Kgaolo 116

Kgothatso E A E Fang Baaposetoloi Ba Gagwe Fa A Tsamaya

MOLETLO wa segopotso o fedile, mme Jesu le baaposetoloi ba gagwe ba santse ba le mo ntlwaneng e e kwa godimo. Lemororo Jesu a saletswe fela ke nako e khutshwane gore a tsamaye, o santse a na le dilo tse dintsi tse a tla di buang. “A dipelo tsa lona di se huduege,” o ba gomotsa jalo. “Dumela[ng] mo Modimoñ.” Mme o oketsa ka go re: “Dumèlañ le mo go nna.”

“Mo tluñ ea ga Rrè go na le mannō a le mantsi,” Jesu o a tswelela. “Ke ea go lo baakanyetsa bonnō . . . gore kwa ke gōna le lona lo nnè gōna. Me kwa ke eañ gōna, lo itse tsela ea gōna.” Baaposetoloi ga ba lemoge gore Jesu o bua ka go tsamaya a ya kwa legodimong, ka jalo Thomase o botsa jaana: “Morèna, ga re itse kwa u eañ gōna; kana tsela re e itse yañ?”

“Ke nna tsela, le boamarure, le botshelō,” Jesu o a araba. Ee, motho a ka tsena mo ntlong ya selegodimo ya ga Rara fela ka go mo amogela le go latela tsela ya gagwe ya botshelo ka gonne, jaaka Jesu a bolela: “Ga go tle opè mo go Rara ha e se ka nna.”

“Morèna re bontshè Rara,” Filipo o kopa jalo, “me go tla bo go re lekanye.” Go lebega Filipo a batla gore Jesu a ba direle sesupo sengwe se se bonalang ka Modimo, jaaka se se neng sa supiwa mo metlheng ya bogologolo mo diponatshegelong tsa ga Moshe, Elija, le Isaia. Mme tota, baaposetoloi ba na le sengwe se se botoka thata go na le diponatshegelo tsa mofuta oo, jaaka Jesu a tlhokomedisa: “A ke go re, ke nntse le lona lobaka lo lo kana kana, me a ga u e se u nkitse, Filipo? Eo o mponyeñ, o bonye Rara.”

Jesu o na le botho jo bo tshwanang fela le jwa ga Rraagwe mo e leng gore go tshela le ene le go mo elatlhoko, totatota, go tshwana fela le go bona Rraagwe. Lefa go le jalo, Rara o mogolo mo go Morwa, jaaka Jesu le ene a dumalana le seo ka go re: “Mahoko a ke a buañ le lona, ga ke a ipuise ka nosi.” Jesu ka tshwanelo o naya Rraagwe wa selegodimo tlotlo ka dithuto tsa gagwe.

Abo go kgothatsa jang ne mo baaposetoloing go utlwa Jesu jaanong a ba raya a re: “Eo o dumèlañ mo go nna, ditihō tse ke di dihañ, le èna o tla di diha; me o tla diha ditihō tse di kgolo go heta tse”! Jesu ga a reye gore balatedi ba gagwe ba tla nna le nonofo e kgolo ya go dira dikgakgamatso tse dintsi go mo feta. Nnyaa, mme o raya gore ba tla nna mo bodiheding ka lobaka lo loleelenyana, ba dira mo lefelong le legolwane, le mo bathong ba bantsi.

Jesu ga a ne a latlha barutwa ba gagwe morago ga fa a sena go tsamaya. “Ha lo ntōpa señwe hèla ka leina ya me,” o a ba solofetsa, “shōna ke tla se diha.” Mo godimo ga moo, o bua jaana: “Ke tla rapèla Rara, me o tla lo naea Mogomotsi o sele, gore a nnè le lona ka bosakhutleñ, Eboñ Mōea oa boamarure.” Moragonyana, fa a sena go tlhatlogela kwa legodimong, Jesu o tshololela barutwa ba gagwe moya o o boitshepo, ene mothusi o sele yoo.

