Kgaolo ya Borataro

Jehofa—“Modimo yo o Siameng le Mmoloki”

Isaia 45:1-25

1, 2. Ke dikgothatso dife tse di newang mo go Isaia kgaolo 45, mme re tla tlhatlhoba dipotso dife?

DITSHOLOFETSO tsa ga Jehofa di a ikanyega. Ke Modimo wa tshenolo le Modimo wa popo. Gangwe le gape o ile a itshupa e le Modimo yo o siameng le Mmoloki wa batho ba ditšhaba tsotlhe. Tseno ke dingwe tsa dikgothatso tse di fitlhelwang mo go Isaia kgaolo 45.

² Mo godimo ga moo, Isaia kgaolo 45 e na le sekai se se gakgamatsang sa kafa Jehofa a kgonang go porofeta ka teng. Moya wa Modimo o dira gore Isaia a kgone go leba kwa dinageng tse di kgakala a bo a bone dilo tse di tla diragalang mo makgolokgolong a dingwaga a a tlang, mme o dira gore a kgone go tlhalosa tiragalo e Jehofa, Modimo wa boporofeti jwa boammaaruri, e leng ene fela a neng a ka e bolelela pele ka go e nepa. Tiragalo eo ke efe? E ama batho ba Modimo jang mo motlheng wa ga Isaia? E botlhokwa jang mo go rona gompieno? A re tlhatlhobeng mafoko a moporofeti yono.

Polelo ya ga Jehofa Kgatlhanong le Babelona

3. Isaia 45:1-3a e tlhalosa phenyo ya ga Kurose ka mafoko afe a a utlwalang sentle?

³ “Jehofa o reile motlodiwa wa gagwe jaana, e leng Kurose, yo ke tshwereng seatla sa gagwe sa moja, gore ke fenye ditšhaba fa pele ga gagwe, gore ke tlamolole dinōka tsa dikgosi; ke mmulele dikgoro tse di mefama mebedi, gore le dikgoro di se ka tsa tswalega: ‘Ke tla tsamaya kwa pele ga gago, mme ke tla papana ditotoma tsa naga. Dikgoro tsa kgotlho ke tla di thubaganya, le mephakalego ya tshipi ke tla e kgaola. Mme ke tla go naya matlotlo mo lefifing le matlotlo a a fitlhilweng mo mafelong a go iphitlha.’”—Isaia 45:1-3a.

4. (a) Ke ka ntlha yang fa Jehofa a bitsa Kurose “motlodiwa” wa gagwe? (b) Jehofa o tla tlhomamisa jang gore Kurose o a fenya?

⁴ Jehofa o dirisa Isaia go bua le Kurose jaaka e kete o a tshela, le fa tota Kurose a ise a tsholwe mo motlheng wa ga Isaia. (Baroma 4:17) E re ka Jehofa a tlhoma Kurose go sa le pele gore a dire tiro e e rileng, go ka twe Kurose ke “motlodiwa” wa Modimo. O tla fenya ditšhaba a eteletswe pele ke Modimo, a dira gore dikgosi di nne bokoa mme di se ka tsa kgona go iphemela. Mme fa Kurose a tlhasela Babelona, Jehofa o tla tlhomamisa gore dikgoro tsa motse di tlogelwa di butswe, mo e leng gore di tla bo di se na mosola fela jaaka dikgoro tse di thubagantsweng. O tla etelela Kurose pele, a tlosa dikgoreletsi tsotlhe. Kwa bofelong, masole a ga Kurose a tla fenya motse a bo a thopa “matlotlo [a one] a a fitlhilweng,” khumo ya one e e beilweng mo mabolokelong a a lefifi a a kafa tlase ga lefatshe. Seno ke sone se Isaia a se bolelelang pele. A mme mafoko a gagwe a a diragala?

5, 6. Boporofeti jwa go wa ga Babelona bo diragala leng le gone jang?

⁵ Ka ngwaga wa 539 B.C.E.—dingwaga di ka nna 200 Isaia a sena go kwala boporofeti jono—Kurose ka mmannete o goroga kwa dipoteng tsa Babelona a bo a tlhasela motse. (Jeremia 51:11, 12) Le fa go ntse jalo, Bababelona ga ba tshwenyege. Ba akanya gore motse wa bone o ka se fenngwe. Dipota tsa one tse di telele di okame mesele e e boteng e e tletseng ka metsi a a tswang kwa Nokeng ya Euferatese, e e leng karolo ya thulaganyo ya motse ono ya itshireletso. Go setse go fetile dingwaga di feta lekgolo go se na mmaba ope yo o ileng a kgona go tlhasela Babelona! E bile tota, mmusi wa Babelona wa nama o tshwere e bong Beleshasare, o ikutlwa a sireletsegile mo e leng gore o dira mokete le maloko a ntlo ya gagwe ya segosi. (Daniele 5:1) Mo bosigong joo—bosigo jwa October 5/6—Kurose o wetsa leano le le botlhale la sesole.

