Kgaolo 122

Go Tswa kwa go Pilatwe O Ya kwa go Herode A bo A Boela kwa go Ene Gape

LEMORORO Jesu a sa leke ka gope go fitlhela Pilatwe gore ke kgosi, o tlhalosa gore Bogosi jwa gagwe ga bo tshosetse Roma ka gope. “Bogosi yoa me ga se yoa lehatshe yeno,” Jesu o bolela jalo. “Ha bogosi yoa me e ka bo e le yoa lehatshe yeno, batlhanka ba me ba ko ba tlhabana, gore ke se ka ka neèlwa Bayuda: me yana bogosi yoa me ga se yoa mono.” Ka gone Jesu o dumela ka makgetlo a mararo gore o na le Bogosi, lemororo e se jwa selefatshe.

Lefa go le jalo, Pilatwe o tswelela a mmotsa jaana: “Me a u kgosi?” Ke gore, lemororo Bogosi jwa gago e se jwa mo lefatsheng leno a gone o kgosi?

Jesu o dira gore Pilatwe a itse fa a dirile tshwetso e e siameng, ka go araba jaana: “Wèna ua re, Ke kgosi. Ke tsalecwe gōna mouō, me ke tletse gōna mouō mo lehatshiñ, gore ke shupè kaga boamarure. Moñwe le moñwe eo e leñ oa boamarure o utlwa lencwe ya me.”

Ee, boikaelelo jo bogolo jwa go tla ga ga Jesu mo lefatsheng e ne e le go supa kaga “boamarure,” segolobogolo boammaaruri kaga Bogosi jwa gagwe. Jesu o iketleeditse go ikanyega mo boammaaruring joo lefa go tla batla gore a duele ka botshelo jwa gagwe. Lemororo Pilatwe a botsa ka gore: “Boamarure ke eñ?” ga a emele gore a fiwe tlhaloso e e oketsegileng. O utlwile mo go lekaneng gore a ka kgona go ntsha katlholo.

Pilatwe o boela kwa boidiiding jwa batho ba ba emeng kafa ntle ga ntlo ya gagwe ya segosi. Go lebega Jesu a le fa thoko ga gagwe fa a raya baperesiti ba bagolo le bao ba neng ba na nabo a re: “Ga ke bone molato mo monneñ eo.”

Boidiidi joo jwa batho ba simolola go gatelela jaana ba galefisitswe ke tshwetso eo: “O hudua seshaba, o simolotse kwa Galilea, a ruta mo Yudea yeotlhe go tla go hitlha hano.”

Pilatwe o tshwanetse a bo a gakgamadiwa ke go gagamala mono ga Bajuda mme ba sena mabaka. Jalo, fa baperesiti ba bagolo le bannabagolo ba tswelela ba ntse ba tlhaeletsa jalo kwa godimo, Pilatwe o retologela kwa go Jesu a bo a mmotsa a re: “A ga u utlwe dilō tse dintsi tse ba di shupañ kaga gago?” Lefa go le jalo, Jesu ga a leke go araba. Go ritibala ga sefatlhego sa gagwe fa a latofadiwa botlhoko jaana go gakgamatsa Pilatwe.

Fa a utlwa gore Jesu ke Mogalalea, Pilatwe o bona tsela ya go ithola boikarabelo. Mmusi wa Galalea, Herode Antipase (morwa wa ga Herode yo Mogolo), o tlile Tlolaganyong mo Jerusalema, ka jalo Pilatwe o romela Jesu kwa go ene. Pelenyana ga foo, Herode Antipase o ne a dira gore Johane Mokolobetsi a kgaolwe tlhogo, mme jaanong Herode o ne a boifa fa a utlwa kaga ditiro tse di gakgamatsang tseo Jesu a di dirang, a boifa gore Jesu tota e ne e le Johane yo a neng a tsositswe mo baswing.

Jaanong, Herode o itumetse fela thata gore o tlile go bona Jesu. Seno ga se ka gore o amegile ka botshelo jwa ga Jesu kana gore o batla go dira maiteko a go itse gore a seo a latofadiwang ka sone se boammaaruri kana nnyaa. Go na le moo, o batla fela go itse fela ebile o solofela go bona Jesu a dira kgakgamatso nngwe.

Lefa go ntse jalo, Jesu o gana go kgotsofatsa go batla go itse ga ga Herode. Ebile, o didimala fela fa Herode a mmotsa dipotso. A swabisitswe ke seno, Herode le badisa ba gagwe ba dira metlae ka Jesu. Ba mo apesa seaparo se se phatsimang ba bo ba mo sotla. Morago ba mmusetsa kwa go Pilatwe. Seno se dira gore Herode le Pilatwe, bao pele e neng e le baba, ba fetoge ditsala.

Fa Jesu a boa, Pilatwe o phutha baperesiti ba bagolo, babusi ba Bajuda, le batho botlhe mmogo a bo a bolela jaana: “Lo tlisitse monna eo kwa go nna, yaka moñwe eo o shōkamisañ seshaba: me bōnañ, ke mmoditse ha pele ga lona, me ke se ka ka bōna molato opè mo monneñ eo kaga dilō tse lo reñ o molato kaga cōna; Nya, leha e le èna Herode; gonne o mmoseditse kwano go rona; me bōnañ, ga go na sepè se o se dihileñ se se chwanetseñ losho. Ke gōna ke tla mo kgwathisañ, ke mo golole.”

Ka gone, Pilatwe o buile gabedi gore Jesu ga a na molato. O iketleeditse go mo golola, ka a lemoga gore baperesiti ba mo tlisitse kwa go ene ka gonne ba mo fufegela. Mme fa Pilatwe a ntse a leka go golola Jesu, o tlhotlhelediwa ke sengwe gape se se nonofileng gore a dire jalo. Fa a ntse a le mo setulong sa gagwe sa boatlhodi, mosadi wa gagwe o romela molaetsa, a mo kopa jaana: “U se ka ua diha sepè ka monna eo o siameñ euō: ka gonne ke bogile dilō di le dintsi gompiyeno mo toroñ [e go lebegang e ne e tswa kwa Modimong] ka ntlha ea gagwè.”

Lefa go le jalo, Pilatwe o tla golola monna yo o senang molato yono jang, jaaka a itse gore o tshwanetse go dira jalo? Yohane 18:36-38; Luke 23:4-16; Mathaio 27:12-14, 18, 19; 14:1, 2; Mareko 15:2-5.

▪ Jesu o araba jang potso e a e bodiwang ya gore a ke kgosi?

▪ “Boamarure” jo Jesu a neng a senya botshelo jwa gagwe jwa selefatshe a neela bosupi ka jone ke eng?

▪ Pilatwe o atlhola jang, batho ba itshwara jang, mme Pilatwe o dira eng ka Jesu?

▪ Herode Antipase ke mang, ke ka ntlha yang fa a itumetse thata go bona Jesu, mme o mo dira eng?

▪ Ke ka ntlha yang fa Pilatwe a iketleeditse go golola Jesu?