Kgaolo 124

O A Ba Newa Ba bo Ba Tsamaya Nae

FA PILATWE a angwa maikutlo ke seriti se Jesu a nang le sone lemororo a ntse a tlhokofadiwa, o leka gape go mo golola, baperesiti ba bagolo ba shakgala le go feta. Ga ba batle go letla sepe go kgoreletsa boikaelelo jwa bone jo bo bosula. Ka jalo ba tlhaeletsa gape jaana: “Mmapolè, mmapolè.”

“Mo itseeleñ, lo mmapolè,” Pilatwe o araba jalo. (Phapaanong le kafa ba neng ba ntse ba bua ka gone pele, jaanong ba re Bajuda ba letlelesega go bolaya dinokwane tse di nang le melato ya bodumedi e e ka tsewang fa e le masisi.) Morago, mo e ka nnang lekgetlo la botlhano, Pilatwe o bolela gape gore Jesu ga a na molato ope ka go bua a re: “Ga ke bone molato opè mo go èna.”

Fa Bajuda ba bona melato ya bone ya sepolotiki e ba neng ba e mo pega e sa kgone go nna le matswela, ba boela gape mo go mo pegeng molato wa bodumedi wa go tlhapatsa o ba neng ba o mo pega diura pele ga foo kwa tshekong ya ga Jesu fa pele ga Sanehederine. “Re na le molaō,” ba bolela jalo, “me kaha molaoñ ouō, o chwanetse go shwa, ka go bo a itihile Morwa Modimo.”

Molato o ba o mo pegang ono o mosha mo ditsebeng tsa ga Pilatwe, mme o mo dira gore a boife thata. Jaanong o lemoga gore Jesu ga se motho fela, fela jaaka toro ya mosadi wa gagwe le nonofo e e gakgamatsang le botho jwa ga Jesu di supa. Mme a ke “Morwa Modimo”? Pilatwe o itse fa Jesu a tswa kwa Galilea. Lefa go le jalo a a ka tswa a kile a tshela pele? Fa a boela le ene kwa ntlong ya gagwe ya segosi gape, Pilatwe o mmotsa jaana: “U cwa kae?”

Jesu o didimala fela. O ne a setse a boleletse Pilatwe pele gore ke kgosi, mme gore Bogosi jwa gagwe e ne e se karolo ya lefatshe leno. Jaanong tlhaloso epe e nngwe gape ga e kake ya thusa ka sepe. Lefa go ntse jalo, Pilatwe jaanong o ikutlwa a nyaditswe fa a gana go mo araba, mme o shakgalela Jesu ka mafoko ano: “A ga u bue le nna? A ga u itse ha ke na le thata ea go gu golola, ke bile ke na le thata ea go gu bapola?”

“U ka bo u sena thata epè mo go nna, ha u nu u sa e nèwa e cwa kwa godimo,” Jesu o araba jalo ka tlotlo. O lebisitse go bolaodi jo Modimo o bo nayang babusi ba batho gore ba bo dirise mo lefatsheng. Jesu o oketsa jaana: “Ke gōna eo o ntsentseñ mo seatleñ sa gago o na le boleo yo bogolo.” Eleruri, moperesiti yo mogolo Kaiafase le ditsala tsa gagwe mmogo le Judase Isekariota botlhe ba na le boikarabelo jo bogolo go feta Pilatwe jwa go tshwara Jesu ka tsela e e sa siamang.

Pilatwe o leka sesha gape go golola Jesu gonne a mo kgatlhile le go feta pele ebile a boifa gore a ka tswa a tswa kwa Modimong. Lefa go ntse jalo, Bajuda ba kgala Pilatwe. Ba boeletsa tatofatso ya bone ya sepolotiki, ba tshosetsa jaana ka maano a bonokwane: “Ha u golola monna eo, ga u tsala ea ga Kaesare: moñwe le moñwe eo o itihañ kgosi o tlhabana le Kaesare.”