⁶ Kgakalanyana le Babelona, baenjenere ba ga Kurose ba epile losi lwa Noka ya Euferatese, ka go rialo ba faposa metsi a yone gore a se ka a tlhola a elela kwa borwa, kwa ntlheng ya motse. Go ise go ye kae, metsi a a mo nokeng mo Babelona le go mo dikologa a fokotsega mo e leng gore masole a ga Kurose a kgona go gobua mo nokeng a ya kwa gare ga motse. (Isaia 44:27; Jeremia 50:38) Selo se se gakgamatsang ke gore, fela jaaka Isaia a boleletse pele, dikgoro tse di kafa nokeng ga di a tswalwa. Masole a ga Kurose a thelegela mo Babelona, a tsaya ntlo ya segosi a bo a bolaya Kgosi Beleshasare. (Daniele 5:30) Phenyo e dirwa mo bosigong bo le bongwe fela. Babelona o ole, mme boporofeti bo diragaditswe fela jaaka bo ne bo boletswe.

7. Bakeresete ba nonotshiwa jang ke tiragatso e e gakgamatsang ya boporofeti jwa ga Isaia malebana le Kurose?

⁷ Go diragadiwa ka tlhomamo ga boporofeti jono go nonotsha tumelo ya Bakeresete gompieno. Go ba naya lebaka le le utlwalang la go dumela gore dipolelelopele tsa Baebele tse di iseng di diragadiwe ga jaanong le tsone di ka ikanngwa ka botlalo. (2 Petere 1:20, 21) Baobamedi ba ga Jehofa gompieno ba itse gore tiragalo e e neng e tshwantshediwa ke go wa ga Babelona ka 539 B.C.E.—e leng go wa ga “Babelona o Mogolo”—e setse e diragetse morago kwa ka 1919. Mme ba sa ntse ba lebile pele kwa nakong ya fa mokgatlho oo wa bodumedi wa motlha wa gompieno o tla bo o senngwa le fa tsamaiso ya bopolotiki e e laolwang ke Satane e tla bo e tlosiwa jaaka go solofeditswe, fa Satane a tswalelwa mo moleteng le fa go tla magodimo a masha le lefatshe le lesha. (Tshenolo 18:2, 21; 19:19-21; 20:1-3, 12, 13; 21:1-4) Ba itse gore dipolelelopele tsa ga Jehofa ga se ditsholofetso tse di sa kakeng tsa diragadiwa, mme ke ditlhaloso tsa ditiragalo tsa mmatota tse di tla diragalang mo isagweng. Tsholofelo ya Bakeresete ba boammaaruri e a nonofa fa ba gakologelwa gore dintlha tsotlhe tsa boporofeti jwa ga Isaia malebana le go wa ga Babelona di ile tsa diragala. Ba a itse gore ka metlha Jehofa o diragatsa lefoko la gagwe.

Lebaka La go Bo Jehofa a Tla Tlhopha Kurose

8. Lebaka lengwe la go bo Jehofa a thusa Kurose gore a fenye Babelona ke lefe?

⁸ Fa Jehofa a sena go bolela gore ke mang yo o tla fenyang Babelona le gore seno se tla dirwa jang, o tlhalosa lebaka le le lengwe fela la go bo Kurose a tla thusiwa go fenya. Jehofa o bua le Kurose mo boporofeting a re ke “gore o tle o itse gore ke nna Jehofa, Yo ke go bitsang ka leina la gago, Modimo wa Iseraele.” (Isaia 45:3b) Go a tshwanela gore mmusi wa mmuso wa bonè wa lefatshe mo hisitoring ya Baebele a lemoge gore phenyo ya gagwe e kgolo e tla ka ntlha ya go tshegediwa ke mongwe yo mogolo go mo feta—Jehofa, Molaodi wa Lobopo. Kurose o tshwanetse a dumela gore o biditswe, kana o romilwe ke Jehofa, Modimo wa Iseraele. Pego ya Baebele e bontsha gore eleruri Kurose o ne a dumela gore phenyo ya gagwe e kgolo e ne e tswa kwa go Jehofa.—Esera 1:2, 3.

