Nna le Matswela mo Bodireding Jwa Gago

¹ Loapi lo a fifala mme modumo o o tshosang o a oketsega go fitlha e nna go duma go go kabang ditsebe. Go fologa leru le e keteng ke mosi. Ke eng? Ke lesogodi la dimilione tsa ditsie le le tlang go swafatsa naga ka mo go feletseng! Pono eno e e tlhalosiwang ke moporofeti Joele e a diragadiwa gompieno mo tirong ya go rera ya batlhanka ba ba tloditsweng ba Modimo le ditsala tsa bone, boidiidi jo bogolo.

² Tora ya Tebelo ya May 1, 1998, tsebe ya 11, serapa 19, e boletse jaana: “Mophato wa motlha wa segompieno wa ditsie wa Modimo o neetse bosupi jo bo feletseng mo ‘motseng’ wa Labokeresete. (Joele 2:9) . . . Ba sa ntse ba fenya dikgoreletsi, ba tsena mo matlong a a dimilione, ba atamela batho mo mebileng, ba bua le bone mo founong le go ikgolaganya le bone ka tsela epe fela e e ka kgonegang fa ba ntse ba bolela molaetsa wa ga Jehofa.” A ga se tshiamelo e kgolo go nna le seabe mo tirong eno e e tlhomamisitsweng ke Modimo?

³ Go farologana le ditsie tsa mmatota, tse boikaelelo jwa tsone fela e leng go iphepa, rona jaaka batlhanka ba ga Jehofa re amegile thata ka matshelo a ba re ba rerelang. Re batla go thusa ba bangwe gore ba ithute boammaaruri jo bo itumedisang jo bo mo Lefokong la Modimo ba bo ba tlhotlheletsege go tsaya dikgato tse di tla dirang gore ba bolokwe ka bosakhutleng. (Joh. 17:3; 1 Tim. 4:16) Ke gone ka moo, re batlang go nna le matswela mo tseleng e re dirang bodiredi jwa rona ka yone. Go sa kgathalesege gore re dirisa mokgwa ofe wa go rera, re tshwanetse go ela tlhoko gore re dira bodiredi jono ka mokgwa le ka nako e e tla dirang gore re nne le matswela a a molemo. E re ka ‘seemo sa lefatshe leno se fetoga,’ re dira sentle fa re sekaseka mekgwa ya rona le tsela e re buisanang le batho ka yone go tlhomamisa gore re nna le matswela kafa go ka kgonegang ka teng.—1 Bakor. 7:31.

⁴ Le fa gone re leka go kopana le batho ka ditsela tse dintsi, tiro ya ntlo le ntlo e sa ntse e le yone ya konokono mo bodireding jwa rona. A o fitlhela gore batho gantsi ga ba yo mo gae kana ba robetse fa o ba etetse? A bo seno se kgoba marapo jang ne, ka gonne ga o kgone go ba bolelela molaetsa wa dikgang tse di molemo! O ka lebana jang le kgwetlho eno?

⁵ Fetofetoga Mme o Tsamaisane le Maemo: Kwa Iseraeleng wa lekgolo la ntlha la dingwaga, batshwaraditlhapi ba ne ba tshwara ditlhapi bosigo. Ka ntlha yang bosigo? Le fa gone e ne e se nako e ba neng ba ka e rata, e ne e le nako e e siameng ya go tshwara ditlhapi tse dintsi. E ne e le nako e ba dirang se se bonalang ka yone. Tora ya Tebelo ya June 15, 1992, fa e akgela ka tlwaelo eno, e boletse jaana: “Le rona re tshwanetse go ithuta tshimo ya rona gore re ye go tshwara ditlhapi, jaaka go ne go ka tualo, fa bontsi jwa batho bo le kwa gae e bile bo ka reetsa.” Fa go ne go tlhatlhobiwa mekgwa ya batho go fitlhetswe gore kwa metseng ya ditoropo le kwa mafelong a mangwe a go nniwang mo go one, batho ba ka tswa ba le mo gae fa re ba etela maphakela a Matlhatso le a Sontaga, mme ga se gantsi ba re reetsang fa re ba etetse ka nako eo. Fa e le gore go ntse jalo mo lefelong le o nnang mo go lone, a o ka fetola nako e o etang ka yone mme o ye motshegarenyana kana le e leng thapama? Eno ke tsela e e molemo ya go dira gore re nne le matswela mo bodireding jwa rona mmogo le go bontsha go akanyetsa baagelani ba rona, e leng selo se se bontshang lorato lwa Bokeresete jwa boammaaruri.—Math. 7:12.

