsa Bokeresete? (b) Re ka ‘gagamalela kwa go goleng sentle’ jang?

⁷ Gore re tswelele pele re le mo tseleng ya go nna barutwa ba Bakeresete ga re a tshwanela go nna fela le kitso ya “thuto ya motheo” mme gape re tshwanetse gore “re gagamaleleng kwa go goleng sentle.” (Bahebera 6:1) Ka jalo re tshwanetse go kgatlhegela go itse “bophara le boleele le bogodimo le boteng” jwa boammaaruri le go monya dikotla go tswa mo “dijo[ng] tse di tiileng [tse e leng tsa] batho ba ba godileng sentle.” (Baefeso 3:18; Bahebera 5:12-14) Ka sekai, akanya ka dipego tse nnè tse di ikanyegang tsa botshelo jwa ga Jesu mo lefatsheng—Efangele ya ga Mathaio, Mareko, Luke le Johane. Fa re ithuta dipego tsa Diefangele tseno ka kelotlhoko, ga re kitla re itse fela ditiro tse Jesu a ileng a di dira le gore e ne e le motho yo o ntseng jang, mme gape, re tla kgona go itse tsela ya go akanya e e neng e tlhotlheletsa dilo tse a di dirang. Jalo he re tla “[nna] le mogopolo wa ga Keresete.”—1 Bakorintha 2:16.

 8. Dipokano tsa Bokeresete di re thusa jang gore re itshoke mo lobelong lwa botshelo?

⁸ Paulo o ile a gakolola badumedikaene jaana: “A re akanyetsaneng go tlhotlheletsa loratong le ditirong tse di molemomogolo, re sa lese go phuthega mmogo ga rona, jaaka bangwe ba na le mokgwa oo, mme re kgothatsana, mme segolobogolo ka lo bona letsatsi le atamela.” (Bahebera 10:24, 25) A bo dipokano tsa Bokeresete e le motswedi wa kgothatso e kgolo jang ne! Mme a bo go lapolosa jang ne go nna le bakaulengwe le bokgaitsadi ba ba re kgatlhegelang e bile ba batla go re thusa go itshoka go fitlha kwa bokhutlong! Ruri ga re a tshwanela go tsaya thulaganyo eno e e lorato ya ga Jehofa motlhofo. Ka go ithuta ka namana ka tlhoafalo le ka go nna gone ka metlha mo dipokanong, a re “nneng ba ba godileng ka botlalo mo maatleng a go tlhaloganya.”—1 Bakorintha 14:20.

Babogedi Ba ba Go Rotloetsang

9, 10. (a) Babogedi ba ka kgothatsa motho jang gore a itshoke mo lobelong? (b) ‘Bontsintsi jo bogolo jwa basupi jo bo re dikanyeditseng’ jo bo umakiwang mo go Bahebera 12:1, ke eng?

⁹ Le fa go ntse jalo, le fa motabogi a ka tswa a ipaakantse go le kana kang, go ka nna ga tlhaga dilo tse di ka mo kgoreletsang. Paulo o ile a botsa jaana: “Lo ne lo siana sentle. Ke mang yo o neng a lo kgoreletsa go nna lo utlwa boammaaruri?” (Bagalatia 5:7) Go bonala Bakeresete bangwe ba Galatia ba ile ba itsalanya le batho ba ba bosula mme seno sa ba kgoreletsa mo lobelong lwa bone lwa botshelo. Kafa letlhakoreng le lengwe, go engwa nokeng le go kgothadiwa ke batho ba bangwe go ka dira gore go nne motlhofo gore motho a itshoke mo lobelong. Seno se tshwana thata le tlhotlheletso e babogedi ba ka nnang le yone mo bataboging. Babogedi ba ba tlatlarietsang ba ka dira gore batabogi ba nne le tlhagafalo e e ka ba rotloetsang go tloga kwa tshimologong go fitlha kwa bowelong. Meduduetso e gantsi e tswakaneng le modumo o mogolo wa mmino le go opa diatla ga babogedi e ka naya batabogi matlhagatlhaga a a ka ba thusang go fitlha kwa bowelong. Ee ruri, babogedi ba ba akanyetsang ba ka rotloetsa batabogi ka tsela e e molemo.