9. Lebaka la bobedi la go bo Jehofa a dira gore Kurose a fenye Babelona ke lefe?

⁹ Jehofa o tlhalosa lebaka la bobedi la go bo a dira gore Kurose a tle go fenya Babelona: “Ka ntlha ya motlhanka wa me Jakobe le Iseraele yo ke mo tlhophileng, ke ne ka ba ka go bitsa ka leina la gago; ke ne ka go naya leina la tlotlo, le fa o ne o sa nkitse.” (Isaia 45:4) Go fenya Babelona ga ga Kurose go tshikinya lefatshe. Go supa gore mmuso mongwe wa lefatshe o a wa mme o mongwe ke one o simololang go busa, mme go tla nna go gakologelwa mo hisitoring ke dikokomana tse dintsi tse di tla tlang. Le fa go ntse jalo, batho ba ditšhaba tse di gaufi, ba ba lebeletseng ditiragalo ka tlhoafalo ba tshwanetse ba bo ba ka gakgamadiwa ke go itse gore sotlhe seno se diragala gore go solegelwe molemo batshwarwa ba le dikete di se kae “ba e seng ba sepe” ba ba kwa Babelona—Bajuda, ditlogolwana tsa ga Jakobe. Le fa go ntse jalo, mo matlhong a ga Jehofa, bafalodi bano ba setšhaba sa bogologolo sa Iseraele ba botlhokwa tota. Ke “motlhanka” wa gagwe. Mo gare ga ditšhaba tsotlhe tsa lefatshe, bone ke ‘motlhophiwa’ wa gagwe. Le fa Kurose a ne a sa itse Jehofa pele, Jehofa o mo dirisa jaaka motlodiwa wa Gagwe gore a dige motse o o ganang go golola batshwarwa ba one. Ga se boikaelelo jwa Modimo gore batho ba gagwe ba ba tlhophilweng ba sotlegele ruri kwa nageng e sele.

10. Ke lebaka lefe la botlhokwa go gaisa la go bo Jehofa a dirisa Kurose go fedisa Mmuso wa Lefatshe wa Babelona?

¹⁰ Go na le lebaka la boraro, le le botlhokwa le go gaisa la go bo Jehofa a dirisa Kurose go fenya Babelona. Jehofa a re: “Ke nna Jehofa, mme ga go na ope o sele. Kwantle ga me ga go na Modimo ope. Ke tla go gatlha thata, le fa o sa nkitse, gore batho ba tle ba itse go tswa kwa tlhabong ya letsatsi le go ya kwa phirimong ya lone gore ga go na ope kwantle ga me. Ke nna Jehofa, mme ga go na ope o sele.” (Isaia 45:5, 6) Ee, go wa ga Mmuso wa Lefatshe wa Babelona go bontsha gore Jehofa ke ene Modimo, bosupi jo bo bontshang mongwe le mongwe gore ke ene fela a tshwanelwang ke go obamelwa. Ka ntlha ya go gololwa ga batho ba Modimo, batho ba ba tswang mo ditšhabeng di le dintsi—go tswa botlhaba go ya bophirima—ba tla dumela gore Jehofa ke ene fela Modimo wa boammaaruri.—Malaki 1:11.

11. Jehofa o tshwantsha jang gore o na le maatla a go diragatsa boikaelelo jwa gagwe ka Babelona?

¹¹ Gakologelwa gore boporofeti jono jwa ga Isaia bo kwadilwe dingwaga di ka nna 200 pele bo diragala. Gongwe fa bangwe ba bo utlwa ba ile ba akanya jaana, ‘A ruri Jehofa o na le maatla a go bo diragatsa?’ Jaaka hisitori e bontsha, karabo ke ee. Jehofa o tlhalosa lebaka la go bo go utlwala go dumela gore a ka diragatsa se a se bolelang: “Yo ke bopang lesedi e bile ke dira lefifi, ke dira kagiso le go bopa masetlapelo, nna, Jehofa, ke dira dilo tseno tsotlhe.” (Isaia 45:7) Sengwe le sengwe mo popong—go tloga ka lesedi go fitlha ka lefifi—le sengwe le sengwe fela mo hisitoring—go akaretsa kagiso le masetlapelo—Jehofa o kgona go se laola. Fela jaaka a bopa lesedi la motshegare le lefifi la bosigo, o tla direla Iseraele kagiso mme a direle Babelona masetlapelo. Jehofa o na le maatla a go dira lobopo, gape o na le maatla a go diragatsa boporofeti jwa gagwe. Seno se kgothatsa Bakeresete gompieno, ba ba ithutang lefoko la gagwe la boporofeti ka tlhoafalo.

12. (a) Jehofa o dira gore magodimo le lefatshe la tshwantshetso di tlhagise eng? (b) Mafoko a Isaia 45:8 a tshwaretse Bakeresete gompieno tsholofetso efe e e kgothatsang?