Jesu o setse a le gaufi le go tsamaya, jaaka a re: “E tla re kwa pelenyana, lehatshe le bo le sa tlhole le mpōna.” Jesu o tla bo a le sebopiwa sa semoya se go senang motho ope yo o ka se bonang. Mme Jesu o solofetsa baaposetoloi ba gagwe ba ba ikanyegang gape jaana: “Me lona lo bo lo nntse lo mpōna: ereka ke tshedile, le lona lo tla tshela.” Ee, Jesu ga a ne a iponatsa mo go bone fela a le mo sebopegong sa motho morago ga go tsosiwa ga gagwe mo baswing mme fa nako e ntse e tsamaya o tla ba tsosetsa mo botshelong kwa go ene kwa legodimong jaaka dibopiwa tsa semoya.

Jesu jaanong o ba naya taolo eno e e motlhofo: “Eo o nañ le ditaolō tsa me, a di tshegetsa, ke èna eo o nthatañ: me eo o nthatañ, o tla ratwa ke Rrè, le nna ke tla mo rata, me ke tla mo ipontsha.”

Fa a rialo moaposetoloi Judase, yoo gape a bidiwang Thadaeo, o mo tsena ganong a re: “Morèna, go dihile yañ, ka u tla ipontsha rona, me eseñ lehatshe?”

“Ha motho a nthata,” Jesu o a fetola, “o tla tshegetsa lehoko ya me: me Rrè o tla mo rata . . . Eo o sa nthateñ, ga a tshegetse mahoko a me.” Go farologana le barutwa ba gagwe ba ba kutlo, lefatshe le itlhokomolosa dithuto tsa ga Keresete. Ka jalo ga a le itshenolele.

Jesu o ile a ruta baaposetoloi ba gagwe dilo tse dintsi ka nako ya bodihedi jwa gagwe jwa mo lefatsheng. Ba tla kgona go di gakologelwa tsotlhe jang, segolobogolo ka jaana, le go fitlha jaanong ba palelwa ke go tlhaloganya go le kalo? Ka boitumelo, Jesu o ba solofetsa jaana: “Mogomotsi, eboñ Mōea o o Boitshèpō, eo Rara o tla mo romañ ka leina ya me, èna o tla lo ruta dilō cotlhe, me o tla lo gakolola cotlhe tse ke di buileñ le lona.”

Jesu o bua gape jaana a ba gomotsa: “Kagishō ke e tlogèla le lona . . . A dipelo tsa lona di se huduege.” Ke boammaaruri gore Jesu o a tsamaya, mme o tlhalosa jaana: “Ha lo no lo nthata, lo no lo tla itumèla, ka go bo ke ea kwa go Rara: gonne Rara o mogolo bogolo go nna.”

Nako e Jesu a santseng a tla e nna le bone e khutshwane. “Ga nketla ke tlhōla ke bua segolo le lona,” o bua jalo, “gonne kgōsana ea lehatshe ee tla: me ga e na sepè mo go nna.” Satane Diabolo, yo a neng a kgona go tsena mo go Judase a bo a mo fenya, ke ene kgosana ya lefatshe. Mme Jesu ga a na bokoa bope fela jwa boleo joo Satane a ka bo dirisang go mo dira gore a seka a direla Modimo.

Go Ipelela Botsalano jo Bogolo

Jesu o ne a ntse a kgothatsa baaposetoloi ba gagwe a bua le bone ka masisi kwa bothokong morago ga dijo tsa segopotso. E ka tswa e le morago ga bosigogare. Ka jalo Jesu o ba rotloetsa ka go re: “Nanogañ re cweñ mono.” Lefa go ntse jalo, pele ba tsamaya, Jesu a tlhotlhelediwa ke lorato lwa gagwe mo go bone, mme o tswelela a ntse a bua a ba bolelela setshwantsho se se tlhotlheletsang tota.

