“Moatlhodi wa Lefatshe Lotlhe” o Dira se se Siameng ka Metlha

 1. Aborahame o ne a bontsha jang gore o tlhomamisegile gore Jehofa o atlhola ka tsela e e siameng? (Bona setshwantsho se se simololang setlhogo.)

‘A MOATLHODI wa lefatshe lotlhe ga a kitla a dira se se siameng?’ (Gen. 18:25) Potso eno e bontsha gore Aborahame o ne a tlhomamisegile gore Jehofa o tla atlhola Sodoma le Gomora ka tsela e e siameng. Aborahame o ne a tlhomamisegile gore Jehofa a ka se dire tshiamololo ka “go bolaya motho yo o siameng le yo o boikepo.” Aborahame o ne a itse gore Jehofa ‘a ka se ka a dira jalo.’ Dingwaga di ka nna 400 moragonyana, Jehofa o ne a itlhalosa jaana: “Lefika, tiro ya gagwe e itekanetse, gonne ditsela tsotlhe tsa gagwe di tshiamiso. Modimo yo o ikanyegang, yo go se nang botlhoka tshiamiso mo go ene; o siame e bile o thokgame.”—Dute. 31:19; 32:4.

 2. Ke eng fa re ka re Jehofa ga a kgone go dira tshiamololo?

² Ke eng fa Aborahame a ne a tlhomamisegile gore ka metlha Jehofa o atlhola ka tsela e e siameng? Ke ka gonne Jehofa ke sekao se se di gaisang tsotlhe sa go diragatsa tshiamo le tshiamiso. Tota e bile, gantsi mafoko a Sehebera a a ranotsweng e le “tshiamiso” le “tshiamo,” a tlhagelela mmogo mo Dikwalong Tsa Sehebera. Tota ga go na pharologanyo magareng ga tshiamo le tshiamiso. Ka jalo, e re ka ditsela tsotlhe tsa ga Jehofa di siame, ka metlha o atlhola ka tshiamiso. Mo godimo ga moo, Baebele ya re Jehofa “ke morati wa tshiamo le tshiamiso.”—Pes. 33:5.

 3. Umaka sekai sengwe sa tshiamololo e e diregang gompieno.

³ Le fa gone lefatshe le tletse ka tshiamololo, batho ba ba ikanyegang ba gomodiwa ke go itse gore ka metlha Jehofa o diragatsa tshiamiso. Batho ba le bantsi ba a boga ka ntlha ya tshiamololo. Ka sekai, batho bangwe ba ile ba atlholwa le go tsenngwa mo kgolegelong ba se molato. Bosheng jaana go sekaseka bosupi jwa DNA go ile ga dira gore bangwe ba gololwe morago ga go fetsa dingwaga di le dintsi mo kgolegelong le fa gone ba ne ba sa dira sepe se se phoso. Le fa gone tshiamololo e e ntseng jalo e ka dira gore batho ba kgobege marapo le e leng go galefa, go na le mofuta o mongwe wa tshiamololo o go ka nnang thata gore Bakeresete ba o itshokele.

 4. Ke eng se se ka dirang gore go nne thata gore re tswelele re ikanyega?

⁴ Bakeresete ba a itse gore ka dinako tse dingwe batho ba e seng Basupi ba ka se ba tshware sentle. Le fa go ntse jalo, go ka nna thata gore re tswelele re ikanyega fa re bona e kete go na le tshiamololo mo phuthegong. O tla dira eng fa o akanya gore o diretswe tshiamololo mo phuthegong kgotsa gore mongwe mo phuthegong ga a go tshwara sentle? A o tla letla seo se go kgopisa?

 5. Ke eng fa re sa tshwanela go gakgamala fa re sa tshwarwa sentle kgotsa fa re bona mongwe a sa tshwarwa sentle mo phuthegong?

⁵ E re ka re na le boleo e bile re dira diphoso, re a itse gore go ka direga gore re se ka ra tshwarwa sentle kgotsa go ka direga gore re se ka ra tshwara ba bangwe sentle. (1 Joh. 1:8) Le fa gone seno se ka direga sewelo, Bakeresete ga ba gakgamale e bile ga ba kgopisege fa seo se direga. Ke gone ka moo Jehofa a re neileng kgakololo e e mosola mo Lefokong la gagwe go re thusa gore re tswelele re ikanyega le fa ba bangwe mo phuthegong ba ka re direla diphoso.—Pes. 55:12-14.

