Baebele—Buka ya Boporofeti jo bo Opang Kgomo Lonaka, Karolo 1

“Ke Tla Dira Setšhaba se Segolo ka Wena”

Mo motseletseleng ono wa ditlhogo di le robedi, “Tsogang!” e tla sekaseka karolo e e tlhomologileng ya Baebele—dipolelelopele tsa yone. Ditlhogo tseno di tla go thusa go araba dipotso tseno: A dipolelelopele tsa Baebele di itlhametswe fela ke batho ba ba botlhale? A di tlhotlheleditswe ke Modimo? Re go laletsa gore o sekaseke bosupi.

GO BELAELA le go se tlhomamisege—maikutlo ano a tlwaelegile mo motlheng wa rona mme ke one a batho bangwe ba nang le one ka Baebele. Mme ka maswabi, batho ba le bantsi ga ba ise ba ke ba iphe nako ya go tlhatlhoba Baebele ka kelotlhoko. Gantsi dilo tse ba di dumelang di theilwe mo go se batho ba bangwe ba se buang. Re solofela gore o tla rata go itshekatshekela dintlha ka bowena. Fa go le jalo, mma jaanong re boele morago mo hisitoring mme re sekaseke tshedimosetso e e tla re thusang go tlhomamisa gore Baebele e boammaaruri.

Re tla simolola ka monna yo le gompieno a sa ntseng a tlotliwa ke Bakeresete, Bajuda le Bamoseleme. E ne e le Mohebera yo o neng a tshela go tloga ka 2018 go ya go 1843 B.C.E.a Leina la gagwe ke Aborahame.b

Aborahame e ne e le motho yo go buiwang thata ka ene mo dipolelelopeleng dingwe tsa bogologolo tse di kwadilweng mo Baebeleng—dipolelelopele tse e bile di amang le rona gompieno. (Bona lebokose le le reng “Tshegofatso ya ‘Ditšhaba Tsotlhe.’”) Go ya ka buka ya Baebele ya Genesise, dipolelelopele tseno di akaretsa tse di latelang: (1) Bana ba ga Aborahame ba ne ba tla nna setšhaba se segolo. (2) Fa ba ntse ba nna setšhaba se segolo, ba ne ba tla nna makgoba kwa nageng e sele. (3) Ba ne ba tla gololwa mme ba gape naga ya Kanana. Jaanong a re sekasekeng dipolelelopele tseo ka botlalo.

Dipolelelopele Tse Tharo Tse di Tlhomologileng

Polelelopele 1: “Ke tla dira setšhaba se segolo ka wena [Aborahame].”—Genesise 12:2.

Tiragatso: Ditlogolwana tsa ga Aborahame tse di tlileng ka Isake le Jakobe (yo gape a bidiwang Iseraele) di ne tsa nna setšhaba sa bogologolo sa Iseraele—puso e e ikemetseng e e nang le dikgosi tsa yone.

Se hisitori e se senolang:

● Baebele e tlhalosa dintlha tsotlhe ka losika lwa ga Aborahame, go akaretsa ditlogolwana tse di tlileng ka Isake, Jakobe le barwa ba ba 12 ba ga Jakobe. Gape tatelano eno ya losika e akaretsa dikgosi tse dintsi tse di neng tsa busa Iseraele le Juda. Mo babusing bano, ba le 17 ba bone ba umakwa mo metsweding e mengwe ya tshedimosetso e e seng ya Baebele mme metswedi eo e dumalana le pego ya Baebele ya kafa ditlogolwana tsa ga Aborahame tse di tlileng ka Isake le Jakobe di neng tsa nna setšhaba ka teng.c

Polelelopele 2: “Losika lwa gago [Aborahame] lo tla nna moagi wa moeng mo lefatsheng le e seng la bone, mme ba tla tshwanelwa ke go ba direla . . . Mme mo kokomaneng ya bonè ba tla boela fano.”—Genesise 15:13, 16.

