Go Rotloetsa ka Tsela e e Molemo

BAGOLWANE ba Bakeresete ba tshwanetse go kgona go “rotloetsa ka thuto e e itekanetseng.” (Tito 1:9) Ka dinako tse dingwe, seno se tshwanetse go dirwa kafa tlase ga maemo a a boima. Go botlhokwa go neela kgakololo e e tsamaisanang le Dikwalo. Ka gone, bagolwane ba tshwanetse go tsaya tsia kgakololo e e reng: “Tswelela o dira ka bojotlhe . . . mo go rotloetseng.” (1 Tim. 4:13) Le mororo motlotlo wa rona fano o lebisitswe segolobogolo mo bagolwaneng kgotsa mo go ba ba lekang go tshwanelegela tshiamelo eo, ka dinako tse dingwe batsadi ba tshwanetse go rotloetsa bana ba bone mme ba ba tshwarang dithuto tsa Baebele ba tshwanetse go rotloetsa ba ba ithutang Baebele le bone. Mo mabakeng a a tshwanang le ao, go ka dirisiwa melaometheo e e tshwanang.

Maemo a a Batlang Gore Motho a Rotloediwe. Go sekaseka maemo mangwe a a begilweng mo Baebeleng a batho ba neng ba rotloediwa mo go one go ka thusa go bona gore ke leng o ka rotloetsang motho. Moaposetoloi Petere o ne a rotloetsa bagolwane gore ba ele tlhoko boikarabelo jwa bone jaaka badisa ba letsomane la Modimo. (1 Pet. 5:1, 2) Paulo o ne a gakolola Tito gore a rotloetse makawana go “nna a itekanetse sentle mo mogopolong.” (Tito 2:6) Paulo o ne a kgothatsa Bakeresete ka ene gore ba “bue ka tumalano” le gore ba se ka ba tsalana le ba ba neng ba leka go baka dikgaogano mo gare ba bakaulengwe. (1 Bakor. 1:10; Bar. 16:17; Bafil. 4:2) Le mororo Paulo a ne a akgolela maloko a phuthego ya Thesalonika dilo tse di molemo tse ba neng ba di dira, o ne a ba rotloetsa gore ba dirise thuto e ba neng ba e rutilwe ka botlalo. (1 Bathes. 4:1, 10) Petere o ne a kgothatsa Bakeresete ka ene gore ba “nne [ba] ithibe mo dikeletsong tsa senama.” (1 Pet. 2:11) Jude o ne a rotloetsa bakaulengwe ba gagwe gore ba ‘lwe ka thata ba lwela tumelo’ ka gonne go ne go na le tlhotlheletso ya batho ba ba bosula ba ba neng ba na le boitshwaro jo bo repileng. (Jude 3, 4) Bakeresete botlhe ba ne ba kgothalediwa gore ba rotloetsane gore go se ka ga nna le ope wa bone yo o tla kgwaraladiwang ke maatla a boleo. (Baheb. 3:13) Petere o ne a rotloetsa Bajuda ba ba neng ba ise ba dumele mo go Keresete a re: “Bolokwang mo kokomaneng eno e e kgopameng.”—Dit. 2:40.

Go tlhokega dinonofo dife gore motho a kgone go kgothatsa mo maemong a a ntseng jalo? Yo o rotloetsang a ka dira jang gore tsela e a rotloetsang ba bangwe ka yone e itshupe e ba solegela molemo mme a sa ba gatelele e bile a se setlhogo mo go bone?

“Ka Lorato.” Fa re sa rotloetse ba bangwe “ka lorato,” re ka nna ra utlwala re le makgwakgwa. (File. 9) Ke boammaaruri gore fa go tlhokega gore go tsewe kgato ka bonako, tsela e sebui se neelang puo ka yone e tshwanetse go bontsha gore boemo bo potlakile. Go bua ka mokgwa o o bonolo thata go ka nna ga utlwala jaaka e kete kgang ga e masisi go le kalo. Le fa go ntse jalo, kgothatso eo e tshwanetse go dirwa ka tlhoafalo e bile e bontsha gore o amegile. Go ka direga thata gore fa o kgothatsa bareetsi ka lorato ba tla tlhotlheletsega go tsaya kgato. Fa Paulo a ne a bua ka se ene le batho ba a neng a tsamaya le bone ba neng ba se dira, o ne a bolelela Bathesalonika jaana: “Jaaka rrabana a dira mo baneng ba gagwe, lo itse sentle kafa re neng ra nna ra rotloetsa mongwe le mongwe wa lona ka gone.” (1 Bathes. 2:11) Balebedi bao ba Bakeresete ba ne ba kgothatsa bakaulengwe ka lorato. Go tshwanetse ga utlwala mo tseleng e o buang ka yone gore o amegile tota ka bareetsi ba gago.