6, 7. Mokaulengwe mongwe o ne a direlwa tshiamololo efe mme ke eng se se ileng sa mo thusa gore a tswelele a ikanyega?

⁶ Akanya ka kgang ya ga Willi Diehl. Go tloga ka 1931, Mokaulengwe Diehl o ne a direla ka boikanyegi kwa legaeng la Bethele la kwa Bern, Switzerland. Ka 1946, o ne a ya kwa tlelaseng ya borobedi ya Sekolo sa Gileade kwa New York, U.S.A. Fa a sena go aloga, o ne a abelwa kwa Switzerland gore a dire tiro ya potologo. Mokaulengwe Diehl o ne a bua jaana mo pegong ya gagwe ya botshelo: “Ka May 1949, ke ne ka itsise ofisi ya lekala ya kwa Bern gore ke batla go nyala.” Ofisi ya lekala e ne ya nkaraba jaana: ‘Ga go na ditshiamelo dipe tse o tla di newang fa e se go nna mmulatsela wa ka metlha fela.’ Mokaulengwe Diehl o ne a oketsa jaana: “Ke ne ke sa letliwe go neela dipuo . . . Ba bantsi ba ne ba sa re dumedise, ba re tshwara jaaka batho ba ba kgaotsweng.”

⁷ Mokaulengwe Diehl o ne a dira eng? A re: “Le fa go ntse jalo, re ne re itse gore go nyala go ne go se kgatlhanong le Dikwalo, ka jalo re ne ra rapela le go ikanya Jehofa.” Moragonyana, kgopolo e e phoso e e malebana le lenyalo e e neng e dira gore Mokaulengwe Diehl a se ka a tshwarwa sentle e ne ya baakanngwa mme o ne a newa ditshiamelo tsa gagwe gape. Jehofa o ne a mo segofatsa ka gonne a ile a ikanyega.a Re ka nna ra ipotsa jaana: ‘Fa ke ne nka direlwa tshiamololo, a le nna ke ne ke tla bontsha gore ke ikanya Modimo ka tsela eo? A ke ne ke tla leta Jehofa ke le pelotelele kgotsa ke ne ke tla batla go ipagololela mogodu?’—Dia. 11:2; bala Mika 7:7.

 8. Ke eng se se ka dirang gore o akanye gore o diretswe tshiamololo kgotsa gore motho mongwe o diretswe tshiamololo?

⁸ Ka fa letlhakoreng le lengwe, o ka nna wa dira phoso ya go akanya gore o diretswe tshiamololo kgotsa gore motho yo mongwe mo phuthegong o diretswe tshiamololo. Seno se ka direga ka gonne re sa tlhaloganye kgang sentle kgotsa re se na dintlha tsotlhe ka kgang eo. Le fa tsela e re tlhaloganyang kgang ka yone e ka tswa e siame kgotsa e le phoso, fa re ikaega ka Jehofa, re mo rapela e bile re ikanyega mo go ene, ga re kitla re “galefela Jehofa.”—Bala Diane 19:3.

 9. Re tlile go tlotla ka dikai dife mo setlhogong seno le se se latelang?

⁹ A re sekasekeng dikai tsa batlhanka ba le bararo ba ga Jehofa ba bogologolo ba ba ileng ba direlwa tshiamololo. Mo setlhogong seno, re tla tlotla ka se se ileng sa diragalela setlogolwana sa ga Aborahame e bong Josefa. Mo setlhogong se se latelang, re tla tlotla kafa Jehofa a ileng a dirisana ka gone le Kgosi ya Iseraele e bong Ahabe le se se ileng sa diragalela moaposetoloi Petere kwa Antioka wa Siria. Fa re ntse re tlotla ka dikai tseno, batla dithuto tse di tla go thusang gore o tswelele o direla Jehofa ka boikanyegi e bile o atamalane le ene, segolobogolo fa o akanya gore mongwe o go diretse tshiamololo.

10, 11. (a) Josefa o ile a diragalelwa ke eng? (b) Josefa o ne a nna le tshono ya go dira eng fa a le kwa kgolegelong?

