Baebele ya Reng

Modimo o Leba Jang Didirisiwa Tse di Thusang Motho mo Kobamelong?

Dilo tse di dirisiwang go thusa motho go rapela di tlwaelegile mo Bobudeng, Bohindung, Boiselamong, Bojudeng, Katoliki ya Roma le Tumelo ya Orthodox ya kwa Botlhaba. Ka jalo, batho ba le dimilione mo e ka nnang mo dinageng tsotlhe ba dumela gore dilo tse di ntseng jalo di ba thusa go rapela Modimo, go dira gore a ba amogele kgotsa go bona masego a gagwe. Baebele e ruta eng?

GO DIRISA didirisiwa tse di thusang motho go rapela go simologile dingwaga di le diketekete tse di fetileng. Ka sekai, kwa lefelong le Ninife wa bogologolo e neng e le mo go lone, baithutamarope ba ile ba epolola “basadi ba babedi ba ba nang le diphuka ba ba emeng fa pele ga setlhare se se boitshepo ba rapela; mo [seatleng] sa molema ba tshwere kgare ya malomo kgotsa rosari.”—The Catholic Encyclopedia.

Dirosari di thusa ka eng? Yone buka eo ya tshedimosetso e araba jaana: “Fa go na le thapelo e e tshwanetseng go boelediwa ka makgetlho a mantsi, gantsi go tla dirisiwa sengwe se go leng motlhofo go se dirisa go na le go bala ka menwana.”

Maotwana a a dirisediwang dithapelo a dira gore go boeletsa dithapelo go nne motlhofo le go feta. Nako le nako fa leotwana leno le dikolosiwa e kane e le ka seatla, ka phefo, metsi kgotsa ka motlakase, go tsewa fa go tshwana le go rapela. Gantsi maotwana ano a dirisiwa mmogo le di-mantra—mafoko kgotsa ditemana tse di amanang le dilo tsa semoya. A ko o akanye gore Modimo o ikutlwa jang ka dilo tse di ntseng jalo.

“O se Ka wa Boaboeletsa Dilo di le Dingwe”

Jesu Keresete, yo tota le dimilione tsa batho ba e seng Bakeresete ba dumelang gore ke moporofeti wa Modimo, o ne a tlhalosa jaana malebana le kafa Mmopi a ikutlwang ka teng ka thapelo e e boaboelediwang: “Fa o rapela, o se ka wa boaboeletsa dilo di le dingwe, fela jaaka batho ba ditšhaba ba dira, gonne ba ithaya ba re ba tla utlwiwa ka ntlha ya go dirisa ga bone mafoko a le mantsi.”a—Mathaio 6:7.

Ka jalo, fa Modimo a sa itumele fa re “boaboeletsa dilo di le dingwe” a seo ga se supe gore go dirisa dilo tse di thusang motho go boeletsa dithapelo le gone ga go amogelesege? Mme e bile, Baebele ga e na pego epe ya motlhanka yo o ikanyegang wa Modimo wa boammaaruri yo o kileng a dirisa dirosari, maotwana a a dirisediwang dithapelo, kgotsa dilo dingwe tse di tshwanang le tseo mo kobamelong. Mabaka a utlwala sentle le go feta fa re tlhaloganya gore tota thapelo ke eng le gore ke ka ntlha yang fa re rapela.

Thapelo e e Itumedisang Modimo

Mo thapelong ya gagwe ya sekao, Jesu o ne a bua ka Modimo ka tsela e e kgethegileng a re ke “Rraarona.” Ee, Mmopi wa rona ga se maatla mangwe a a kgakala a a sa itsiweng a a tshwanetseng go rebiwa bogale ka boselamose, meetlo kgotsa ka di-mantra. Go na le moo, ke Rre yo o lorato mme o batla gore re mo itse ka tsela eo, re bo re mo rate. Jesu o ne a re: “Ke rata Rara.” (Johane 14:31) Moporofeti mongwe kwa Iseraele wa bogologolo o ne a re: “Wena Jehofa, o Rraarona.”—Isaia 64:8.

