“Tswelela o Ntshale Morago”

1-3. (a) Jesu o ile a kgaogana jang le baaposetoloi ba gagwe, mme ke eng fa e ne e se go laelana ka bohutsana? (b) Ke eng fa re tshwanetse go ithuta ka botshelo jo Jesu a ntseng a bo tshela fa e sa le a boetse kwa legodimong?

BANNA ba le lesome le bongwe ba eme mmogo mo thabeng. Ka lorato le kanaanelo e kgolo ba lebile monna wa bolesome le bobedi. O lebega a na le mmele wa batho mme totatota ke Jesu yo o tsositsweng, a setse a le morwa yo o maatla go gaisa botlhe mo barweng ba ga Jehofa ba semoya. Jesu o phuthile baaposetoloi ba gagwe gore a kopane le bone fano mo Thabeng ya Lotlhware ka lekgetlo la bofelo.

² Thaba eno, e e leng karolo ya mogolagang wa dithaba tsa kalaka o o ralalang Mokgatšha wa Kiderona go tswa Jerusalema, ruri e tshwanetse go bo e ne e gopotsa Jesu dilo di le dintsi. Mo mokgokoloseng wa thaba eno go larile motse wa Bethani, koo Jesu a neng a tsosa Lasaro teng. Dibeke di se kae fela tse di fetileng, Jesu o ne a tsena jaaka mofenyi kwa Jerusalema a tswa mo motseng o o fa gaufi wa Bethefage. Gape go ka direga gore tshimo ya Gethesemane e ne e le mo Thabeng ya Lotlhware, koo Jesu a neng a fetsa diura tsa gagwe tsa bofelo tse di ngomolang pelo teng pele ga a tshwarwa. Jaanong mo go yone thaba eno, Jesu o ipaakanyetsa go kgaogana le ditsala tsa gagwe le balatedi ba gagwe ba a ba ratang thata. O bua le bone mafoko a bofelo a bopelonomi. Go tswa foo o simolola go tlhatloga a tswa mo lefatsheng! Baaposetoloi ba sala ba eme fela ba sa tshikinyege, ba tlhomile Mong wa bone yo o rategang matlho jaaka fa a tlhatlogela kwa loaping. Kwa bofelong, leru le ba sira mo ba sa tlholeng ba kgona go mmona.—Ditiro 1:6-12.

³ A o akanya gore tiragalo eno ke e e tlogelang batho ba itumetse gape ba utlwile botlhoko, ba laelana ka bohutsana? Ga go a nna jalo. Tota e bile, jaaka fa baengele ba babedi jaanong ba gopotsa baaposetoloi, kgang ya ga Jesu ga e ise e fele. (Ditiro 1:10, 11) Go kgaogana ga gagwe le bone a ya kwa legodimong ke tshimologo fela ka ditsela di le dintsi. Lefoko la Modimo ga le a re tlogela fela re le mo lefifing malebana le se se neng sa direga ka Jesu morago ga foo. Go botlhokwa gore re ithute ka botshelo jo Jesu a ileng a bo tshela fa e sa le a tswa mo lefatsheng. Ka ntlha yang? Gopola mafoko ano a Jesu a neng a a bua le Petere: “Tswelela o ntshale morago.” (Johane 21:19, 22) Rotlhe re tshwanetse go ikobela taelo eo, e seng go e ikobela fela ka nakwana, go na le moo, go e ikobela botshelo jotlhe jwa rona. Gore re kgone go dira jalo, re tshwanetse go tlhaloganya se Mong wa rona a se dirang gone jaanong le dikabelo tse a abetsweng tsone kwa legodimong.

