Kgaolo 77

Kgang Kaga Boswa

BATHO ba itse ka phepafalo gore Jesu o ne a ntse a ja kwa ntlong ya Mofarasai. Jalo diketekete tsa bone di phuthegela ka kwa ntle, mme fa Jesu a tswa o ba fitlhela ba mo emetse. Go farologana le Bafarasai ba ba ganetsang Jesu ebile ba leka go mo tshwara ka sengwe se se phoso se a ka se buang, batho bano ba mo reetsa ka tlhoafalo le ka kanaanelo.

A retologela lantlha kwa barutweng ba gagwe, Jesu o bua jaana: “Lo itisè mo sebedishoñ sa Bafarisai, se e leñ boitimokanyō.” Jaaka go supilwe fa ba ntse ba ja, tsamaiso yotlhe ya bodumedi jwa Bafarasai e tletse boitimokanyo. Mme le eleng fa boikepo jwa Bafarasai bo ka bipiwa ke go bontsha ga bone tlhoafalo, e tla re kgabagare bo senolwe. “Ga go na sepè se se bipilweñ,” Jesu o a bolela, “se se se ketlañ se senolwa; leha e le se se hitlhegileñ, se se se ketlañ se itsege.”

Jesu o tswelela ka go boeletsa kgothatso eo a neng a e file ba ba 12 fa a ne a ba roma mo loetong lwa go rera lwa kwa Galilea. O bua jaana: “Se boiheñ ba ba bolaeañ mmele, me kwa moragō ba sa tlhole ba na le se ba ka se dihañ.” Ereka Modimo o sa lebale le eleng thaga e le nngwe, Jesu o tlhomamisetsa balatedi ba gagwe gore Modimo ga o kitla o ba lebala. O tlhalosa jaana: “Mogañ ba lo isañ ha pele ga ditshèkō tsa matlo a thutō, le kwa balaodiñ, le bathata, . . . Mōea o o Boitshèpō o tla lo ruta mo lobakeñ louō hèla se lo chwanetseñ go se bua.”

Monna mongwe o bua go tswa mo boidiiding. “Moruti,” o a kopa, “bua le mogolole gore a kgaoganè boshwa le nna.” Molao wa ga Moshe o bontsha gore morwa wa maitibolo o tshwanetse go amogela sebedi sa karolo ya boswa, ka jalo ga go a tshwanela go bo go na le kgotlhang. Go bonala sentle gore monna yono o batla go le gontsi go feta se a tshwanetseng go se amogela kafa molaong.

Jesu kafa tshwanelong o gana go kopanyelediwa mo go seno. “Monna, ke dihilwe emañ moatlhodi le moabi mo go lona?” o a botsa. Mme jaanong o fa boidiidi kgakololo e e molemo eno: “Tlhokomèlañ, lo bo lo itisè mo bopelotshetlheñ: gonne botshelō yoa motho ga boa èma mo letlotloñ ya dithoto tse o nañ nacō.” Ee, go sa kgathalesege gore motho a ka bo a na le dilo tse di kana kang, go tlwaelesegile gore o tla swa a di tlogela kwa morago. Go gatelela ntlha eno, le go bontsha boeleele jwa go sa itirele leina le le molemo le Modimo, Jesu o dirisa setshwantsho. O tlhalosa jaana:

“Lehatshe ya mohumi moñwe ya uñwisa segolo: Me a ithaea a re, Ke tla dihañ, ka ke sena mo ke ka bolokèlañ mauñō a me gōna? Me a re, Ke tla diha yana: ke tla rutla matlo a me a mabolokèlō, ke aga a sele, a magolo; me ke tla bolokèla mabèlè a me, le dithoto tsa me gōna. Me ke tla raea mōea oa me, ke re, Mōea, u na le dithoto di tona, di bolokecwe dinyaga di le dintsi; iketlè, u yè, u nwè, u dihè mokete. Me Modimo oa mo raea, oa re, Seeleele ke wèna, mōea oa gago o lōpiwa mo go wèna sigoñ yono; me dilō tse u di baakantseñ di tla nna tsa ga mañ?”

Fa a digela, Jesu o tlhalosa jaana: “Le èna eo o ikhumèlañ hèla, a sa humèla Modimo, o nntse hèla yalo.” Lemororo barutwa ba ka seka ba raelwa ke boeleele jwa go ikgobokanyetsa dikhumo, ba ka nna ba kgorelediwa motlhofo fela ke ditlhokafalo tsa letsatsi le letsatsi mo go direleng Jehofa ka moya otlhe. Jalo Jesu o dirisa nako eno go boeletsa kgakololo eno e e molemo e a neng a e neetse mo e ka nnang ngwaga le sephatlo pele ga foo mo Therong ya kwa Thabeng. O bua jaana, fa a retologela kwa barutweng ba gagwe, a re:

“Ke gōna ke lo raeañ, ke re, Se tlhobaeleñ kaga botshelō yoa lona, go re, lo tla ya eñ; leha e le kaga mmele, go re, lo tla apara eñ . . . Èlañ mahukubu tlhōkō, u bōnè ha a sa yale, a sa robe; ga a na letlole leha e le sebolokèlō; me Modimo oa a yesa . . . Èlañ dithunya tsa mashōma tlhōkō, kaha di golañ ka gōna; ga di dihe, ga di otlhe; me leha go nntse yalo, kea lo raea, Le èna Solomone mo kgalaleloñ eotlhe ea gagwè, o na a sa kgabe yaka señwe sa tseuō.  . .

“Me se batleñ se lo tla se yañ, le se lo tla se nwañ, le gōna lo se ka loa etsaetsèga. Gonne dilō cotlhe tse di batlwa ke merahe ea lehatshe: me Rra eno oa itse ha lo tlhōka dilō tse. Me bogolo, batlañ bogosi yoa ōna me dilō cotlhe tse, lo tla di okelediwa.”

Mafoko a ga Jesu a tla tlhoka tlhokomelo e kgolo segolobogolo ka nako ya fa go na le mathata a tsa madi. Motho yo o tlhobaelang thata ka ditlhokafalo tsa senama mme a bo a simolola go repisa mo go tlhoafaleleng dilo tsa semoya, tota, o bontsha go tlhoka tumelo mo nonofong ya Modimo ya go tlamela batlhanka ba Gagwe. Luke 12:1-31; Duteronome 21:17.

▪ E ka tswa lebaka e le lefe la go bo monna a botsa ka boswa, mme ke tlhagiso efe e Jesu a e neelang?

▪ Jesu o dirisa setshwantsho sefe, mme se kaya eng?

▪ Jesu o boeletsa kgakololo efe, mme ke ka ntlhayang fa e tshwanela?