Kgaolo 44

Go Didimatsa Setsuatsue Se Se Tshosang

JESU o tlhotse mo tirong letsatsi lotlhe, go akaretsa go ruta boidiidi mo lotshitshing mme morago o tlhalosetsa barutwa ba gagwe ditshwantsho kwa thoko. Fa bosigo bo atamela, o a re: “A re tsheleleñ kwa moseya.”

Kwa moseja mo lotshitshing lwa botlhaba lwa Lewatle la Galilea go na le kgaolo nngwe e e bidiwang Dikapolise, go tswa mo lefokong la Segerika deʹka, le le rayang “lesome,” le poʹlis, le le rayang “motsemogolo.” Metsemegolo ya Dekapolise ke boremelelo jwa tsela ya botshelo ya Segerika, lemororo kwantle ga pelaelo gape e le legae la Bajuda ba le bantsi. Lefa go ntse jalo, Jesu ga a dire dilo di le dintsi thata mo kgaolong eno. Le eleng mo loetong lono, jaaka re tla bona moragonyana, o kgoreletsega go nna lobaka lo loleele.

Fa Jesu a kopa gore ba tswe ba ye kwa lotshitshing lo longwe, barutwa ba mo tsamaisa ka mokoro. Lefa go ntse jalo, go tsamaya ga bone go a lemogiwa. Ka bofefo fela ba bangwe ba palama mekoro ya bone gore ba tsamaye le bone. Ga go kgakala go kgabaganya. Tota, Lewatle la Galilea ke letšha fela le legolo le le ka nnang boleele jwa dikilometara di le 21 le bophara jwa dikilometara di le 12 fa le leng sephara teng.

Go tlhaloganyesega sentle gore Jesu o lapile. Jalo, ka bofefo fela morago ga mokoro o sena go emelela, o rapama kwa morago ga one, o baya tlhogo ya gagwe mo mosamong, mme a bo a thulamela. Bontsi jwa baaposetoloi ba na le kitso e e molemo ya go tsamaisa mekoro, ka go bo ga ba bolo go nna ba tshwara ditlhapi thata mo Lewatleng la Galilea. Jalo ke bone ba ba tsamaisang mokoro.

Mme ono ga o nne mosepele o o motlhofo. Ka ntlha ya seemo se se bothitho sa metsi a letšha, le le ka nnang dimetara di le 210 kwa tlase ga bophaphathi jwa lewatle, le ka ntlha ya phefo e tsiditshana mo dithabeng tse di gautshwane, diphefo tse di maatla ka dinako tse dingwe di a tsubutla mme di dire gore go nne le matsubutsubu a tshoganyetso a a nonofileng mo letšheng. Seno ke se jaanong se diragalang. Ka bofefo fela makhubu a itaagana mo mokorong le go phatšhegela mo go one, mo eleng gore o gaufi le go nwela. Lefa go le jalo, Jesu o nna a ntse a robetse fela!

Banna ba lewatle bao ba ba nang le maitemogelo ba leka ka natla go laola mokoro. Kwantle ga pelaelo ba kile ba ralala matsubutsubu pele. Mme gompieno ba feletswe. Ka go tshogela matshelo a bone, ba tsosa Jesu. ‘Morena, a ga o re sepe? Re a nwela!’ ba a goa. ‘Re boloke, re tlile go kgangwa ke metsi!’

Fa a tsoga, Jesu o raya phefo le lewatle a re: “Kgaotsa, u sisibalè.” Mme phefo e e gaketseng e a ema le lewatle le a ritibala. Fa a retologela kwa barutweng ba gagwe, o a botsa: “Ana lo boihèlañ? A ga lo e se lo nne le tumèlō?”

Ka ntlha ya moo, barutwa ba tsenwa ke poifo e kgolo. “Ana motho eo ea bo e le mañ?” ba a botsanya, ‘gonne o laola le eleng diphefo le metsi, mme di a mo utlwa.’

Abo Jesu a bontsha thata e kgolo jang ne! Abo go nametsa jang ne go itse gore Kgosi ya rona e na le thata mo dilong tsa tlholego le gore fa a simolola go siamisa lefatshe le re leng mo go lone mo pusong ya Bogosi jwa gagwe, batho botlhe ba tla nna ba bolokesegile mo masuleng a a tshosang a dilo tsa tlholego!

Moragonyana ga setsuatsue se sena go kokobela, Jesu le barutwa ba gagwe ba goroga ba bolokesegile mo lotshitshing le le kafa botlhaba. Gongwe mekoro e mengwe le yone e ne ya falodiwa mo setsuatsueng se se nonofileng seo mme ya boela morago e bolokesegile. Mareko 4:35–5:1; Mathaio 8:18, 23-27; Luke 8:22-26.

▪ Dikapolise ke eng, mme e agilwe fa kae?

▪ Ke dipopo dife tsa tlholego tse di dirang gore go nne le ditsuatsue tse di maatla mo Lewatleng la Galilea?

▪ Fa barutwa ba sa kgone go ipoloka ka bokgoni jwa bone jwa go tsamaisa mekoro, ba dira eng?