“Ke nna mofine oa amarure, me Rrè ke èna Mmaakanyi oa tshimo,” o simolola jalo. Molemi yo Mogolwane, Jehofa Modimo, o ne a jala mofine ono wa tshwantshetso fa a ne a tlotsa Jesu ka moya o o boitshepo fa a ne a kolobediwa mo letlhabuleng la 29 C.E. Mme Jesu o tswelela go bontsha gore mofine o tshwantshetsa sengwe se segolwane fa ene, a ba tlhokomedisa jaana: “Kala ñwe le ñwe e e mo go nna, e e sa uñweñ, oa e tlosa: me kala ñwe le ñwe e e uñwañ, oa e ntlahatsa, gore e uñwè bogolo. . . . Yaka kala e sa kake ea uñwa ka eosi, ha e sa nne mo mofineñ; go nntse yalo le lona, ha lo sa nne mo go nna. Ke nna mofine, lona lo dikala.”

Baaposetoloi le ba bangwe ba fetoga dikala tsa mofine malatsi a le 51 moragonyana ka Pentekosete fa ba tshololelwa moya o o boitshepo. Kgabagare, batho ba le 144 000 ba fetoga dikala tsa mofine ono wa tshwantshetso. Bano mmogo le kutu ya mofine ono, ebong Jesu Keresete, ba dira mofine wa tshwantshetso oo o ntshang maungo a Bogosi jwa Modimo.

Jesu o tlhalosa sekopololo sa go ntsha maungo jaana: “Eo o nnañ mo go nna, le nna mo go èna, ke èna eo o uñwañ segolo: gonne kwa ntlè ga me ga lo kake loa diha sepè.” Lefa go ntse jalo, Jesu o bolela gore fa motho a palelwa ke go ntsha maungo, “o latlhèlwa kwa ntlè yaka kala, me e omelele; me batho ba di kgobokanye ba di latlhèle mo moleloñ, me di yewe ke molelō.” Kafa letlhakoreng le lengwe, Jesu o solofetsa jaana: “Ha lo nna mo go nna, le mahoko a me a nna mo go lona, lōpañ se lo se ratañ, me lo tla se dihèlwa.”

Mo godimo ga moo, Jesu o raya baaposetoloi a re: “Rrè o galalediwa ke mo, ke go re, ha lo uñwa segolo; me yalo lo tla nna barutwa ba me.” Loungo loo Modimo o lo batlang mo dikaleng ke gore di supe dinonofo tse di tshwanang le tsa ga Keresete, segolobogolo lorato. Mo godimo ga moo, ereka Keresete e ne e le mmoledi wa Bogosi jwa Modimo, maungo a a tlhokegang gape a akaretsa tiro ya go dira barutwa jaaka a ne a dira.

“Lo tla nna mo loratoñ lwa me,” Jesu jaanong o ba kgothatsa jalo. Lefa go le jalo, baaposetoloi ba gagwe ba ka dira seo jang? “Ha lo tshegetsa ditaolō tsa me,” o bolela jalo, “lo tla nna mo loratoñ loa me.” Fa a tswelela, Jesu o tlhalosa jaana: “Taolō ea me ke e, gore lo ratanè, hèla yaka le nna ke lo ratile. Ga go opè eo o nañ le loratō lo lo hetañ lo, ha motho a ka beèla ditsala tsa gagwè botshelō yoa gagwè.”

Jesu o tlile go supa lorato lono ka go ntshetsa baaposetoloi ba gagwe botshelo jwa gagwe, mmogo le ba bangwe botlhe bao ba tla dumelang mo go ene mo diureng di sekae tse di tlang. Sekai sa gagwe se tshwanetse go tlhotlheletsa balatedi ba gagwe go ratana ka lorato lo lo tshwanang lwa go intshetsa ba bangwe setlhabelo. Lorato lono lo tla ba supa gore ke bomang, fela jaaka Jesu a ile a bua pelenyana a re: “Batho botlhe ba tla itse ha lo le barutwa ba me ka mo, ha lo ratana.”