⁶ Mo go Bafilipi 4:5, moaposetoloi Paulo o re gakolola gore ‘go nna kakanyetso ga rona go itsiwe mo bathong botlhe.’ Tumalanong le kaelo eno e e tlhotlheleditsweng, re batla go dira dilo ka tekatekano le go tsamaisana le maemo mo mekgweng ya rona fa re ntse re diragatsa kabelo ya rona ya go rera ka tlhoafalo le ka tlhagafalo. Ga re batle go ‘ithiba go ruta phatlalatsa le go tswa ntlong go ya ntlong,’ mme re batla go tlhomamisa gore re diragatsa bodiredi jwa rona jwa ntlo le ntlo ka dinako tse di siameng le tse di nang le matswela. (Dit. 20:20) Fela jaaka batshwari ba ditlhapi ba Iseraele wa lekgolo la ntlha la dingwaga, re amegile ka ‘go tshwara ditlhapi’ ka dinako tse re tla nnang le matswela ka tsone, e seng ka dinako tse go batlang rona ka tsone.

⁷ Go ka dirwa diphetogo dife? Gantsi, dipokano tsa rona tsa tirelo ya tshimo di tshwarwa ka 9:00 kana ka 9:30 a.m. ka Matlhatso le ka Sontaga, mme morago ga moo setlhopha se tswe ka yone nako eo go dira ka ntlo le ntlo mo tshimong. Le fa go ntse jalo, ditlhopha dingwe tsa bagolwane di rulagantse gore setlhopha se nne le seabe mo mefuteng e mengwe ya bodiredi, e e jaaka bosupi jwa mo mmileng, tshimo ya kgwebo kana maeto a go boela, pele ga ba ya ka ntlo le ntlo kwa mafelong a go nniwang kwa go one. Diphuthego tse dingwe di rulagantse gore go tshwarwe pokano ya tirelo ya tshimo moragonyana mo mosong—ka 10:00 a.m., 11:00 a.m., kana 12:00 motshegare. Morago ga moo, setlhopha se ya ka tlhamalalo kwa tirong ya ntlo le ntlo mme ba dire go fitlha go sa le gale thapama. Kwa mafelong a mangwe, go dira tshimo go sa le gale thapama go botoka thata go feta mo mosong. Go dira diphetogo tseno go ka dira gore re nne le matswela a magolwanyane mo tirong ya ntlo le ntlo.

⁸ Nna le Temogo le Botlhale: Fa re ntse re bua le batho ka ntlo le ntlo, ba tsibogela molaetsa wa rona ka ditsela tse di farologaneng. Beng ba bangwe ba matlo ba a re reetsa, ba bangwe ga ba kgatlhege mme ba le mmalwa ba nna manganga kana ba a re lwantsha. Malebana le ba ba nnang manganga, mo tsebeng ya 7 ya Go Fetolana ka Dikwalo, re gakololwa gore ga re batle go “‘fenya dikgaruru’ le batho bao ba sa rateng boammaaruri.” Fa mong wa ntlo a sa rate, go molemo gore re tsamaye. Re se ke ra rumola batho ka go ba gatelela gore ba bue le rona kana ba lebe dilo kafa rona re di lebang ka teng. Ga re pateletse batho molaetsa wa rona. Go dira jalo ga go botlhale e bile go ka bakela Basupi ba bangwe le tiro ka kakaretso mathata.