¹² Go a tshwanela go bo Jehofa a dirisa dilo tse di diragalang ka metlha mo popong go tshwantsha dilo tse di tla diragalelang Bajuda ba ba ileng botshwarwa: “Lona magodimo, dirang gore go rothe go tswa kwa godimo; mme a loapi lo lo tletseng maru lo rothe tshiamo. A lefatshe le bulege, mme le ungwe poloko, mme le dire gore tshiamo e tlhage ka nako e e tshwanang. Nna Jehofa, ke go bopile.” (Isaia 45:8) Fela jaaka magodimo a mmatota a dira gore pula e e nayang botshelo e ne, Jehofa o tla dira gore tlhotlheletso e e siameng e tshologele mo bathong ba gagwe e tswa kwa magodimong a tshwantshetso. Mme fela jaaka lefatshe la mmatota le bulega gore le tlhagise thobo e kgolo, Jehofa o tla laela lefatshe la tshwantshetso gore le tlhagise ditiragalo tse di dumalanang le boikaelelo jwa gagwe jo bo siameng—bogolo segolo go bolokwa ga batho ba gagwe ba ba kwa botshwarwa kwa Babelona. Ka 1919, Jehofa o ne a dira gore ‘legodimo’ le “lefatshe” le tlhagise ditiragalo fela jalo gore a golole batho ba gagwe. Go bona dilo tse di ntseng jalo go dira gore Bakeresete gompieno ba itumele. Ka ntlha yang? Ka gonne ditiragalo tseo di nonotsha tumelo ya bone fa ba ntse ba lebile pele kwa nakong ya fa magodimo a tshwantshetso, Bogosi jwa Modimo, a tla bo a tlisetsa lefatshe la tshiamo masego. Ka nako eo tshiamo le poloko tse di tswang kwa magodimong le mo lefatsheng la tshwantshetso di tla bo di le dikgolo thata go feta fa Babelona wa bogologolo a ne a fenngwa. A bo eo e tla bo e le tiragatso e e molemo jang ne ya makgaolakgang ya mafoko a ga Isaia!—2 Petere 3:13; Tshenolo 21:1.

Masego a go Tlotla Bolaodi Jwa ga Jehofa

13. Ke ka ntlha yang fa e le boeleele gore batho ba ganetse maikaelelo a ga Jehofa?

¹³ Fa boporofeti jono bo sena go tlhalosa masego a a itumedisang a nako e e tlang, molaetsa wa jone o fetoga ka tshoganetso, mme Isaia o bolela ka tatlhego e e gabedi: “A bo go latlhega ene yo o neng a ganetsana le Mmopi wa gagwe, jaaka kapetla ya sejana sa letsopa e ganetsana le dikapetla tse dingwe tsa sejana sa letsopa sa mmu! A letsopa le ka raya mmopi wa lone la re: ‘O dira eng?’ Le se o se fitlheletseng sa re: ‘Ga a na diatla’? A bo go latlhega ene yo o rayang rre a re: ‘O nna rraagwe eng?’ le yo o rayang mosadi a re: ‘O mo ditlhabing tsa pelegi ka ntlha yang?’” (Isaia 45:9, 10) Go bonala bomorwa Iseraele ba ganetsa se Jehofa a se bolelelang pele. Gongwe ga ba dumele gore Jehofa o tla letla batho ba gagwe ba ya botshwarwa. Kgotsa gongwe ba nyatsa gore Iseraele o tla gololwa ke kgosi ya setšhaba sa boheitane go na le gore a gololwe ke kgosi ya ntlo ya ga Dafide. Go bontsha boeleele jwa dikganetso tse di ntseng jalo, Isaia o tshwantsha baganetsi le makwete a a latlhilweng a mmopa le manathwana a a latlhilweng a dijana tse di bopilweng tse di neng di ka nna le sebete sa go belaela botlhale jwa modiri wa tsone. Sone selo se se dirilweng ke mmopi wa letsopa jaanong se bolela gore mmopi yono ga a na diatla le fa e le maatla a go bopa. A boeleele! Baganetsi ba ntse jaaka bana ba bannye ba ba nnang le sebete sa go nyatsa taolo ya batsadi ba bone.

14, 15. Mafoko a a reng “Moitshepi” le “Mmopi” a senola eng ka ga Jehofa?

¹⁴ Isaia o naya baganetsi bano karabo ya ga Jehofa: “Jehofa o buile jaana, Moitshepi wa Iseraele le Mmopi wa gagwe: ‘Mpotsang le ka ga dilo tse di tlang malebana le bomorwaake; mme lo ntaole kaga tiro ya diatla tsa me. Nna ke dirile lefatshe mme ke bopile motho yo o mo go lone. Nna—diatla tsa me di otlolotse magodimo, le masomosomo otlhe a one ke a laotse. Ke kurusitse mongwe ka tshiamo, le ditsela tsa gagwe tsotlhe ke tla di tlhamalatsa. Ke ene yo o tla agang motse wa me, le batho ba me ba ba kwa botshwarwa o tla ba lesa ba tsamaya, e se ka tlhwatlhwa le fa e le ka pipamolomo,’ go bua Jehofa wa masomosomo.”—Isaia 45:11-13.

