Dikgosi wa Ntlha

15 Mo ngwageng wa bo18 wa ga Kgosi Jeroboame+ morwa Nebate, Abijame o ne a nna kgosi mo Juda.+ 2 O ne a busa dingwaga di le tharo mo Jerusalema. Leina la ga mmaagwe e ne e le Maaka,+ setlogolwana sa ga Abishalome. 3 O ne a nna a dira maleo a a tshwanang le a rraagwe a a dirileng pele ga gagwe, mme o ne a sa ineela ka botlalo mo go Jehofa, Modimo wa gagwe jaaka Dafide rraagwemogolo. 4 Le fa go ntse jalo, ka ntlha ya ga Dafide,+ Jehofa, Modimo wa gagwe o ne a mo naya lobone mo Jerusalema+ ka go tlhoma morwawe gore a nne kgosi morago ga gagwe le ka go boloka Jerusalema e le gone. 5 Gonne Dafide o ne a dira se se siameng mo matlhong a ga Jehofa e bile o ne a se ka a fapoga mo go sepe se Modimo a neng a se mo laetse malatsi otlhe a botshelo jwa gagwe, kwantle fela ga kgang ya ga Uria wa Mohite.+ 6 Mme go ne go na le ntwa fa gare ga ga Rehoboame le Jeroboame malatsi otlhe a botshelo jwa gagwe.+

7 Fa e le pego yotlhe ya botshelo jwa ga Abijame, sotlhe se a se dirileng, a ga e a kwalwa mo bukeng ya dipego tsa metlha ya dikgosi tsa Juda?+ Gape go ne ga nna le ntwa fa gare ga ga Abijame le Jeroboame.+ 8 Go tswa foo, Abijame o ne a swa jaaka borraagwemogolo, mme ba ne ba mo fitlha mo Motseng wa ga Dafide; mme morwawe e bong Asa+ o ne a nna kgosi mo boemong jwa gagwe.+

9 Mo ngwageng wa bo20 wa ga Kgosi Jeroboame wa Iseraele, Asa o ne a simolola go busa mo Juda. 10 O ne a busa mo Jerusalema dingwaga di le 41. Leina la ga mmaagwemogolo e ne e le Maaka,+ setlogolwana sa ga Abishalome. 11 Asa o ne a dira se se siameng mo matlhong a ga Jehofa,+ jaaka Dafide rraagwemogolo. 12 O ne a leleka bagwebakammele ba banna ba mo tempeleng mo lefatsheng+ a bo a tlosa medingwana yotlhe e e ferosang sebete* e borraagwemogolo ba neng ba e dirile.+ 13 O ne a bo a tlosa mmaagwemogolo e bong Maaka+ mo maemong a gagwe a go nna mohumagadi, ka gonne o ne a dirile modingwana o o makgapha gore o dirisiwe mo kobamelong ya kota e e boitshepo.* Asa o ne a rema modingwana oo o o makgapha+ a bo a o fisetsa kwa Mokgatšheng wa Kiderone.+ 14 Le fa go ntse jalo, mafelo a a kwa godimo a a boitshepo a ne a se ka a tlosiwa.+ Mme gone, Asa o ne a ineetse ka botlalo mo go Jehofa botshelo* jotlhe jwa gagwe. 15 O ne a tsaya dilo tse ene le rraagwe ba neng ba di dirile boitshepo a di tlisa mo ntlong ya ga Jehofa: selefera, gauta le dilwana tse dingwe.+