⁹ Pele ga re simolola go bereka mo tshimong nngwe, go botlhale gore re lebe karata ya tshimo go bona diaterese tse beng ba tsone ba re boleletseng gore re se ba etele. Fa go na le diaterese tse di ntseng jalo, mmoledi mongwe le mongwe yo o dirang mo seterateng seo o tshwanetse go bolelelwa kwa a sa tshwanelang go tsena teng. Ga go na ope yo o tshwanetseng go itsenela fela mo matlong ano a sa kaelwa ke molebedi wa tirelo go dira jalo.—Bona Tirelo ya Rona ya Bogosi ya September 1994, Lebokoso la Dipotso.

¹⁰ Re ka nna le matswela a magolwanyane ka go nna le temogo fa re dira ka ntlo le ntlo. Nna kelotlhoko fa o atamela ntlo. A digaretene di tswetswe tsotlhe? A ga go utlwale modumo ope? Seno se ka supa gore beng ba ntlo ba robetse. Go ka direga gore re nne le motlotlo o o nang le matswela thata le mong wa ntlo fa re ka boa moragonyana. Gongwe go ka nna molemo gore re fete ntlo eno gone jaanong, mme re kwale nomoro ya ntlo. O ka nna wa ya go tlhola ntlo eo gape pele ga o tswa mo tshimong eo kana o kwale gore o boele gape moragonyana.

¹¹ Go ka nna ga diragala gore re tsose mongwe re sa ikaelela kana gongwe re mo tshwenye. A ka nna a lebega a selekegile kana a galefile. Re dire jang? Diane 17:27 e gakolola jaana: “Yo o mowa o tsididi ke motho wa tlhaloganyo.” Le fa gone re sa ikwatlhaele bodiredi jwa rona, eleruri re ka mmolelela gore re maswabi go bo re tlile ka nako e e sa tshwanelang. Re ka mmotsa ka maitseo gore a re ka boa ka nako nngwe e e tshwanetseng mme re ithaopele go boa gape. Go bontsha gore re amegile, re bua ka lentswe le le bonolo gantsi go ka thusa go ritibatsa motho yono. (Dia. 15:1) Fa mong wa ntlo a re bolelela gore ka metlha o bereka bosigo, go ka nna ga tshwaiwa seno mo kareteng ya tshimo e le gore mo nakong e e tlang a etelwe ka nako e e tshwanetseng.

¹² Gape re tshwanetse go nna le temogo fa re ntse re leka go dira tshimo ya rona ka botlalo. E re ka batho ba bantsi ba se teng mo gae fa re ba etela ka lekgetlo la ntlha, re tlhoka go tsaya matsapa a a oketsegileng gore re kopane le bone gore re ba bolelele molaetsa wa poloko. (Bar. 10:13) Dipego di supa gore ka dinako dingwe baboledi ba boela kwa ntlong e le nngwe ka makgetlo a le mmalwa mo letsatsing le le lengwe go leka go bona batho mo ntlong eno. Seno se gapa tlhokomelo ya baagelani. Ba ka nna le kgopolo e e sa siamang ya gore Basupi ba ga Jehofa ‘ka metlha ba nna ba boaboa’ mo seterateng sa bone. Seno se ka tilwa jang?

¹³ Dirisa temogo. Fa o boela gape kwa ntlong e e neng e se na batho, a go na le sengwe se se bontshang gore jaanong go na le motho mo ntlong? Fa e le gore poso kana dipampitshana tsa diphasalatso di sa ntse di tlhagile mo lebokosong la poso, go ka direga gore go sa ntse go se na motho mo legaeng leo mme ga go ne go thusa gore o boele gape kwa ntlong eno ka nako eno. Fa e le gore ga o kgone go kopana le motho yono morago ga gore o leke makgetlo a le mmalwa ka dinako tse di farologaneng mo letsatsing, jaaka mo maitseboeng, go ka nna ga kgonega gore o ikgolaganye le mong wa ntlo ka thelefouno. Go seng jalo, o ka nna wa tlogela pampitshana kana taletso ka tsela e e botlhale kafa tlase ga kgoro, segolobogolo fa e le gore tshimo eno e dirwa gantsinyana. Go ka nna ga direga gore motho yono a ka nna a etelwa gape mo nakong e e tlang fa go berekiwa tshimo eno gape.

