“Ope Fela yo o Tlhokomelang Kgalemelo o Botlhale”

DIANE 23:12 ya re: “Tlisa pelo ya gago mo kotlhaong le tsebe ya gago kwa mafokong a kitso.” Mo temaneng eno lefoko “kotlhao,” kana go rutwa boitsholo, le akaretsa go ikgalemela kana go kgalengwa ke ba bangwe. Kotlhao e e ntseng jalo e tlhoka gore motho yo o e nayang a bo a itse gore go tlhokega kgakololo efe le gore e ka newa jang. Ka gone, ‘mafoko a kitso’ a a tswang mo motsweding o o ikanyegang a botlhokwa fa go newa kotlhao.

Buka ya Baebele ya Diane ke motswedi o o molemo wa mafoko a a botlhale. Diane tse di begilweng mo go yone di thusa “gore motho a itse botlhale le kotlhao, . . . a amogele kotlhao e e nayang temogo, tshiamo le katlholo le thokgamo.” (Diane 1:1-3) Re tla bo re le botlhale fa re ‘tlisa tsebe ya rona’ mo go tsone. Diane kgaolo 15 e re naya kaelo e e utlwalang e e malebana le go laola bogale, go dirisa loleme le go naya ba bangwe kitso. A re sekasekeng dingwe tsa ditemana tse di tswang mo kgaolong eno.

Ke Eng se se ‘Faposang Bogale’?

Fa Kgosi Solomone wa Iseraele wa bogologolo a tlhalosa kafa mafoko a a buiwang a amanang le bogale ka gone a re: “Karabo fa e le bonolo e faposa bogale, mme lefoko le le utlwisang botlhoko le tsosa bogale.” (Diane 15:1) “Bogale” ke lereo le le dirisiwang go tlhalosa boikutlo jo bo maatla kana tsela e motho a itshwarang ka yone fa a tenegile. Seane seno se ka re thusa jang go lebana le bogale jwa motho yo mongwe mmogo le go laola bogale jwa rona?

Mafoko a a bogale a a utlwisang botlhoko a ka gakatsa boemo jo bo neng bo ntse bo le maswe. Kafa letlhakoreng le lengwe, gantsi karabo e e bonolo e ritibatsa maikutlo. Le fa go ntse jalo, ga go motlhofo go araba motho yo o galefileng ka tsela e e bonolo. Mme gone go a thusa go leka go tlhaloganya gore ke eng se se mo galefisitseng. Baebele ya re: “Temogo ya motho ruri e fokotsa bogale jwa gagwe, mme ke bontle mo go ene go tlhokomologa tlolo.” (Diane 19:11) A gongwe motho yono a ka tswa a galefile gonne a sa itshepe kana o batla fela go tsewa tsia? Lebaka la mmatota la go bo motho a galefile le ka tswa le sa amane ka gope le se re ka tswang re se buile kana re se dirile. A ga se boammaaruri gore fa re kopana le motho yo o galefileng mo bodireding jwa Bokeresete, gantsi e a bo e le ka gonne motho yoo a boleletswe maaka ka ditumelo tsa rona kana a na le mogopolo mongwe o o phoso ka rona? A re tshwanetse go galefa re bo re araba ka bogale e kete mong wa ntlo o ne a tlhasela rona ka namana? Le fa gone re sa bone lebaka la go bo motho a galefile, go mo araba ka mafoko a a utlwisang botlhoko go ka bontsha gore rona ka borona re palelwa ke go ikgalemela. Re tshwanetse go tila go araba ka tsela e e ntseng jalo.

Kgakololo ya gore re arabe ka karabo e e bonolo e botlhokwa thata le fa re batla go laola bogale jwa rona. Re ka dirisa kgakololo eo ka go ithuta go ntsha maikutlo a rona ka ditsela tse di ka se keng tsa kgopisa motho yo o re reeditseng. Fa re dirisana le ba lelapa, go na le go bua ka tsela e e bogale kana go ba bitsa ka maina a a bontshang lonyatso, re ka leka go tlhagisa maikutlo a rona re ritibetse. Gantsi go tlhasela motho ka mafoko go mo tlhotlheletsa gore a batle go ipusolosetsa. Fa re bolelela motho maikutlo a rona ka tsela e e bonolo, motho yoo o kgona go bona gore ga re mo latofatse mme seo se ka mo tlhotlheletsa gore a ikope maitshwarelo.