 4. Baebele e ile ya senola jang go sa le pele se se neng se tla direga kwa legodimong morago ga gore Jesu a boele teng?

⁴ Dikwalo ga di re bolelele gore Jesu o ile a fitlha a amogelwa jang le gore Rraagwe o ile a mo itumelela jang fa ba boa ba kopana gape kwa legodimong. Le fa go ntse jalo, Baebele e ile ya senola go sa le pele gore go ne go tla direga eng kwa legodimong ka bonako fela fa Jesu a boela teng. Bajuda ba ne ba na le dingwaga di le makgolo a le 15 ba ntse ba bona tiragalo nngwe e e boitshepo e dirwa ka metlha. Letsatsi le le lengwe mo ngwageng nngwe le nngwe, moperesiti yo mogolo o ne a tsena mo lefelong la Boitshepo jwa Maitshepo la tempele go ya go kgatsha madi a ditlhabelo tsa Letsatsi la Tetlanyo fa pele ga letlole la kgolagano. Mo letsatsing leo, moperesiti yo mogolo o ne a tshwantshetsa Mesia. Jesu o ile a diragatsa bokao jwa boporofeti jwa tiragalo eo gangwe fela le go ya go ile fa a sena go boela kwa legodimong. O ne a tsena mo kgalalelong e kgolo ya ga Jehofa kwa legodimong—lefelo le le boitshepo go gaisa otlhe mo lobopong—mme a fitlha a naya Rraagwe boleng jwa setlhabelo sa gagwe sa thekololo. (Bahebera 9:11, 12, 24) A Jehofa o ile a se amogela?

5, 6. (a) Ke bosupi bofe jo bo bontshang gore Jehofa o ne a amogela setlhabelo sa thekololo sa ga Keresete? (b) Ke bomang ba ba solegelwang molemo ke thekololo mme e ba solegela molemo jang?

⁵ Re bona karabo ka go sekaseka se se neng sa direga malatsi a se kae morago ga gore Jesu a tlhatloge. Palo e nnye ya Bakeresete ba ka nna 120 e ne e kopane kwa Jerusalema kwa phaposing nngwe e e kwa godimo fa ka tshoganyetso go utlwala modumo o e keteng sefefo se segolo o tlala ka lefelo leo. Diteme tse e ke teng molelo di ne tsa bonala fa godimo ga ditlhogo tsa bone, ba ne ba tladiwa ka moya o o boitshepo mme ba simolola go bua ka diteme tse di farologaneng. (Ditiro 2:1-4) Tiragalo eno e ne e tshwantshetsa go tsalwa ga setšhaba se sesha, Iseraele wa semoya, o e neng e le ‘lotso lo losha lo Modimo a lo tlhophileng’ le “boperesiti jwa segosi” go diragatsa thato ya Modimo mo lefatsheng. (1 Petere 2:9) Ga go pelaelo gore, Jehofa Modimo o ne a amogela le go itumelela setlhabelo sa thekololo sa ga Keresete. Go tshololwa goo ga moya o o boitshepo e ne e le mangwe a masego a ntlha a a neng a nna gone ka ntlha ya thekololo.

⁶ Fa e sa le ka nako eo, thekololo ya ga Keresete e ile ya solegela balatedi ba gagwe molemo mo lefatsheng lotlhe. Re solegelwa molemo ke setlhabelo sa ga Keresete, e ka ne re bangwe ba batlodiwa ba “letsomanyane,” ba ba tla busang le ene kwa legodimong, kgotsa re ba “dinku tse dingwe” tse di tla bong di tshela mo lefatsheng mo pusong ya gagwe. (Luke 12:32; Johane 10:16) Ke sone se se dirang gore re kgone go nang le tsholofelo le go itshwarelwa maleo. Fa fela re tswelela pele go ‘dumela’ mo thekololong eo, re latela Jesu letsatsi le letsatsi, re ka itumelela go nna le segakolodi se se phepa le tsholofelo e e tlhomameng ya isagwe e e itumedisang.—Johane 3:16.