Fa a supa gore bao e leng ditsala tsa gagwe ke bomang, Jesu o bua jaana: “Lona lo ditsala tsa me, ha lo diha dilō tse ke di lo laolèlañ. Ga ke tlhole ke lo bitsa batlhanka; gonne motlhanka ga a itse se morèna oa gagwè o se dihañ: me ke lo biditse ditsala; gonne dilō cotlhe tse ke di utlwileñ mo go Rrè, ke di lo itsisitse.”

Abo seo e le kamano ya botlhokwa jang ne e motho o ka nnang nayo—go nna ditsala tse di atamalaneng thata le Jesu! Mme gore ba tswelele ba ipelela kamano eo, balatedi ba gagwe ba tshwanetse go “uñwa.” Fa ba dira jalo, Jesu a re, “se lo se lōpañ Rara, leha e ka nna eñ, ka leina ya me, [o tla se lo naya].” Eleruri seo ke tuelo e kgolo ya go ungwa maungo a Bogosi! Morago ga go rotloetsa barutwa ba gagwe gape gore ba “ratanè,” Jesu o ba tlhalosetsa gore lefatshe le tla ba ila. Lefa go le jalo, o ba gomotsa jaana: “Ha lehatshe le lo ila, loa itse ha le nkidile pele, le e se le lo ile.” Morago Jesu o senola lebaka la go bo lefatshe le tlhoile balatedi ba gagwe ka go re: “Ereka lo se ba lehatshe, me ke lo itshenketse mo lehatshiñ, ke gōna lehatshe le lo ilañ.”

Fa a tlhalosa ka mo go oketsegileng lebaka la go bo ba tlhoilwe ke lefatshe, Jesu o tswelela a re: “Dilō cotlhe tse, ba tla di lo dihèla ka ntlha ea leina ya me, ka go bo ba sa itse [Jehofa Modimo] eo o nthomileñ.” Totatota dikgakgamatso tseo Jesu a di dirileng di pega bao ba mo tlhoileng molato, jaaka a lemotsha ka go re: “Ha ke ka bo ke se ka ka diha mo go bōnè ditihō tse opè o sele o se kañ a di diha, ba ko ba sena boleo: me yanoñ ba mponye, me ba bile ba idile nna le Rrè.” Ka gone, jaaka Jesu a bua, go diragadiwa lokwalo lo lo reng: “Ba nkidile ka boomo hèla.”

Jaaka a ne a dira pelenyana, Jesu o ba gomotsa gape ka go ba solofetsa go ba romelela mogomotsi, moya o o boitshepo, oo eleng maatla a a dirang a a nonofileng a Modimo. “Èna o tla shupa kaga me: Me le lona loa shupa.”

Kgothatso E Nngwe Gape ya go Laela

Jesu le baaposetoloi ba ipaakanyeditse go tswa mo ntlwaneng e e kwa godimo. “Dilō tse ke di buile le lona gore lo se ka loa kgopisiwa ke batho,” o tswelela jalo. Morago o ba naya tlhagiso e e masisi eno: “Ba tla lo kgaola mo matluñ a thutō: E, motlha oè tla, o moñwe le moñwe eo o lo bolaeañ ka ōna, o tla gopola, go re, o dihèla Modimo.”

Tlhagiso eno e lebega e tshwentse baaposetoloi thata. Lemororo Jesu pelenyana a ne a rile lefatshe le tla ba ila, ga a ka a re ba ne ba tla bolawa. “Dilō tse ga kea ka ka di bua le lona mo tshimologoñ,” Jesu o a tlhalosa, “ka go bo ke ne ke na le lona.” Lefa go le jalo, abo go le molemo jang ne gore a ba neele tshedimosetso eno go sa le gale pele a tsamaya!

“Me yanoñ,” Jesu o a tswelela, “ke ea kwa go èna eo o nthomileñ; me ga go opè oa lona eo o mpotsañ, go re, U ea kae?” Pelenyana mo bosigong joo, ba ne ba kile ba mmotsa gore o ya kae, mme jaanong ba tshwenyegile tota ka seo a sa tswang go se ba bolelela mo ba palelwang ke go mmotsa gape kaga seno. Jaaka Jesu a bolela: “Bohutsana bo tletse ka dipelo tsa lona, ka go bo ke lo boleletse dilō tse.” Baaposetoloi ba hutsafetse eseng fela ka gonne ba utlwile gore ba tlile go bogisiwa botlhoko le go bolawa mme ka gonne Mong wa bone o a ba tlogela.