Lemororo seo ba se buang se kaya sengwe se se masisi, Pilatwe o ntshetsa Jesu kwa ntle gape. “Bōnañ Kgosi ea lona!” o ikuela gape mo go bone.

“A a eè koñ, a a eè koñ, mmapolè!”

“A ke tla bapola Kgosi ea lona?” Pilatwe o ba botsa jalo a tlaletswe.

Bajuda ba ne ba goga bokete tota mo pusong ya Baroma. Eleruri, ba ne ba nyatsa puso ya Roma fela thata! Lefa go le jalo, baperesiti ba bagolo ba bua ka boitimokanyo ba re: “Ga re na kgosi epè ha e se Kaesare.”

Ka a ne a boifa go latlhegelwa ke maemo a gagwe a sepolotiki le go senyega leina, Pilatwe kgabagare o ineela mo go seo Bajuda ba se batlang ba sa boe ka morago. O ba naya Jesu. Masole a apola Jesu seaparo se se bohibidu jo bo mokgona ba bo ba mo apesa kobo ya gagwe ya kafa ntle. Fa Jesu a tsewa jalo go ya go bapolwa, o rwadisiwa kota eo a yang go bogisediwa mo go yone.

Jaanong ke fa gare ga moso wa Labotlhano, ka Nisane 14; gongwe ebile go setse go ela motshegareng o mogolo. Jesu ga a ise a ko a robale fa e sale Labone mo mosong, mme ga go a nna le nako eo a neng a sa boge botlhoko mo go yone. Ka mo go tlhaloganyesegang, o felelwa ke nonofo fa a ntse a sikere kota e e bokete eo. Ka jalo, mofetiwatsela mongwe, motho mongwe yo o bidiwang Simone wa Kurene e e mo Afrika, o gatelelwa gore a e mo sikarele. Fa ba ntse ba tsamaya, batho ba bantsi ba mo sala morago, go akaretsa le basadi ba ba tsamayang ba itshwere mahuma ka go hutsafalela le go lelela Jesu.

Fa a retologela mo basading bao, Jesu o bolela jaana: “Bomorwadia Yerusalema, Se nteleleñ, me lo itelèlè, lo bo lo lelèlè bana ba lona. Gonne, bōnañ, metlha ee tla, e ba tla buañ mo go eōna, ba re, Go segō meopa, le dibopèlō tse di eseñ di ke di belege, le mabèlè a a e señ a ke a amuse. Gonne ha ba diha dilō tse mo setlhariñ se se tala, go tla dihwa eñ mo go se se omeletseñ?”

Jesu fano o bua ka setlhare sa morafe wa Bajuda, seo se santseng se na le bokgolanyana jwa botshelo mo go sone gonne Jesu le masalela a a dumelang mo go ene ba santse ba le gone. Mme fa bano ba ntshiwa mo morafeng oo, go sala fela setlhare se se suleng semoyeng, ee, tsamaiso e e suleng ya morafe. Abo go tla baka selelo jang ne fa masole a Baroma, ao a dirang jaaka babolai ba Modimo a tla go nyeleletsa ruri morafe wa Bajuda! Yohane 19:6-17; 18:31; Luke 23:24-31; Mathaio 27:31, 32; Mareko 15:20, 21.

▪ Baeteledipele ba bodumedi ba latofatsa Jesu ka eng fa tatofatso ya bone ya sepolotiki e sa nne le matswela?

▪ Ke ka ntlha yang fa Pilatwe a boifa?

▪ Ke mang yo o nang le boleo jo bogolwane ka seo se diragalelang Jesu?

▪ Baperesiti ba dira jang gore Pilatwe a ba neye Jesu gore ba mmolaye?

▪ Jesu o raya basadi ba ba mo lelelang a reng, mme o kaya eng fa a bua ka setlhare “se se tala” se morago se tla ‘omelelang’?