 7. Jesu o ile a newa taolo efe fa a sena go boela kwa legodimong, mme o ka mo ema nokeng jang?

⁷ Jesu o ntse a dira eng kwa legodimong fa e sa le a boela teng? O na le taolo e e seng kana ka sepe. (Mathaio 28:18) Ee, Jehofa o mo tlhomile go busa phuthego ya Bokeresete, kabelo e a ntseng a e dira ka lorato le ka tshiamo. (Bakolosa 1:13) Jaaka fa go boleletswe pele, Jesu o tlhomile banna ba ba nang le maikarabelo go tlhokomela dilo tse letsomane la gagwe le di tlhokang. (Baefeso 4:8) Ka sekai, o ne a tlhopha Paulo go nna “moaposetoloi mo ditšhabeng,” a mo romela go anamisetsa dikgang tse di molemo kwa mafelong a a gaufi le a a kwa kgakala. (Baroma 11:13; 1 Timotheo 2:7) Fa lekgolo la ntlha la dingwaga le tloga le fela, Jesu o ile a romelela diphuthego tse supa tsa porofense ya Asia kwa Roma melaetsa ya go di akgola, go di gakolola le go di kgalemela. (Tshenolo, kgaolo 2-3) A o tsaya Jesu e le Tlhogo ya phuthego ya Bokeresete? (Baefeso 5:23) Gore o tswelele pele o mo latela, o tshwanetse go thusa gore go nne le moya wa boikobo le wa tirisanommogo mo phuthegong ya gaeno.

8, 9. Jesu o ne a newa taolo efe ka 1914, mme seo se tshwanetse go ama jang ditshwetso tse re di dirang?

⁸ Jesu o ne a newa taolo e nngwe gape ka 1914. Ka ngwaga oo, o ne a tlhomiwa go nna Kgosi ya Bogosi jwa ga Jehofa jwa Bomesia. Fa Jesu a simolola go busa, go ne “ga tsoga ntwa kwa legodimong.” Go ne ga felela ka eng? Satane le badimona ba gagwe ba ne ba piriganyediwa mo lefatsheng, mme seo se ne sa simolola motlha wa masetlapelo. Dintwa tse dintsintsi, bokebekwa, borukhutlhi, malwetse, dithoromo tsa lefatshe le ditlala tse di farafereng batho gompieno, di re gopotsa gore gone jaanong Jesu o a busa kwa legodimong. Satane e sa ntse e le ene “mmusi wa lefatshe leno” ka “lobaka lo lokhutshwane lwa nako.” (Tshenolo 12:7-12; Johane 12:31; Mathaio 24:3-7; Luke 21:11) Le fa go ntse jalo, Jesu o abela batho mo lefatsheng lotlhe tshono ya go amogela bolaodi jwa gagwe.

⁹ Go botlhokwa gore re bontshe gore re ema Kgosi eno ya Bomesia nokeng. Mo ditshwetsong tsotlhe tse re di dirang, re tshwanetse go batla go amogelwa ke eme, e seng ke lefatshe leno le le senyegileng. Fa “Kgosi ya dikgosi le Morena wa barena” a ntse a sekaseka batho, pelo ya gagwe e e siameng e tuka bogale e bile e phophoma ka boipelo. (Tshenolo 19:16) Ka ntlha yang?

10. Ka metlha Jesu ke motho yo o ntseng jang, le fa go ntse jalo, ke eng se se dirang gore Mong wa rona a nne le lebaka la go galefa?