Ka jalo Jesu o tlhalosa jaana: “Go ka nna molemō kaga lona ha ke tsamaea: gonne ha ke sa tsamaee, Mogomotsi ga a ketla a tla mo go lona; me ha ke tsamaea, ke tla mo roma mo go lona.” Jaaka motho, Jesu ga a kake a nna mo mafelong a mabedi ka nako e le nngwe, mme fa a le kwa legodimong, a ka kgona go romelela balatedi ba gagwe mothusi, eleng moya o o boitshepo wa Modimo gongwe le gongwe koo ba ka tswang ba le gone mo lefatsheng. Ka gone ba tla solegelwa molemo fa Jesu a sena go tsamaya.

Jesu o bolela gore moya o o boitshepo o tla “senolèla lehatshe molato kaga boleo, le kaga tshiamō, le kaga katlholō.” Boleo jwa lefatshe joo eleng go palelwa ga lone go dumela mo go Morwa Modimo, bo tla senolwa. Mo godimo ga moo, bosupi jo bo tlhatswang pelo jwa gore Jesu o siame bo tla bonala fa a tlhatlogela kwa go Rara. Mme go palelwa ga ga Satane le lefatshe la gagwe le le boikepo go roba bothokgami jwa ga Jesu ke bosupi jo bo tlhatswang pelo jwa gore kgosana ya lefatshe leno e atlhotswe mo go botlhoko.

“Ke sa na le dilō di le dintsi go di bua le lona,” Jesu o a tswelela, “me ga lo kake loa di ichokèla gompiyeno.” Ka gone Jesu o ba solofetsa gore fa a ba tshololela moya o o boitshepo, oo eleng maatla a a dirang a Modimo, one o tla ba kaela gore ba tlhaloganye dilo tse go ya kafa ba kgonang go di tshwara ka gone.

Baaposetoloi segolobogolo ba palelwa go tlhaloganya gore Jesu o tla swa a bo a bonala mo go bone gape fa a sena go tsosiwa mo baswing. Ka jalo ba botsana ba re: “Mo o go buañ le rona ke go reñ, a re, E tla re ka lobakanyana, lo bo lo sa mpone; me gapè, ka lobakanyana, me lo tla mpōna: gapè, a re, Ka go bo ke ea kwa go Rara?”

Jesu o lemoga gore ba batla go mmotsa dipotso, ka jalo o tlhalosa jaana: “Amarure, amarure, Kea lo raea, lona lo tla lela, lo hutsahala, me lehatshe le tla itumèla: lo tla nna le bohutsana, me bohutsana yoa lona bo tla hetoga boitumèlō.” Moragonyana mo go lone letsatsi leo, mo thapameng, fa Jesu a bolawa, baeteledipele ba lefatshe ba bodumedi baa itumela, mme barutwa ba hutsafetse. Lefa go ntse jalo, bohutsana jwa bone bo fetoga boitumelo fa Jesu a tsoga mo baswing! Mme ba tswelela ba ntse ba itumetse fa a ba naya maatla a go nna basupi ba gagwe ka go ba tshololela moya o o boitshepo wa Modimo ka Pentekosete!

Fa a bapisa boemo jwa baaposetoloi le jwa mosadi fa a le mo ditlhabing tsa pelegi, Jesu o bua jaana: “Mosadi o na le bohutsana a le mo go belegeñ, ka go bo lobaka loa gagwè lo tsile.” Lefa go le jalo Jesu o lemoga gore ga a sa tlhola a gakologelwa pitlagano ya gagwe fa a setse a tshotse ngwana, mme o kgothatsa barutwa ba gagwe, a re: “Ke gōna le lona lo na le bohutsana gompiyeno: me ke tla ba ke lo bōna [fa ke sena go tsosiwa], me dipelo tsa lona di tla itumèla, me ga go opè eo o tla lo tlosetsañ boitumèlō yoa lona.”