¹⁵ Go tlhalosa Jehofa e le “Moitshepi” go gatelela gore o boitshepo. Go mmitsa “Mmopi,” go gatelela gore o na le tshwanelo jaaka Mmopi go dira tshwetso ka tsela e dilo di tla diragalang ka yone. Jehofa o kgona go itsise barwa ba Iseraele ka dilo tse di tla tlang le go tlhokomela tiro ya diatla tsa gagwe, ke gore, batho ba gagwe. Fano le gone go bontshiwa tsela e go bopiwa ga dilo le go senolwa ga dilo go tsamaisanang ka yone. E re ka Jehofa e le Mmopi wa lobopo lotlhe, o na le tshwanelo ya go kaela ditiragalo ka tsela e a batlang ka yone. (1 Ditiragalo 29:11, 12) Mo kgannyeng e e tshwerweng gone jaanong, Mmusi yo Mogolo o dirile tshwetso ya go dira gore Kurose, moheitane, a golole Iseraele. Go tla ga ga Kurose, le fa go sa ntse go le kwa pele, go tlhomamisegile fela jaaka go nna teng ga legodimo le lefatshe. Ke morwa ofe wa Iseraele he, yo o neng a ka nna le sebete sa go nyatsa Rre, “Jehofa wa masomosomo”?

16. Ke ka ntlha yang fa batlhanka ba ga Jehofa ba tshwanetse ba mo ikobela?

¹⁶ Tsone ditemana tseno tsa Isaia di bontsha lebaka le lengwe gape la go bo batlhanka ba Modimo ba tshwanetse ba mo ikobela. Ka dinako tsotlhe ditshwetso tsa gagwe di diretswe go solegela batlhanka ba gagwe molemo. (Jobe 36:3) O dirile melao go thusa batho ba gagwe gore ba solegelwe molemo. (Isaia 48:17) Bajuda ba motlha wa ga Kurose ba ba amogelang bolaodi jwa ga Jehofa ba fitlhela go ntse fela jalo. Kurose o dira go dumalana le tshiamo ya ga Jehofa, mme o ba romela gae go tswa Babelona gore ba tle ba kgone go aga tempele sesha. (Esera 6:3-5) Le gompieno batho ba ba dirisang melao ya Modimo mo matshelong a bone a letsatsi le letsatsi e bile ba ikobela bolaodi jwa gagwe ba bona masego.—Pesalema 1:1-3; 19:7; 119:105; Johane 8:31, 32.

Masego mo Ditšhabeng Tse Dingwe

17. Kwantle ga Iseraele, ke bomang gape ba ba tla solegelwang molemo ke ditiro tsa ga Jehofa tsa go boloka, mme jang?

¹⁷ Iseraele ga se sone fela setšhaba se se tla solegelwang molemo ke go wa ga Babelona. Isaia a re: “Jehofa o buile jaana: ‘Badiri ba ba sa duelweng ba kwa Egepeto le bagwebi ba kwa Ethiopia le Baseba, banna ba baleele, ba tla tla kwa go wena, mme ba tla nna ba gago. Ba tla tsamaya fa morago ga gago; ba tla tla ka mehiri, mme ba tla go ikobela. Ba tla go rapela, ba re, “Ruri Modimo o seoposengwe le wena, mme ga go na ope o sele; ga go na Modimo ope yo mongwe.”’” (Isaia 45:14) Mo motlheng wa ga Moshe, “batho ba bantsi ba ba kopakopaneng” ba e seng Baiseraele ba ne ba tsamaya le Baiseraele fa ba Fuduga go tswa kwa Egepeto. (Ekesodo 12:37, 38) Ka tsela e e tshwanang, Bajuda ba ba boelang gae ba tswa Babelona ba tla patiwa ke batho ba sele. Batho bano ba e seng Bajuda ga ba ne ba patelediwa go tsamaya mme bone “ba tla tla kwa go wena.” Fa Jehofa a re, “ba tla go ikobela,” “ba tla go rapela,” o tlhalosa kafa batswakwa bano ba tla ikobelang Iseraele le go ineela mo go ene ka teng. Fa ba rwala mehiri, ba tla bo ba dira jalo ka go rata, ba bontsha gore ba iketleeditse go direla batho ba Modimo a dirileng kgolagano le bone, ba ba tla ba rayang ba re: “Modimo o seoposengwe le wena.” Ba tla obamela Jehofa e le basokologi, mo dithulaganyong tsa kgolagano ya gagwe le Iseraele.—Isaia 56:6.

18. Ke bomang gompieno ba ba ileng ba solegelwa molemo ke gore Jehofa a golole “Iseraele wa Modimo,” mme ka ditsela dife?

