Kgaolo 114

Selalelo sa Segopotso

FA Jesu a sena go tlhapisa barutwa ba gagwe dinao, o tsopola lokwalo lwa Pesalema 41:9, a re: “Eo o yañ senkgwè sa me, o ncholeleditse serèthè sa gagwè.” Morago, fa jaanong a simolola go tshwenyega mo moyeng, o tlhalosa jaana: “Moñwe oa lona o tla nkōka.”

Baaposetoloi ba simolola go utlwa botlhoko mme ba bua le Jesu jaana ka bongwe ka bongwe: “A ke nna?” Judase Isekariota le ene o botsa jalo. Johane yo a rapameng fa thoko ga ga Jesu mo tafoleng, o ikaega ka sehuba sa ga Jesu a bo a botsa a re: “Morèna ke mañ?”

“Ke moñwe oa ba ba shomè le bobedi, eo o inañ le nna mo seyaneñ,” Jesu o a araba. “Gonne Morwa Motho oa tsamaea, hèla yaka go kwadilwe kaga gagwè: me go bo go latlhèga monna eo o ōkañ Morwa Motho! go ka bo go le molemō mo monneñ eouō ha a ka bo a se ka a tsalwa.” Morago ga foo, Satane o tsena gape mo go Judase, a dirisa pelo ya gagwe e e neng e fetogile e e boikepo. Moragonyana mo bosigong joo, Jesu o bitsa Judase sentle a re ke “ñwana oa tatlhègō.”

Jesu jaanong o raya Judase a re: “Se u se dihañ, u se dihè ka bonakō.” Ga go ope wa baaposetoloi ba bangwe yo o tlhaloganyang gore Jesu o kaya eng ka seo. Bangwe ba akanya gore ereka Judase e le ene a tsholang letlole la madi, Jesu o mo raya a re: “A eè go rèkèla modihō dilō tse ba di tlhōkañ,” kana gore a tsamaye a ye go naya batlhoki sengwe.

Fa Judase a sena go tsamaya, Jesu o simolola moletlo mongwe o mosha gotlhelele, kana segopotso le barutwa ba gagwe ba babotlana. O tsaya senkgwe, o rapela a se lebogela, oa se ngathoganya, a bo a se ba naya a re: “Tsaeañ, lo yè.” O tlhalosa jaana: “Se ke mmele oa me, o o ntshediwañ lona; dihañ mo, lo nkgopolè ka gōna.”

Fa mongwe le mongwe a sena go ja senkgwe, Jesu o tsaya senwelo sa beine, se go lebegang e le senwelo sa bonè se se dirisiwang mo tirelong ya Tlolaganyo. Le sone o rapela a se lebogela, a se ba naya, o ba laela gore ba se nwe a bo a re: “Senwèlō se, ke kgōlaganō e ncha mo madiñ a me, eboñ a a chololèlwañ lona.”

Ebile tota seno tota ke segopotso sa loso lwa ga Jesu. Jaaka Jesu a bolela se tshwanetse go dirwa ngwaga mongwe le mongwe ka Nisane 14, go mo gopola. Se tla gakolola baketeki ba sone ka seo Jesu le Rraagwe wa selegodimo ba se dirileng go golola batho mo katlholong ya loso. Mo Bajudeng ba ba fetogang balatedi ba ga Keresete moletlo ono o tsaya sebaka sa Tlolaganyo.

Kgolagano e ntšha eo e tlhomiwang ka madi a a tsholotsweng a ga Jesu e tsaya sebaka sa kgolagano ya Molao. Jesu Keresete ke motsereganyi wa yone fa gare ga ditlhopha tse pedi—Jehofa Modimo a le kafa letlhakoreng le lengwe, le Bakeresete ba ba tloditsweng ka moya ba ba 144 000 ba le kafa letlhakoreng le lengwe. Kwantle ga go dira gore go nne le boitshwarelo jwa dibe, kgolagano eno e letla gore go bopiwe morafe wa selegodimo wa baperesiti ba dikgosi. Mathaio 26:21-29; Mareko 14:18-25; Luke 22:19-23; Yohane 13:18-30; 17:12; 1 Bakorintha 5:7.

▪ Jesu o tsopola boperofeti bofe jwa Bibela jo bo mabapi le mongwe wa ba a nang nabo, mme o bo dirisa jang?

▪ Ke ka ntlhayang fa barutwa ba utlwa botlhoko thata jaana, mme mongwe le mongwe o botsa jang?

▪ Jesu o raya Judase a re a dire eng, mme barutwa ba bangwe ba tlhaloganya ditaolo tseno jang?

▪ Jesu o ba itsise ka moletlo ofe fa Judase a sena go tsamaya, mme boikaelelo jwa one ke bofe?

▪ Ke ditlhopha dife tse di akarediwang mo kgolaganong e ntšha, mme kgolagano eno e diragatsa eng?