Go fitlha ka nako eno, baaposetoloi ga ba ise ba kope sepe ka leina la ga Jesu. Mme jaanong a re: “Ha lo lōpa Rara señwe, o tla se lo naea ka leina ya me. . . . Gonne Rara ka esi oa lo rata, ka gonne lo nthatile, lo bile lo dumetse ha ke cwa kwa go Rara. Ka cwa kwa go Rara, me ke tsile mo lehatshiñ: gapè, ke tlogèla lehatshe, me ke ea kwa go Rara.”

Mafoko a ga Jesu a kgothatsa baaposetoloi tota. “Rea dumèla ka mo ha u nu u cwa Modimoñ,” ba bua jalo. “A gompiyeno loa dumèla?” Jesu o a botsa. “Bōnañ, lobaka loè tla, E, lo setse lo hitlhile, lo lo tla haladiwañ ka lōna, moñwe le moñwe a ea ga gabō, me lo ntlogèla ke le nosi.” Lemororo seno se lebega se ka se nne jalo, seno se direga pele bosigo bo sa!

“Dilō tse ke di buile le lona, gore lo nnè le kagishō mo go nna.” Jesu o konela jaana: “Mo lehatshiñ lo na le pitlaganō: me nametsègañ; ke hentse lehatshe.” Jesu o fentse lefatshe ka go diragatsa go rata ga Modimo ka boikanyegi go sa kgathalesege sengwe le sengwe seo Satane le lefatshe la gagwe ba neng ba leka go se dira go roba bothokgami jwa ga Jesu.

Thapelo ya Bofelo mo Ntlwaneng E E kwa Godimo

Ereka Jesu a tlhotlhelediwa ke lorato lo lo boteng lo a ratang baaposetoloi ba gagwe ka lone, o ntse a ba baakanyetsa go tsamaya ga gagwe mo go atamelang. Jaanong, fa a sena go ba kgothatsa le go ba gomotsa ka lobaka lo loleele, o lelalela kwa legodimong a bo a lopa Rraagwe jaana: “Galaletsa Morwao, gore Morwao a gu galaletse: Hèla yaka u mo neile taolō mo nameñ eotlhe, e tle e re bōnè ba u ba mo neileñ leha e ka ne e le mañ, a ba neè botshelō yo bo sa khutleñ.”

Abo Jesu a simolola setlhogo se se tshikinyang maikutlo jang ne—botshelo jo bosakhutleng! Ereka a neilwe “taolō mo nameñ eotlhe,” Jesu a ka fetisetsa melemo ya setlhabelo sa gagwe sa thekololo mo bathong ba ba swang. Lefa go le jalo, o naya fela bao Rraagwe a ba amogelang “botshelō yo bo sa khutleñ.” Jesu o tswelela ka thapelo ya gagwe a buelela setlhogo seno sa botshelo jo bosakhutleng ka go re:

“Botshelō yo bo sa khutleñ ke yo, gore ba gu itse, wèna, Modimo o o osi, o o boamarure, le èna eo u mo romileñ, eboñ Yesu Keresete.” Ee, re ka bolokiwa fela fa re ka nna le kitso kaga Modimo mmogo le Morwawe. Mme go tlhokega go le gontsi go na le go ba itse fela.

Motho o tshwanetse go ba itse a atamalana nabo, a tlhagolela botsalano jwa kutlwisiso le bone. Motho o tshwanetse go nna le boikutlo jo bo tshwanang le jwa bone ka dilo mme a lebe dilo go ya ka pono ya bone. Mme mo godimo ga tsotlhe, motho o tshwanetse go leka thata go etsa dinonofo tsa bone tse di sa tshwaneng le dipe fa a dirisana le ba bangwe.

