Kgaolo 47

Dikeledi tsa Fetoga Boitumelo jo Bogolo

FA JAIRO a bona fa mosadi yo o tshologang madi a fodile, go tshepa ga gagwe maatla a a gakgamatsang a ga Jesu go a oketsega kwantle ga pelaelo. Pelenyana mo letsatsing leo, Jairo o ne a kopile Jesu go tla go thusa morwadie yo o rategang wa dingwaga tse 12, yo o neng a le gaufi le go swa. Lefa go ntse jalo, fa dilo di eme jalo, se Jairo a se tshogetseng thata se a diragala. Fa Jesu a santse a bua le mosadi yoo, banna bangwe ba a goroga mme ba raya Jairo ba re: “Morwadio o shule: ana u sa nntse u lapisetsañ Moruti?”

Ana mafoko ao a nyemisa moko jang ne! Akanya fela: Monna yono, yo o tlotlwang thata ke batho ba ga gabo, o felelwa ke tshepo gotlhelele fa a utlwalela ka loso lwa ga morwadie. Lefa go ntse jalo, Jesu wa ba utlwa fa ba buisana. Jalo, fa a retologela kwa go Jairo, o mo kgothatsa ka go re: “U se ka ua boiha, dumèla hèla.”

Jesu o pata monna yono yo o utlwileng botlhoko fela thata go ya kwa ga gagwe. Fa ba goroga, ba fitlhela khuduego e kgolo ya go lela le go bokolela. Go phuthegile boidiidi jwa batho, mme ba ikitaaganya ka go utlwa botlhoko. Fa Jesu a tsena mo teng, o botsa jaana: “Lo dihèlañ khuduègō yana, lo lela? ñwana ga aa shwa, o robetse.”

Fa batho ba utlwa Jesu a rialo, ba simolola go mo tshega ka tshotlo ka gonne ba itse fa mosetsanyana eleruri a sule. Lefa go ntse jalo, Jesu a re o robetse fela. Ka go dirisa dinonofo tsa gagwe tse a di filweng ke Modimo, o tla supa gore batho ba ka busediwa botshelong go tswa losong motlhofo fela jaaka ba ka tsosiwa mo borokong jo bogolo.

Jaanong Jesu o ntshetsa mongwe le mongwe kwa ntle fa e se Petere, Jakobe, Johane, le mmaagwe mosetsanyana le rraagwe fela. Go tswa foo o tsamaya le batho ba batlhano bano go ya kwa mosetsanyana o laditsweng teng. Fa a mo tshwara ka seatla, Jesu o mo raya a re: “Talitha kumi,” mo, fa go ranolwa, go rayang gore: “Morweetsana, kea gu raea, Coga.” Mme gone fela foo mosetsanyana o a tsoga a bo a simolola go tsamaya! Batsadi ba gagwe fa ba bona seo ba sala ba tseanye fela ka baka la boitumelo jo bogolo.

Fa Jesu a sena go bolela gore ngwana a fiwe sengwe go ja, o laela Jairo le mosadi wa gagwe gore ba seka ba bolelela ope se se diragetseng. Mme go sa kgathalesege se Jesu a se buang, dikgang kaga tiragalo eo di anamela mo lefelong leo lotlhe. Eno ke tsogo ya bobedi e Jesu a e dirang. Mathaio 9:18-26; Mareko 5:35-43; Luke 8:41-56.

▪ Jairo o utlwalela dikgang dife, mme Jesu o mo kgothatsa jang?

▪ Fa ba goroga kwa ga Jairo ba fitlhela boemo bofe?

▪ Ke ka ntlhayang fa Jesu a re ngwana yo o suleng o robetse fela?

▪ Ke batho bafe ba batlhano ba ba nang le Jesu ba ba iponelang tsogo eo ka matlho?