¹⁰ Motlhanka yo o ikanyegang wa ga Jehofa e bong Josefa, o ne a direlwa tshiamololo ke batho ba ba sa obameleng Modimo, mme se se utlwisang botlhoko le go feta ke gore gape o ne a direlwa tshiamololo ke bomorwarraagwe. Fa Josefa a ne a sa ntse a le mosha, bomorwarraagwe ba ne ba mo utswa ba bo ba mo rekisa gore e nne lekgoba. O ne a patelediwa go ya kwa Egepeto. (Gen. 37:23-28; 42:21) Moragonyana fa a le koo, o ne a latofadiwa ka gore o lekile go betelela mosadi wa mong wa gagwe mme o ne a isiwa kwa kgolegelong ntle le go sekisiwa. (Gen. 39:17-20) O ne a tswelela e le lekgoba le legolegwa dingwaga di ka nna 13. Re ka ithuta eng mo pegong ya ga Josefa se se tla re thusang fa mongwe mo phuthegong a sa re tshware sentle?

¹¹ Josefa o ne a nna le tshono ya go tlotlela legolegwa lengwe ka kgang ya gagwe. Legolegwa leo e ne e kile ya bo e le motsholasenwelo yo mogolo wa kgosi. Ka nako ya fa Josefa le motsholasenwelo ba ne ba le mo kgolegelong, motsholasenwelo o ne a nna le toro mme Josefa a mo tlhalosetsa gore e kaya eng. Josefa o ne a mo tlhalosetsa gore o ne a tla busediwa mo tirong ya gagwe ya pele kwa ntlong ya segosi ya ga Faro. Fa Josefa a ntse a mo tlhalosetsa gore toro ya gagwe e kaya eng, gape o ne a mo mmolelela se se mo diragaletseng. Re ka ithuta dithuto tsa botlhokwa mo go se Josefa a ileng a se bua le mo go se a neng a sa se bua.—Gen. 40:5-13.

12, 13. (a) Se Josefa a neng a se bolelela motsholasenwelo se bontsha jang gore ga a ka a amogela fela se se mo diragaletseng? (b) Josefa ga a ka a bolelela motsholasenwelo eng?

¹² Bala Genesise 40:14, 15. Ela tlhoko gore Josefa o ne a dirisa lefoko “utswiwa” go tlhalosa se se mo diragaletseng. Go bonala sentle gore o ne a diretswe tshiamololo. Gape Josefa o ne a tlhalosa gore ga a dira molato o o dirileng gore a tsenngwe mo kgolegelong. Ka ntlha ya seo, o ne a kopa motsholasenwelo gore a mmuelele mo go Faro. Ka ntlha yang? O ne a tlhalosa jaana: ‘Gore o nketshe mo ntlong eno.’

¹³ A se Josefa a neng a se bua se ne se bontsha gore o itlhobogile e bile o amogetse boemo jwa gagwe? Le e seng! O ne a itse sentle gore o ne a diretswe tshiamololo makgetlo a le mantsi. O ne a bolelela motsholasenwelo dintlha ka botlalo ka gonne gongwe o ne a ka kgona go mo thusa. Le fa go ntse jalo, ela tlhoko gore ga go na gope mo Baebele e tlhalosang gore Josefa o ne a bolelela mongwe, tota le e leng Faro gore o ne a utswilwe ke bomorwarraagwe. Tota e bile, fa bomorwarraagwe ba tla mo Egepeto mme ba kopana le Josefa gape, Faro o ne a ba amogela mme a ba bolelela gore ba nne mo Egepeto le go itumelela “molemo wa lefatshe lotlhe.”—Gen. 45:16-20.

14. Ke eng se se tla re thusang gore re se ka ra senya ba bangwe maina fa re diretswe tshiamololo mo phuthegong?

¹⁴ Fa Mokeresete a akanya gore o diretswe tshiamololo, o tshwanetse go nna kelotlhoko gore a se ka a senya ba bangwe maina. Gone go tla bo go siame go kopa thuso mo bagolwaneng le go ba bolelela fa mongwe mo phuthegong a dirile boleo jo bo masisi. (Lefi. 5:1) Le fa go ntse jalo, mo maemong a mo go one go sa dirwang boleo bope jo bo masisi, Bakeresete ba ka kgona go rarabolola kgang ntle le go tsenya ba bangwe mo go yone, tota le e leng bagolwane. (Bala Mathaio 5:23, 24; 18:15.) Go ka nna molemo gore re rarabolole dikgang tse di ntseng jalo re dirisa kgakololo ya Baebele. Mo maemong mangwe, re ka nna ra lemoga morago gore tota re ne re sa direlwa tshiamololo. Fa seo se direga, re tla itumelela gore ga re a ka ra gakatsa boemo ka go senya Mokeresete yo mongwe leina. Gopola gore le fa re ka tswa re diretswe tshiamololo kgotsa jang, go senya ba bangwe maina go ka se thuse ka sepe. Go ikanyega mo go Jehofa le mo bakaulengweng ba rona, go tla re thusa gore re se ka ra dira phoso eno. Fa mopesalema a ne a bua ka motho “yo o tsamayang ka go tlhoka molato,” o ne a re: “Ga a a senya batho leina ka loleme lwa gagwe. Ga a a direla molekane wa gagwe sepe se se bosula, gape ga a a kgoba motho yo a tlwaelaneng thata le ene.”—Pes. 15:2, 3; Jak. 3:5.