¹⁴ Re tshwanetse go tila go bua lobaka lo lo leele mo kgorong fa e le gore mong wa ntlo o tshwanelwa ke go ema mo maemong a a sa itumediseng a bosa. Fa o dumelelwa go tsena mo ntlong, ela tlhoko gore o se ke wa tlatsa leswe fa fatshe. Dirisa botlhale fa o kgogogelwa ke ntša e bogola. Fa lo bereka mo difoleteng, buela kwa tlase mme o se ka wa dira modumo o o tla tshwenyang banni le go ba lemosa gore o teng.

¹⁵ Dira Dilo ka Thulaganyo le ka Tsela e e Nang le Seriti: Fa re rulaganya dilo sentle re ka tila go ema ka ditlhopha tse dikgolo, tse di bonwang ke batho botlhe di kokoane mo tshimong. Beng ba matlo bangwe ba ka nna ba tshoga fa dikoloi di le mmalwa le dibene di goroga fa pele ga ntlo ya bone le setlhopha se segolo sa baboledi. Ga re batle go dira gore batho ba nne le kgopolo ya gore re “tlhasela” mafelo a go nniwang mo go one. Go ka nna molemo fa dithulaganyo tsa go bereka tshimo di direlwa kwa pokanong ya tirelo ya tshimo. Ditlhopha tse di nnye tsa baboledi, tse di jaaka lelapa, ga se gantsi di tshosang beng ba matlo e bile ga go tlhokege tiro e kgolo ya go ba rulaganya gape fa tshimo e berekiwa.

¹⁶ Go dira dilo ka thulaganyo go tlhoka gore batsadi ba ele tlhoko tsela e bana ba bone ba itshwarang ka yone fa ba le mo tshimong. Bana ba tshwanetse go itshwara sentle fa ba tsamaya le bagolo go ya mo matlong a batho. Basha ga ba a tshwanela go tlogelwa ba tshameka kana ba itsamaatsamaela fela, ba ngoka tlhokomelo ya banni go sa tlhokege kana ya batho ba ba fetang ka tsela.

¹⁷ Gape go tlhoka go nna le tekatekano mo kgannyeng ya go ikhutsa go nwa kofi. Tirelo ya Rona ya Bogosi ya June 1995, tsebe 3 e boletse jaana: “Fa re le mo tirelong ya tshimo, re ka nna ra senya nako e e botlhokwa ka go ikhutsa go nwa kofi. Le fa go ntse jalo, fa maemo a bosa a se monate, fa re ikhutsa go sekaenyana seo se ka re lapolosa e bile se ka re thusa gore re tswelele pele. Le fa go ntse jalo, batho ba le bantsi ba rata bogolo go nna ba ntse ba neela bosupi go na le gore ba ijese monate le bakaulengwe ka go ikhutsa go nwa kofi ka nako e ba e beetseng tiro ya bodiredi.” Le fa gone go emisa go sekae go ja dijonyana tse di motlhofo e le selo se motho a ka se dirang fa a batla go dira jalo, go lemogilwe gore ka dinako dingwe, ditlhopha tse dikgolo tsa bakaulengwe le bokgaitsadi ba kopana kwa lebenkeleng la kofi kana kwa resetšhurenteng. Mo godimo ga gore go bo go tlile go tsaya nako gore ba thusiwe, fa e le setlhopha se segolo thata sa batho se ka nna sa tshosa ba bangwe ba ba tlileng go reka. Ka dinako tse dingwe, go buelwa kwa godimo fa go tlotlwa ka maitemogelo a tirelo ya tshimo ya mo mosong, mme seno se tlosa seriti sa bodiredi jwa rona mme se dira gore bo se nne le matswela go le kalo. Ka go nna le temogo, baboledi ba ka dira gore ba se ka ba kokoana mo lefelong le le lengwe fela le go senya nako ya bodiredi go sa tlhokege.