Re ka atamela jang Jehofa jaaka Rraarona wa kwa legodimong? (Jakobe 4:8) Jaaka mo kamanong epe fela, re atamela Modimo ka go buisana le ene. Modimo o “bua” le rona ka Baebele—Lefoko la gagwe le le kwadilweng—le mo go lone a senolang ditiro tsa gagwe, botho jwa gagwe le boikaelelo jwa gagwe ka rona. (2 Timotheo 3:16) Kafa letlhakoreng le lengwe, rona re bua le Modimo ka thapelo. Le fa go ntse jalo, thapelo e e ntseng jalo, e tshwanetse go nna e e tswang pelong le e e lorato, e se seomodiro fela e bile e se moetlo.

Akanya ka seno: Mo lelapeng le le atamalaneng, le le nang le lorato, bana ba ba nang le botsogo jo bo siameng ba ba botlhale ba buisana jang le batsadi ba bone? A ba tla nna ba boaboeletsa mafoko kgotsa dipolelwana tse di tshwanang, gongwe e bile ba bala gore ba boeletsa mafoko ao ga kae ba dirisa sedirisiwa sengwe? Nnyaa le e seng! Go na le moo, ba tla bua ka tsela e e utlwalang sentle, le e bontshang tlotlo e bile e le go tswa pelong.

Go rapela Modimo go tshwanetse ga nna fela jalo. Ee ruri, re ka bua le Modimo mo e ka nnang ka sengwe le sengwe se se re tshwenyang. Bafilipi 4:6, 7 ya re: “Lo se ka lwa tlhobaela ka sepe, mme mo go sengwe le sengwe ka thapelo le mokokotlelo mmogo le go ntshiwa ga ditebogo a dikopo tsa lona di itsisiwe Modimo; mme kagiso ya Modimo . . . e tla disa dipelo tsa lona le maatla a lona a mogopolo.” Gantsi, fa re tlhobaela ka sengwe, go ka direga gore re rapele ka kgang eo gangwe le gape. Mme seno ga se tshwane le go boaboeletsa lefoko lengwe le lengwe.—Mathaio 7:7-11.

Baebele e na le dikai di le dintsi tsa dithapelo tse di itumedisang Modimo, go akaretsa dipesalema le dipina kgotsa dithapelo tse di neng tsa rapelwa ke Jesu ka boene.b (Pesalema 17 le 86, mafoko a a fa godimo ga dikgaolo; Luke 10:21, 22; 22:40-44) O ka bona nngwe ya dithapelo tsa ga Jesu mo go Johane kgaolo 17. Iphe metsotso e se kae go e bala. Fa o ntse o e bala, ela tlhoko kafa Jesu a neng a bulela Modimo mafatlha a gagwe ka teng. Ela tlhoko gape kafa thapelo ya gagwe e se nang bopelotshetlha ka teng—kafa e neng e bontsha tsela e a neng a rata balatedi ba gagwe thata ka yone. O ne a re: “Rara yo o Boitshepo,” “ba tlhokomele ka ntlha ya yo o boikepo,” e leng Satane.—Johane 17:11, 15.

A go na le sengwenyana se o se lemogang se se supang gore dithapelo tsa ga Jesu di ne di sa tswe pelong e bile e le ngwaokobamelo fela? Le e seng! A bo a re tlhometse sekao se se molemo jang ne! Ee, botlhe ba ba batlang go atamela Modimo wa boammaaruri ba tshwanetse go mo itse sentle jaaka motho. Go tswa foo, ka ntlha ya go tlhotlhelediwa ke lorato lo lo theilweng mo kitsong eo, ba tshwanetse go gana dingwao le ditiro tse di sa itumediseng Modimo. Mo bathong ba ba ntseng jalo Jehofa a re: “Ke tla nna rraalona, mme lona lo tla nna bomorwaake le bomorwadiake.”—2 Bakorintha 6:17, 18.

[Dintlha tse di kwa tlase]

A O KILE WA IPOTSA GORE. . .

◼ A kgakololo ya ga Jesu malebana le gore re se ka ra boaboeletsa dithapelo e ka dira le mo kgannyeng ya go dirisa dirosari le maotwana a a dirisediwang dithapelo?—Mathaio 6:7.

◼ Dithapelo tsa rona di tshwanetse go supa eng malebana le tsela e re lebang Modimo ka yone?—Isaia 64:8.

◼ Fa re gana maaka a bodumedi, Modimo o tla re leba jang?—2 Bakorintha 6:17, 18.