Kgaolo 73

Mosamaria Yo o Molemo

JESU a ka nna a bo a le gaufi le Bethania, motse o o ka nnang dikilometara di le tharo go tswa Jerusalema. Monna yo o itseng Molao wa ga Moshe o a mo atamela mme a mmotsa potso nngwe, a re: “Moruti, ke tla dihañ gore ke ruè botshelō yo bo sa khutleñ?”

Jesu o lemoga gore monna yono, wa agente, ga a boletse go bona tshedimosetso fela mme gonne o batla go mo leka. Maikaelelo a agente eno e ka nna ya bo e le go batla gore Jesu a arabe ka tsela eo a tla kgopisang maikutlo a Bajuda. Jalo Jesu o dira gore agente eno e itshware ka mafoko, a mmotsa a re: “Go kwadilwe eñ mo molaoñ? U bala yañ?”

Fa a araba, agente eno, e dirisa pono e e sa tlwaelegang, e tsopola go tswa mo melaong ya Modimo e e mo go Duteronome 6:5 le Lefitiko 19:18, a re: “U ratè Yehofa Modimo oa gago ka pelo eotlhe ea gago, le ka mōea otlhe oa gago, le ka thata eotlhe ea gago, le ka tlhaloganyō eotlhe ea gago; le moñwe ka wèna yaka u ithata.”

“U hetotse ka tshiamō,” Jesu o araba jalo. “Diha mo, me u tla tshela.”

Lefa go ntse jalo, agente eno, ga e a kgotsofala. Mo go ene karabo ya ga Jesu ga e a tlhamalala ka mo go lekaneng. O batla gore Jesu a mo tlhomamisetse gore dikakanyo tsa gagwe di siame le gore tsela e a tshwarang ba bangwe ka yone e siame. Ka gone, o a botsa: “Ana, moñwe ka nna e be e le mañ?”

Bajuda ba dumela gore lefoko “moñwe ka nna” le dira fela mo Bajudeng, jaaka mafoko a a mo go Lefitiko 19:18 a lebega a supa jalo. Totatota, morago le eleng moaposetoloi Petere o ne a bua jaana: “Le lona ka losi loa itse yaka e le mo go sa letlèlèlwañ motho eo e leñ Moyuda ha a ka ikōpanya le moñwe oa morahe o sele.” Jalo agente eno, gongwe le bone barutwa ba ga Jesu, ba dumela gore ba siame fa ba tshwara Bajuda ka bone fela sentle ka bopelonomi, ereka, mo ponong ya bone, bao e seng Bajuda tota e se bangwe ka bone.

Jesu a ka baakanya pono ya bone jang a sa kgopise bareetsi ba gagwe? O ba tseela kgang nngwe, e gongwe e thailweng mo sengweng se se diragetseng. “Monna moñwe [Mojuda],” Jesu o a tlhalosa, “o kile a cwa Yerusalema a hologèla kwa Yeriko; me a wèla mo dinokwaneñ; me tsa mo rutla diaparō, tsa mo itaea, tsa tsamaea tsa mo tlogèla a le gauhi le go shwa.”

“Me ga choganwa,” Jesu o a tswelela, “ka moperisiti moñwe a tla ka tsela euō; me ea re a mmōna, a mo hapoga a heta kaha ntlheñ e ñwe ea tsela. Hèla yalo le Molefi, ea re a hitlha heloñ hoñ, me a mmōna, a mo hapoga a heta kaha ntlheñ e ñwe ea tsela. Me Mosamaria moñwe ea re a etile, a tla hèla ha o gōna; me ea re a mmōna, a mo tlhomogèla pelo.”

Baperesiti ba bantsi le Molefi bao ba thusang kwa tempeleng ba nna kwa Jeriko, sekgala sa dikilometara di ka nna 23 mo tseleng e e kotsi e e tlhatlogelang kwa godimo dimetara di ka nna 900 go tswa fa ba neng ba direla gone mo tempeleng mo Jerusalema. Go ne go lebeletswe gore moperesiti le Molefi ba thuse Mojudakabone fa a le mo tlalelong. Mme ga ba dire jalo. Go na le moo, Mosamaria ene o dira jalo. Bajuda ba tlhoile Basamaria mo eleng gore bosheng jaana ba ne ba tlhapatsa Jesu ba mmitsa “Mosamaria.”

Ke eng seo Mosamaria a se dirang go thusa Mojuda? “Me a ea mo go èna,” Jesu o a bolela, “a hapa dinthō tsa gagwè, a di thèla loukwane le boyalwa yoa mofine; me a mo pèga mo peleseñ ea gagwè, me a mo isa kwa tluñ ea baeti, a mo tlamela. Me ka moshō a ntsha boshiliñ ba le banè, [mo e ka nnang tuelo ya modiri ya malatsi a mabedi], a ba naea muñ oa ntlo, me a mo raea, a re, Mo tlamèlè sentlè; me se u tla se ntshañ bogolo go mo ka ntlha ea gagwè, e tla re ke boea ke se gu lehèle.”

Morago ga go ba bolelela kgannyana eno, Jesu o ne a botsa agente eno jaana: “Ke mañ oa ba bararo ba, eo o ichupileñ a le oa ga gabō èna eo o wetseñ mo dinokwaneñ?”

A ikutlwa a sa gololesega go naya Mosamaria tlotlo, agente e araba ka tsela eno e e bonolo: “Ke eo o mo utlwetseñ botlhoko.”

“Ea u dihè yalo le wèna,” Jesu o digela jalo.

Fa Jesu a ka bo a boleletse agente ka tlhamalalo gore le batho bao eseng Bajuda le bone e ne e le bangwe ka ene, monna yono o ne a ka se dumele se a se buang mme bontsi jwa bareetsi bo ne bo tla tsaya letlhakore la gagwe mo puisanong ya gagwe le Jesu. Lefa go ntse jalo, kgang eno e e diragetseng, e ne ya dira gore go utlwale ka tsela e e ka se ganediweng gore bangwekarona ba akaretsa batho bao eseng ba lotso lwa rona kana morafe fela. Abo Jesu a na le tsela e e molemo jang ne ya go ruta! Luke 10:25-37; Ditihō 10:28; Yohane 4:9; 8:48.

▪ Ke dipotso dife tseo agente e di botsang Jesu, mme go bonala e le ka boikaelelo bofe?

▪ Bajuda ba akanya gore bangwekabone ke bomang, mme ke lebaka lefe le le gone la go dumela gore le eleng barutwa ba na le pono e e tshwanang?

▪ Jesu o ne a tlhalosa pono e e siameng jang mo e leng gore agente e ne e sa kake ya mo ganetsa?