Ithute mo Setshwantshong sa Ditalenta

1, 2. Ke ka ntlha yang fa Jesu a ne a dirisa setshwantsho sa ditalenta?

JESU o ne a dirisa setshwantsho sa ditalenta go lemotsha balatedi ba gagwe ba ba tloditsweng boikarabelo jo ba nang le jone. Mme setshwantsho seno se re ama rotlhe. Ka jalo, go sa kgathalesege gore a re solofetse go tshela kwa legodimong kgotsa go tshelela ruri mo lefatsheng, rotlhe re tshwanetse go tlhaloganya bokao jwa setshwantsho seno.

² Jesu o ile a tlotla ka setshwantsho seno leng? Ka nako ya fa barutwa ba gagwe ba ne ba mmotsa ka sesupo sa go nna gone ga gagwe e le Kgosi le sa bokhutlo jwa tsamaiso eo ya dilo. (Mathaio 24:3) Ka jalo, o ne a dirisa setshwantsho seno sa ditalenta e le karolo ya sesupo seo mme se sa ntse se re ama le gompieno.

 3. Re tla ithuta eng mo ditshwantshong tse di mo go Mathaio 24 le 25?

³ Jesu o ne a dirisa le ditshwantsho tse dingwe tse tharo. Ditshwantsho tseno tsotlhe di tlotla ka dinonofo tsa botlhokwa tse balatedi ba gagwe ba tshwanetseng go nna le tsone. Re ka ithuta tsone mo go Mathaio 24:45 go ya go 25:46. Setshwantsho sa ntlha se bua ka motlhanka yo o ikanyegang yo o emelang setlhotswana sa Bakeresete ba ba tloditsweng ba boikarabelo jwa bone e leng go ruta batho ba ga Jehofa. Ba tshwanetse go ikanyega le go nna botlhale.a (Bona ntlha e e kwa tlase.) Setshwantsho sa bobedi se bua ka makgarebane a a lesome. Mo go sone, Jesu o ne a tlhagisa Bakeresete ba ba tloditsweng gore ba tshwanetse go nna ba ipaakantse le go nna ba disitse ka gonne ga ba itse letsatsi le fa e le ura e a tla tlang ka yone.b (Bona ntlha e e kwa tlase.) Setshwantsho sa boraro se bua ka ditalenta mme se thusa Bakeresete ba ba tloditsweng gore ba tshwanetse go dira ka natla gore ba dire boikarabelo jwa bone ka botlalo. Setshwantsho sa bonè se bua ka dinku le dipodi mme se lebisitswe mo bathong ba ba tla tshelelang ruri mo lefatsheng. Mo go sone, Jesu o ne a gatelela ntlha ya gore batho bano ba tshwanetse go ikanyega le go dira sotlhe se ba ka se kgonang go thusa Bakeresete ba ba tloditsweng.c (Bona ntlha e e kwa tlase.) Setlhogo seno se tla re tlhalosetsa gore setshwantsho sa ditalenta se kaya eng.

4, 5. Monna yo o mo setshwantshong o emela mang, mme talenta yone ke eng?

⁴ Bala Mathaio 25:14-30. Mo setshwantshong seno, Jesu o bua ka monna yo o tlogang a tsaya loeto. Mme mo setshwantshong se sengwe se se tshwanang le seno, Jesu o ne a bua ka monna yo o neng a tsaya loeto go ya go amogela bogosi.d (Bona ntlha e e kwa tlase.) (Luke 19:12) Mo dingwageng tse di fetileng, re ne re re ditshwantsho tseno di bua ka Jesu fa a ne a ya kwa legodimong ka ngwaga wa 33. Mme gone, Jesu ga a ka a nna kgosi ka bonako fela fa a sena go fitlha kwa legodimong. O ne a leta go fitlha ka 1914, fa baba ba gagwe ba ne ba “bewa jaaka sebeo sa dinao tsa gagwe.”—Bahebera 10:12, 13.