¹⁸ Fa e sa le ka 1919 fa “Iseraele wa Modimo” a ne a gololwa mo botshwarong jwa semoya, mafoko a ga Isaia a ile a diragadiwa ka tsela e kgolwane go feta mo motlheng wa ga Kurose. Batho ba le dimilione mo lefatsheng lotlhe ba bontsha gore ba rata go direla Jehofa. (Bagalatia 6:16; Sekarea 8:23) Fela jaaka “badiri” le “bagwebi” ba ba umakwang ke Isaia, ba dirisa maatla a bone le madi a bone ka boitumelo gore ba tshegetse kobamelo ya boammaaruri. (Mathaio 25:34-40; Mareko 12:30) Ba ineela mo Modimong mme ba tsamaya mo ditselaneng tsa gagwe, ba itumelela go nna batlhanka ba gagwe. (Luke 9:23) Ba obamela Jehofa fela, ba itumelela melemo ya go dirisana le “motlhanka yo o boikanyego le yo o botlhale” wa ga Jehofa, yo o nang le kamano e ntle ya go nna le kgolagano le Modimo. (Mathaio 24:45-47; 26:28; Bahebera 8:8-13) Le fa ba se na seabe mo kgolaganong eo, e solegela “badiri” le “bagwebi” bao molemo e bile ba utlwa melao ya yone, ba bolela jaana ka bopelokgale: “Ga go na Modimo ope yo mongwe.” A bo go kgatlha jang ne gompieno go bona koketsego e kgolo ya palo ya batho ba ba ntseng jalo ba ba ratang go tshegetsa kobamelo ya boammaaruri!—Isaia 60:22.

19. Go tla diragala eng ka batho ba ba tswelelang pele ba obamela medingwana?

¹⁹ Fa moporofeti a sena go senola gore batho ba ditšhaba ba tla kopanela mo go obameleng Jehofa, o bolela jaana: “Eleruri o Modimo yo o nnang a iphitlhile, Modimo wa Iseraele, Mmoloki”! (Isaia 45:15) Le fa Jehofa a sa bontshe maatla a gagwe gone jaanong, mo isagweng ga a ne a tlhola a iphitlha. O tla itshupa e le Modimo wa Iseraele, Mmoloki wa batho ba gagwe. Le fa go ntse jalo, Jehofa ga a kitla a nna Mmoloki wa batho ba ba ikanyang medingwana. Isaia o bolela jaana ka bone: “Ruri ba tla tlhabiwa ke ditlhong ba bo ba kokobediwe, botlhe fela. Badiri ba medingwana ba tla tsamaya mmogo ba tlhabilwe ke ditlhong.” (Isaia 45:16) Ditlhong tsa bone ga e kitla e nna go tlhabiwa ke ditlhong ka nakwana fela. Go tla kaya loso—sengwe se se fapaaneng gotlhelele le se Jehofa a se solofetsang Iseraele morago ga moo.

20. Iseraele o tla bona “poloko ya bosakhutleng” jang?

²⁰ “Fa e le Iseraele, ruri o tla bolokwa tumalanong le Jehofa ka poloko ya bosakhutleng. Ga lo kitla lo tlhabiwa ke ditlhong, le fa e le go kokobediwa go ya metlheng e e sa feleng ya bosakhutleng.” (Isaia 45:17) Jehofa o solofetsa gore Iseraele o tla bolokwa ka bosakhutleng, mme seno se tla ikaega ka mabaka mangwe. Iseraele o tshwanetse a tswelela a le “tumalanong le Jehofa.” Fa Iseraele a tlhokomologa tumalano eo ka go sa amogele Jesu jaaka Mesia, setšhaba seno se tla felelwa ke tsholofelo ya “poloko ya bosakhutleng.” Le fa go ntse jalo, bangwe kwa Iseraele ba tla bontsha tumelo mo go Jesu, mme ba tla nna motheo wa Iseraele wa Modimo, yo o tla tsayang sebaka sa Iseraele wa senama. (Mathaio 21:43; Bagalatia 3:28, 29; 1 Petere 2:9) Iseraele wa semoya ga a kitla a tlhabisiwa ditlhong. O tla tsenngwa mo ‘kgolaganong ya bosakhutleng.’—Bahebera 13:20.

Jehofa o a Ikanyega mo Popong le mo Tshenolong

21. Jehofa o itshupa jang gore o ikanyega tota mo popong le mo tshenolong?

²¹ A Bajuda ba ka ikaega ka tsholofetso ya ga Jehofa ya go tlisetsa Iseraele poloko ya bosakhutleng? Isaia o araba jaana: “Jehofa o buile jaana, Mmopi wa magodimo, Ene Modimo wa boammaaruri, Mmopi wa lefatshe le Modiri wa lone, Ene Yo o le tlhomamisitseng thata, yo o sa le bopelang lefela, yo o le bopetseng go nniwa: ‘Ke nna Jehofa, mme ga go na ope o sele. Ga ke a bua mo lefelong la go iphitlha, mo lefelong le le lefifi la lefatshe; le fa e le go raya losika lwa ga Jakobe ke re, “Mpatlelang lefela.” Ke nna Jehofa, yo ke buang se se siameng, yo ke bolelang se se thokgameng.’” (Isaia 45:18, 19) Ka lekgetlho la bonè e bile e le la bofelo mo kgaolong eno, Isaia o simolola tema ya boporofeti jo bo boteng ka polelwana eno: “Jehofa o buile jaana.” (Isaia 45:1, 11, 14) Jehofa a reng? A re o a ikanyega, mo popong le mo tshenolong. Ga a bopela lefatshe “lefela.” Mme le batho ba gagwe, Iseraele, ga a ba kope gore ba mmatlele “lefela.” Fela jaaka boikaelelo jwa Modimo ka lefatshe bo tla diragadiwa, boikaelelo jwa Modimo ka batho ba gagwe ba ba tlhophilweng le jone bo tla diragadiwa. Go fapaana le medumo e e sa utlwaleng ya batho ba ba direlang medimo ya maaka, mafoko a ga Jehofa a bolelwa phatlalatsa. Mafoko a gagwe a na le tshiamiso, e bile a tla diragala. Ba ba mo direlang ga ba ne ba mo direla lefela.