Morago Jesu o rapela jaana: “Ke gu galaleditse mo lehatshiñ, ka ke weditse tihō e u e nneetseñ go e diha.” Ereka go fitlha jaanong a weditse tiro ya gagwe ebile a tshepa gore o tla atlega mo isagweng, o lopa jaana: “Rara, A u ko u nkgalaletsè nau, ka kgalalèlō e ke ne ke nntse ke na naeō nau pele lehatshe le e se le nne.” Ee, jaanong o kopa gore a newe kgalalelo e a neng a na nayo pele ya selegodimo ka go tsosiwa mo baswing.

Fa a sobokanya tiro ya gagwe e kgolo ya mo lefatsheng, Jesu o bua jaana: “Leina ya gago ke le bontshitse batho ba u ba lomolotseñ mo lehatshiñ ua ba nnaea: e ne e le ba gago, me ua ba nnaea, me ba tshegeditse lehoko ya gago.” Jesu o ne a dirisa leina la Modimo, Jehofa, mo bodiheding jwa gagwe a bo a itsise kafa le tshwanetseng go bidiwa ka gone, mme o ne a dira go le gontsi go feta go itsise baaposetoloi ba gagwe leina la Modimo. Gape o ne a oketsa kitso ya bone le go anaanela ga bone Jehofa, botho jwa gagwe, le maikaelelo a gagwe.

Ereka a tsaya Jehofa jaaka yo Mogolo mo go ene, Yoo a neng a dira kafa tlase ga gagwe, Jesu o ipolela ka boikokobetso a re: “Mahoko a u a nneileñ ke a neile bōnè; me ba a chotse, me ba itsile ha rure ke cwa kwa go wèna, ba bile ba dumetse ha u nthomile.”

Fa Jesu a farologanya balatedi ba gagwe le batho ba bangwe botlhe, o rapela jaana: “Kea ba rapèlèla: ga ke rapelele lehatshe, ha e se bōnè ba u ba nneileñ . . . Ke rile ke sa nntse ke nna nabō, ka ba boloka . . . ka ba hemèla, me go se ka ga latlhèga opè oa bōnè, ha e se ñwana oa tatlhègō hèla,” ebong Judase Isekariota. Judase ka nako eno o mo tirong ya gagwe e e tlhabisang ditlhong ya go oka Jesu. Ka gone, Judase o diragatsa Dikwalo a sa itse.

“Lehatshe ya ba ila,” Jesu o tswelela a ntse a rapela. “Ga ke rapele gore u ba ntshè mo lehatshiñ, ha e se gore u ba dibèlè mo go eo o boshula. Bōnè ga se ba lehatshe, hèla yaka nna ke se oa lehatshe.” Balatedi ba ga Jesu ba mo lefatsheng leo e leng mokgatlho wa batho o o rulagantsweng o o busiwang ke Satane, mme ba lomologane ebile ba tshwanetse go nna ka metlha ba lomologane le lone le boikepo jwa lone.

“Ba itshepisè mo boamarureñ,” Jesu o a tswelela, “lehoko ya gago ke boamarure.” Jesu fano o bitsa Dikwalo tse di tlhotlheleditsweng tsa Sehebera tseo a neng a ntse a tsopola mo go tsone, “boamarure.” Mme seo a neng a se ruta barutwa ba gagwe le seo ba neng ba se kwala moragonyana ka tlhotlheletso jaaka Dikwalo tsa Bokeresete tsa Segerika, ka mo go tshwanang ke “boamarure.” Boammaaruri jono bo ka dira motho gore a itsheke, bo ka fetola botshelo jwa gagwe gotlhelele, mme jwa mo dira motho yo o lomologaneng le lefatshe.

Jesu jaanong ga a rapelele ‘bone bosi, me o rapelela le ba ba dumelang mo go ene ka lefoko la bone.’ Ka jalo Jesu o rapelela bao ba tla nnang balatedi ba gagwe ba ba tloditsweng le barutwa ba bangwe ba gagwe ba mo isagweng bao ba neng ba santse ba tla phuthiwa go nna ‘letsomane le le lengwe fela.’ Mme botlhe bano o ba kopela eng? “Gore ba nnè bañwe hèla botlhe; hèla yaka wèna Rara u le mo go nna; . . . gore ba nnè bañwe hèla, yaka rona re le moñwe hèla.” Jesu le Rraagwe totatota ga se motho a le mongwe, mme ba dumalana mo dilong tsotlhe. Jesu o rapelela gore balatedi ba gagwe ba ipelele bongwefela jono gore “lehatshe le itse ha u nthomile, le gore, u rata bōnè, hèla yaka u ratile nna.”