¹⁰ Mong wa rona ke motho yo o itumetseng ka metlha fela jaaka Rraagwe. (1 Timotheo 1:11) Fa Jesu a ne a le mo lefatsheng e ne e se motho yo o ratang go tshwayatshwaya diphoso le yo o sa kgotsofaleng. Le fa go ntse jalo, go na le dilo di le dintsi tse di diregang mo lefatsheng tse di tshwanetseng tsa bo di dira gore a nne le lebaka la go galefa. Ruri o galefisiwa ke mekgatlho yotlhe ya bodumedi e e buang maaka a gore ke baemedi ba gagwe. O ile a bolelela pele jaana: “Ga se mongwe le mongwe yo o nthayang a re, ‘Morena, Morena,’ yo o tla tsenang mo bogosing jwa magodimo, mme yo o dirang thato ya ga Rre yo o kwa magodimong o tla tsena. Ba le bantsi ba tla nthaya mo letsatsing leo ba re, ‘Morena, Morena, a re ne ra se ka ra . . . dira ditiro di le dintsi tse di maatla ka leina la gago?’ Mme le fa go ntse jalo foo ke tla ba bolelela ke re: Ga ke ise nke ke lo itse! Tlogang fa go nna, lona ba lo dirang ka go tlhoka molao.”—Mathaio 7:21-23.

11-13. Ke eng fa batho bangwe ba ka gakgamadiwa ke mafoko a a bogale a Jesu a a buang le batho ba ba dirang “ditiro di le dintsi tse di maatla” ka leina la gagwe, mme gone ke eng fa a ba galefela? Tshwantsha.

¹¹ Batho ba le bantsi gompieno ba ba ipitsang Bakeresete ba ka nna ba gakgamadiwa ke mafoko ao. Ke eng fa Jesu a ka bua mafoko a a bogale jalo le batho ba ba ntseng ba dira “ditiro di le dintsi tse di maatla” ka leina la gagwe? Dikereke tsa madumedi a a ipitsang gore ke a Bokeresete di ntse di tshegetsa mekgatlho ya tlhokomelo ya setšhaba ka madi, di thusa bahumanegi, di aga dikokelo le dikolo le go dira ditiro tse dingwe tse dintsintsi. Gore o tle o bone gore ke eng fa go tshwanela gore Jesu a di galefele, akanya ka sekai seno.

¹² Rre le mmè ba tshwanelwa ke go tsaya loeto. Ga ba kgone go tsamaya le bana ba bone, ka jalo ba hira mongwe go ba salela le bone. Ba naya motho yono ditaelo tseno tse di motlhofo: “Re salele le bana. O ba fepe, o ba tlhapise mme o ele tlhoko gore ga ba tlhagelwe ke kotsi epe.” Le fa go ntse jalo, fa batsadi ba boa, ba garolwa pelo ke go fitlhela bana ba bone ba bolailwe ke tlala. Ba leswe, ba a lwala e bile ba tlhomola pelo. Ba lelela motlhokomedi yono wa bone gore a ba thuse mme ga a na sepe le bone. Ka ntlha yang? Ka gonne o palame llere, o tlhatswa difensetere. Batsadi ba galefile mme ba batla gore a ba tlhalosetse lebaka la go dira jalo. O araba jaana: “Bonang fela gore ke lo diretse eng! A ga ke a phepafatsa difensetere tsa lona? Ke lo baakanyeditse le dilo tse di neng di senyegile mo ntlong!” A seo se ka dira gore batsadi ba ikutlwe botoka? Legoka! Ga baa mo kopa go dira ditiro tseo; se ba neng ba se batla fela e ne e le gore a ba tlhokomelele bana. Ba tla galefisiwa ke go bo a sa dira dilo go ya kafa ba mo laetseng ka gone.

¹³ Madumedi a a ipitsang gore ke a Bokeresete a itshwere fela jaaka motho yono yo o kopilweng gore a tlhokomele bana. Jesu o laetse baemedi ba gagwe gore ba fepe batho semoyeng ka go ba ruta boammaaruri jwa Lefoko la Modimo le go ba thusa go nna phepa semoyeng. (Johane 21:15-17) Le fa go ntse jalo, madumedi ano a a ipitsang a Bokeresete a paletswe gotlhelele ke go ikobela taelo ya gagwe. A tlogetse batho ba bolawa ke tlala ya semoya, ba tlhakanngwa tlhogo ke maaka e bile ba sa itse dithuto tsa motheo tsa boammaaruri jwa Baebele. (Isaia 65:13; Amose 8:11) Tota le maiteko a madumedi ano a a dirileng go tokafatsa lefatshe leno ga a phimole molato o a nang le one wa go tlola ditaelo ka boomo. Kana e bile, tsamaiso eno ya dilo e tshwana le ntlo e e tlogang e thujwa! Lefoko la Modimo le tlhalosa sentle gore tsamaiso ya lefatshe ya ga Satane e tla tloga e senngwa.—1 Johane 2:15-17.