¹⁰ Ke bomang ba e leng babogedi mo lobelong lwa botshelo lo Bakeresete ba lo tsenetseng? Paulo o ile a kwala jaana morago ga go umaka basupi ba ba ikanyegang ba ga Jehofa ba pele ga motlha wa Bokeresete, jaaka go kwadilwe mo kgaolong ya bo11 ya Bahebera: “Jalo, he, ka gonne re na le bontsintsi jo bogolo jaana jwa basupi jo bo re dikanyeditseng, . . . a re sianeng ka boitshoko lobelo lo re lo tlhomilweng pele.” (Bahebera 12:1) Fa Paulo a dirisa tshwantshiso ya leru, o ne a sa dirise lefoko la Segerika le le tlhalosang leru le le nang le bogolo le popego e e rileng. Go na le moo, o dirisitse le go ya ka W. E. Vine, yo e leng mokwadi wa didikishinare, “le nayang kgopolo ya leru le legolo thata le le se nang popego e e rileng le le bipileng loapi.” Go mo pepeneneng gore Paulo o ne a akantse ka bontsintsi jo bogolo jwa basupi—ba bantsi jaana mo ba neng ba ntse jaaka leru le legolo.

11, 12. (a) Basupi ba ba ikanyegang ba motlha wa pele ga Bokeresete ba ka re rotloetsa jang, jaaka fa go ka tualo, gore re taboge ka boitshoko mo lobelong lwa rona? (b) ‘Bontsintsi jo bogolo jwa basupi’ bo ka re solegela molemo jang ka botlalo?

¹¹ A basupi ba pele ga motlha wa Bokeresete ba ka nna babogedi ba gompieno ka tsela ya mmatota? Nnyaa. Botlhe fela ba robetse mo losong, ba letetse tsogo. Le fa go ntse jalo, bone ka bobone e ne e le batabogi ba ba ileng ba atlega fa ba sa ntse ba tshela, mme dikai tsa bone di sa ntse di tshela mo Baebeleng. Fa re ntse re ithuta Dikwalo, go nna jaaka e kete batho bano ba ba ikanyegang ba a tshela mo megopolong ya rona mme ba ka re rotloetsa, jaaka fa re ka rialo, gore re tswelele pele re taboga go fitlha re wetsa lobelo.—Baroma 15:4.a

¹² Ka sekai, fa re ikutlwa re meletsa ditshono dingwe tsa lefatshe mathe, a ga re ne re tlhotlheletsega go tswelela pele mo lobelong fa re akanya ka tsela e Moshe a ileng a gana maemo a kwa Egepeto ka yone? Fa go bonala teko e re lebaneng le yone e re fekeetsa, re ka kgothadiwa thata gore re se ka ra ineela mo kgaisanong ya rona ya tumelo fa re gopola teko e e boima e Aborahame a ileng a lebana le yone fa a ne a kopiwa go ntsha morwawe e bong Isake setlhabelo. Selekanyo se ‘bontsintsi jono jo bogolo’ jwa basupi bo re rotloetsang ka sone se ikaegile thata ka gore re ba bona sentle go le kana kang ka matlho a rona a tlhaloganyo.

13. Basupi ba ga Jehofa ba motlha wa gompieno ba re rotloetsa jang mo lobelong lwa botshelo?

¹³ Gape re dikaganyeditswe ke bontsi jo bogolo jwa Basupi ba ga Jehofa ba motlha wa gompieno. A bo Bakeresete ba ba tloditsweng le banna le basadi ba “boidiidi jo bogolo” ba re tlhometse dikao tse di molemo jang ne tsa tumelo! (Tshenolo 7:9) Gangwe le gape re ka bala ka dikgang tsa botshelo jwa bone mo makasineng ono le mo dikgatisong tse dingwe tsa Watch Tower.b Fa re ntse re akanya ka tumelo ya bone, re tlhotlheletsega go itshoka go fitlha kwa bokhutlong. Mme a bo go le molemo jang ne go engwa nokeng ke ditsala tsa rona tse dikgolo le ba losika ba le bone ba direlang Jehofa ka boikanyegi! Ee, re na le batho ba bantsi ba ba re rotloetsang mo lobelong lono lwa botshelo.

Tlhoma Lobelo Lwa Gago Sentle

14, 15. (a) Ke eng fa go le botlhokwa gore motho a itlhomele lobelo lo lo siameng? (b) Ke eng fa re tshwanetse go nna kakanyetso fa re itlhomela mekgele?

¹⁴ Motabogi o tshwanetse go tlhoma lobelo lwa gagwe sentle fa a taboga lobelo lo loleele lo lo jaaka marathone. Makasine wa New York Runner wa re: “Fa o ka simolola o le mafega thata o ka nna wa se ka wa atlega. Go ka nna ga direga gore o felelwe ke maatla fa go setse dimmaele [dikilometara] di sekae kana o palelwe ke go le wetsa gotlhelele.” Motabogi mongwe wa dimarathone o gakologelwa jaana: “Sebui kwa puong e ke neng ka ya go e reetsa fa ke ne ke ipaakanyetsa lobelo, se ile sa tlhagisa jaana: ‘O se ka wa ya le batabogi ba ba tabogang ka lobelo lo logolo. Taboga ka lobelo lo lo go lekaneng. Fa o sa dire jalo, o tla lapa mme o ka nna se ka wa wetsa lobelo.’ Go reetsa kgakololo eno go ile ga nthusa go wetsa lobelo.”

