Kgaolo 53

Mmusi yo o Eletsegang wa Maatla a a Fetang a Motho

FA JESU a fepa diketekete tsa batho ka kgakgamatso, batho baa gakgamala. Ba re “Amarure, eo, ke èna moperofeti eo o tlañ mo lehatshiñ.” Ba fetsa jalo eseng fela ka gore Jesu o tshwanetse ya bo e le moperofeti yole yo mogolo go na le Moshe mme gape le gore o ka nna mmusi yo o eletsegang thata. Jalo ba loga leano la go mo tshwara le go mo dira kgosi.

Lefa go ntse jalo, Jesu o lemoga seo batho bano ba se rulaganyetsang. Jalo ka bofefo fela o tloga foo go tila go tlhophiwa ke bone ka pateletso. O phatlalatsa boidiidi jwa batho a ba a pateletsa barutwa ba gagwe go tsena mo mokorong wa bone le go boela kwa Kaperenama. Morago o ngongwaelela kwa thabeng go ya go rapela. Bosigo joo Jesu o koo a le nosi.

Ka bokhutshwane fela pele ga letsatsi le tswa Jesu o leba go tswa kwa lefelong le le kwa godimo le a kgonang go bona sentle mo go lone mme o etsetlhoko jaaka makhubu a lewatle a ntse a tlhatlosiwa mo lewatleng ke phefo e e maatla. Ereka Tlolaganyo e le gaufi, ngwedi le yone e setse e tla nna kgolokwe, Jesu o kgona go bona barutwa ba gagwe jaaka ba ntse ba leka ka thata go lwantshana le makhubu ka mokoro wa bone. Banna bao ba fuduwa mokoro ka maatla a bone otlhe.

Fa Jesu a bona se, o fologa kwa godimo ga thaba a ba a simolola go tsamaela kwa mokorong a kgabaganya makhubu. Mokoro oo o tsamaile sekgala sa dikilometara di le tlhano kana di le thataro fa Jesu a fitlha fa go one. Lefa go ntse jalo, o tsamaya fela jaaka ekete o tla o feta. Fa barutwa ba mmona ba tlhaeletsa ba re: “Ke sedimo.”

Jesu o ba gomotsa ka go araba a re: “Ke nna; se boiheñ.”

Mme Petere a re: “Morèna, ha e le wèna, nthaea u re, ke eè koñ go wèna mo godimo ga metsi.”

“Ntlo” Jesu o araba jalo.

Gone fela foo, Petere, o fologa mo mokorong a bo a tsamaya mo godimo ga metsi a ya kwa go Jesu. Mme Petere fa a bona setsuatsue, o a tshoga, mme fa a simolola go nwela, o goa ka go re: “Morèna, mpoloka.”

Ka bofefo fela Jesu o otlolola lebogo la gagwe, a ba a mo tshwara, a re: “Ao! wèna eo u tumèlō e e pōtlana, u nu u belaèlèlañ?”

Morago ga Petere le Jesu ba sena go boela mo mokorong, phefo e a didimala, mme barutwa ba tseane fela. A mme ba tshwanetse go tseana jalo? Fa ba ne ba ‘tlhalogantse kaga dinkgwe’ ka go lemoga kgakgamatso e kgolo e Jesu a neng a e dira diura di sekae pelenyana ya go fepa diketekete tsa batho ka dinkgwe di le tlhano le ditlhatswana di le pedi fela, he go ne go sa tshwanela go lebega go gakgamatsa go le kalo gore o ne a kgona go tsamaya mo godimo ga metsi le go kokobetsa phefo. Lefa go ntse jalo, jaanong barutwa ba obamela Jesu ba bo ba re: “Amarure u Morwa Modimo.”

Mo nakong e khutshwane fela ba goroga kwa Genesareta, naga e ntle, ya dipoa e e nang le ditlhare tse dintsi tsa maungo e e gaufi le Kaperenama. Ba emisa mokoro wa bone koo. Mme fa ba fologa mo mokorong, batho ba lemoga Jesu ba bo ba ya mo dikgaolong tse di gaufi, ba ya go batla ba ba lwalang. Fa bano ba leriwe ba le mo malaong a bone mme ba ama lekantsa la kobo ya ga Jesu fela, ba alafesega ka botlalo.

Kgabagare boidiidi jwa batho ba ba neng ba iponela ka matlho go fepiwa ga diketekete tsa batho ka kgakgamatso ba lemoga gore Jesu o tsamaile. Jalo fa mekoro e mebotlana e e tswang kwa Tiberio e goroga, ba e palama ba bo ba leba kwa Kaperenama go ya go batla Jesu. Fa ba mmona, ba botsa ka go re: “Rabi u tsile leñ kwano?” Jesu o a ba kgalemela, jaaka re tla tloga re bona. Yohane 6:14-25; Mathaio 14:22-36; Mareko 6:45-56.

▪ Morago ga Jesu a sena go fepa diketekete tsa batho ka kgakgamatso, batho ba batla go mo dirang?

▪ Jesu o bonang fa a le mo godimo ga thaba eo a neng a ngongwaeletse kwa go yone, mme go tswa foo o dira eng?

▪ Ke ka ntlhayang fa barutwa ba sa tshwanela go tseanngwa ke dilo tseno?

▪ Go diragalang fa ba fitlha kwa lotshitshing lwa lewatle?