Jesu jaanong o kopa a kopela bao ba neng ba tla nna balatedi ba gagwe ba ba tloditsweng kwa go Rraagwe wa selegodimo. O ba kopela eng? “Gore kwa ke gōna, le bōnè ka bo ke na nabō; gore ba bōnè kgalalèlō ea me, e u e nneileñ: gonne u nthatile pele ga tlhōlègō ea lehatshe,” ke gore, fa Adame le Efa ba ne ba nna le ngwana wa bone wa ntlha. Modimo o ne o ntse o rata Morwawe yono yo o tsetsweng a le esi, yo a neng a nna Jesu Keresete, bogologolo pele ga foo.

Fa a konela thapelo ya gagwe, Jesu o gatelela gape jaana: “Ke ba itsisitse leina ya gago, me ke tla nna ke le ba itsise; gore loratō lo u nthatileñ ka lōna lo nnè mo go bōnè, le nna ke nnè mo go bōnè.” Fa baaposetoloi ba ithuta leina la Modimo, seo se ne se kopanyeletsa go itse lorato lwa Modimo ka namana. Yohane 14:1–17:26; 13:27, 35, 36; 10:16; Luke 22:3, 4; Ekesodo 24:10; 1 Dikgosi 19:9-13; Isaia 6:1-5; Bagalatia 6:16; Pesalema 35:19; 69:4; Diane 8:22, 30.

▪ Jesu o ya kae, mme Thomase o arabiwa jang mabapi le tsela ya go ya koo?

▪ Go ya ka kopo ya gagwe, Filipo go lebega a batla gore Jesu a dire eng?

▪ Ke ka ntlha yang fa motho yo o boneng Jesu a bone le Rara?

▪ Balatedi ba ga Jesu ba dira ditiro tse di fetang tsa gagwe jang?

▪ Satane ga a na kafa a ka fenyang Jesu ka gone ka tsela efe?

▪ Jehofa o ne a jala leng mofine wa tshwantshetso, mme batho ba bangwe ba fetoga karolo ya mofine leng le gone jang?

▪ Kgabagare, mofine wa tshwantshetso o nna le dikala di le kae?

▪ Ke loungo lofe lo Modimo o lo batlang mo dikaleng?

▪ Re ka nna ditsala tsa ga Jesu jang?

▪ Ke ka ntlhayang fa lefatshe le ila balatedi ba ga Jesu?

▪ Jesu o tlhagisa baaposetoloi ba gagwe ka eng se se ba tshwenyang maikutlo?

▪ Ke ka ntlhayang fa baaposetoloi ba ne ba palelwa ke go botsa Jesu kaga lefelo le a neng a ya kwa go lone?

▪ Baaposetoloi ba palelwa ke go tlhaloganya eng segolobogolo?

▪ Jesu o dira setshwantsho sefe go supa gore boemo jwa baaposetoloi bo tla fetoga go tswa go jwa bohutsana go nna jwa boitumelo?

▪ Jesu a re baaposetoloi ba tla tloga ba dira eng?

▪ Jesu o fenya lefatshe jang?

▪ Jesu o ile a newa “taolō mo nameñ eotlhe” ka tlhaloganyo efe?

▪ Go kaya eng go itse Modimo le Morwawe?

▪ Jesu o ne a itsise leina la Modimo ka ditsela dife?

▪ “Boamarure” ke eng, mme bo ka ‘itshekisa’ Mokeresete jang?

▪ Modimo, Morwawe le baobamedi botlhe ba boammaaruri ba bangwe fela jang?

▪ ‘Lefatshe le ne la nna gone’ leng?