¹⁵ Batlhanka ba Modimo ba tshwanetse go iteka ka natla tota mo lobelong lono lwa botshelo. (Luke 13:24) Le fa go ntse jalo, morutwa Jakobe o ile a kwala jaana: “Botlhale jo bo tswang kwa godimo . . . bo kakanyetso.” (Jakobe 3:17) Le fa sekao se se molemo sa batho ba bangwe se ka re kgothaletsa go iteka thata, go nna kakanyetso go tla re thusa gore re ipeele mekgele e e re tshwanetseng go ya ka bokgoni jwa rona le maemo. Dikwalo di re gakolola jaana: “A mongwe le mongwe a bontshe se tiro ya gagwe e leng sone, mme ke gone a tla nnang le lebaka la go kgana malebang le ene ka esi, mme e seng a ipapisa le motho yo mongwe. Gonne mongwe le mongwe o tla rwala morwalo wa gagwe.”—Bagalatia 6:4, 5.

16. Go nna boingotlo go ka re thusa jang fa re itlhomela lobelo lo lo re siametseng?

¹⁶ Mo go Mika 6:8 re bodiwa potso eno e e dirang gore motho a akanye: “Jehofa o lopa eng mo go wena fa e se . . . go nna boingotlo fa o tsamaya le Modimo wa gago?” Go nna boingotlo go akaretsa gore re itse makoa a rona. A botsogo jo bo bokoa kana go tsofala go re beetse dikgoreletsi dingwe mo tirelong ya rona go Modimo? A re se kgobege marapo. Jehofa o itumelela maiteko le go intsha setlhabelo ga rona ‘go ya ka se re nang le sone, e seng go ya ka se re se nang sone.’—2 Bakorintha 8:12; bapisa Luke 21:1-4.

Tlhoma Matlho mo Sekgeleng

17, 18. Jesu o ile a kgona go itshokela thupa ya tlhokofatso ka go nna a akantse ka eng?

¹⁷ Fa Paulo a lemotsha Bakeresete ba Korintha botlhokwa jwa go itshoka mo lobelong lwa botshelo, o ile a umaka selo se sengwe gape se se neng se direga mo Metshamekong ya Isthmian se se neng se tlhoka go elwa tlhoko. Paulo o ile a kwala jaana malebana le batabogi mo metshamekong eno: “Jaanong bone, legale, [ba siana] gore ba tle ba bone serwalo se se senyegang, mme rona se se sa senyegeng. Ka jalo, tsela e ke sianang ka yone ga se ka go sa tlhomamisege; tsela e ke lebantshang go itaya ga me ka yone ke e le gore ke se ka ka itaya moya wa loapi.” (1 Bakorintha 9:25, 26) Mo metshamekong eo ya bogologolo mofenyi o ne a duelwa ka go newa serwalo, kana kgare, e e dirilweng ka matlhare a setlhare sa phaene kana dimela tse dingwe, kana le e leng matlhare a a omeletseng a semela sa naga sa celery—“serwalo se se senyegang” ruri. Le fa go ntse jalo, Bakeresete ba ba itshokang go fitlha kwa bokhutlong bone ba tla newa eng?

¹⁸ Moaposetoloi Paulo o ile a kwala jaana a bua ka Motlhomasekao wa rona e bong Jesu Keresete: “Ka ntlha ya boipelo jo bo neng bo tlhomilwe fa pele ga gagwe o ne a itshokela kota ya tlhokofatso, a nyatsa ditlhong, mme o ntse kafa seatleng sa moja sa setulo sa bogosi sa Modimo.” (Bahebera 12:2) Jesu o ile a itshoka go fitlha kwa bokhutlong jwa botshelo jwa gagwe jwa mo lefatsheng ka go itshokela thupa ya tlhokofatso a ntse a akantse ka tuelo ya gagwe, e e neng e akaretsa boipelo jo a nang le jone mo go nneng le seabe mo go direng gore leina la ga Jehofa le itshepisiwe, go rekolola batho mo losong, le go busa e le Kgosi le Moperesiti yo Mogolo fa a ntse a busetsa batho ba ba kutlo mo go nneng le botshelo jo bo sa feleng mo lefatsheng la paradaise.—Mathaio 6:9, 10; 20:28; Bahebera 7:23-26.