14. Gompieno ke tiro efe e e itumedisang Jesu, mme ka ntlha yang?

¹⁴ Kafa letlhakoreng le lengwe, Jesu o tshwanetse a bo a itumela thata fa a leba a le kwa legodimong mme a bona dimilione tsa batho di diragatsa taelo ya go dira batho barutwa, e a e neileng balatedi ba gagwe pele ga a tswa mo lefatsheng. (Mathaio 28:19, 20) A bo e le tshiamelo e kgolo jang ne go itumedisa Kgosi ya Bomesia! A re ititeyeng sehuba gore le ka motlha re se tlogele go thusa “motlhanka yo o boikanyego le yo o botlhale.” (Mathaio 24:45) Go farologana le baruti ba madumedi a a ipitsang gore ke a Bokeresete, setlhopha seno sa Bakeresete ba ba tloditsweng se ntse se bontsha go nna kutlo ka go etelela pele tiro ya go rera le go fepa dinku tsa ga Keresete ka boikanyegi.

15, 16. (a) Jesu o ikutlwa jang ka go tlhoka lorato go go anameng thata jaana gompieno, mme re itse seo jang? (b) Madumedi a a ipitsang gore ke a Bokeresete a dirile eng se se dirang gore Jesu a a galefele?

¹⁵ Re ka tlhomamisega gore Kgosi eno e galefisiwa ke go bona go tlhoka lorato go go anameng mo lefatsheng gompieno. Re ka nna ra gakologelwa kafa Bafarasai ba ileng ba pega Jesu molato ka teng fa a ne a fodisa batho ka Sabata. Ba ne ba le peloethata jaana e bile ba le tlhogoethata mo ba neng ba sirilwe ditlhaloganyo ke tsela ya bone e e sokameng ya go tlhalosa Molao wa ga Moshe le molao o o sa kwalwang. Dikgakgamatso tsa ga Jesu di ne di tlisetsa batho melemo e le mentsi! Le fa go ntse jalo, boipelo, go imologa le go nonotshiwa tumelo go dikgakgamatso tseo di neng di go leretse batho, go ne go sa reye sepe mo banneng bao. Jesu o ne a ikutlwa jang ka bone? Nako nngwe o ne a “lebaleba mo tikologong kwa go bone ka kgakalo, a hutsafaditswe thatathata ke go kgwaralala ga dipelo tsa bone.”—Mareko 3:5.

¹⁶ Gompieno, Jesu o bona dilo di le dintsi go feta pele tse di mo dirang gore a ikutlwe a ‘hutsafetse thata.’ Baeteledipele ba madumedi a a ipitsang gore ke a Bokeresete ba foufadiwa ke go ineela ga bone mo dingwaong le mo dithutong tse di sa dumalaneng le Dikwalo. Mo godimo ga moo, ba galefisiwa ke go rerwa ga dikgang tse di molemo tsa Bogosi jwa Modimo. Mo dikarolong di le dintsi tsa lefatshe, baruti ba tlhotlheleditse go bogisiwa setlhogo ga Bakeresete ba ba lekang ka bopeloephepa go rera molaetsa o Jesu a neng a o rera. (Johane 16:2; Tshenolo 18:4, 24) Mme gape, gantsi baruti bano ba kgothaletsa balatedi ba bone go ya ntweng le go bolaya batho ba bangwe—jaaka e kete go dira jalo go tla itumedisa Jesu Keresete!