16 Go ne ga tswelela go na le ntwa fa gare ga ga Asa le Baasha+ kgosi ya Iseraele. 17 Ka jalo, Kgosi Baasha wa Iseraele o ne a tlhasela Juda mme o ne a simolola go aga* Rama+ gore a thibele motho ope go tswa kgotsa go tsena kwa go* Kgosi Asa wa Juda.+ 18 Foo Asa o ne a tsaya selefera le gauta yotlhe tse di neng di setse mo mabolokelamatlotlong a ntlo ya ga Jehofa le mo mabolokelamatlotlong a ntlo ya kgosi* a bo a di naya batlhanka ba gagwe. Go tswa foo, Kgosi Asa o ne a ba roma kwa go Bene-hadade morwa Taberimone morwa Hesione, kgosi ya Siria,+ yo o neng a nna kwa Damaseko, a re: 19 “Go na le tumalano* fa gare ga me le wena le fa gare ga ga rre le rrago. Ke go romelela mpho ya selefera le gauta. Tlaa, fedisa tumalano* ya gago le Kgosi Baasha wa Iseraele, gore a tle a ntlogele.” 20 Bene-hadade o ne a reetsa Kgosi Asa mme a romela balaodi ba masole a gagwe gore ba ye go tlhasela metse ya Iseraele, mme ba ne ba kgemetha Ijone,+ Dana,+ Abele-bethe-maaka, Kinerethe yotlhe le lefatshe lotlhe la Nafetali. 21 E rile Baasha a utlwa ka gone, ka yone nako eo o ne a tlogela go aga* Rama mme a tswelela a nna mo Tiresa.+ 22 Go tswa foo, Kgosi Asa o ne a bitsa Juda yotlhe, go ne go se na ope yo o tlogetsweng, mme ba ne ba tsaya maje le dikota tsa Rama tse Baasha a neng a ntse a aga ka tsone, mme Kgosi Asa o ne a di dirisa go aga* Geba+ mo Benjamine le Misepa.+

23 Fa e le pego yotlhe ya botshelo jwa ga Asa, kafa a neng a le maatla ka gone le sotlhe se a se dirileng le metse e a neng a e aga,* a ga e a kwalwa mo bukeng ya dipego tsa metlha ya dikgosi tsa Juda? Mme fa a setse a tsofetse o ne a nna le bolwetse jwa dinao.+ 24 Go tswa foo, Asa o ne a swa jaaka borraagwemogolo mme a fitlhwa le bone mo Motseng wa ga Dafide rraagwemogolo; mme morwawe e bong Jehoshafate+ o ne a nna kgosi mo boemong jwa gagwe.

25 Nadabe+ morwa Jeroboame o ne a nna kgosi mo Iseraele mo ngwageng wa bobedi wa ga Kgosi Asa wa Juda, mme o ne a busa mo Iseraele dingwaga di le pedi. 26 O ne a nna a dira se se bosula mo matlhong a ga Jehofa mme o ne a tsamaya mo tseleng ya ga rraagwe+ le mo boleong jwa gagwe jo a neng a dira gore Iseraele e bo dire.+ 27 Baasha morwa Ahija wa lotso lwa ga Isakare o ne a logela Nadabe leano la boferefere, mme Baasha o ne a mmolaela kwa Gibethone,+ e e neng e le ya Bafilisitia, fa Nadabe le Baiseraele botlhe ba ne ba kampile go dikologa Gibethone. 28 Ka jalo, Baasha o ne a mmolaya mo ngwageng wa boraro wa ga Kgosi Asa wa Juda mme o ne a nna kgosi mo boemong jwa gagwe. 29 Mme fela fa a sena go nna kgosi, o ne a bolaya botlhe ba lelapa la ga Jeroboame. Ga a ka a tlogela ope mo lelapeng la ga Jeroboame a tshela; o ne a laela gore ba nyelediwe go ya ka se Jehofa a neng a se buile ka motlhanka wa gagwe Ahija wa Moshilo.+ 30 O ne a dira seno ka ntlha ya maleo a Jeroboame a neng a a dirile le a a neng a dira gore Iseraele e a dire le ka ntlha ya go bo a ile a kgopisa Jehofa, Modimo wa Iseraele thata. 31 Fa e le pego yotlhe ya botshelo jwa ga Nadabe, sotlhe se a se dirileng, a ga e a kwalwa mo bukeng ya dipego tsa metlha ya dikgosi tsa Iseraele? 32 Mme go ne ga tswelela go na le ntwa fa gare ga ga Asa le Kgosi Baasha wa Iseraele.+

33 Mo ngwageng wa boraro wa ga Kgosi Asa wa Juda, Baasha morwa Ahija o ne a nna kgosi mo Tiresa a busa Iseraele yotlhe mme o ne a busa dingwaga di le 24.+ 34 Le fa go ntse jalo, o ne a nna a dira se se bosula mo matlhong a ga Jehofa,+ mme o ne a tsamaya mo tseleng ya ga Jeroboame le mo boleong jwa gagwe jo a neng a dira gore Iseraele e bo dire.+