19. Re tshwanetse go nna re akantse ka eng fa re ntse re tsweletse mo tseleng ya go nna barutwa ba Bakeresete?

¹⁹ Akanya ka boipelo jo re tlileng go nna le jone fa re ntse re tsweletse mo tseleng ya rona ya go nna barutwa ba Bakeresete. Jehofa o re abetse tiro e e kgotsofatsang tota ya go rera dikgang tse di molemo tsa Bogosi jwa Modimo le ya go abela batho ba bangwe kitso ya Baebele e e ka ba nayang botshelo. (Mathaio 28:19, 20) A bo go itumedisa jang ne go bona mongwe a kgatlhegela Modimo wa boammaaruri mme re mo thusa gore a tsene mo lobelong lono lwa botshelo! Mme le fa batho ba re ba rerelang ba ka tsiboga jang, ke tshiamelo e kgolo go nna le seabe mo tirong eno e e amanang le go itshepisiwa ga leina la ga Jehofa. Fa re itshoka mo bodireding le fa batho ba tshimo ya rona ba re itlhokomolosa kana ba re ganetsa, re tla nna le boipelo jwa go itumedisa pelo ya ga Jehofa. (Diane 27:11) Mme tuelo e kgolo e a re solofetsang yone ke botshelo jo bo sa khutleng. A bo seo e tla nna boipelo jo bogolo jang ne! Re tshwanetse go nna re akantse ka masego ano mme re tswelele pele ka lobelo lwa rona.

Fa Bokhutlo bo Atamela

20. Lobelo lwa botshelo lo ka nna boima jang fa bokhutlo jwa lone bo ntse bo atamela?

²⁰ Mo lobelong lwa rona lwa botshelo, re tshwanelwa ke go lwa le mmaba wa rona yo mogolo e bong Satane Diabolo. Fa re ntse re atamela kwa bokhutlong, o leka ka bojotlhe go re diga kana go re fokotsa lobelo. (Tshenolo 12:12, 17) Mme ga go motlhofo go tswelela pele re le baboledi ba Bogosi ba ba ikanyegang le ba ba ineetseng ka ntlha ya dintwa, ditlala, dikgogodi le mathata a mangwe a a tshwayang ‘motlha ono wa bokhutlo.’ (Daniele 12:4; Mathaio 24:3-14; Luke 21:11; 2 Timotheo 3:1-5) Mo godimo ga moo, ka dinako tse dingwe go ka nna ga lebega bokhutlo bo le kgakala thata go feta kafa re neng re akantse ka teng, segolobogolo fa e le gore re na le masomesome a dingwaga re le mo lobelong. Le fa go ntse jalo, Lefoko la Modimo le re tlhomamisetsa gore bokhutlo bo tla tla. Jehofa a re ga bo kitla bo diega. Bokhutlo bo atametse.—Habakuke 2:3; 2 Petere 3:9, 10.

21. (a) Ke eng se se tla re nonotshang fa re ntse re tsweletse mo lobelong lwa botshelo? (b) Re tshwanetse go ititaya sehuba go dira eng fa bokhutlo bo ntse bo atamela?

²¹ Ka jalo, gore re atlege mo lobelong lwa botshelo, re tshwanetse go inonotsha ka dithulaganyo tse Jehofa a re diretseng tsone ka lorato gore di re fepe semoyeng. Gape re tlhoka kgothatso yotlhe e re ka e bonang ka go kopana ka metlha le badumedikarona, ba le bone ba tabogang mo lobelong lono. Tota le fa re tla re kopana le dipogiso tse dikgolo le maemo a a sa lebelelwang a a dirang gore lobelo lo nne boima, re ka kgona go itshoka go fitlha kwa bokhutlong ka gonne Jehofa o re naya “maatla a a fetang a a tlwaelegileng.” (2 Bakorintha 4:7) A bo go nametsa pelo jang ne go itse gore Jehofa o batla gore re fenye lobelo lono! A ka go ititaya sehuba “re sianeng ka boitshoko lobelo lo re lo tlhomilweng pele,” re tshepa re sa belaele gore “re tla roba mo pakeng e e leng yone fa re sa lape.”—Bahebera 12:1; Bagalatia 6:9.

[Dintlha tse di kwa tlase]

A o A Gakologelwa?

◻ Ke eng fa re tshwanetse go itshoka go fitlha kwa bokhutlong?

◻ Ke dithulaganyo dife tsa ga Jehofa tse re sa tshwanelang go di tlhokomologa?

◻ Ke eng fa go le botlhokwa gore re itlhomele lobelo lo lo siameng?

◻ Ke boipelo bofe jo re tlileng go nna le jone fa re ntse re tsweletse mo lobelong lono?

[Setshwantsho mo go tsebe 18]

Senka kgothatso mo dipokanong tsa Bokeresete