17. Balatedi ba boammaaruri ba ga Jesu ba ipedisa pelo ya gagwe jang?

¹⁷ Go farologana le seo, balatedi ba boammaaruri ba ga Jesu ba leka go bontsha gore ba rata batho ba bangwe. Ba rerela “batho ba mefuta yotlhe” dikgang tse di molemo fela jaaka Jesu a dirile, go sa kgathalesege dipogiso. (1 Timotheo 2:4) Mme lorato lo bone ka bobone ba ratanang ka lone lo a gakgamatsa; ke lone lotshwao lo logolo lo lo ba tlhaolang. (Johane 13:34, 35) Ba itshupa e le balatedi ba boammaaruri ba ga Jesu ka go tshwara Bakeresete ka bone ka lorato, ka tlotlo le ka seriti—mme ka go dira jalo ba ipedisa pelo ya Kgosi ya Bomesia!

18. Ke eng se se utlwisang Mong wa rona botlhoko, mme rona re ka dira eng go mo itumedisa?

¹⁸ A re se lebale le gore Mong wa rona o utlwa botlhoko thata fa balatedi ba gagwe ba palelwa ke go itshoka, ba letla gore lorato lo ba ratang Jehofa ka lone lo tsidifale ba bo ba tlogela go tlhola e nna batlhanka ba gagwe. (Tshenolo 2:4, 5) Le fa go ntse jalo, Jesu o itumedisiwa ke ba ba itshokang go ya bokhutlong. (Mathaio 24:13) Ka gone, a re lekeng ka natla gore ka metlha re nne re gopotse taelo eno ya ga Keresete: “Tswelela o ntshale morago.” (Johane 21:19) A re sekasekeng mangwe a masego a Kgosi ya Bomesia e tla a abelang batho ba ba itshokang go fitlha kwa bokhutlong.

19, 20. (a) Go latela Jesu go leretse motho masego afe gone jaanong? (b) Go latela Keresete go ka re thusa jang go kaba phatla e re nang le yone ya go tlhoka rre?

¹⁹ Go nna molatedi wa ga Jesu ke tsela e e ka re thusang go nna le botshelo jo bo itumedisang thata gone jaanong. Fa re dumela gore Keresete a nne Mong wa rona, re latela kaelo ya gagwe le go dirisa sekai sa gagwe go re kaela, re tla bona letlotlo le legolo le batho mo lefatsheng lotlhe ba nang le go batlana le lone mme ba se ke ba le bona. Re tla nna le tiro e e dirang gore botshelo jwa rona e nne jo bo nang le maikalelo, re tla nna lelapa le le lengwe le badumedi ka rona le le dirwang seoposengwe ke kamano ya lorato lwa boammaaruri, re tla nna le segakolodi se se phepa le go ritibala mo maikutlong. Ka bokhutshwane re ka re, re tla kgona go nna le botshelo jo bo itumedisang le jo bo kgotsofatsang. Mme gape re tla bona melemo e mengwe e mentsi.

²⁰ Jehofa o re abetse Jesu go nna “Rara wa Bosakhutleng” wa batho ba ba nang le tsholofelo ya go tshelela ruri mo lefatsheng. Jesu o tsaya maemo a rre wa ntlha wa batho e bong Adame, yo o neng a swabisa bana botlhe ba gagwe ka tsela e e setlhogo. (Isaia 9:6, 7) Fa re amogela gore Jesu ke ‘Rara wa rona wa Bosakhutleng’ e bile re bontsha go dumela mo go ene, re tla nna le tsholofelo e e tlhomameng ya go bona botshelo jo bo sa khutleng. Mo godimo ga moo, seo se dira gore re atamalane thata le Jehofa Modimo. Jaaka fa re ithutile, go lwela go latela sekao sa ga Jesu letsatsi le letsatsi ke tsela e e molemo go gaisa tsotlhe e re bontshang ka yone gore re ikobela taelo eno ya Modimo: “Nnang baetsi ba Modimo, jaaka bana ba ba rategang.”—Baefeso 5:1.

