Baebele Buka ya Boporofeti jo bo Opang Kgomo Lonaka Karolo

“Re Bone Mesia”

Motseletsele ono wa ditlhogo di le robedi mo makasineng wa “Tsogang!” o sekaseka karolo e e tlhomologileng ya Baebele—dipolelelopele tsa yone. Ditlhogo tseno di tla go thusa go araba dipotso tseno: A dipolelelopele tsa Baebele di itlhametswe fela ke batho ba ba botlhale? A di tlhotlheleditswe ke Modimo? Re go laletsa gore o sekaseke bosupi.

MAKGOLOKGOLO a dingwaga pele Jesu a tsholwa, baporofeti ba Bahebera ba ne ba bolelela pele go tla ga Mesia, mo ka Sehebera go kayang “Motlodiwa.” Baporofeti bao ba ne ba neela dintlha tse di maleba malebana le botshelo jwa Mesia yo o neng a tla—go akaretsa tatelano ya losika lo a neng a tla tswa mo go lone—gore o ne a tla tswa kae, o ne a tla goroga leng le gore o ne a tla diragalelwa ke eng.

Bakeresete ba lekgolo la ntlha la dingwaga C.E. ba ne ba dumela gore dipolelelopele tseno di diragaditswe ke Jesu. Ba ne ba ikutlwa jaaka morutwa Anderea, yo o neng a bolelela morwarragwe e bong Simone jaana: “Re bone Mesia.” (Johane 1:40, 41) A ba ne ba nepile? Mma re tlotleng ka dipolelelopele di le nnè mo go tse dintsi tse di kaga Mesia, mme re tla sekaseka bosupi mo go nngwe le nngwe ya tsone.

Polelelopele 1: “O tla nna mo setulong sa bogosi sa ga Dafide.”—Isaia 9:7, “Knox.”

Tiragatso: Efangele ya ga Mathaio e simolola ka mafoko a a reng: “Buka ya polelo ya botshelo jwa ga Jesu Keresete, morwa Dafide, morwa Aborahame.” Go tswa foo Mathaio o kwala tatelano ya losika lo Jesu a neng a tswa mo go lone ka Dafide, fela jaaka mokwadi wa Efangele e bong Luke a ne a dira.—Mathaio 1:1-16; Luke 3:23-38.

Se hisitori e se senolang:

● Mekwalo ya mokwalahisitori wa Mojuda e bong Josephus e bontsha gore direkoto tsa tatelano ya masika a malapa a Bajuda di ne di le mo mabolokelong a direkoto tsa botlhe. Direkoto tseo di ne tsa senngwa ka 70 C.E. fa Jerusalema e ne e senngwa. Mme pele Jerusalema e senngwa, batho gongwe le gongwe ba ne ba bolela gore Jesu o tswa mo losikeng lwa ga Dafide. (Mathaio 9:27; 20:30; 21:9) Fa e le gore se ba neng ba se bua e ne e le maaka, mongwe o ka bo a ile a belaela kgotsa le e leng go ganetsa se ba neng ba se bua. Le fa go ntse jalo, ga go na pego epe e e bontshang gore mongwe o ile a leka go dira jalo.

Polelelopele 2: “Bethelehema Eferatha, yo monnye thata go ka nna mo gare ga dikete tsa Juda, go tswa mo go wena go tla tla mo go nna yo o tla nnang mmusi mo Iseraele.”—Mika 5:2.

Tiragatso: Jesu o ne a tsholelwa kwa Bethelehema. Fa Kaesara Aguseto a ne a ntsha taelo ya gore go balwe batho, rraagwe Jesu yo o mo godisitseng e bong Josefa o ne a patelesega go tswa kwa Nasaretha go ya kwa “Judea [Juda] kwa motseng wa ga Dafide, o o bidiwang Bethelehema, ka gonne a le leloko la ntlo le la lelapa la ga Dafide, go ya go kwadisiwa le Marea.” Fa ba ntse ba le koo, Marea o ne “a belega morwawe” e bong Jesu.—Luke 2:1-7.

Se hisitori e se senolang:

● Thutamarope e tlhomamisa gore Baroma ba ne ba bala batho kwa Botlhabagare gore ba kgone go ba duedisa lekgetho le go ba kwadisetsa sesole. Bosupi jwa go bala batho ka tsela e e ntseng jalo bo ka bonwa mo taolong ya mmusi wa kwa Roma yo o neng a laola Egepeto ka 104 C.E. Khopi e e tlhalosang taolo eo, e gone jaanong e leng kwa Laeboraring ya Boritane, e balega jaana: “E re ka jaanong e setse e le nako ya gore go balwe batho ka ntlo le ntlo, re tshwanetse go pateletsa botlhe ba ka ntlha ya mabaka mangwe ba nnang mo metseng [dikgaolo] e e seng ya bone gore ba boele kwa metseng ya bone, e le gore thulaganyo e e dirwang ka metlha ya go bala batho e kgone go dirwa ka thelelo le gore ba kgone go ipha nako ya go lema masimo a bone.”

● Ka nako ya fa Jesu a ne a tsholwa, go ne go na le metse e mebedi kwa Iseraele e e bidiwang Bethelehema. O mongwe o ne o le kwa bokone gaufi le Nasaretha. O mongwe, o pele go lebegang o ne o itsiwe e le Eferatha, o ne o le gaufi le Jerusalema kwa Juda. (Genesise 35:19) Jesu o tsholetswe kwa Eferatha, fela jaaka Mika a ne a boleletse pele dingwaga di ka nna makgolo a robedi pelenyana.