Bua ka botlhale. O se ka wa rumola ba o lekang go ba tlhotlheletsa go tsaya kgato. Le fa go ntse jalo, o se ka wa tshaba go bolelela bareetsi ba gago “boikaelelo jotlhe jwa Modimo.” (Dit. 20:27) Ba ba anaanelang ga ba kitla ba kgopisega kgotsa ba go tlhoela gore o ba kgothaditse ka bopelonomi gore ba dire se se siameng.—Pes. 141:5.

Gantsi go molemo gore pele ga o rotloetsa motho o mo akgolele sengwe se se rileng ka bopeloephepa. Akanya ka dilo tse di molemo tse bakaulengwe ba gago ba di dirang—dilo tse di tshwanetseng tsa bo di itumedisa Jehofa thata: tumelo e ba e bontshang mo go se ba se dirang, lorato lo lo ba tlhotlheletsang go iteka ka natla, boitshoko jwa bone fa ba lebane le maemo a a lekang. (1 Bathes. 1:2-8; 2 Bathes. 1:3-5) Seno se tla thusa bakaulengwe ba gago gore ba ikutlwe ba anaanelwa e bile ba tlhaloganngwa, e bile se tla dira gore ba amogele kgothatso e ba tla e newang.

“Ka Bopelotelele Jotlhe.” Batho ba tshwanetse go rotloediwa ka “bopelotelele jotlhe.” (2 Tim. 4:2) Seno se akaretsa eng? Bopelotelele bo kopanyeletsa go itshokela phoso kgotsa go itshokela go kgopisiwa ka lobaka lo loleele. Motho yo o pelotelele o nna a na le tsholofelo ya gore bareetsi ba gagwe ba tla dirisa se a se buang. Fa o rotloetsa bareetsi ba gago ka tsela eno go tla dira gore ba se ka ba akanya gore o ba tlhobogile. Fa o na le tshepo ya gore bakaulengwe le bokgaitsadi ba gago ba batla go dira sotlhe se ba ka se kgonang go direla Jehofa, seno se tla dira gore ba batle go dira se se siameng.—Baheb. 6:9.

“Ka Thuto e e Itekanetseng.” Mogolwane a ka ‘rotloetsa jang ka thuto e e itekanetseng’? Ka go ‘tshwarelela ka nitamo mo lefokong le le ikanyegang malebana le botswerere jwa gagwe jwa go ruta.’ (Tito 1:9) Go na le gore o bue dilo ka tsela e wena o di bonang ka yone, kgothatsa o dirisa Lefoko la Modimo. Dira gore Baebele e nne yone e go kaelang se o tshwanetseng go se bua. Tlhalosa melemo ya go dirisa se Baebele e se buang mo kgannyeng e o tlotlang ka yone. Nna o akantse ka ditlamorago—tsa gone jaanong le tsa mo isagweng—tsa go sa dire dilo tumalanong le Lefoko la Modimo, mme o di dirise go bontsha bareetsi ba gago kafa go leng botlhokwa ka teng go tsaya kgato e e tshwanetseng.

Tlhomamisa gore o tlhalosetsa bareetsi ba gago sentle gore ke eng se ba tshwanetseng go se dira le kafa ba ka se dirang ka teng. Dira gore go utlwale sentle gore tsela e o tlhalosang dilo ka yone e theilwe ka botlalo mo Dikwalong. Fa e le gore Dikwalo di naya motho kgololesego ya go itirela tshwetso malebana le kgang nngwe, tlhalosa gore o ka gololesega go ya bokgakaleng bofe go dira jalo. Morago ga moo, fa o konela, feleletsa ka go kgothatsa bareetsi ba gago ka tsela e e tla dirang gore ba ikemisetse go tsaya kgato.

Ka ‘Kgololesego ya go Bua.’ Gore motho a kgone go rotloetsa ba bangwe ka tsela e e nang le matswela, o tshwanetse go nna le ‘kgololesego ya go bua mo tumelong.’ (1 Tim. 3:13) Ke eng se se dirang gore motho a kgone go bua a gololesegile? Ke go bo ‘sekao sa gagwe sa ditiro tse di molemo’ se dumalana le se a kgothaletsang bakaulengwe ba gagwe go se dira. (Tito 2:6, 7; 1 Pet. 5:3) Fa a tlhoma sekao se se ntseng jalo, ba ba kgothadiwang gore ba tseye kgato ba tla lemoga gore yo o ba rotloetsang ga a lebelela gore ba dire se ene a sa se direng. Ba tla lemoga gore ba tshwanetse go etsa tumelo ya gagwe fela jaaka le ene a leka go etsa Keresete.—1 Bakor. 11:1; Bafil. 3:17.

Go rotloetsa o dirisa Lefoko la Modimo e bile e le ka lorato, go ka nna le matswela a a molemo thata. Ba ba neilweng maikarabelo a go rotloetsa jalo ba tshwanetse go leka go go dira ka tsela e e molemo.—Bar. 12:8.