Tiragatso: Ka ntlha ya leuba kwa Kanana, dikokomana di le nnè tsa ditlogolwana tsa ga Aborahame di ne tsa nna kwa Egepeto, sa ntlha e le baagi ba baeng mme moragonyana e le makgoba a a neng a abetswe go dira ditena ka letsopa le lotlhaka. Fa go buiwa ka karolo e le nngwe fela ya losika loo—losika lwa setlogolwana sa ga Aborahame e bong Lefi, yo o neng a fudugela kwa Egepeto le rraagwe yo o tsofetseng—dikokomana tseno tse nnè ke (1) Lefi, (2) morwawe e bong Kohathe, (3) setlogolwana sa gagwe e bong Amerame le (4) setlogotlogolwana sa gagwe e bong Moshe. (Ekesodo 6:16, 18, 20) Ka ngwaga wa 1513 B.C.E., Moshe o ne a etelela Baiseraele pele go tswa mo Egepeto.—Bona lenaane la ditiragalo tsa botlhokwa le lebokoso le le reng “Go Boloka Rekoto e e Tlhomameng ya Nako.”

Se hisitori e se senolang:

● Go ya ka James K. Hoffmeier, porofesa ya Old Testament and Near Eastern Archaeology, mekwalo ya kwa Egepeto mmogo le bosupi jwa thutamarope ya koo bo bontsha gore Basemite (ba ba akaretsang Bahebera ba bogologolo) ba ne ba letlelelwa go tsena mo Egepeto le diruiwa tsa bone ka nako ya leuba. Mme a Baiseraele ba ile ba nna makgoba koo ba bo ba abelwa go dira ditena?

● Le fa dipego tsa kwa Egepeto di sa umake Baiseraele ka tlhamalalo, ditshwantsho tse di mo mabitleng le mekwalo ya kwa Egepeto e tlhomamisa gore Baegepeto ba ne ba dirisa batswakwa go dira ditena ka seretse le lotlhaka. Go dumalana le Baebele, dipego tsa kwa Egepeto gape di bontsha gore bagobagobetsi ba ne ba boloka rekoto ya palo ya ditena tse di tshwanetseng go dirwa. (Ekesodo 5:14, 19) Hoffmeier a re: “Metswedi ya tshedimosetso ya kwa Egepeto e tlhomamisa gore batswakwa ba ne ba patelediwa go nna makgoba . . . ka yone nako e Baiseraele ba neng ba gatelelwa ka yone. Fa re sobokanya, go tsena ga Bahebera ba bogologolo kwa Egepeto . . . ka nako ya leuba ba bo ba dirwa makgoba go lebega go diragetse.”

Polelelopele 3: “Ke tla naya . . . losika lwa gago . . . lefatshe lotlhe la Kanana.”—Genesise 17:8.

Tiragatso: Le fa Moshe a ne a etelela Baiseraele pele go tswa kwa Egepeto, Joshua morwa Nune o ne a etelela setšhaba seo pele go tsena mo nageng ya Kanana ka 1473 B.C.E.

Se hisitori e se senolang:

● Porofesa wa setso sa bogologolo sa Egepeto yo o tlogetseng tiro e bong K. A. Kitchen a re le fa baithutamarope ba ka tswa ba sa dumalane ka matlha, “kgangkgolo ke gore Baiseraele ba ile ba tsena mo Kanana ba bo ba thibelela koo.”

● Baebele ya re Joshua o ne “a fisa [motse wa Kanana wa] Hasore mo molelong.” (Joshua 11:10, 11) Mo matlotleng a motse oo, baithutamarope ba ne ba epolola mafelo a mo go one go neng go na le ditempele di le tharo tsa Kanana tse di neng di sentswe gotlhelele. Gape ba ne ba fitlhela bosupi jwa gore motse oo o ne wa fisiwa ka dingwaga tsa bo1400 B.C.E. Dintlha tseno di dumalana le Baebele.

● Motse o mongwe wa Kanana o re ka ratang go itse ka one ke wa Gibeone, o o sekgala sa dikilometara di le 9,6 go tswa kwa Jerusalema. Baithutamarope ba ne ba lemoga gore motse oo ke ofe fa ba ne ba bona mekgothi e ka nna 30 ya dinkgo e e neng e gabilwe leina la motse. Bagibeone ba bogologolo bone ga ba a ka ba tshwana le baagi ba Hasore, ka gonne bone ba ne ba dira kagiso le Joshua. Mme go tswa foo o ne a dira gore e nne “bagi ba metsi.” (Joshua 9:3-7, 23) Ke eng fa a ne a ba naya kabelo eno? Ditlhaloso tse di mo go 2 Samuele 2:13 le Jeremia 41:12 di bontsha gore naga ya Gibeone e ne e na le metsi a mantsi. Ka jalo, go dumalana le pego ya Baebele, buka ya Archaeological Study Bible, New International Version ya re: “Sengwe se se tlhomologileng thata ka naga ya Gibeone ke gore e na le metsi a mantsi: motswedi o mogolo o le mongwe le e mennye e le supa.”