22. (a) Bajuda ba ba ileng botshwarwa kwa Babelona ba ka tlhomamisega ka eng? (b) Bakeresete gompieno ba tlhomamisediwa eng?

²² Mo bathong ba Modimo ba ba isitsweng botshwarwa kwa Babelona, mafoko ao a tlhomamisa gore Naga e e Solofeditsweng ga e kitla e nnela ruri e swafetse. E tla boa gape e nniwa. Mme dilo tse Jehofa a di ba solofetsang di a diragala. Ka tsela e e tshwanang, mafoko a ga Isaia a tlhomamisetsa batho ba Modimo gompieno gore lefatshe ga le kitla le nna marope a a swafetseng—le gaupantswe ke molelo, jaaka bangwe ba dumela, kana le sentswe ke dibomo tsa nuklea, jaaka ba bangwe ba boifa. Modimo o ikaeletse gore lefatshe le nnele ruri, le apere bontle jwa paradaise e bile le nniwa ke batho ba ba siameng. (Pesalema 37:11, 29; 115:16; Mathaio 6:9, 10; Tshenolo 21:3, 4) Ee, mafoko a ga Jehofa a tla itshupa e le a a ikanyegang fela jaaka go diragetse ka Iseraele.

Jehofa o Bontsha Bopelotlhomogi

23. Phelelo ke efe ya batho ba ba obamelang medingwana, mme go diragala eng ka ba ba obamelang Jehofa?

²³ Poloko ya Iseraele e gatelelwa ke mafoko a a latelang a ga Jehofa: “Phuthegang mmogo lo tle. Atamelanang, lona bafalodi ba ditšhaba. Ba ba tshotseng logong lwa setshwantsho sa bone se se setilweng ga ba itse sepe, le fa e le ba ba rapelang modimo yo o ka se kang a boloka. Dirang pego ya lona le neo ya lona. Ee, a ba gakololane mmogo ka kutlwano. Ke mang yo o dirileng gore seno se utlwiwe go tswa bogologolong? Ke mang yo o go begileng go tloga ka yone nako eo? A ga se nna, Jehofa, yo go se nang Modimo ope yo mongwe kwantle ga gagwe; Modimo yo o siameng le Mmoloki, go se na ope kwantle ga me?” (Isaia 45:20, 21) Jehofa o bitsa “bafalodi” gore ba bapise go bolokwa ga bone le se se diragalelang batho ba ba obamelang medingwana. (Duteronome 30:3; Jeremia 29:14; 50:28) E re ka baobamedi ba medingwana ba rapela le go direla medimo e e se nang maatla e e ka se kang ya ba boloka, “ga ba itse sepe.” Kobamelo ya bone ke ya lefela—ruri ga se ya sepe. Mme ba ba obamelang Jehofa bone ba fitlhela gore o na le maatla a go diragatsa dilo tse a di boleletseng pele “go tswa bogologolong,” go akaretsa go boloka batho ba gagwe ba ba kwa botshwarwa kwa Babelona. Maatla a a ntseng jalo le go bonela dilo pele di ne tsa tlhaola Jehofa mo medingwaneng e mengwe yotlhe. Ruri ke “Modimo yo o siameng le Mmoloki.”

“Poloko re e Neilwe ke Modimo wa Rona”

24, 25. (a) Jehofa o dira taletso efe, mme ke ka ntlha yang fa go tlhomamisegile gore tsholofetso ya gagwe e tla diragala? (b) Go matshwanedi gore Jehofa a bo a batla eng?

²⁴ Bopelotlhomogi jwa ga Jehofa bo mo tlhotlheletsa gore a laletse jaana: “Retologelang kwa go nna mme lo bolokwe, lona lotlhe ba lo kwa mafelelong a lefatshe; gonne ke Modimo, mme ga go na ope o sele. Ke ikanne ka nna—lefoko le dule mo molomong wa me ka tshiamo, mo le ka se kang la boa—gore lengole lengwe le lengwe le tla nkhubamela, le loleme longwe le longwe lo tla inkanela, lo re, ‘Ruri go na le tshiamo e e feletseng le nonofo mo go Jehofa. Botlhe ba ba mo galefelang ba tla tlhamalalela kwa go ene mme ba tlhabiwe ke ditlhong. Losika lotlhe lwa Iseraele lo tla siama mo go Jehofa mme lo tla ipelafatsa.’”—Isaia 45:22-25.