“Loleme Lwa ba ba Botlhale lo Dira Molemo”

Go kgona go ikgalemela go ama tsela e re buang ka yone le se re se buang. Solomone a re: “Loleme lwa ba ba botlhale lo dira molemo ka kitso, mme mo molomong wa dimatla go tswa boeleele.” (Diane 15:2) A ga re ‘dire molemo ka kitso’ fa re godisa keletso ya go thusa ba bangwe mme re bua le bone ka maikaelelo a Modimo le dilo tse di molemo tse a re nayang tsone? Seeleele ga se kgone go dira jalo ka gonne ga se na kitso.

Pele Solomone a ntsha kaelo e e oketsegileng malebana le go dirisa loleme, o bua ka pharologanyo nngwe e e dirang gore motho a akanye. “Matlho a ga Jehofa a mo lefelong lengwe le lengwe, a nna a lebeletse ba ba bosula le ba ba molemo.” (Diane 15:3) Re ka itumelela seno gonne re tlhomamisediwa jaana: “Fa e le Jehofa ene, matlho a gagwe a ya kwa le kwa mo lefatsheng lotlhe gore a bontshe ba pelo ya bone e feletseng mo go ene nonofo ya gagwe.” (2 Ditiragalo 16:9) Jehofa o a itse fa re dira molemo. Gape o bona ba ba dirang bosula e bile o dira gore ba ikarabelele ka ditiro tseo tsa bone.

Solomone o gatelela gape botlhokwa jwa loleme lo lo bonolo fa a re: “Go ritibala ga loleme ke setlhare sa botshelo, mme tshokamo ya lone e raya go utlwa botlhoko mo moyeng.” (Diane 15:4) Mafoko a a reng “setlhare sa botshelo” a ka tswa a raya gore loleme lo kgona go fodisa le go kgothatsa. (Tshenolo 22:2) Puo e e ritibetseng ya motho yo o botlhale e lapolosa moya wa batho ba ba mo reeditseng. E dira gore ba bontshe dinonofo tsa bone tse di molemo. Go farologana le moo, loleme lo lo tletseng tsietso lo lapisa moya wa batho ba ba lo reeditseng.

Go Otlhaiwa le go “Gasamisa Kitso”

Kgosi e e botlhale e tswelela ka go re: “Ope fela yo o seeleele ga a tlotle kotlhao ya ga rraagwe, mme ope fela yo o tlhokomelang kgalemelo o botlhale.” (Diane 15:5) Ga go kafa motho a ka “tlhokomelang kgalemelo” fa a sa e neelwe. A temana eno ga e bontshe gore kgalemo e tshwanetse go neelwa fa e tlhokega? Mo lelapeng, ke boikarabelo jwa batsadi—segolobogolo rre—go ntsha kgalemo, mme bana ba tshwanetse go e amogela. (Baefeso 6:1-3) Le fa go ntse jalo, batlhanka botlhe ba ga Jehofa ba amogela kgalemo ka tsela nngwe. Bahebera 12:6 ya re: “Yo Jehofa a mo ratang o a mo otlhaya; tota e bile, o kgwathisa mongwe le mongwe yo a mo amogelang jaaka morwa.” Tsela e re itshwarang ka yone fa re kgalemiwa e senola gore a re botlhale kana re dimatla.

Fa a bua ka pharologanyo e nngwe gape, Solomone a re: “Dipounama tsa ba ba botlhale di nna di gasamisa kitso, mme pelo ya dimatla ga e a nna jalo.” (Diane 15:7) Go abela ba bangwe kitso go tshwana le go gasamisa peo. Mo motlheng wa bogologolo, molemi o ne a sa jale peo ya gagwe yotlhe mo lefelong le le lengwe. Go na le moo, o ne a gasamisa dipeo di se kae mo tshimong yotlhe. Go ntse fela jalo le ka go abela ba bangwe kitso. Ka sekai, fa re kopana le mongwe mo bodireding, go ka se ka ga nna botlhale gore re mmolelele dilo tsotlhe tse re di itseng tse di leng mo Baebeleng ka nako e le nngwe. Go na le moo, motho yo o botlhale o ela tlhoko tsela e a buang ka yone. O “gasamisa” kitso fa a ntse a tlotla ka ntlha e le nngwe ka nako ya boammaaruri jwa Baebele a bo a remelela mo go yone a ntse a etse tlhoko tsela e moreetsi wa gagwe a tsibogelang se a se buang ka yone. Motlhomasekao wa rona Jesu Keresete, o ne a dira seno fa a ne a bua le mosadi wa Mosamarea.—Johane 4:7-26.