¹⁸ Ba le bantsi ba nnile le matswela a a molemo ka go bua le batho gotlhe fela kwa ba ka fitlhelwang teng—mo mebileng, mo mafelong a go phakiwang dikoloi mo go one le mo mafelong a mangwe a botlhe. Le teng fano, re batla go neela bosupi jo bo molemo, e seng ka mafoko fela mme gape le ka go nna tekatekano ga rona. Baboledi mo phuthegong nngwe le nngwe ba tshwanetse go tlhomamisa gore ba dira go fitlha fela mo melelwaneng ya tshimo ya bone e le gore ba se ka ba kgoreletsa batsamaakadinao mo marekelong le mo diteisheneng kana badiri ba ba mo tirong, jaaka badiri ba mo mafelong a go tshelwang peterolo mo go one, a a bulwang diura di le 24. Go tlhomamisa gore re dira bodiredi jwa rona ka thulaganyo, ka mokgwa o o nang le seriti, re tla dira fela mo teng ga melelwane ya tshimo e re e abetsweng kwantle ga fa go dirilwe dithulaganyo tse di rileng ka Komiti ya Tirelo ya Phuthego e nngwe, go ba thusa.—Bapisa 2 Bakorintha 10:13-15.

¹⁹ Diphuthego dingwe tse di nang le mafelo a mantsi a go ka neelwang bosupi jwa phatlalatsa mo go one di rulagantse mafelo ano go a dira ditshimo. Mme mmoledi kana setlhopha se neelwe karata ya tshimo. Seno se dira gore tshimo e wediwe sentle e bile se sireletsa gore go se nne le baboledi ba bantsi ba ba dirang mo lefelong le le lengwe ka nako e le nngwe, go dumalana le molaomotheo o o mo go 1 Bakorintha 14:40: “A dilo tsotlhe di diragale ka mokgwa o montle le ka thulaganyo.”

²⁰ Ponalo ya rona ka metlha e tshwanetse go nna e e tlotlegang le e e bontshang gore re badiredi ba ba sikereng leina la ga Jehofa. Dilo tse re di dirisang le tsone di tshwanetse go nna fela jalo. Dikgetsana tse di onetseng tsa dibuka le Dibaebele tse di menegileng mo dintlheng tsa ditsebe kana tse di leswe di dira gore molaetsa wa Bogosi o nyatsege. Go tlhola go bolelwa gore tsela e motho a aparang ka yone le e a ipaakanyang ka yone “e bolelela batho ba ba go dikologileng gore o mang le gore o eng le gore o motho wa mofuta ofe.” Ka gone, ponalo ya rona ga ya tshwanela go nna e e seng phepa kana e e botlhaswa, ga ya tshwanela go nna e e maphatsiphatsi kana e e feteletseng, mme ka metlha e nne e e “tshwanelang dikgang tse di molemo.”—Bafil. 1:27; bapisa le 1 Timotheo 2:9, 10.

²¹ Mo go 1 Bakorintha 9:26, moaposetoloi Paulo o bolela jaana: “Tsela e ke sianang ka yone ga se ka go sa tlhomamisege; tsela e ke lebantshang go itaya ga me ka yone ke e le gore ke se ka ka itaya moya wa loapi.” Fela jaaka Paulo, re ikemiseditse go nna le bodiredi jo bo nang le boleng le matswela. Fa re ntse re nna le seabe ka tlhoafalo mo tirong ya go neela bosupi jaaka karolo ya “mophato wa ditsie” tsa ga Jehofa, e kete re ka dirisa botlhale jwa Bokeresete le temogo fa re isa molaetsa wa poloko kwa go botlhe ba ba mo tshimong ya rona.