● Metswedi e mengwe ya hisitori e naya bosupi jwa gore batho ba le bantsi ba ba umakwang mo Baebeleng ba kile ba nna teng. Jaaka fa go boletswe pelenyana, lenaane la batho bano le akaretsa maina a dikgosi di le 17 tse di mo losikeng lwa ga Aborahame tse di neng tsa busa Iseraele le Juda. Di akaretsa Ahabe, Ahase, Dafide, Hesekia, Manase le Usia. Go bonala sentle gore lebaka la go bo go ne go na le masika a segosi le naya bosupi jo bo ka se kang jwa belaelwa jwa gore setšhaba sengwe se se bidiwang Iseraele se ne sa tsena mo lefatsheng la Kanana sa bo sa nna mo go lone.

● Ka 1896, babatlisisi ba ne ba bona Leje le le Gabilweng la ga Merneptah kwa Thebes, Egepeto. Leje leno le le gabilweng le tlhalosa letsholo la sesole la ga Faro Merneptah ka boikgantsho fa a ne a tsena mo Kanana mo e ka nnang ka 1210 B.C.E. Leje leno ke lone la ntlha mo metsweding e e seng ya Baebele go umaka Iseraele mme le naya bosupi jo bongwe jwa gore setšhaba seno se kile sa nna teng.

Mosola wa Dintlha Tse di Tlhomameng

Jaaka re bone, Baebele e na le dintlha tse dintsintsi tse di tlhomameng ka batho, mafelo le ditiragalo. Dintlha tseno di re thusa go bapisa se se mo Baebeleng le metswedi e mengwe ya tshedimosetso e e seng ya Baebele, ka jalo di re thusa go tlhomamisa gore dipolelelopele tsa Baebele di diragaditswe. Malebana le Aborahame le losika lwa gagwe, bosupi bo re bontsha gore ditsholofetso tsa Modimo di ne tsa diragadiwa—losika lwa ga Aborahame ruri lo ne lwa nna setšhaba, lo ne lwa dirwa makgoba kwa Egepeto mme moragonyana lwa nna kwa nageng ya Kanana. Seno sotlhe se re gopotsa mafoko a mokwadi wa Baebele e bong Petere, yo o neng a dumela jaana ka boikokobetso: “Ga go ka nako epe boporofeti bo neng jwa tlisiwa ka thato ya motho, mme batho ba ne ba bua se se tswang kwa Modimong e re ka ba ne ba tlhotlhelediwa ke moya o o boitshepo.”—2 Petere 1:21.

Fa go sena go feta makgolo a dingwaga Baiseraele ba sena go tsena kwa Kanana, ditiragalo tsa setšhaba seno di ne tsa tsaya phekelo e sele mme ga nna le ditlamorago tse di botlhoko. Ditlamorago tseno le tsone di ne di boleletswe pele ke bakwadi ba Baebele, jaaka setlhogo se se mo makasineng o o latelang se tla bontsha.

[Dintlha tse di kwa tlase]

[Lebokoso mo go tsebe 17]

TSHEGOFATSO YA “DITŠHABA TSOTLHE”

Modimo o ne a solofetsa gore batho ba “ditšhaba tsotlhe” ba ne ba tla itshegofatsa ka losika lwa ga Aborahame. (Genesise 22:18) Lebaka la konokono la go bo Modimo a ile a dira gore losika lwa ga Aborahame e nne setšhaba ke gore Mesia a nne teng, ene yo o neng a tla ntsha botshelo jwa gagwe mo boemong jwa ditšhaba tsotlhe.d Ka jalo, tsholofetso e Modimo a neng a e naya Aborahame e a go ama! Johane 3:16 ya re: “Modimo o ratile lefatshe mo go kalo mo a bileng a ntsha Morwawe yo o tsetsweng a le esi, gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.”