⁵ Jesu o ne a re monna yo o mo setshwantshong seno o na le ditalenta di le robedi. E ne e le mohumi.e (Bona ntlha e e kwa tlase.) Pele a tsaya loeto, o ne a naya batlhanka ba gagwe madi ano. A ba bolelela gore ba mo okeletse one. Fela jaaka madi ao a ne a le botlhokwa mo monneng yono, go na le sengwe se Jesu le ene a se tsayang se le botlhokwa thata. Ke eng seo? Ke tiro e a neng a e dira fa a ne a le mo lefatsheng.

6, 7. Ditalenta di emela eng?

⁶ Jesu o ne a tsaya tiro ya go rera e le botlhokwa thata. Ka ntlha ya tiro eo, o ne a nna le barutwa ba le bantsi thata. (Bala Luke 4:43.) O ne a itse gore tiro e kgolo e larile kwa pele le gore batho ba le bantsi ba ne ba tla amogela dikgang tse di molemo. Ke ka moo a neng a raya barutwa ba gagwe a re: “Tsholetsang matlho a lona mme lo lebe masimo, gore a masweu go ka rojwa.” (Johane 4:35-38) Fa molemi a bona gore tshimo e siametse go ka rojwa, ga a kitla a e itlhokomolosa. Jesu o ne a tshwana le molemi yoo. Ka jalo, pelenyana fela a boela kwa legodimong, o ne a laela balatedi ba gagwe a re: “Jalo tsamayang mme lo dire batho . . .  barutwa.” (Mathaio 28:18-20) Fano Jesu o ne a ba naya letlotlo le le tlhwatlhwakgolo, e leng boikarabelo jo bogolo jwa go ruta batho.—2 Bakorintha 4:7.

⁷ Fela jaaka monna yo o neng a naya batlhanka ba gagwe madi, Jesu le ene o neile Bakeresete ba ba tloditsweng tiro ya go dira batho barutwa. (Mathaio 25:14) Ka jalo, ditalenta di emela boikarabelo jwa go rera le go dira batho barutwa.

 8. Le fa batlhanka ba ne ba neilwe madi a a sa lekaneng, mong wa bone o ne a lebeletse gore ba dire eng?

⁸ Jesu a re monna o ne a naya motlhanka wa ntlha ditalenta di le tlhano, wa bobedi ditalenta di le pedi mme wa boraro talenta e le nngwe. (Mathaio 25:15) Le fa monna yono a neile batlhanka ba gagwe madi a a sa lekaneng, o ne a lebeletse gore ba dire ka natla go a oketsa. Jesu le ene o lebeletse gore balatedi ba gagwe ba ba tloditsweng ba dire ka natla mo tirong ya go rera. (Mathaio 22:37; Bakolosa 3:23) Ka Pentekosete ya ngwaga wa 33, balatedi ba ga Jesu ba ne ba simolola go ruta batho ba ditšhaba tsotlhe. Tota e bile, fa re bala buka ya Ditiro re kgona go bona sentle gore ba ne ba tshwere phage ka mangana.f (Bona ntlha e e kwa tlase.)—Ditiro 6:7; 12:24; 19:20.

 9. (a) Batlhanka ba babedi ba ne ba dira eng ka madi a ba neng ba a newa mme re ka ithuta eng mo go seo? (b) Batho ba ba solofetseng go tshelela ruri mo lefatsheng ba tshwanetse go dira eng?

⁹ Batlhanka ba ntlha ba babedi ba ba neng ba dirisa madi a mong wa bone sentle, ba emela Bakeresete ba ba tloditsweng ba ba ikanyegang ba ba tshelang mo metlheng ya bofelo. Fa e sa le ka 1919, ba ntse ba dira ka natla mo tirong ya go rera. Mo setshwantshong, batlhanka ba babedi bano ba newa madi a a sa lekaneng mme seno ga se reye gore go na le ditlhopha di le pedi tsa Bakeresete ba ba tloditsweng ba ba ikanyegang. E re ka batlhanka bano ba ne ba dira ka natla, ba ne ba oketsa madi a ba a neilweng. A seno se raya gore batlodiwa ke bone fela ba go lebeletsweng gore ba dire ka natla mo tirong ya go rera le ya go ruta? Nnyaa. Setshwantsho sa ga Jesu sa dinku le dipodi se re ruta gore batho ba ba solofetseng go tshelela ruri mo lefatsheng ba tshwanetse go tswelela ba tshegetsa Bakeresete ba ba tloditsweng mo tirong ya go rera. Ba tsaya go dira jalo e le tshiamelo e kgolo. Batho ba ga Jehofa ke “letsomane le le lengwe” e bile ba dira ka natla mo tirong ya go rera le go dira batho barutwa.—Johane 10:16.