Go abela ba bangwe kitso go akaretsa go bua sengwe se se rutang e bile se le mosola. Motho o tshwanetse gore a ipaakanye gore a bue mafoko a a solegelang ba bangwe molemo e bile a kgothatsa. Ke gone ka moo, ‘pelo ya mosiami e tlhatlhanyang gore e tle e arabe.’ (Diane 15:28) Ruri go botlhokwa gore mafoko a re a buang a tshwane le pula e e bonolo e e kolobetsang mmu e bile e le mosola, a se ka a tshwana le morwalela o o sa batlegeng o o gogolang sengwe le sengwe se se mo tseleng ya one.

Go ‘Nna Boitshepo mo Boitshwarong’

Ga go pelaelo gore re tla bo re dira ka botlhale fa re gasamisa kitso ka Jehofa le maikaelelo a gagwe le go mo naya “leungo la dipounama” e le ‘setlhabelo sa pako.’ (Bahebera 13:15) Le fa go ntse jalo, gore setlhabelo se se ntseng jalo se amogelege mo go Jehofa, re tshwanetse go ‘nna boitshepo mo boitshwarong jotlhe jwa rona.’ (1 Petere 1:14-16) Solomone o re bontsha boammaaruri jono jo bo botlhokwa a dirisa diane tse pedi tse di sa tshwaneng. A re: “Setlhabelo sa baikepi ke selo se se makgapha mo go Jehofa, mme thapelo ya ba ba thokgameng e a mo ipedisa. Tsela ya moikepi ke selo se se makgapha mo go Jehofa, mme o rata yo o latelelang tshiamo.”—Diane 15:8, 9.

Batho ba ba tlogelang tsela e e isang botshelong ba leba kgalemo jang, mme matswela a seo ke afe? (Mathaio 7:13, 14) “Kotlhao e bosula mo go yo o tlogelang tselana; ope fela yo o tlhoileng kgalemelo o tla swa.” (Diane 15:10) Go na le go amogela kgalemelo mo go ba ba nang le maikarabelo mo phuthegong ya Bokeresete mme motho a ikwatlhaye go tswa pelong, bangwe ba ba latelang tsela e e phoso ba tlhopha go tlogela tsela ya tshiamo. Ruri seo ke boeleele!

Go tweng fa mongwe a itira e kete o amogela kgalemo fa tota a e tlhoile? Seno le sone ke boeleele. Kgosi ya Iseraele ya re: “Sheole le lefelo la tshenyego di fa pele ga ga Jehofa. A bo go ntse jalo segolo jang ne ka dipelo tsa bana ba batho!” (Diane 15:11) Ga go sepe se ka tsela ya tshwantshetso se ka nnang kgakala thata le Modimo yo o tshelang go feta Sheole, e leng lefelo la baswi. Le fa go ntse jalo, e fa pele ga gagwe. O itse batho botlhe ba ba leng koo le botho jwa bone mme o kgona go ba tsosa. (Pesalema 139:8; Johane 5:28, 29) Ka jalo a bo go le motlhofo jang gore Jehofa a itse se se leng mo dipelong tsa batho! Moaposetoloi Paulo o ne a kwala jaana: “Dilo tsotlhe di senogile e bile di mo pontsheng fela mo matlhong a gagwe yo re ikarabelelang mo go ene.” (Bahebera 4:13) Go itshema se re seng sone go ka tsietsa batho e seng Modimo.

Motho yo o ganang kgalemo, ga a tlhoa fela kgalemo, o tlhoile le batho ba ba mo nayang yone. Solomone a re: “Mosotli ga a rate yo o mo kgalemelang.” Go gatelela ntlha eno, o umaka kgopolo e nngwe gape e e tshwanang le eno: “Ga a na go ya kwa go ba ba botlhale.” (Diane 15:12) Ruri go na le tsholofelo e nnye fela ya gore motho yo o ntseng jalo o tla tlhamalatsa tsela ya gagwe.

Go Leba Dilo ka Tsela e e Tshwanetseng

Diane tse tharo tse di latelang tsa ga Solomone di tshwana ka gore tsotlhe di umaka lefoko “pelo.” Fa a tlhalosa tsela e maikutlo a rona a amang sefatlhego sa rona ka gone, kgosi e e botlhale ya re: “Pelo e e ipelang e na le phelelo e e molemo mo sefatlhegong, mme go na le moya o o hutsafetseng ka ntlha ya pelo e e botlhoko.”—Diane 15:13.