Polelelopele 3: “Go simolola ka nako e lefoko le tswang ka yone la go tsosolosa le go aga Jerusalema sesha go fitlha Mesia, Moeteledipele a goroga, e tla nna dibeke di supa, le dibeke di le masome a marataro le bobedi.”—Daniele 9:25.

Tiragatso: Lobaka lwa nako lo lo tlhalositsweng mo boporofeting jwa ga Daniele lo lekana le dibeke di le 69 tse nngwe le nngwe ya tsone e tsayang dingwaga di le 7, kgotsa dingwaga di le 483. Go agiwa sesha ga Jerusalema go simologile ka 455 B.C.E. Jaaka go boleletswe pele, dingwaga di le 483 (dibeke di le 69 tsa dingwaga) moragonyana ka 29 C.E., Jesu o ne a nna Motlodiwa kgotsa Mesia fa a ne a kolobediwa le go tlodiwa ka moya o o boitshepo wa Modimo.a—Luke 3:21, 22.

Se hisitori e se senolang:

● Mo masimologong a lekgolo la ntlha la dingwaga C.E., “batho ba ne ba letile” go goroga ga ga Mesia. (Luke 3:15) Mo bukeng ya gagwe ya A History of Messianic Speculation in Israel, mokanoki wa Mojuda e bong Abba Hillel Silver a re ka nako ya pele Jerusalema e senngwa, “batho botlhe ba ne ba lebeletse gore Mesia o ne a tla tla ka bonako.” Gape o bolela gore “Mesia o ne a lebeletswe mo e ka nnang ka kwatara ya bobedi ya lekgolo la ntlha la dingwaga.” Silver a re tebelelo ya Bajuda e ne e theilwe mo go “se batho ba neng ba itse se tlile go diragala ka nako eo.”

Polelelopele 4: “O tla dira gore lefelo la gagwe la go fitlhela le nne le baikepi, le setlhopha sa bahumi fa a swa.”—Isaia 53:9.

Tiragatso: Jesu o ne a bolawa le dinokwane tse pedi tse di neng di atlholetswe loso, le fa go ntse jalo, o ne a fitlhwa mo lebitleng le le dirilweng mo lefikeng le le neng le abilwe ke monna mongwe wa modumedi yo o neng a humile—Josefa wa Arimathea.—Mathaio 27:38, 57-60; Johane 19:38.

Se hisitori e se senolang:

● Bakwadi ba le bantsi ba bogologolo ba e neng e se Bakeresete—go akaretsa rahisitori wa Mojuda e bong Josephus le rahisitori wa Moroma e bong Tacitus—ba supa gore Jesu o ne a bolawa jaaka senokwane.

● Dipatlisiso tse di dirilweng ke baithutamarope kwa Palesetina di ribolotse mabitla a bogologolo a a nang le diphaposi tse dinnye tse di dirilweng mo lefikeng. Go nna le lebitla le le ntseng jalo e bile le setse le baakantswe e ne e ka se nne bothata mo mothong yo o humileng e bile a na le tlhotlheletso jaaka Josefa wa Arimathea.

Dipolelelopele tseno ke dingwe fela tsa dipolelelopele tse dintsi kaga Mesia tse di neng tsa diragadiwa ke Jesu. Ga go na pelaelo gore ga go na motho ope yo o neng a ka aka malebana le go diragadiwa ga dipolelelopele tseo tse di tlhalositsweng ka tlhamalalo. Go diragadiwa ka nepo ga dipolelelopele tseo go nonotsha tumelo ya rona gore Modimo ke ene yo o neng a di tlhotlheleditse le gore o sa ntse a tla diragatsa ditshegofatso tsotlhe tse a di boleletseng pele ka Mesia mo bathong ba ba kutlo.

Mo setlhogong se se latelang sa motseletsele ono wa ditlhogo, re tla tlotla ka potso e e kgatlhang: Fa e le gore ruri Jesu e ne e le Mesia yo o solofeditsweng, ke ka ntlha yang fa a ile a itetla go boga le go swa?

[Ntlha e e kwa tlase]

[Tšhate/Ditshwantsho mo go tsebe 22, 23]

(Go bona mokwalo o o feletseng, leba kgatiso)

TATELANO YA DITIRAGALO TSA BOTLHOKWA TSA DIPOLELELOPELE TSE NNÈ KAGA MESIA

1 Mesia o ne a tla tswa mo losikeng lwa ga Kgosi Dafide

1070 B.C.E.

Dafide o nna kgosi ya Iseraele yotlhe

607 B.C.E.

Jerusalema e senngwa ke Bababelona

455 B.C.E.

Go ntshiwa taelo ya go tsosolosa Jerusalema le go e aga sesha

2 Mesia o ne a tla tsholelwa kwa Bethelehema ya Juda

2 B.C.E.

Jesu o tsholelwa kwa Bethelehema ya Juda mo losikeng lwa ga Dafide

3 Mesia o ne a tla goroga dingwaga di le 483 morago ga gore go ntshiwe taelo ya go aga Jerusalema sesha

29 C.E.

Jesu o a kolobediwa mme o tlodiwa go nna Mesia

4 Mesia o ne a tla swa le baleofi a bo a fitlhwa le bahumi

33 C.E.

Jesu o swa le dinokwane a bo a fitlhwa le bahumi