10. Ke karolo efe ya sesupo sa ga Jesu e e bontshang gore re tshela mo metlheng ya bofelo?

¹⁰ Jesu o lebeletse gore balatedi botlhe ba gagwe ba dire ka natla mo tirong ya go rera gore go nne le barutwa ba le bantsi. Seo ke se barutwa ba gagwe ba nako e e fetileng ba neng ba se dira. Mo metlheng eno e setshwantsho seno sa ga Jesu se diragadiwang mo go yone, a balatedi ba gagwe ba sa ntse ba dira tiro eno ya go rera? Ee, ga go ise go tsamaye go nne le palo e kanakana ya batho ba ba ileng ba amogela dikgang tse di molemo le go nna balatedi ba ga Jesu! E re ka balatedi ba ga Jesu ba semeletse thata mo tirong eno, go kolobediwa batho ba le diketekete ngwaga le ngwaga. Mme le bone ba dira mmogo le rona mo tirong eno. Dilo tseno tsotlhe tse re buileng ka tsone ke karolo ya botlhokwa ya sesupo se Jesu a neng a bua ka sone malebana le metlha ya bofelo. Re ka bua re sa kgale mathe ganong gore Jesu o motlotlo tota ka tiro ya batlhanka ba gagwe!

11. Re itse jang gore Jesu o tla tla ka nako ya pitlagano e kgolo?

¹¹ Jesu o ne a re: “Morago ga nako e telele mong wa batlhanka bao a tla mme a baakanya melato le bone.” (Mathaio 25:19) Mong e bong Jesu Keresete, o tla dira seno go ela kwa bokhutlong jwa pitlagano e kgolo. Re itse seo jang? Mo boporofeting jo bo mo go Mathaio kgaolo 24 le 25, gangwe le gape Jesu o ne a umaka gore o etla. Ka sekai, o ne a re batho ba “tla bona Morwa motho a tla a le mo marung a legodimo.” Fano go buiwa ka nako ya pitlagano e kgolo fa Jesu a tla bo a tla go atlhola batho. Gape o ne a bua jaana a tlhagisa balatedi ba gagwe ba ba tshelang mo metlheng ya bofelo gore ba nne ba disitse: “Ga lo itse gore Morena wa lona o tla ka letsatsi lefe” le gore “ka ura e lo sa akanyeng gore ke yone, Morwa motho o tla ka yone.” (Mathaio 24:30, 42, 44) Ka jalo, mo setshwantshong sa ditalenta, Jesu o ne a bua le ka nako ya fa a tla bo a tla go atlhola batho le go fedisa lefatshe la ga Satane.g—Bona ntlha e e kwa tlase.

12, 13. (a) Mong o raya batlhanka ba gagwe ba babedi a reng, mme ka ntlha yang? (b) Bakeresete ba ba tloditsweng ba tshwaiwa leng la bofelo? (Bona lebokose le le reng, “Ba Kaiwa ba Siame fa ba Swa.”) (c) Batho ba ba tshegetsang Bakeresete ba ba tloditsweng ba tla newa eng?

¹² Fa mong a boa, o fitlhela motlhanka yo a mo neileng ditalenta tse tlhano a di okeditse ka tse dingwe tse tlhano le yo a mo neileng tse pedi a di okeditse ka tse dingwe tse pedi. Mong wa bone o raya mongwe le mongwe wa bone a re: “O dirile sentle, motlhanka yo o molemo le yo o ikanyegang! O ne o ikanyega mo dilong di le mmalwa. Ke tla go tlhoma go okamela dilo di le dintsi.” (Mathaio 25:21, 23) Jesu o tla dira eng fa a boa mo isagweng?