15. Kamano e Josefa a neng a na le yone le Jehofa e ne ya mo thusa jang?

¹⁵ Re ithuta sengwe sa botlhokwa tota mo kamanong e Josefa a neng a na le yone le Jehofa. Josefa o ne a bontsha gore o leba dilo jaaka Jehofa a di leba mo dingwageng tsotlhe tse 13 tsa fa a ne a lebane le mathata. (Gen. 45:5-8) Le ka motlha ga a ka a pega Jehofa molato wa dilo tse di mo diragaletseng. Le fa gone a ne a sa lebala dilo tseno, ga a ka di letla gore di dire gore a tshware batho ba bangwe ka pelo. Sa botlhokwa le go feta, ga a ka a letla diphoso tsa ba bangwe le ditiro tsa bone tse di sa siamang gore di mo kgaoganye le Jehofa. Go ikanyega ga gagwe go ile ga dira gore a kgone go bona kafa Jehofa a ileng a baakanya dilo ka gone le go segofatsa ene le ba lelapa la gagwe.

16. Ke eng fa re tshwanetse go atamalana thata le Jehofa fa re diretswe tshiamololo mo phuthegong?

¹⁶ Ka tsela e e tshwanang, re tshwanetse go anaanela le go sireletsa kamano ya rona le Jehofa. Ga re a tshwanela go letla diphoso tsa Bakeresetemmogo le rona gore di re kgaoganye le Modimo yo re mo ratang le yo re mo obamelang. (Bar. 8:38, 39) Go na le moo, fa Mokeresete mongwe a sa re tshware sentle, re tshwanetse go etsa Josefa ka go atamalana thata le Jehofa le go leka go leba dilo jaaka a di leba. Fa re dirile sotlhe se re ka se kgonang go leka go baakanya dilo, re tshwanetse go tlogelela dilo tsotlhe mo go Jehofa re tlhomamisegile gore o tla di baakanya ka nako ya gagwe le ka tsela ya gagwe.

17. Re ka bontsha jang gore re ikanya “Moatlhodi wa lefatshe lotlhe”?

¹⁷ Fa fela re sa ntse re tshela mo tsamaisong eno ya dilo, re a itse gore batho bangwe ba ka se re tshware sentle. Go ka direga gore nako nngwe o akanye gore wena kgotsa mongwe yo o mo itseng o diretswe tshiamololo mo phuthegong. O se ka wa kgopisega. (Pes. 119:165) Go na le moo, e re ka re le batlhanka ba ba ikanyegang ba Modimo, re ikaega ka ene le go mo kopa gore a re thuse. Mo godimo ga moo, re amogela gore ga se ka metlha re itseng dintlha tsotlhe. Re a itse gore ka dinako dingwe bothata e ka tswa e le gore ga re tlhaloganye kgang sentle. Jaaka re ithutile mo sekaong sa ga Josefa, re tshwanetse go tila go senya ba bangwe maina ka gonne seo se ka dira gore dilo di nne maswe le go feta. Sa bofelo, go na le gore re ipagololele mogodu, a re ikemisetseng go nna re ikanyega le go leta Jehofa ka bopelotelele gore a baakanye dilo. Fa re dira jalo, Jehofa o tla re amogela le go re segofatsa fela jaaka a ile a dira ka Josefa. Eleruri re ka tlhomamisega gore ka metlha “Moatlhodi wa lefatshe lotlhe” e bong Jehofa o dira se se siameng, “gonne ditsela tsotlhe tsa gagwe di tshiamiso.”—Gen. 18:25; Dute. 32:4.

18. Re tla sekaseka eng mo setlhogong se se latelang?

¹⁸ Mo setlhogong se se latelang, re tla sekaseka dikao tse pedi tsa batho ba ga Jehofa ba bogologolo ba ba ileng ba se ka ba tshwarwa sentle. Dipego tseno di tla bontsha kafa go nna boingotlo le go iketleeletsa go itshwarela go ka re thusang ka gone gore re etse tsela e Jehofa a lebang tshiamiso ka teng.