²⁵ Jehofa o solofetsa Iseraele gore kwa Babelona o tla boloka ba ba retologelang kwa go ene. Go ka se direge gore boporofeti jono bo se ka jwa diragala ka gonne Jehofa o a rata e bile a ka kgona go falotsa batho ba gagwe. (Isaia 55:11) Mafoko a Modimo a a ikanyega ka boone, mme a ikanyega le go feta fa Jehofa a a tlhomamisa ka maikano a gagwe. (Bahebera 6:13) Go matshwanedi gore a bo a batla gore batho ba ba eletsang gore a ba amogele ba mo ikobele (“lengole lengwe le lengwe le tla nkhubamela”) ba bo ba ineele mo go ene (“loleme longwe le longwe lo tla inkanela”). Baiseraele ba ba tswelelang pele ba obamela Jehofa ba tla bolokwa. Ba tla kgona go ikgantsha ka se Jehofa a se ba direlang.—2 Bakorintha 10:17.

26. “Boidiidi jo bogolo” jo bo tswang mo merafeng yotlhe bo tsibogela jang taletso ya ga Jehofa ya gore ba retologele kwa go ene?

²⁶ Le fa go ntse jalo, taletso ya Modimo ya gore batho ba retologele kwa go ene, ga e a lebagana le batshwarwa ba kwa Babelona wa bogologolo fela. (Ditiro 14:14, 15; 15:19; 1 Timotheo 2:3, 4) Taletso eno e sa ntse e dirwa mme ‘boidiidi jo bogolo jo bo tswang mo merafeng yotlhe’ bo a arabela mme bo bolela jaana: “Poloko re e neilwe ke Modimo wa rona . . . le ke Kwana [Jesu].” (Tshenolo 7:9, 10; 15:4) Ngwaga le ngwaga, makgolo a le diketekete a batho ba basha ba oketsa boidiidi jo bogolo ka go retologela kwa Modimong, ba amogela bolaodi jwa gagwe ka botlalo e bile ba bolela phatlalatsa gore ba ineetse mo go ene. Mo godimo ga moo, ba tshegetsa Iseraele wa semoya ka boikanyegi, yo e leng ‘losika lwa ga Aborahame.’ (Bagalatia 3:29) Ba bontsha go rata taolo ya ga Jehofa e e siameng ka go bolela jaana mo lefatsheng lotlhe: “Ruri go na le tshiamo e e feletseng le nonofo mo go Jehofa.”a Mo lekwalong le moaposetoloi Paulo a neng a le kwalela Baroma, o ne a nopola thanolo ya Septuagint ya Isaia 45:23 go bontsha gore kgabagare mongwe le mongwe yo o tshelang o tla amogela bolaodi jwa Modimo a bo a bake leina la gagwe ka bosakhutleng.—Baroma 14:11; Bafilipi 2:9-11; Tshenolo 21:22-27.

27. Ke ka ntlha yang fa Bakeresete gompieno ba ka nna le tshepo e e feletseng mo ditsholofetsong tsa ga Jehofa?

²⁷ Ke ka ntlha yang fa maloko a boidiidi jo bogolo a ka ikanya gore go retologela kwa Modimong go kaya poloko? Ka gonne ditsholofetso tsa ga Jehofa di a ikanyega, jaaka mafoko a boporofeti a a mo go Isaia kgaolo 45 a bontsha ka phepafalo. Fela jaaka Jehofa a ne a na le maatla le botlhale jwa go bopa magodimo le lefatshe, fela jalo o na le maatla le botlhale tsa go diragatsa dipolelelopele tsa gagwe. Mme fela jaaka a ile a dira gore boporofeti ka ga Kurose bo diragale, o tla diragatsa boporofeti bope fela jo bongwe jwa Baebele jo bo iseng bo diragale. Ka jalo, baobamedi ba ga Jehofa ba ka tshepa gore go ise go ye kae Jehofa o tla supa gape gore ke “Modimo yo o siameng le Mmoloki.”

[Dintlha tse di kwa tlase]

[Ditshwantsho mo go tsebe 80, 81]

Jehofa, yo o dirang lesedi e bile a bopa lefifi, a ka dira kagiso a bo a bopa masetlapelo

[Setshwantsho mo go tsebe 83]

Jehofa o tla dira gore “magodimo” a nese masego le gore “lefatshe” le tlhagise poloko

[Setshwantsho mo go tsebe 84]

A manathwana a a latlhilweng a dilo tse di bopilweng a tshwanetse a belaela botlhale jwa modiri wa one?

[Setshwantsho mo go tsebe 89]

Jehofa ga a bopela lefatshe lefela