Ke eng se se ka utlwisang pelo botlhoko? Baebele ya re: “Go tshwenyega ka tlhobaelo mo pelong ya motho ke gone go tla e obang [ka bohutsana].” (Diane 12:25) Re ka dira jang gore maemo a a sa itumediseng mo botshelong a se ka a re ngomola pelo? Go na le gore ka metlha re tlhome mogopolo mo maemong a gongwe re sa kgoneng go a fetola, re ka akanya ka ditshegofatso tse dintsi tsa semoya tse Jehofa a re neileng tsone gone jaanong le ka se a tlileng go re direla sone mo isagweng. Seno se tla re atamalanya le ene. Ee, ga go pelaelo gore go atamela “Modimo yo o itumetseng” go tla itumedisa pelo ya rona e e hutsafetseng.—1 Timotheo 1:11.

Mo godimo ga moo, molaetsa o o mo Baebeleng ke motswedi o mogolo wa kgomotso le boitumelo. Mopesalema o ne a bolela gore go itumela motho yo o ‘natefelelwang ke molao wa ga Jehofa, o balela molao wa gagwe kwa tlase motshegare le bosigo.’ (Pesalema 1:1, 2) Tota le fa re utlwile botlhoko mo pelong, go bala Baebele le go tlhatlhanya ka se e se buang go tla re kgothatsa. Gape re na le bodiredi jo Modimo a re neileng jone. Re tlhomamisediwa gore “ba ba jalang peo ka dikeledi ba tla roba ba goa ka boipelo.”—Pesalema 126:5.

Solomone a re: “Pelo e e tlhaloganyang ke e e batlang kitso, mme molomo wa batho ba ba dimatla ke o o eletsang boeleele.” (Diane 15:14) Seane seno se re lemosa pharologano e kgolo e e leng gone fa gare ga kgakololo ya motho yo o botlhale le ya seeleele. Motho wa pelo e e tlhaloganyang o batla kitso pele a ka naya mongwe kgakololo. O reetsa ka kelotlhoko gore a bone dintlha tsotlhe tse di botlhokwa. O sekaseka Dikwalo go tlhomamisa gore melao le melaometheo e e amanang le boemo joo ya reng. Kgakololo ya gagwe e theilwe mo Lefokong la Modimo ka mo go feletseng. Le fa go ntse jalo, motho yo e leng seeleele ene ga a itshwenye ka go batlisisa dintlha tse di amanang le boemo jo a lebaneng le jone, o phamoga fela a bo a bua se se tlang pele mo mogopolong wa gagwe. Ka jalo fa re batla kgakololo, re tla bo re le botlhale fa re ya kwa bathong ba ba nang le kitso, ba ba godileng go na le go ya kwa go ba ba tla re bolelelang se re batlang go se utlwa. Eleruri go a itumedisa go bo re na le “dimpho tse e leng banna” mo phuthegong ya Bokeresete ba ba “batlang kitso” pele ba re naya kgakololo!—Baefeso 4:8.

Seane se se latelang se tlhalosa matswela a a molemo a go leba dilo ka tsela e e tshwanetseng. Kgosi ya Iseraele ya re: “Malatsi otlhe a yo o bogisiwang a bosula; mme yo o nang le pelo e e thamileng o nna le modiro ka metlha.” (Diane 15:15) Mo botshelong go na le dinako tsa masego le tsa masetlapelo, tsa boitumelo le tsa go lela. Fa re tlhoma mogopolo mo go tse di botlhoko fela, re tla nna re akantse fela ka bohutsana jwa rona mme re tla aparelwa ke bohutsana mo malatsing otlhe a botshelo jwa rona. Le fa go ntse jalo, fa re letla gore masego a re nang le one le tsholofelo e Modimo a re neileng yone e nne tsone dilo tse re nnang re akantse ka tsone, dilo tse di re ngomolang pelo mo botshelong di tla lebega di le dinnye mme re tla itumela. Go leba dilo ka tsela e e tshwanetseng go dira gore re kgone go itumelela “modiro ka metlha.”

Ka jalo a re direng bojotlhe go bontsha gore re tlotla kgalemo. A re direng gore e se ka ya ama fela maikutlo a rona, tsela e re buang ka yone le e re itshwarang ka yone mme e ame gape le tsela e re lebang dilo ka yone.

[Setshwantsho mo go tsebe 13]

“Karabo fa e le bonolo e faposa bogale”

[Setshwantsho mo go tsebe 15]

Batsadi ke bone ba nang le maikarabelo a go kgalema bana ba bone

[Setshwantsho mo go tsebe 15]

“Dipounama tsa ba ba botlhale di nna di gasamisa kitso”