¹³ Pelenyana fela ga pitlagano e kgolo e simologa, Bakeresete ba ba tloditsweng ba ba ileng ba ikanyega go fitlha ka nako eo, ba tla tshwaiwa la bofelo. (Tshenolo 7:1-3) Go tswa foo, pele Haramagedona e simologa, Jesu o tla ba tseela kwa legodimong. Jaanong go tla diragala eng ka batho ba ba solofetseng go tshela mo lefatsheng ba ba ileng ba tshegetsa Bakeresete ba ba tloditsweng mo tirong ya go rera? Ba tla bo ba setse ba atlhotswe gore ke ba ba siameng. Mme ba tla tshelela ruri mo lefatsheng le le laolwang ke Bogosi Jwa Modimo.—Mathaio 25:34.

14, 15. A Jesu o ne a raya gore bontsi jwa Bakeresete ba ba tloditsweng ba ne ba tla nna boikepo le go nna dibodu? Tlhalosa.

¹⁴ Gape setshwantsho seno se bua ka motlhanka yo o neng a newa talenta e le nngwe. Ga a ka a dira sepe go e oketsa. Go na le moo, o ne a e katela. Mong wa gagwe o ne a mo raya a re o boikepo e bile ke sebodu. O ne a tsaya talenta eo mo go ene mme a e naya motlhanka wa ntlha. Go tswa foo, a mo latlhela “kwa lefifing,” kwa a neng a lela selelo sa mma ijoo!—Mathaio 25:24-30; Luke 19:22, 23.

¹⁵ Fa Jesu a ne a re motlhanka yono o ne a le boikepo e bile e le sebodu, o ne a sa reye gore Bakeresete bangwe ba ba tloditsweng ba tla tshwana le ene. Re itse seno ka gonne setshwantsho seno se tshwana le tse dingwe tse pedi. Mo setshwantshong sa motlhanka yo o boikanyego le yo o botlhale, Jesu o ne a bua ka motlhanka yo o boikepo yo o neng a bogisa batlhanka ba bangwe. Jesu o ne a sa reye gore motlhanka yo o boikanyego le yo o botlhale o tla nna boikepo. Go na le moo, o ne a tlhagisa Bakeresete ba ba tloditsweng gore ba se ka ba nna jaaka motlhanka yo o boikepo. Go tswa foo, o ne a bua ka makgarebane a matlhano a a dieleele le a matlhano a a botlhale. O ne a sa reye gore halofo ya Bakeresete ba ba tloditsweng e ne e tla nna dieleele. Go na le moo, Jesu o ne a ba tlhagisa ka se se tla ba diragalelang fa ba sa nne ba ipaakantse e bile ba se kelotlhoko.h (Bona ntlha e e kwa tlase.) Ka jalo, le mo setshwantshong sa ditalenta, Jesu o ne a sa reye gore bontsi jwa Bakeresete ba ba tloditsweng ba ba tshelang mo motlheng wa bofelo ba ne ba tla nna boikepo e bile e le dibodu. Go na le moo, o ne a ba tlhagisa gore ba se ka ba tshwana le motlhanka yo o boikepo mme ba tswelele pele ba dira ka natla mo tirong ya go rera.—Mathaio 25:16.

16. (a) Re ithuta dithuto dife tse pedi mo setshwantshong sa ditalenta? (b) Setlhogo seno se re thusitse jang go tlhaloganya bokao jwa setshwantsho sa ditalenta? (Bona lebokose le le reng, “Re Tshwanetse go Tlhaloganya Jang Setshwantsho sa Ditalenta?”)

¹⁶ Re ithuta dithuto dife tse pedi mo setshwantshong sa ditalenta? Sa ntlha, Jesu o ne a naya balatedi ba gagwe ba ba tloditsweng letlotlo le le tlhwatlhwakgolo, e leng boikarabelo jo bogolo jwa go rera le go dira batho barutwa. Sa bobedi, Jesu o lebeletse gore rotlhe re dire bojotlhe mo tirong ya go rera. Fa re itshoka mo tirong eno e bile re tswelela pele go mo ikobela, re a itse gore o tla re duela.—Mathaio 25:21, 23, 34.