[Ntlha e e kwa tlase]

[Lebokoso mo go tsebe 17]

GO BOLOKA REKOTO E E TLHOMAMENG YA NAKO

Sekai sa kafa go leng botlhokwa ka teng go bo Baebele e ne ya boloka rekoto e e tlhomameng ya nako se bontshiwa ke 1 Dikgosi 6:1, e e bontshang nako e ka yone Kgosi Solomone a neng a simolola go aga tempele kwa Jerusalema. Re bala jaana: “Ga diragala gore ka ngwaga wa bomakgolo a manè le masome a le robedi [dingwaga tse di tletseng di le 479] fa bomorwa Iseraele ba sena go tswa mo lefatsheng la Egepeto, mo ngwageng wa bonè [wa puso ya ga Solomone], mo kgweding ya Sife, ke gore, kgwedi ya bobedi, fa Solomone a sena go nna kgosi mo Iseraele, a agela Jehofa ntlo.”

Tatelano ya ditiragalo tsa Baebele e bontsha gore ngwaga wa bonè wa puso ya ga Solomone e ne e le 1034 B.C.E. Fa re bala go ya kwa morago dingwaga di le 479 tse di tletseng go tswa mo letlheng leno re fitlha go 1513 B.C.E., ngwaga wa Khudugo ya Baiseraele.

[Lebokoso mo go tsebe 18]

ABORAHAME—MOTHO YO O KILENG A NNA TENG

● Matlapanakwalelo a letsopa a a kwadilweng mo masimologong a sekete sa bobedi sa dingwaga B.C.E. a na le lenaane la metse e e tshwanang le maina a ba losika lwa ga Aborahame. Metse eno e akaretsa Pelege, Seruge, Nahore, Tera le Harana.—Genesise 11:17-32.

● Mo go Genesise 11:31, re bala gore Aborahame le lelapa la gagwe ba ne ba fuduga go tswa kwa “Ure wa Bakaladia.” Marope a motse ono a ne a ribololwa kwa borwabotlhaba jwa Iraq. Gape Baebele ya re rraagwe Aborahame e bong Tera o ne a swela kwa motseng wa Harana, o gone jaanong o ka tswang o le kwa Turkey, e bile ya re mosadi wa ga Aborahame e bong Sara o ne a swela kwa Heberone, mongwe wa metse ya bogologolo e le jaanong e sa ntseng e nniwa kwa Botlhabagare.—Genesise 11:32; 23:2.

[[Tšhate/Setshwantsho mo go tsebe 16, 17]

(Go bona mokwalo o o feletseng, leba kgatiso)

TATELANO YA DITIRAGALO TSE DI BOTLHOKWA TSA LOSIKA LWA GA ABORAHAMELE KHUDUGO YA BAISERAELE

Dikokomana di le nnè tsa ditlogolwana tsa ga Aborahame

Lefi

Kohathe

Amerame

Moshe

(B.C.E.)

1843 Aborahame o a swa

1728 Jakobe o fudugela kwa Egepeto le lelapa la gagwe

1711 Jakobe o a swa

1657 Josefa o a swa

1593 Moshe o a tsholwa

1513 Moshe o etelela Baiseraele pele go tswa mo Egepeto

1473 Moshe o a swa. Joshua o etelela Baiseraele pele go tsena mo nageng ya Kanana

Motlha wa Baatlhodi

1117 Samuele o tlotsa Saulo go nna kgosi ya ntlha ya Iseraele

1107 Dafide o a tsholwa

1070 Dafide o nna kgosi ya Iseraele

1034 Solomone o simolola go aga tempele

[Setshwantsho mo go tsebe 17]

Leje leno la segopodiso sa phenyo le le gabilweng mafoko a a reng “Ntlo ya ga Dafide,” ke mongwe wa metswedi e le mentsi ya tshedimosetso e e umakang dikgosi tse e neng e le ditlogolwana tsa ga Aborahame tse di neng tsa busa kwa Iseraele kgotsa kwa Juda

[Motswedi wa Setshwantsho]

© Israel Museum, Jerusalem/The Bridgeman Art Library International