21. Balatedi ba ga Keresete ba phatsimisa lesedi jang mo lefatsheng leno le le lefifi?

²¹ Fa re ntse re etsa Jesu le Rraagwe, Jehofa, re nna le tshiamelo e e molemolemo. Re bonatsha lesedi le le galalelang. Mo lefatsheng leno le le aparetsweng ke lefifi, le mo go lone dibilione tsa batho di tsieditsweng ke Satane e bile di etsa mekgwa ya gagwe, rona ba re latelang Keresete re phatsimisa lesedi le le galalelang go gaisa otlhe—lesedi la boammaaruri jwa Dikwalo, lesedi la dinonofo tse di molemo tsa Bokeresete, lesedi la boipelo jwa boammaaruri, kagiso ya boammaaruri le lorato lwa mmatota. Mme gape, re atamalana thata le Jehofa, mme oo ke mokgele o o molemo go gaisa yotlhe e setshedi sepe fela se se botlhale se ka nnang le one.

22, 23. (a) Ke masego afe a mo isagweng a a tla bonwang ke batho ba ba tswelelang pele ba latela Jesu ka boikanyegi? (b) Re tshwanetse go ititaya sehuba go dira eng?

²² A ko o akanye le ka se Jehofa a batlang go go direla sone mo isagweng a dirisa Kgosi ya gagwe ya Bomesia. Go ise go ye kae Kgosi eo e tla lwa ntwa ya tshiamo e lwa le tsamaiso e e boikepo ya dilo ya ga Satane. Ruri Jesu o tla fenya! (Tshenolo 19:11-15) Morago ga moo, Keresete o tla simolola Puso ya gagwe ya Dingwaga Tse di Sekete mo lefatsheng. Puso ya gagwe ya kwa legodimong e tla anamisetsa melemo ya thekololo mo bathong botlhe ba ba ikanyegang, e dira gore batho bao ba itekanele. Akanya fela o na le botsogo jo bontle, o nnetse mosha ruri e bile o nonofile, o itumelela go bereka le lelapa la batho le le seoposengwe go fetola lefatshe leno go nna paradaise! Kwa bofelong jwa Puso eo ya Dingwaga Tse di Sekete, Jesu o tla busetsa bolaodi kwa go Rraagwe. (1 Bakorintha 15:24) Fa o ka tswelela pele o latela Keresete ka boikanyegi, o tla abelwa tshiamelo e kgolo e go leng thata go e akanya—“kgololesego e e galalelang ya bana ba Modimo.” (Baroma 8:21) Ee, re tla nna le masego otlhe a Adame le Efa ba neng ba na le one mme a ile a ba latlhegela. E re ka re tla bo re le barwa le barwadi ba ga Jehofa ba mo lefatsheng, re tla bo re gololesegile gotlhelele mo boleong jwa ga Adame. Ee, “loso lo tla bo lo seyo.”—Tshenolo 21:4.

²³ Gopola mmusi yole yo mmotlana yo o humileng yo re buileng ka ene mo go Kgaolo 1. O ne a gana taletso eno ya ga Jesu: ‘Tla o nne molatedi wa me.’ (Mareko 10:17-22) Le ka motlha o se ka wa dira phoso e e ntseng jalo! E kete o ka amogela taletso eo ya ga Jesu ka boipelo le ka matlhagatlhaga. E kete o ka ititaya sehuba go itshoka, go tswelela pele o latela Modisa yo o Molemo letsatsi le letsatsi, ngwaga le ngwaga, mme o tshele go fitlha kgabagare o bona a diragatsa maikaelelo otlhe a ga Jehofa ka tsela e e molemo!